Be inyalo dwoko penjo ma luwogi ka luwore gi weche mosewuoye e Ohinga mar Jarito ma 2019?

Wach ma Jehova nosingo ni: “Gir lweny moro amora molos mondo ohinyi ok nohinyi” tiende en ang’o? (Isa. 54:17)

Wanyalo bedo gadier chuth ni Jehova biro geng’owa kuom ‘jo mager.’ (Isa. 25:4, 5) Jowasikwa ok bi kelonwa hinyruok mosiko.​—w19.01, ite mar 6-7.

Yo ma Jehova nokumogo Jo-Kanaan kod Jo-Israel ma nong’anjo puonjowa ang’o e wi tim makare ma Jehova nigo?

Jehova nokumo joma ne timo timbe modwanyore mag terruok kod joma ne sando mon gi nyithindo. Noguedho jotichne ma nomakore kode kendo ma ne timo ne jowetegi gik mowinjore.​—w19.02, ite mar 22-23.

Ang’o monego watim ka po ni wantie sama ng’at ma ok Janeno lemo?

Wanyalo ling’ aling’a kendo chiwo luor mowinjore, to ok wabi wacho “amin” kata mako lwetwa kodgi. Wanyalo yiero mar wacho lamo marwa wawegi gie chunywa.​—w19.03, ite mar 31.

Ang’o momiyo tim mar njawo nyithindo en richo maduong’ ahinya?

En richo ma hinyo nyathi monjawno, en richo e wang’ kanyakla, en richo ma ketho chik sirkal, to moloyo duto, en richo e wang’ Nyasaye. Ka chike ma sirkal oketo dwaro ni ng’ato ogo ne sirkal ripot sama onjaw nyathi moro, jodongo timo kamano.​—w19.05, ite mar 9-10.

Ere kaka inyalo loko paro ma chiki?

Gik monego itim gin: Lamo mondo Jehova okonyi. Paro matut kitemo nono lokruoge minyalo medo timo. Yiero osiepe mabeyo.​—w19.06, ite mar 11.

Ang’o ma wanyalo timo sani mondo waikre ne sand?

Dwarore ni wamed tego osiep ma ni e kindwa gi Jehova. Bed gadier chuth ni Jehova oheri kendo ni ok obi weyi ngang’. Som Muma pile kendo ilem nyading’eny. Bed gadier chuth ni gueth ma Jehova osingonwa e bwo loch mar Pinyruodhe biro chopo. Mak ndiko moko kod wende mihero e wiyi.​—w19.07, ite mar 2-4.

Ang’o ma wanyalo timo mondo walend ne wedewa?

Onego watem ng’eyo kaka giwinjo e chunygi, waywagi kokalo kuom timbewa, kik waol kodgi, kendo wahore.​—w19.08, ite mar 15-17.

Wayudo yueyo nade ka luwore gi weche ma Yesu nosingo e Mathayo 11:28?

Wan gi jorit mabeyo mogik, wan gi osiepe mabeyo mogik, kendo wan gi tich maber mogik.​—w19.09, ite mar 23.

Ere kaka Jehova nyalo miyowa teko kod gombo mar timo dwache? (Fil. 2:13)

Otimonwa kamano sama wasomo Wach Nyasaye kendo paro matut kuom gik ma wasomo. Onyalo miyowa rohone maler mondo okonywa tiyo maber gi nyalo ma wan-go.​—w19.10, ite mar 21.

Gin ang’o monego watim ka pok watimo yiero moro mapek?

Gin gik moko abichgi: Lem kikwayo Nyasaye mondo omiyi rieko. Tim nonro matut. Non gimomiyo itimo yierono. Bed gi chenro moriere. Ng’e gik minyalo kod ma ok inyal.​—w19.11, ite mar 27-29.

Be puonj mar chuny ma ok tho nochakore gi weche ma Satan nonyiso Hawa e puodho mar Eden?

Nenore ni ok en kamano. Satan nonyiso Hawa ni ne ok odhi tho, to ok ni nodhi nenore mana ka gima otho to kare pod nodhi bedo mangima kamoro. Lamo duto mag miriambo ne otiek e Ataro ma ndalo Noa. Puonjno nochakore ka ne Nyasaye pok nokeyo joma ne gero ohinga mar Babel.​—w19.12, ite mar 15.