NE JOMA OKENDORE
4: Ng’wono ne Nyawadu
TIEND WACHNO
Ka ing’wono ne nyawadu, ok ibi makone sadha. Mano ok nyis ni koro ne ok ochwanyi kata ni itemo wuondori ni onge gima notimore.
PUONJ MA MUMA CHIWO: “Ng’ato ka ng’ato mondo odhi nyime nano gi nyawadgi, kendo wereuru ketho e kindu gi chuny man thuolo kata ka ng’ato nigi wach moro gi nyawadgi.”—Jo-Kolosai 3:13.
“Ka ihero nyawadu, ok ibi keto pachi kuom nyawo mage, kar mano, ibiro keto pachi kuom kinda motimo mondo olo nyawo ma en-go.”—Aaron.
GIMOMIYO EN GIMA DUONG’
Mako sadha nyalo hinyi, kendo onyalo ketho kend maru.
“Nitie chieng’ moro ma chwora nokwaya ng’wono bang’ chwanya matek. Ne tekna ahinya mondo ang’wonne. Gikone nang’wonone, en mana ni naywago ang’e ni ne ok atimo kamano mapiyo. Mano nomiyo kuom kinde, winjruokwa ne ok obedo maber ahinya, to mano en gima ne inyalo geng’ ka di ne ok adigni ng’wonone.”—Julia.
GIMA INYALO TIMO
NONRI ANE
Chieng’ machielo ka jaodi otimo gimoro kata owacho gimoro mochwanyi, penjri ane kama:
‘Be dibed ni achwanyora piyo ahinya?’
‘Be dibed ni gima otimore en wach malich ahinya ma nyalo dwaro ni nyaka nyawadwa kwaya ng’wono, koso en wach ma anyalo fwayo afwaya?’
WUOURU E WI PENJOGI
Wakawoga kinde ma romo nade mondo walos wach sama wachwanyore?
Ang’o ma wanyalo timo mondo walosga weche mapiyo sama wachwanyore?
TEM TIMO KAMA
Sama ochwanyi, kik ipar ni jaodi dwaroga mana ni mondo ochwanyi.
Tem fwayo gima rach ma nyawadu otimoni ka iketo e paro ni “waduto wachwanyore nyading’eny.”—Jakobo 3:2.
“Yot ng’wono ne nyawadu ka uduto uneno ni un joketho, moloyo ka ng’ato achiel e ma neno ni ikethonega. Dwarore ni ng’ato obolre mondo okwa ng’wono kata weyo ne nyawadgi kethone.”—Kimberly.
PUONJ MA MUMA CHIWO: “Los weche piyo.”—Mathayo 5:25.
Mako sadha nyalo hinyi, kendo onyalo ketho kend maru
