IWINJOGA nade sama osiepni moro ondikoni barua ma jiwi? Timotheo noyudo barua machal kamano kowuok kuom jaote Paulo, kendo baruano e ma sani iluongo e Muma ni 2 Timotheo. Nyalo bedo ni ka ne Timotheo oyudo baruano, nomanyo kamoro mokue mondo osom ane weche ma Paulo osiepne nondikone. Samoro nopenjore kama: To Paulo koro dhi nade? Be dibed ni baruani nigi weche moko ma nyalo konya e migawo mosemiya? Be dibed ni oting’o weche ma nyalo konya yudo nyak e tij lendo kod kaka anyalo konyo jomamoko? Mana kaka wabiro neno, Timotheo noyudo dwoko mag penjogo e baruano kod weche mamoko ma ne nyalo konye. Mokwongo, we wane ane weche moko madongo ma yudore e baruano ma nyalo konyowa.

Ka Timotheo nochako somo barua ma noorneno, noneno kaka Paulo nohere ahinya kendo dewe gadier. Paulo noluonge ni, “nyathina ma ahero.” (2 Tim. 1:2) Timotheo noyudo baruano e higa mar 65 ka en jahigni 30 gi wiye, kendo nosebedo gi lony kaka jaduong’-kanyakla. Nosebedo ka en gi Paulo kuom higni mang’eny kendo nopuonjore gik mathoth kuome.

Nyaka bed ni Timotheo noyudo jip ahinya bang’ ng’eyo ni Paulo ne nano maber e tembe ma noromogo. Paulo ne ni e tuech Rumi, kendo nochiegni nege. (2 Tim. 1:15, 16; 4:6-8) Timotheo ne nyalo neno kaka Paulo ne nigi chir e weche ma nondikogi: “Adhi nyime nano e weche duto.” (2 Tim. 2:8-13) Mana kaka Timotheo, wan bende wanyalo nano e chandruoge ma yudowa kuom luwo ranyisi maber ma Paulo noketonwa.

Paulo nojiwo Timotheo mondo one migawo ma nosemiye kaka migawo makende ahinya. Nonyiso Timotheo niya: “Mich mar Nyasaye man kuomi oliel ka mach.” (2 Tim. 1:6) E dho Grik, wach ma Paulo notiyogo ni khaʹri·sma iloko ni “mich.” Tiende en mich ma ng’ato yudo nikech ng’wono monyise to ok nikech en-gi ratiro mar yude. Timotheo noyudo michno ka nopwodhe ne migawo moro makende e kanyakla.​—1 Tim. 4:14.

 Timotheo nonego oti gi michno nade? Nyaka bed ni sama nosomo weche ma wacho ni, “oliel ka mach,” noparo kuom mach ma ne itiyogo e mier mathoth ma ne nyalo liel ka bebni kae to bang’e tho. Majno ne inyalo mok kendo mana ka omedne yien. Diksonari moro lero ni a·na·zo·py·reʹo en wach ma yudore e dho Grik ma Paulo notiyogo kowuoyo kuom “chako timo gimoro kendo, kata kudho mach mondo oliel kendo.” Wachno inyalo tigo e yor ranyisi ka iwuoyo kuom kaka “ng’ato nyalo chako timo gimoro gi kinda kendo.” Omiyo, Paulo ne temo jiwo Timotheo kama: ‘Ket Chunyi Kuom Tich Mosemiyi.’ E kindewagi bende, onego wabed gi kinda e tij Nyasaye mana kaka Paulo.

Sama Timotheo ne dhi nyime gi somo barua ma nondikne gi osiepne mogenono, noyudo weche mamoko ma ne dhi konye e migepe ma ne Nyasaye omiye. Paulo nondikone kama: “Rit mwandu maberno kokalo kuom roho maler ma odak e iwa.” (2 Tim. 1:14) En mwandu mane ma nosemi Timotheo? E wes motelo ne ma, Paulo nowuoyo e wi “weche mangima” ma ne gin adiera ma Timotheo noseyudo kokalo kuom Ndiko. (2 Tim. 1:13) Nonego opuonj adierano e kanyakla kendo ne jomamoko. (2 Tim. 4:1-5) Timotheo bende nosepwodh kaka jaduong’-kanyakla ma rito kueth mar Nyasaye. (1 Pet. 5:2) Nonego orit mwandu ma nosemiye, tiende ni, adiera ma nonego opuonj ji kitaye gi roho maler mar Jehova kod Wachne​—2 Tim. 3:14-17.

Wan bende osemiwa mwandu, tiende ni, adiera monego wayal ne jomamoko. (Mat. 28:19, 20) Onego wanyis ni wageno mwandu ma jaber ma osemiwano kuom lamo ma ok waweyo kendo bedo gi chenro maber mar puonjruok Wach Nyasaye. (Rumi 12:11, 12; 1 Tim. 4:13, 15, 16) Bende, nyalo bedo ni wan-gi migepe moko momedore kaka bedo jaduong’-kanyakla kata tiyo ne Nyasaye kuom thuolowa duto. Bedo gi mwandu ma kamago onego omi wabolre kendo geno kuom Nyasaye mondo okonywa timo migawo momiwa. Omiyo, onego wakwa Jehova mondo okonywa rito mwandu mosemiwa.

Migawo ma nomi Timotheo noriwo tiego jomamoko mondo gin be gitim migawono. Mano e momiyo Paulo nojiwo Timotheo niya: “Weche ma ne iwinjo koa kuoma, . . . iket wechego e lwet jo minyalo gen, mondo gin bende gibi gipuonj jomamoko e yo molony.” (2 Tim. 2:2) Ne dwarore ni Timotheo opuonj owete mamoko gik moko duto ma nosepuonjore. Owete matayo e kanyakla e kindegi bende onego otimo kamano. Jarit maber mar kanyakla ok onego oling’ aling’a gi gik mabeyo mosepuonjore. Kar mano, onego opuonj jomamoko mondo gin bende ging’e timo tijego. Ok onego obed maluor ni jogo biro bedo gi ng’eyo mang’eny moloye, kata timo maber moloye. Kuom mano, ok onego opuonj ng’ato mana weche matin e wi tich moro. Onego okony joma otiego obed joma ochwiny e migawo momigi. E yo ma kamano, owete “migeno” mosetieggo biro bedo gueth ne kanyakla ahinya.

Nyaka bed ni Timotheo ne mor ahinya ka noyudo barua ma Paulo nondikoneno. Wanyalo temo paro kaka ne ojasomo baruano nyadinwoya mondo one kaka nonyalo tiyo gi wechego sama otimo migepene.

Wan be dwaher tiyo gi wechego e ngimawa. Ere kaka wanyalo timo mano? En ka waweyo mondo mich mar Nyasaye man kuomwa oliel ka mach, ka warito mwandu maber mosemiwa, kendo ka watiego jomamoko. Mano biro miyo wan bende ‘watim tich mosemiwa e yo maber chuth,’ mana kaka Paulo nojiwo Timotheo.​—2 Tim. 4:5.