Dichwo gi dhako mochiwore ne kend margi ok bi neno kendgi kaka kama gibworoe abwora, ma ka weche tek to ginyalo were. Kar mano, ng’ato ka ng’ato kuomgi neno kendgi kaka gima oriwogi ma onge gima nyalo pogogi kata bed ni weche tek manade.

Nitie joma odak adaka gi joma gikendorego mana nikech giluoro gik ma ji biro wacho ka di po ni giketho kendgino. Kata kamano, joma ochiwore ne kend margi siko e kendgino nikech giherore gadier kendo gimiyore luor.

PUONJ MA MUMA CHIWO: “Dichwo ok onego owe chiege.”​—1 Jo-Korintho 7:11.

“Ka ichiwori ne kend maru, iyi ok bi wang’ piyo sama gimoro ochwanyi. Kar mano, ibiro ng’wono ne nyawadu mapiyo kendo in bende ibiro kwayo ng’wono sama ichwanye. Ok ibi neno chandruoge mag kend kaka weche minyalo tiyogo mondo iketh kend maru, to ibiro nenogi mana kaka pek ma ji nyalo romogago kinde ka kinde.”​—Micah.

Sama chandruok oneno e kend, joma ok ochiwore ne kend margi nyalo wacho ni, ‘Ne ok onego wakendre’ kendo ginyalo manyo yore mag wuok e kendno.

“Ji mang’eny donjoga e kend ka gin gi paro moro ni ka weche odhi matek, to giwere chuth. Sama ng’ato odonjo e kend ka en gi paro ma kamano, mano nyiso ni ok ochiwore ne kendno.”​—Jean.

NONRI ANE

Sama uchwanyoru . . .

• Be iywagoga ang’e ni ne ukendoru gi jaodi?

• Be ijaparoga ni ka di ne idonjo e kend gi ng’ama chielo dikoro weche berberie?

• Be iwachoga ni, “Abiro weyi” kata ni, “Abiro dhi manyo ng’at machielo mohera”?

Ka di po ni idwoko achiel kuom penjogo ni ee, kare ma e sama onego itegie chiwruok mari ne kend maru.

WUOURU E WI PENJOGI

• Be di bed ni tinde ok wachiwore ne kend marwa kaka ne watimoga chon? Ka en kamano, ang’o momiyo?

• Ang’o ma wanyalo timo mondo wamed chiwore chuth e kend marwa?

TEM TIMO KAMA

• Kinde ka kinde, ndik ne jaodi weche moko ma nyiso ni ihere

• Inyalo nyiso ni ichiwori ne kend maru kuom keto picha mar jaodi kama itiyoe

• Go ne jaodi simu odiechieng’ kodiechieng’ ka in e tich kata sama uonge kode kamoro achiel

PUONJ MA MUMA CHIWO: “Gima Nyasaye oseriwo, dhano moro amora kik opogi.”​—Mathayo 19:6.