Inyalo dwoko nade ka ng’ato openji niya: “Be diher dak nyaka chieng’?” Thothgi biro yie. Kata kamano, pod gineno ni mano en gima ok nyalre. Ji wachoga ni “tho nondiki” kata ni “tho nosingi,” kendo ni ji duto nyaka tho.

To nade kapo ni olok penjono mopenji niya, “Be igombo tho?” Joma nigi paro makare biro dwoko penjono ni ooyo. Wachno nyiso ang’o? Wagombo dak nyaka chieng’ kata obedo ni wakalo e chandruoge mopogore opogore. Muma nyiso ni Nyasaye nochueyo dhano gi gombo mar dak nyaka chieng’.

Kata kamano, onge dhano mosedakga nyaka chieng’. Kare, ang’o ma notimore momiyo sani dhano ok nyal dak nyaka chieng’? Be Nyasaye osetimo gimoro amora mondo olos wachno? Muma chiwo dwoko ma jiwo chunywa ahinya, kendo dwokogo otudore achiel kachiel gi gima nomiyo osand Yesu kae to onege.

Sula adek mokwongo mag bug Chakruok nyisowa ni Nyasaye nowuoyo gi jonyuolwa mokwongo Adam gi Hawa kuom ngima ma nyaka chieng’, kendo nonyisogi gima nonego gitim mondo gidag nyaka chieng’. Kae to sulago bende nyiso kaka ne gitamore winjo Nyasaye mi gilalo ngima maberno. Ji wuoyoga kuom gima notimoreno mana ka sigana moro, kendo mano osemiyo jomoko okawe mana ka wach moro mochuog. Kata kamano, mana kaka buge mag Injili, bug Chakruok oting’o weche ma nyiso ni gigo notimore adier. *

Richo ma Adam notimono osekelonwa ang’o? Muma wacho kama: “Kaka richo nodonjo e piny kokalo kuom ng’ato achiel [Adam], kendo tho nobiro kokalo kuom richo, tho nolandore kuom ji duto nikech giduto ne gisetimo richo.” (Jo-Rumi 5:12) Adam notimo richo ka noketho chik Nyasaye. Omiyo, nolalo geno ma ne en-go mar dak nyaka chieng’, mi bang’e notho. Nikech wan nyithinde, onyuolwa e richo. Mano e momiyo wabedo ma tuwo, wati, kendo watho. Mani owinjore ahinya gi kaka sayans bende lero ni nyathi nyalo yudo kido moko koa kuom  jonyuolne. To be nitie gima Nyasaye osetimo e wi wachno?

Adam nolalo ngima maber ne nyithinde. Kata kamano, Nyasaye notimo chenro mondo oduok ngima ma Adam nolalono, ma en ngima ma nyaka chieng’. Ere kaka Nyasaye notimo mano?

Muma wacho kama e bug Jo-Rumi 6:23, “Misach richo en tho.” Mano nyiso ni watho nikech richo. Adam notimo richo kendo mano nomiyo otho. Kamano bende, watho nikech wan joricho. Kata obedo ni jonyuolwa mokwongo e ma notimo richono, wan be richogino mulo ngimawa. Nyasaye nonyisowa hera kuom oronwa Wuode Yesu mondo ochulnwa “misach richo.” Mano nyalore nade?

Adam ne en ng’at makare to ka noketho chik Nyasaye nokelo richo gi tho. Omiyo, ne dwarore ni dhano makare ma ne nyalo rito chike Nyasaye nyaka e thone, owarwa kuom tho. Muma lero wachno kama: “Mana kaka kokalo kuom tim ng’ato achiel mar tamruok luwo chik, ji mang’eny nobedo joricho, e kaka bende kokalo kuom tim ng’ato achiel mar luwo chik, ji mang’eny ibiro kwan kaka joma kare.” (Jo-Rumi 5:19) Yesu e ma ne en ‘ng’atno.’ Nowuok e polo, mobedo dhano makare chuth, * kendo ne ochiwo ngimane nikech wan. Mano e momiyo wanyalo bedo gi winjruok maber gi Nyasaye, kendo wanyalo bedo gi geno mar dak nyaka chieng’.

Ang’o momiyo ne nyaka Yesu tho mondo ochop wachno? Donge Nyasaye ma Nyalo Duto ne nyalo chiko mondo nyithind Adam odag adaga nyaka chieng’? Kuom adier, ne en gi ratiro mar timo kamano. Kata kamano, donge mano ne dhi tuomore gi chikne ni misach richo en tho? Chikno ne ok onego owil awila sa asaya ma ng’ato dwaro. Chikno ne dwarore mondo ong’ad bura e yo makare.—Zaburi 37:28.

Kapo ni Nyasaye dine ombeko chikno gi e kindeno, donge mano ne dhi miyo dhano obed gi kiawa  kabe odhi mbeko chikene mamoko? Kuom ranyisi, be ne odhi ng’ado bura e e yo makare sama ong’ado ni nyithi Adam mage mowinjore oyud ngima mochwere? Be dhano ne dhi gene kuom chopo singo mage? Nikech Nyasaye dwaro ng’ado bura e yo makare, oseloso chenro ma nyalo resowa, kendo mano nyiso maler ni kinde duto obiro timo gik moko e yo makare.

Tho mar Yesu nomiyo Nyasaye oyawo ne dhano yo mar dak nyaka chieng’ e Paradiso e pinyka. Ne ane weche ma Yesu nowacho e Johana 3:16: “Nyasaye nohero piny ahinya mi nochiwo Wuode ma miderma, mondo ng’ato ang’ata ma nyiso yie kuome kik keth, to obed gi ngima ma nyaka chieng’.” Tho mar Yesu nyiso kaka Nyasaye ng’ado bura kare, to moloyo, tho Yesuno nyiso kaka Nyasaye ohero dhano.

Kata kamano, ang’o momiyo ne dwarore ni osand Yesu kendo otho tho malit kaka ondik e buge mag Injili? Ka ne Yesu ochung’ motegno e bwo tembe mager, nonyiso ni gima Jachien nowacho ni dhano ok nyal tiyo ne Nyasaye e bwo tembe ok en adier. (Ayub 2:4, 5) Wachno ne nyalo nenore ka gima en adier bang’ ka Satan nosewuondo Adam motimo richo. Kata kamano, Yesu ma ne en ng’at makare chuth kaka Adam kapok Adam otimo richo, ne ok oketho chik Nyasaye kata e bwo sand malit. (1 Jo-Korintho 15:45) Yesu nonyiso maler ni kata Adam ne nyalo luwo chik Nyasaye ka dine oyiero mar timo kamano. Kuom nano e bwo tem Yesu noweyonwa ranyisi maber monego waluw. (1 Petro 2:21) Nyasaye nomiyo Wuode ngima ma ok nyal kethre e polo nikech norito chikene.

Kuom adier Yesu notho. Omiyo noyawonwa yo mar yudo ngima mochwere. Be diher dak nyaka chieng’? Yesu noleronwa gima onego watim ka nowacho kama: “Ma e ngima ma nyaka chieng’, ni ging’eyi in Nyasaye makende mar adier kod jal ma ne ioro, Yesu Kristo.”—Johana 17:3.

Joma ogoyo gasedni gweli ni mondo ipuonjri e wi Jehova ma en Nyasaye mar adier kod Wuode Yesu Kristo. Joneno mag Jehova modak e alworau oikore puonji wechego. Bende, inyalo yudo weche momedore e websaitwa mar www.dan124.com/luo.