Oganda maduong’ obiro ir Yesu sama en e alwora mar Dekapoli man yo wuok-chieng’ mar Nam Galili. Gibiro mondo giwinje kendo mondo ochanggi. Giting’ore gi okepni madongo dongo ma nigi gik ma ginyalo konyorego.

Kata kamano, bang’e Yesu wacho ne jopuonjrene niya: “Akecho ogandani nimar koro gisebedo koda ka kuom odiechienge adek to gionge gima ginyalo chamo. Kapo ni agonyogi gi kech mondo gidog e miechgi, gibiro podho e ndara, to moko kuomgi oa mabor.” Jopuonjrene wachone kama: “Kae wan kama bor gi kama ji odakie, ere kama ng’ato biro yudoe makate ma yieng’o ogandani?”​—Mariko 8:2-4.

Yesu penjogi niya: “Un gi makate adi?” Jopuonjrene dwoke kama: “Abiriyo kod rech moko manok matindo.” (Mathayo 15:34) Kae to Yesu chiko ni onyis ji mondo gibed piny. Okawo makate gi rech, ogoyo ne Nyasaye erokamano, kae to omiyogi jopuonjrene mondo gipog ne ji. Gima iwuoro en ni jogo duto ochiemo moyieng’. Kata obedo ni chwo ma dirom 4,000 osechiemo, kanyachiel gi mon kod nyithindo, pod ochok ng’injo modong’ ma pong’o okepni abiriyo madongo!

Bang’ ka Yesu osegonyo ogandano, en kaachiel gi jopuonjrene giidho yie mondo gidhi Magadan man loka yo podho-chieng’ mar Nam Galili. Ka gin kuno, Jo-Farisai kaachiel gi kidieny mar dind Jo-Sadukai temo Yesu ka gikwaye ni mondo omigie ranyisi moro moa e polo.

Nikech Yesu ong’eyo dwachgi, odwokogi kama: “Ka odhiambo ochopo, uwacho ni, ‘Kit yamo biro bet maber nimar polo kwarkwar,’ to gokinyi uwacho ni, ‘Piny biro bet mang’ich kendo ni koth biro chue nimar polo kwarkwar kendo odudo.’ Ung’eyo nono kit kor polo, to fwenyo ranyisi mag ndalo to otamou.” (Mathayo 16:2, 3) Kae to Yesu wacho ne Jo-Farisai kod Jo-Sadukai ni onge ranyisi moro amora mibiro migi mak mana ranyisi mar Jona.

Yesu kod jopuonjrene idho yie ka gichomo Bethsaida. Ka gin e yo, jopuonjrene fwenyo ni wigi owil ma ok giting’o makate moromo. Gin mana gi makate achiel kende. Ka pod oparo wach ma oa bedogo gi Jo-Farisai, kod Jo-Sadukai ma gin jolup Herode, Yesu chiwo siem niya: “Yawuru wang’u; tang’uru gi thowi mar Jo-Farisai kod thowi mar Herode.” Jopuonjre paro ni Yesu wuoyo e wi thowi nikech wigi owil ma ok giting’o makate. Yesu ong’eyo ni paro ma gin-gono ok ni kare, omiyo openjogi kama: “Ang’o momiyo ubedo gi mbaka matek nikech uonge makate?”​—Mariko 8:15-17.

Nyocha eka Yesu opidho oganda mang’ongo gi makate. Omiyo, jopuonjrene onego ong’e ni bedo ni ok giting’o makate ok en gima lich ahinya ne Yesu. Yesu penjogi niya: “Ok unyal paro  ni kane ang’ingo makate abich ne chwo 5,000, ne uchoko okepni adi ma ne opong’ gi ng’injo?” Gidwoke kama: “Apar gariyo.” Yesu medo penjogi niya: “Kane ang’ingo makate abiriyoka ne chwo 4,000, ne uchoko okepni adi madongo ma ne opong’ gi ng’injo?” Gidwoke kama: “Abiriyo.”​—Mariko 8:18-20.

Yesu penjogi niya: “Ere kaka ok unyal fwenyo ni ne ok awuo kodu e wi makate?” Omedo wachonegi niya: “Tang’uru gi thowi mar Jo-Farisai gi Jo-Sadukai.”​—Mathayo 16:11.

Gikone, jopuonjre winjo tiend gima owacho. Thowi en gima itiyogo e yienyo mogo modwal kendo miyo makate okuod. Yesu tiyo gi thowi kaka ranyisi mar gima nyalo ketho kata wuondo ng’ato. Osiemo jopuonjrene mondo gitang’ gi “puonj mag Jo-Farisai gi Jo-Sadukai,” nikech puonjgo nyalo kethogi.​—Mathayo 16:12.