1. Gin jomage ma nokonyo e chako kanyakla ma ne ni Filipi?

KA NE Paulo, Sila, Luka, kod Timotheo ochopo e alwora mar Filipi ma ne ni e bwo loch Rumi, ne giyudo ji mang’eny ma ne nigi siso mar winjo wach Pinyruoth. Owete ang’wen ma jokindago nokonyo e chako kanyakla kanyo, kendo jopuonjre nochako chokorega ne lamo. Nenore ni ne gichokorega e od Lidia ma ne en Jakristo mohero rwako welo ahinya.​—Tich 16:40.

2. En pek mane ma kanyaklano noyudo?

² Mapiyo nono, kanyakla manyienno noromo gi pek moro. Satan nosiayo jowasik Nyasaye mondo gikwed tij yalo ma Jokristogo ne timo. Ne omak Paulo gi Sila, ne ochwadgi, mi otuegi e jela. Ka nosegonygi, ne gilimo jopuonjre manyien-go mondo gijiwgi. Kae to Paulo, Sila, kod Timotheo nowuok Filipi, to nenore ni Luka nodong’ kanyo. Kanyakla manyienno nodhi nade? Roho maler nokonyogi mi gidhi nyime timo tij Jehova. (Fil. 2:12) Mano e momiyo Paulo nobedo ma mor ahinya kodgi!

3. Kaka onyis e Jo-Filipi 1:9-11, gin weche mage ma Paulo nolamonee Jo-Filipi?

³ Higni ma dirom apar bang’e, Paulo nondiko barua ne kanyakla ma Filipi. Kisomo baruano, ibiro fwenyo mayot ni Paulo nohero Jokristogo ahinya. Kuom ranyisi, nondikonegi kama: “Agombo ahinya nenou ka an gi hera kaka ma Kristo Yesu nigo.” (Fil. 1:8) Nondikonegi bende ni ne olamonegiga. Nokwayo Jehova mondo omi hera ma ne gin-go osik ka medore, giyang gik ma dwarore moloyo, gitem mondo gibed ma onge bura, kik gichwany jomamoko, kendo  gidhi nyime nyago olemo makare. Weche ma ne Paulo owachogo nyalo konyowa e kindewagi bende. Kuom mano, we wasom ane weche ma nondikogo kae to wanon moko kuom puonj ma nochiwo kod kaka wan be wanyalo tiyo kodgi.​—Som Jo-Filipi 1:9-11.

4. (a) Ka luwore gi 1 Johana 4:9, 10, Jehova osenyiso nade ni oherowa? (b) Onego waher Nyasaye e okang’ ma romo nade?

⁴ Jehova nonyiso ni oherowa ahinya ka ne ooro Wuode e piny mondo otho nikech richowa. (Som 1 Johana 4:9, 10.) Heraneno chwalowa mondo wan be wahere. (Rumi 5:8) Onego waher Nyasaye e okang’ ma romo nade? Weche ma ne Yesu onyiso Ja-Farisai moro konyowa yudo dwoko mar penjono. Nonyise niya: “Nyaka iher Jehova Nyasachi gi chunyi duto, kendo gi ngimani duto, kendo gi pachi duto.” (Mat. 22:36, 37) Ok onego waher Nyasaye gi chuny ma nus-nus. Kar mano, dwarore ni hera ma waherego osik ka medore pile ka pile. Par ni Paulo nonyiso Jo-Filipi ni heragi nonego “osik ka medore moloyo.” Ang’o ma wanyalo timo mondo hera ma waherogo Nyasaye osik ka medore?

5. Mondo wamed hero Nyasaye, ang’o ma dwarore?

⁵ Mondo waher Nyasaye, dwarore ni wang’eye maber. Muma wacho niya: “Ng’ato ang’ata ma ok nyis hera pok ong’eyo Nyasaye, nimar Nyasaye en hera.” (1 Joh. 4:8) Jaote Paulo nowacho ni hera ma waherogo Nyasaye biro medore kaka wamedo bedo gi “ng’eyo malong’o chuth [e wi Nyasaye] kod nyalo mar ng’eyo weche e yo matut.” (Fil. 1:9) Ka ne wahango puonjore Muma, ne wachako hero Nyasaye kata obedo ni ne pok wang’eye matut ahinya. To kaka ne wamedo puonjore wechene, e kaka ne wamedo here. Mano e momiyo wakawoga mapek ahinya chenro mar puonjruok Muma kendo paro matut kuom gik ma wapuonjore.​—Fil. 2:16.

