NE ROWERE
9: Ng’eruok Maber
TIEND WACHNO
Ng’eruok maber ok en mana ng’eyo nyingi kod kaka inenori gi oko. Oriwo timbegi, gik miyiego, kod kido ma in-go. Oriwo bende gik miparo e chunyi kod yo ma ji nenigo.
GIMOMIYO EN GIMA DUONG’
Ka ing’eri maber, to ibiro luwo puonj miseng’eyo moloyo luwo kaka mbeseni chiki.
“Thoth ji tinde chal mana gi stachu mirwakonegi lewni kae to ichungo e dho dukni mondo ji one. Stachugo ok yierga lewni mirwakonegi; jomoko e ma yieronegi.”—Adrian.
“Asepuonjora makora gi yiero makare kata sama timo kamano ok yot. Anyalo ng’eyo ni osiepena madier gin jomage ka ang’iyo yo ma gitimonago gik moko kod kaka an bende atimonegi.”—Courtney.
PUONJ MA MUMA CHIWO: “Weuru luwo kit pinyni, to lokreuru kuom miyo pachu obed manyien.”—Jo-Rumi 12:2.
GIMA INYALO TIMO
Onego ing’e ni in ng’at ma chalo nade gie sani, kendo ni diher bedo ng’at machal nade kinde mabiro. Inyalo timo kamano kuom nono gik miberie, kuonde miremie, kaachiel gi gik miyiego. Yo maber mar chako timo kamano en dwoko penjo ma luwogi:
Gik miberie: Gin gik mage ma alonyie? Gin kido mage mabeyo ma an-go? (Kuom ranyisi: Be an ng’ama ong’eyo rito sa? Be an gi kido mar ritruok? Be ajakinda? Be ajachiwo?) Gin gik mage mabeyo ma atimoga?
TEM TIMO KAMA: Be iyudo ka tekni fwenyo kido mabeyo ma in-go? Ka en kamano, kwa janyuolni kata osiepni migeno mondo onyisi gik ming’eyo timo maber kendo onyisi gimomiyo oneno kamano.
PUONJ MA MUMA CHIWO: “Ng’ato ka ng’ato mondo onon timbene owuon, eka dobed gi gima dimi obed mamor, to ok kopimore gi ng’at machielo.”—Jo-Galatia 6:4.
Kuonde miremie: Gin kido mage ma dwarore ni atimie dongruok moloyo? Gin kinde kaka mage ma yotga mondo adonj e tem mar timo gik maricho? Gin seche mage ma dwarore ahinya ni abed gi kido mar ritruok?
PUONJ MA MUMA CHIWO: “Ka wawacho ni, ‘Waonge gi richo,’ wawuondore wawegi.”—1 Johana 1:8.
Gik miyiego: Gin puonj mage ma aluwo, to ang’o momiyo aluwogi? Be ayie kuom Nyasaye? En ang’o momiyo ayie ni Nyasaye nitie? Gin timbe mage ma aneno ka ok ni kare, to ang’o momiyo anenogi kamano? Gin puonj mage ma ayiego e wi gik mabiro timore e kinde mabiro?
PUONJ MA MUMA CHIWO: “Nyalo mar paro biro riti, kendo winjo tiend wach nobedni ka okumba.”—Ngeche 2:11.
Samoro Inyalo Hero Magi Bende
DWOKO MAG PENJO 10 MA ROWERE PENJOREGA
An Ng’at Machal Nade?
Ka ing’eyo kido mabeyo ma in-go, nyalo ma in-go, nyawo ma in-go, kod gik ma ichano timo, mano biro konyi mondo ing’ad paro makare sama jomoko dwaro ni itim gik ma ok owinjore.
