1, 2. Ang’o momiyo Joneno mag Jehova rwakorega e yo mowinjore? (Ne picha man malo.)

GASET moro mar dho Dutch nowacho kama ka owuoyo e wi rwakruok mar jotend dinde sama gin e chokruok: “Sama piny liet girwako lewni ma ok umgi maber. Mano opogore ahinya gi chokruoge madongo mag Joneno mag Jehova. . . . Yawuowi gi chwo rwako koti gi tai, mine gi nyiri rwako skede ma borgi oromo maber . . . kendo mondisore.” Kinde mang’eny, ji pwoyoga Joneno mag Jehova nikech girwakoga ‘lewni mowinjore, ma ok kal tong’ kendo ma nyiso ni gin joma pachgi long’o.’ Gitimo kamano nikech ‘giluoro Nyasaye.’ (1 Tim. 2:9, 10) Jaote Paulo ne wuoyo e wi yo ma mon onego orwakrego, kata kamano, weche ma nowachogo bende mulo chwo ma Jokristo.

² Rwakruok e yo mowinjore en gima duong’ ahinya e ngimawa kaka jotich Jehova kendo en gima duong’ ne Nyasaye ma walamo. (Cha. 3:21) Gik ma Ndiko wacho kuom rwakruok gi bidhruok nyisowa maler ni Jaloch mar polo gi piny nigi chike ma doher ni jotichne oluw kodok korka weche mag rwakruok. Mano e momiyo yo ma warwakorego ok  onego obed mana ma morowa wawegi, to onego omor Jehova bende.

3. Chik ma Nyasaye ne omiyo Jo-Israel e wi wach rwakruok puonjowa ang’o?

³ Kuom ranyisi, Nyasaye ne omiyo Jo-Israel chike ma ne konyogi mondo kik gibed gi timbe mochido kaka mag ogendni ma ne olworogi. Chikego ne nyiso maler kaka Jehova ne ok dwar ni chwo orwakre ka mon kata mon orwakre ka chwo. (Som Rapar mar Chik 22:5.) Kaluwore gi chik ma Nyasaye nochiwo e wi rwakruok, ok odwar kit rwakruok ma miyo chwo chalo gi mon, to mon chalo gi chwo kata ma miyo pogo chwo gi mon bedo matek.

4. En ang’o ma nyalo konyo Jokristo mondo otim yiero mowinjore e wi lewni monego girwaki?

⁴ Wach Nyasaye oting’o puonj ma nyalo konyo Jokristo e timo yiero mowinjore e wi wach rwakruok. Mago gin puonj monego giluw kata obedo ni ng’ato odak e piny mane, kitgi gi timbegi chalo nade, kendo bed ni pinygi liet kata ng’ich. Ok ochuno ni nyaka wabed gi list ma rabora ma nyiso kit lewni mowinjore kod ma ok owinjore. Kar mano, puonj manie Muma tayowa kendo miyowa thuolo mar yiero kit lewni mowinjore. We wanon ane puonj moko manie Muma ma biro konyowa ng’eyo gima ‘owinjore kendo malong’o chuth e wang’ Nyasaye’ sama wayiero lewni ma wadwaro rwako.​—Rumi 12:1, 2.

5, 6. Yo ma warwakorego nyalo miyo jomoko otim ang’o?

⁵ Roho maler notelo ne jaote Paulo mondo owuo e wi puonj maduong’ ma yudore e 2 Jo-Korintho 6:4. (Som.) Kaka wanenore gioko miyo ji fwenyo gik mathoth kuomwa. Ginyalo chako bedo gi paro moko kuomwa mana nikech ‘nenruokwa ma oko’. (1 Sa. 16:7) Omiyo, wan kaka jotich Nyasaye wang’eyo maber ni ok onego warwak law moro amora ma warodhnogo tek mana ni omorowa. Puonj manie Muma onego okonywa mondo kik warwak lewni ma omakowa ti, ma rieny, kata ma nyalo chiero gombo mag nindruok kuom joma nenowa. Mano tiende ni ok onego warwak lewni ma miyo ji neno kuonde ma ok onego gine e dendwa. Piny ok onego obed madiny ne jomoko sama wan kodgi, kata ok onego gilok wang’gi ka ging’iyo komachielo mana nikech warwakore marach.

⁶ Sama warwakore e yo mondisore kendo ma ok wakal tong’, ji biro miyowa luor kaka jotich Jehova Nyasaye kendo mano nyalo ywayogi ma gichak lamo Jehova. E wi mano, ka warwakore e yo mowinjore, ji biro wuoyo maber e wi riwruokwa kendo ginyalo chiko itgi ne ote ma walandonegi.

7, 8. Gin kinde mage monego warwakre e yo mowinjore?

⁷ Kaka warwakore onego onyis ni wachiwo luor ne Jehova, ne owete gi nyiminewa, ne joma walendonegi kod ne ote ma walando. (Rumi 13:8-10) Mano dwarore ahinya sama wadhi e chokruogewa kaachiel gi tij lendo. Onego warwakre ‘e yo mowinjore gi joma wacho ni giluoro Nyasaye.’ (1 Tim. 2:10) En adier ni nitie kit rwakruok ma nyalo bedo mowinjore gi kamoro to ok owinjore gi kamachielo. Mano e momiyo jotich Jehova e piny mangima keto e paro timbe kod kit ogendni mopogore opogore mondo kik gichwanygi.

