En Sabato machielo, kendo Yesu dhi e sunagogi ma nyalo bedo ni yudore Galili. Kanyo oyudoe ng’at moro ma lwete oner. (Luka 6:6) Jondiko gi Jo-Farisai ochomo wang’gi kuom Yesu ahinya. Nikech ang’o? Ginyiso gima nie chunygi gadier. Gipenjo kama: “Be chango ng’ato chieng’ Sabato en gima owinjore gi chik?”—Mathayo 12:10.

Jotend din mar Jo-Yahudi paro ni chik oyie mondo ochang ng’ato chieng’ Sabato mana ka ngima ng’atno ni kama rach. Kuom ranyisi, gineno ni chik ok oyie mondo orwa ng’at mowil kata otue bandej ne ng’at motur, nikech ngima ng’atno ok ni kama rach. Kuom mano, nenore maler ni jondiko gi Jo-Farisai ok penj Yesu penjono nikech gidewo ng’at ma lwete onerno. Gitemo mana manyo wach ma ginyalo donjonego.

Kata kamano, Yesu ong’eyo ni gin gi paro ma ok ni kare. Ong’eyo ni gigwenyo gima Ndiko wacho e wi Sabato, kendo ni gin gi paro mokalo tong’ e wi tije ma ka ng’ato otimo to nyalo ketho chik Sabato. (Wuok 20:8-10) Ji osebedo ka kwedo Yesu e yo ma ok kare nikech tije mabeyo motimo. Koro Yesu kawo okang’ moro ma nyalo kelo ywaruok e kinde gi joma kwedego. Owacho ne jal ma lwete onerno niya: “A malo mondo ibi diere kae.”​—Mariko 3:3.

Kae to Yesu wacho ne jondiko gi Jo-Farisai kama: “Ka in gi rombo achiel to rombono olwar e bur chieng’ Sabato, be nitie ng’ato kuomu ma ok bi make kendo gole oko?” (Mathayo 12:11) Rombo en mwandu ma nyalo kelo pesa. Omiyo, jogo ok nyal weyo rombo molwar e bur nyaka kinyne; nimar onyalo tho mi gilal mwandugino. E wi mano, Ndiko wacho niya: “Ng’at makare oparo jambe gibedi mangima.”​—Ngeche 12:10.

Yesu dwaro mondo okonygi ging’e pogruok mantie e kind rombo gi dhano. Openjogi kama: “Donge dhano to oloyo rombo nyading’eny? Omiyo, timo gima ber chieng’ Sabato ok en ketho chik.” (Mathayo 12:12) Kuom mano, Yesu ok bi ketho chik Sabato ka ochango ng’atno. Ranyisi ma Yesu otiyogono winjore maler kendo onge kaka jotend din-go nyalo kwede. Koro giling’ thi.

Bang’ ng’iyogi koni gi koni gi mirima kendo ka en gi lit ahinya nikech chunygi tek, Yesu wacho ne ng’atno niya: “Rie lweti.” (Mathayo 12:13) Ng’atno rieyo lwete monerno, kendo lweteno chango gikanyono. Ng’atno bedo mamor nikech ochange. To nade jogo ma dwaro donjo ne Yesu?

Kar bedo mamor ni ochang lwet ng’atno, Jo-Farisai wuok kanyo kendo gikanyono giriwore e paro ‘gi jolup Herode mondo mi gineg Yesu.’ (Mariko 3:6) Nenore ni jolup Herodego oriwo bende kidieny mar dind Jo-Sadukai. Pile Jo-Sadukai gi Jo-Farisai ok winjrega. Kata kamano, sani koro gibedo e paro achiel mondo gikwed Yesu.