E 2 Jo-Korintho 12:2, 3, Paulo wuoyo kuom ng’at moro ma noter “e polo mar adek.” Ng’atno ne en ng’a? Ka ne Paulo ndiko ne kanyakla ma Korintho, nojiwo ni Nyasaye ne tiyo kode kaka jaote. (2 Kor. 11:5, 23) Kae to nowuoyo e wi “fweny kod weche ma Ruodhwa elo.” Sama Paulo ne wacho wechego, ne ok owuoyo kuom Jokristo mamoko. Omiyo, nenore ni ne owuoyo kuome owuon kaka ng’at ma noneno fweny kod weche ma Ruodhwa elo.​—2 Kor. 12:1, 5.

Omiyo, Paulo e ng’at ma “ne oter nyaka e polo mar adek” kendo ma “noter e paradiso.” (2 Kor. 12:2-4) Bedo ni nowuoyo kuom “weche ma Ruodhwa elo” nyiso ni noelne gik ma ne dhi timore e kinde mabiro.

“Polo mar adek” ma Paulo noneno en ang’o?

Sama Muma wuoyo kuom “polo,” seche moko owuoyo kuom gik ma ni e kor polo ma wang’wa nyalo neno. (Cha. 11:4; 27:28; Mat. 6:26) Kata kamano, “polo” inyalo tigo kiwuoyo kuom gik mamoko mopogore opogore. Seche moko ochung’ ne loch mag dhano. (Dan. 4:20-22) Seche moko bende onyalo chung’ ne loch mar Nyasaye, kuom ranyisi, Pinyruodh Nyasaye.​—Fwe. 21:1.

Paulo noneno “polo mar adek.” Ang’o ma notemo wacho? Kinde moko, Muma nyaloga nwoyo gimoro nyadidek mondo ojiwgo ni gima iwacho en gima pek. (Isa. 6:3; Eze. 21:27; Fwe. 4:8) Nenore ni sama Paulo ne wuoyo kuom “polo mar adek,” nowuoyo kuom loch ma ni e rang’iny ma malo ahinya, tiende ni Pinyruodh Mesia ma oseket e lwet Yesu Kristo kod joloch mamoko 144,000. (Som Insight on the Scriptures, Buk 1, ite mag 1059, 1062.) Mana kaka jaote Petro nondiko, warito “polo manyien” ma ne Nyasaye osingo.​—2 Pet. 3:13.

To “paradiso” ma Paulo nowuoye en ang’o?

“Paradiso” bende nyalo chung’ ne gik mopogore opogore: (1) Nikech kar dak ma Nyasaye nokwongo miyo dhano ne en paradiso, nenore ni “paradiso” ma Paulo nowuoye ochung’ ne Paradiso ma ji biro dakie e piny kae e kinde mabiro. (2) Onyalo chung’ ne kue makende ma jotich Nyasaye biro bedogo e piny manyien e kindgi gi Nyasaye kod e kindgi giwegi. (3) Bende, onyalo chung’ ne ngima maber ma ni e polo, ma Fweny 2:7 luongo ni “paradiso mar Nyasaye.”​—Som Ohinga mar Jarito ma Julai 15, 2015, ite mar 8, par. 8.

Nyalo bedo ni Paulo ne nigi weche adekgo duto e paro sama nowuoyo e wi “paradiso” e 2 Jo-Korintho 12:4.

E yo machuok:

“Polo mar adek” miwuoye e 2 Jo-Korintho 12:2 nenore ni ochung’ ne “polo manyien” ma en Pinyruodh Mesia ma oseket e lwet Yesu Kristo kod joloch mamoko 144,000.​—2 Pet. 3:13.

Iluonge ni “polo mar adek” nikech Pinyruodhno en loch ma ni e rang’iny ma malo ahinya.

“Paradiso” ma noterie Paulo e fwenyno nenore ni ochung’ ne (1) Paradiso ma biro betie e piny ka, (2) kue makende ma jotich Nyasaye biro bedogo e piny manyien, kendo kueno biro bedo mang’eny moloyo ma jotich Nyasaye nigo sani, kod (3) “paradiso mar Nyasaye” ma ni e polo ma biro betie sama paradiso ma ni e piny bende nitie.

Omiyo, paradiso ma warito en piny manyien gi polo manyien koriw kanyachiel. Obiro bedo chenro manyien moriwo Pinyruoth ma ni e polo kod dhano ma tiyo ne Jehova e piny ka.