6. Ndiko mar 1 Johana 4:11, 20, 21 puonjowa ang’o e wi hero jowetewa?

⁶ Hera ma Nyasaye oherowago chwalowa mondo waher Jokristo wetewa. (Som 1 Johana 4:11, 20, 21.) Samoro wanyalo paro ni hero Jokristo wetewa en gima onego obi abiya kende. Mano en nikech waduto walamo Jehova kendo watemo matek mondo wabed gi kido ma chal gi kite. Bende, waluwo ranyisi mar Yesu ma noherowa e okang’ malach mi ochiwo ngimane nikech wan. To e ma pod wanyalo yudo ka teknwa ahinya luwo chik ma dwaro ni waherre. Ne ane gimoro ma notimore e kanyakla ma Filipi.

7. Ang’o ma wanyalo puonjore kuom siem ma Paulo nomiyo Yudia gi Sintike?

⁷ Yudia gi Sintike ne gin Jokristo ma jokinda ahinya, kendo Paulo nowacho ni ne ‘gisetiyo matek kode.’ Kata kamano, nenore ni ne giyie mondo nyawo moko matindo tindo ma ne gin-go opoggi. E barua ma ne Paulo ondiko ne kanyakla ma nyiminego ne nitieree, noluongo nyinggi achiel kachiel kosiemogi ni nonego “gibed gi paro achiel.” (Fil. 4:2, 3) Paulo noneno ni ne ber kosiemo bende ji duto ma ne ni e kanyaklano niya: “Sikuru kutimo gik moko duto ma onge ng’ur kod mino wach.” (Fil. 2:14) Onge kiawa ni siem ma achiel kachielno nokonyo nyiminewago kod kanyakla duto mondo hera ma ne ni e kindgi osik ka medore.

8. En ang’o ma nyalo miyo wayud ka teknwa hero Jokristo wetewa moko, to ere kaka wanyalo loyo wachno?

⁸ Mana kaka Yudia gi Sintike, wan be  wanyalo yudo ka teknwa hero Jokristo wetewa moko mana nikech waketo pachwa ahinya kuom nyawo matindo tindo ma gin-go. Waduto wabothga pile ka pile. Ka wasiko ka waguro pachwa mana kuom nyawo ma jomoko nigo, hera ma waherogigo biro dok chien. Kuom ranyisi, ka owadwa moro wiye owil ma ok obiro timo ler e Od Romo, mano nyalo chwanyowa. Ka wachako kwano gik mamoko ma owadwano osegatimo ma ok morwa, wabiro mana medo chwanyore, to mano biro miyo hera ma waherego omed dok chien. Ka po ni nyawo ma Jakristo wadu moro nigo chandi, ber ka iparo wachni: Jehova neno nyawo mag Jakristono kod magi bende. To e ma pod ohero Jakristono, kendo in be oheri. Mano e momiyo onego waluw ranyisi mar Jehova kuom neno Jokristo wetewa kaka onenogi. Ka watimo kinda mondo wamed hero Jokristo wetewa, winjruok ma ni e kindwa kodgi biro medo bedo motegno kendo wabiro tiyo kanyachiel gi kue.​—Fil. 2:1, 2.

9. Moko kuom “gik ma dwarore moloyo” ma Paulo nowacho e barua ma nondiko ne Jo-Filipi gin mage?

⁹ Jehova notayo Paulo gi rohone mondo ondik ne Jokristo ma ne ni Filipi kod wan duto niya: “Uyang gadier gik ma dwarore moloyo.” (Fil. 1:10) Gik ma dwarore moloyogo oriwo keto nying Jehova obed maler, neno kaka ochopo dwache, kod rito kue kod winjruok e kanyakla. (Mat. 6:9, 10; Joh. 13:35) Ka mago e gik ma wadichgo e ngima, wanyiso gadier ni wahero Jehova.

