Joote 12 osebedo ka yalo maber e Galili duto, kendo giwacho ne Yesu “gik moko duto ma ne gisetimo kendo puonjo.” Onge kiawa ni koro giol. Kata kamano, nikech ji ng’eny ahinya, gionge kata mana thuolo mar chiemo. Omiyo, Yesu wachonegi niya: “Biuru kar kendu kama onge ji mondo uyue matin.”​—Mariko 6:30, 31.

Nenore ni giidho yie machiegni gi Kapernaum, kae to ging’ado Aora Jordan kendo gidhi mi gikal Bethsaida. Kata kamano, nikech ji mang’eny oneno ka giwuok, gimiyo jomamoko bende ng’eyo wachno. Jogo ringo kanyachiel kendo gichopo kuro ka pok yie ogowo.

Ka Yesu wuok e yie, oneno oganda mang’ongo kendo okechogi nimar gichalo kaka rombe ma onge jakwath. Omiyo, ochako “puonjogi gik mang’eny” e wi wach Pinyruoth. (Mariko 6:34) Bende, ochango ‘joma dwarore ni ochang.’ (Luka 9:11) Nikech seche oniang’ ahinya, jopuonjrene wachone kama: “Kae wan mabor gi kama ji odakie, kendo sa koro olewo; nyis oganda oa mondo gidhi e mier kendo ging’iew chiemo ma digicham.”​—Mathayo 14:15.

Yesu dwokogi niya: “Ok ochuno ni gia; un migiuru gima ginyalo chamo.” (Mathayo 14:16) Kata obedo ni Yesu ong’eyo gima odwaro timo, otemo yie mar Filipo kuom penje kama: “Ere kama wabiro ng’iewoe makate ne jogi mondo gicham?” Nenore ni openjo Filipo nikech Filipo wuok Bethsaida, taon man machiegni. Kata kamano, ng’iewo makate pod ok nyal konyo ahinya. Kanyo nitiere chwo 5,000 kama. To ka okwan mon gi nyithindo, to ji duto nyalo romo 10,000 kama! Filipo dwoko Yesu niya: “Makate mag dinari [dinari achiel en misach odiechieng’ achiel] 200 ok nyal romogi ng’ato ka ng’ato kata mana matin.”​—Johana 6:5-7.

Nenore ni Andrea dwaro temo nyiso Yesu kaka pidho jogo en gima ok nyalre chuth. Omiyo, owacho ne Yesu kama: “Eri nitie wuowi moro matin kae ma nigi makate abich mag shairi kod rech ariyo matindo. Kata kamano, be magi dirom ji mang’eny kama?”​—Johana 6:9.

Koro en dwe mar Mach kata April kama ka Pasaka mar higa 32 pok ochopo, kendo lum oloth e bath got kanyo. Yesu wacho ne jopuonjrene mondo ginyis ji obed piny e kidienje mag ji 50 kod mag ji 100. Yesu kawo makate abichgo kod rech ariyogo kendo ogoyo erokamano ne Nyasaye. Kae to ong’injo makatego kendo opogo rech ariyogo ma tindotindo. Yesu miyo jopuonjrene chiemogo mondo gipog ne oganda. En gima iwuoro ni ji duto ochiemo moyieng’!

Bang’e, Yesu wacho ne jopuonjrene niya: “Chokuru ng’injo modong’ kanyachiel, mondo kik gimoro amora kethre.” (Johana 6:12) Ng’injo ma gichokogo pong’o okepni 12!