 ⁸ Som 1 Jo-Korintho 10:31. Sama wadwa dhi e chokruoge mag alwora kod mag ndalo adek, onego warwakre e yo mowinjore to ok rwako lewni mokalo tong’ ma onya e piny sani. Kata mana sama wadhi kata wawuok e otel kod sama wago mbaka e seche mag yueyo ka chokruok podi kata koserumo, ok onego warwakre e yo mojwang’ore. Mano biro miyo wabed thuolo nyiso jomoko ni wan Joneno mag Jehova kendo lendonegi ka mano nyalore.

9, 10. Ndiko mar Jo-Filipi 2:4 onego okonywa nade e ng’eyo kaka onego warwakre?

⁹ Som Jo-Filipi 2:4. Ang’o momiyo onego wapar kabe yo ma warwakorego nyalo chwanyo kata moro Jokristo wetewa? Achiel kuom gik momiyo en ni jotich Nyasaye temo matek mondo giluw puonj manie Muma ma wacho niya: “Neguru fuonni mag ringreu manie piny, ka uweyo terruok, gi tim ma ok ler, kod owruok gi gombo mag terruok.” (Kol. 3:2, 5) Ok dwaher ni luwo puonjno obed matek ne Jokristo wetewa mana nikech rwakruokwa. Moko kuom owete gi nyiminewa ma noweyo timbe mag terruok samoro pod nyagore mondo gilo gombo maricho. (1 Kor. 6:9, 10) Ok dwaher ni wamigi tich matek.

¹⁰ Sama wan kanyachiel gi owete gi nyiminewa, kit rwakruokwa onego okonygi neno ni kanyakla en kama ber kendo man gi joma timbegi ler. Rwakruokwa onego obed maber kinde duto, bed ni wan e chokruok kata e  dijewa mamoko. Wan thuolo yiero kit lewni ma dwaher rwako. Kata kamano, waduto wan gi ting’ mar rwako lewni ma biro miyo obed mayot ne jomoko siko ka gin gi paro kod timbe maler kendo wechegi bende obed maler. (1 Pet. 1:15, 16) Hera madier ‘ok tim timbe ma ok nyis luor kendo ok many mana gik ma kelone ber owuon.’​—1 Kor. 13:4, 5.

11, 12. En ang’o monego wapar seche ma wayiero lewni ma wadwa rwako?

¹¹ Sama jotich Nyasaye yiero lewni ma gidwa rwako, giketo e paro ni “nitie kinde mar weche duto kod tich duto.” (Ekl. 3:1, 17) En adier ni chal mar kor lwasi, kit ngima ma wadakie, kod gik mamoko biro miyo warwakre e yo moro. Kata kamano, chike mag Jehova ok lokre kata bed ni kor lwasi chal nade.—Mal. 3:6.

¹² Kuonde ma piny liet, rwako lewni mowinjore kendo ma chiwo luor nyalo bedo matek. Omiyo, owete gi nyimine bedoga ma mor sama ok warwako lewni ma omakowa ti kata ma rieny. (Ayub 31:1) Bende, sama wadhi yueyo e dho nam kata kuonde migoye abal, lep goyo abal onego obed mowinjore. (Nge. 11:2, 20) Kata obedo ni jopiny rwako lewni ma nyiso duggi sama gigoyo abal, jotich Jehova to onego orwak lewni ma miye duong’.

13. Siem ma yudore e 1 Jo-Korintho 10:32, 33 konyowa nade yiero lewni mowinjore?

¹³ Nitie puonj machielo maduong’ ma yudore e Muma ma konyowa yiero lewni mowinjore. Onego watang’ mondo kik wachwany jomoko, bed ni gin Jokristo wetewa kata ooyo. (Som 1 Jo-Korintho 10:32, 33.) Onego wakaw mapek ting’ ma wan-go mar weyo rwako lewni ma nyalo chwanyo jomoko. Jaote Paulo nondiko niya: “Ng’ato ka ng’ato kuomwa mondo otim gik ma moro nyawadgi, ma konye kendo ma gere.” Nowacho gimomiyo onego watim kamano ka nomedo niya: “Kata mana Kristo ok notimo mana gik ma more en owuon.” (Rumi 15:2, 3) Yesu noweyo timo gik ma more en owuon mondo okony jomoko, nikech timo kamano notudore gi chopo dwach Nyasaye. Kuom mano, ok wabi rwako kit lewni ma morowa wawegi kapo ni ginyalo miyo ji kik rwak wach ma walandonegi.