10. Mondo Jehova okwanwa kaka joma onge bura, ang’o monego watim?

¹⁰ Paulo nowacho bende ni onego wabed “ma onge bura.” Mano ok nyis ni koro onego wabed ma onge richo chuth-chuth. Onge kaka dwabed ma onge bura chuth kaka Jehova Nyasaye. Kata kamano, Jehova pod oikore kwanowa kaka joma onge bura ka watimo duto ma wanyalo mondo wamed bedo gi hera kendo wayang gadier gik ma dwarore moloyo. Achiel kuom yore ma wanyalo nyisogo ni wan gi hera en temo matek mondo kik wachwany jomamoko.

11. Ang’o momiyo ok onego wachwany ng’ato ang’ata?

¹¹ Wach ma ikwerowa ni kik wachwany jomamoko en wach maduong’ ahinya. Ere kaka wanyalo chwanyo ng’ato? Wanyalo timo mano kokalo kuom sinembe ma waneno, thumbe ma wawinjo, rwakruokwa, kata tich ma wayiero timo. Samoro gigo ok gin gik maricho. Kata kamano, ka gimiyo ng’at machielo chwanyore, mano wach ma ok onego wakaw mayot. Yesu nowacho ni nyalo bedo maber ka otue kidi maduong’ e ng’ut ng’ato ang’ata ma chwanyo rombene mi nyume e nam!​—Mat. 18:6.

12. Ang’o ma wanyalo puonjore kuom ranyisi mar owadwa moro gi jaode ma gin jopainia?

¹² Ne ane kaka owadwa moro gi jaode ma gin jopainia notiyo gi weche ma Yesu nowachogo. Ne gin e kanyakla ma ne nitie dichwo moro gi jaode ma e ka ne obatisi kendo ma nopon e alwora ma ok oyie ne ji timo gik mang’eny. Kuom ranyisi, ne ok gipar ni Jakristo nyalo dhi e sinema kata ka gik minyiso e sinemano ok rach. Ne gibwok ahinya ka ne giwinjo ni owadwa gi nyaminwa ma jopainiaka nodhi neno sinema moro. Ka ne jopainiago ofwenyo  mano, ne giwere gi wach dhi neno sinema nyaka chop kinde ma Joneno manyien-go biro ng’eyo tiyo maber gi chunygi mar pogo ber gi rach. (Hib. 5:14) Kuom kawo okang’ ma kamano, jopainiago nonyiso ni ne gihero Joneno manyien-go, ok mana gi lep kende, to nyaka gi tim.​—Rumi 14:19-21; 1 Joh. 3:18.

13. Ere kaka wanyalo miyo Jakristo wadwa otim richo?

¹³ Yo machielo ma wanyalo chwanyogo Jakristo wadwa en miyo otim richo moro. Mano nyalo timore e yo mane? Ne ane ranyisini. Japuonjre Muma moro osenyagore kuom kinde malach mondo owe madho kong’o, kendo gikone oweyo. Oneno ni weyo kong’o chuth e ma nyalo konye. Japuonjreno timo dongruok mapiyo ma chop kama ibatise. Bang’ kinde, Jakristo moro gwelo owete gi nyimine moko e ode, moriwo nyaka owadwa manyienno. Otemo miyo owadwa manyienno kong’o konyise niya: “Sani koro in Jakristo, kendo in gi roho maler. To achiel kuom olembe ma roho nyago en ritruok. Ritruok biro miyo kik imeth mokalo tong’.” Parie apara kaka weche nyalo dhi marach ka po ni owadwa manyienno orwako paro mobamno!

14. Ere kaka chokruogewa mag lamo konyowa luwo puonj ma ni e Jo-Filipi 1:10?

¹⁴ Chokruogewa mag lamo konyowa luwo puonj ma ni e Jo-Filipi 1:10 e yore mang’eny. Mokwongo, chiemb chuny ma wayudo e chokruok paronwaga gik ma Jehova neno ni dwarore moloyo. Mar ariyo,  e chokruogego, wapuonjore kaka wanyalo bedo ma onge bura. To mar adek, ijiwowa mondo wabed gi “hera kod timbe mabeyo.” (Hib. 10:24, 25) Kaka Jokristo wetewa medo jiwowa, e kaka wamedo hero Nyasaye kod Jokristo wetewago bende. Ka wan gi hera ma kamano, wabiro temo matek mondo kik wachwany Jokristo wetewa.

15. ‘Pong’ gi olemo makare’ tiende en ang’o?

¹⁵ Paulo nolemo ne Jokristo ma Filipi mondo ‘gipong’ gi olemo makare.’ (Fil. 1:11) “Olemo makare” noriwo hero Jehova kod joge. Noriwo bende wuoyo gi jomamoko e wi yie ma ne gin-go kuom Yesu kod geno ma ne gin-go. Jo-Filipi 2:15 wuoyo kuom ‘rieny kaka ler e piny.’ En gima owinjore wacho kamano kuom Jokristo nikech Yesu nowacho ni jopuonjrene gin “ler mar piny.” (Mat. 5:14-16) Bende, nonyiso jolupne ni ‘gilok ji obed jopuonjrene,’ kendo nowacho ni jolupnego ne dhi ‘bedo jonenone nyaka kuonde maboyo mogik e tung’ piny.’ (Mat. 28:18-20; Tich 1:8) Sama watimo tij lendo gi kinda, wanyago “olemo makare.”

16. Ndiko mar Jo-Filipi 1:12-14 nyiso nade ni wanyalo rieny kaka ler e piny kata sama wan e chal matek? (Ne picha manie nyim gaset.)

¹⁶ Bed ni wadak e chal mane, pod wanyalo rieny kaka ler e piny. Seche moko, gik ma nenore ni nyalo monowa lendo nyalo yawonwa thuolo maber mar lendo. Kuom ranyisi, jaote Paulo ne ni e tuech Rumi e kinde ma ne ondiko barua ne Jo-Filipi. Kata kamano, nyoroche ma notueyego ne ok omone lendo ne askeche kod welo ma ne dhiga lime. Kata obedo ni weche ne tek, Paulo nodhi nyime lendo gi kinda, to mano nojiwo owete gi nyimine mondo gin  be ‘giyal wach Nyasaye ka gionge luoro.’​—Som Jo-Filipi 1:12-14; 4:22.

17. Chiw ane ranyisi ma kindewagi ma nyiso ni wanyalo nyago olemo kata mana sama weche tek.

¹⁷ Owetewa gi nyiminewa mang’eny nyiso chir kaka Paulo. Kata obedo ni gidak e pinje ma ok oyienegi lendo e lela kata e ot ka ot, pod gimanyoga yore mamoko mag lando wach maber. (Mat. 10:16-20) E achiel kuom pinje kaka mago, jarit-alwora moro nowacho ni jalendo ka jalendo otem lendo ne wedene, jirendene, joskul wetene, jotich wetene, kod jomamoko ma ong’iyogo. Mana bang’ higni ariyo kende, kwan mag kanyakla nomedore ahinya. Samoro wan wadak e piny ma wanie gi thuolo mar lendo. Kata ka en kamano, pod wanyalo puonjore gimoro kuom owetewa gi nyiminewa ma ni e pinjego. Puonjno en ma: Kinde duto onego wamany thuolo mag lando wach maber ka wan gadier ni Jehova biro miyowa teko mondo wanyagre gi pek moro amora ma wanyalo romogo.​—Fil. 2:13.

18. En ang’o monego watim sani moloyo kinde moro amora mosekalo?

¹⁸ Magi e kinde monego watiye gi puonj ma Paulo nomiyo Jo-Filipi moloyo kinde moro amora mosekalo. Watemuru matek mondo wayang gik ma dwarore moloyo, wabed ma onge bura, kik wachwany jomamoko, kendo wanyag olemo makare. Ka watimo kamano, hera ma wan-go biro siko ka medore, to mano biro miyo Jehova Wuonwa oyud duong’.