14. Ere kaka jonyuol nyalo konyo nyithindgi mondo omi Nyasaye duong’ kokalo kuom rwakruokgi?

¹⁴ Jonyuol ma Jokristo nigi ting’ mar konyo joutegi ong’e kaka onego giti gi puonj manie Muma. Mano oriwo neno ni giduto kaachiel gi nyithindgi gitemo matek mondo gimor chuny Nyasaye kuom rwakruok kendo bidhruok e yo ma ok kal tong’. (Nge. 22:6; 27:11) Jonyuol nyalo konyo nyithindgi mondo omi Nyasaye ma gilamo luor kuom ketonegi ranyisi maber kendo miyogi chike ma nyalo tayogi. Jonyuol onego okony nyithindgi ong’e kaka ginyalo yiero lewni mowinjore kod kuonde ma lewnigo yudoree. Ok onego giyier lewni mana ma morogi, to onego giyier lewni ma biro miyo Jehova Nyasaye duong’.

15. Ang’o monego otawa sama wayiero lewni monego warwaki?

¹⁵ Wach Nyasaye oting’o puonj ma konyowa timo yiero makare ma biro kelone Nyasaye duong’. Kata kamano, lewni ma warwako nyiso gik ma wahero.  Kit lewni ma wahero nyalo bedo ni opogore gi ma jomoko ohero mana kaka nyalo ma wan-go mar nyiewogi bende opogore. Kata kamano, lepwa onego obed maler, mondisore, ma ok okalo tong’, mowinjore gi kama wantiere, kendo ma ok chwany jomoko.

16. Ang’o momiyo kinda ma watimo mondo warwakre maber ok dhi nono?

¹⁶ Ok en gima yot timo yiero makare kinde duto kendo ma ok bi chwanyo jomoko. E dukni mang’eny, tinde iuso mana lewni manie fason, to thoth lewnigo moriwo nyaka sude gin mana ma mako ji. Kata kamano, Jokristo wetewa biro bedo mamor gi kinda ma watimo mondo warwak lewni mondisore kendo mowinjore. Mor ma wabedogo mar ng’eyo ni wamiyo Wuonwa manie polo duong’ ber moloyo gik matindo tindo ma wanyalo tuonore mana mondo warwakre e yo ma moro Jehova.

17. Gin ang’o ma nyalo miyo owadwa opidh tike kata kik otim kamano?

¹⁷ Be owinjore owete opidh tikgi? Chike mag Musa ne dwaro ni joma chwo opidh tikgi. Kata kamano, Jokristo ok nie bwo chike Musa omiyo chikego ok otueyogi kata matin. (Lawi 19:27; 21:5; Gal. 3:24, 25) Nitie ogendni moko ma joma chwo inyalo yienegi pidho tikgi kendo mano ok nyal monogi lendo tek mana ni giritogi maber kendo e yo ma nyiso luor. Nitie kata mana owete ma nigi migepe to gipidho tikgi. Kata kamano, owete moko e ogendnigo oseyiero mondo kik gipidh tikgi. (1 Kor. 8:9, 13; 10:32) Ogendni moko neno ni pidho tik en gima ok owinjore, omiyo timo kamano bende ok owinjore gi Jokristo manie ogendnigo. Timo kamano nyalo mono owadwa miyo Nyasaye duong’ kendo nyalo miyo ji obed gi paro marach kuome.​—Rumi 15:1-3; 1 Tim. 3:2, 7.

18, 19. Ndiko mar Mika 6:8 konyowa nade sama watemo matek mondo warwakre e yo ma biro moro Nyasaye?

¹⁸ Mano kaka wamor ni Jehova ok omiyowa chike mang’eny ma nyiso kaka onego warwakre kendo wabidhre. Kar mano, omiyowa thuolo mondo watim yierowa wawegi ka itayowa gi puonj manie Muma. Omiyo yo ma warwakorego kod kaka wabidhore onego onyis ni wadwaro ‘wuotho gi chuny ma muol kod Nyasachwa.’​—Mika 6:8.

¹⁹ Bedo joma ok kal tong’ kendo mobolore biro miyo wayie ni Jehova ler kendo ni chikene e ma nyalo tayowa e yo maber chuth. E wi mano, bedo joma ok kal tong’ oriwo nyiso ni wadewo pach jomamoko kod kaka giwinjo e chunygi. Kuom mano, ‘wawuotho gi chuny ma muol kod Nyasachwa’ sama waluwo chikene makare kendo weyo timo gik ma chwanyo jomoko.

20. Yo ma warwakorego kendo wabidhorego onego omul jomoko e yo mane?

²⁰ Lewni ma warwako onego omi ji ofweny mapiyo ni wan jotich Jehova. Owete gi nyiminewa kaachiel gi jomamoko onego one ayanga ni wawinjore bedo joma tiyo e lo Nyasaye. Jehova oketonwa chike makare kendo wamor luwo chikego. Wapwoyo ahinya owete gi nyimine ma rwakore kendo bidhore e yo mowinjore nikech mano miyo jomoko rwako wach ma walando kendo kelo ne Jehova duong’. Ka watimo yiero makare e wi lewni monego warwaki, wabiro dhi nyime miyo Jehova duong’ nikech ‘orwakore gi luor kod duong’ motelo.’—Zab. 104:1, 2.