1. Achiel kuom gik ma nomiyo Yesu opimo jolupne gi rombe en ang’o?

YESU nopimo winjruok maber ma ne en-go gi jopuonjrene gi winjruok mantie e kind jakwath gi rombege. (Joh. 10:14) Ranyisino owinjore ndi! Rombe ong’eyoga jakwadhgi kendo giwinjoga dwonde. Nitie jawuoth moro ma noneno wachno gi wang’e. Nowacho kama: “An gi jowetena ne wadwaro mako vidio mar rombe moko, omiyo, ne watemo luongogi mondo gibi machiegni kodwa. Kata kamano, rombego ne ok obiro nikech ne gikia dwondwa. Kae to rawera moro ma jakwath nobiro, to ka noluongogi aluonga ni i, ne giluwe.”

2-3. (a) Ere kaka jolup Yesu nyisoga ni giwinjo dwonde? (b) En ang’o ma wabiro nono e sulani kod sula ma luwo?

² Ranyisi mar jawuothno paronwa weche ma Yesu nowacho e wi rombege, tiende ni, jopuonjrene. Nowacho kama: “Giniwinj dwonda.” (Joh. 10:16) To nikech Yesu ni e polo, ere kaka wanyalo winjo dwonde? Yo maduong’ ma wanyisogo ni wawinjo dwond Ruodhwa en kuom tiyo gi puonjge e ngimawa.​—Mat. 7:24, 25.

³ E sulani kod sula ma luwo, wabiro nono moko kuom weche ma Yesu nopuonjowa. Mana kaka wabiro neno, Yesu nopuonjowa ni nitie gik moko ma ok onego watim kod gik monego watim. Wabiro chako gi nono weche moko ariyo ma jakwadhwa maber nonyisowa ni kik watim.

4. Ka luwore gi Luka 12:29, en ang’o ma nyalo miyo wabed gi “parruok ahinya”?

⁴ Som Luka 12:29. Yesu nonyiso jolupne ni giwe “bedo gi parruok ahinya” e wi gige ringruok. Wang’eyo ni kinde duto Yesu puonjowaga e yo mariek kendo maber. Wagomboga  ahinya tiyo gi puonj ma Yesu nomiyowa, kata kamano, nitie seche ma ok yotga timo kamano. Ang’o momiyo?

5. Ang’o momiyo jomoko nyaloga bedo gi parruok e wi gige ringruok?

⁵ Nitie joma nyalo bedo gi parruok e wi gima gibiro chamo, gima gibiro rwako, kod kama gibiro dakie. Nyalo bedo ni gidak e pinje modhier. Samoro ok yotnegi yudo kata mana pesa moromo ma ginyalo ritogo joutegi. Kata, nyalo bedo ni ng’at ma ne konyogi e yor pesa notho, kendo jo modong’ onge yor konyruok. Bende, nitie ji mang’eny moselalo tijegi nikech tuo mar korona. (Ekl. 9:11) Ka po ni waseromo gi weche kaka mago, ere kaka wanyalo luwo puonj ma Yesu nomiyowa ni wawe bedo gi parruok?

6. Ler ane gima chieng’ moro notimore ne jaote Petro.

⁶ Nitie kinde moro ma Petro kod joote wetene ne ni e yie e Nam Galili ka ne apaka moro otugore, kendo ne gineno Yesu ka wuotho e wi pi. Petro nonyise niya: “Ruoth ka en in, to yiena abi iri ka awuotho e wi pi.” Bang’ ka Yesu noseluonge, nowuok e yie “mowuotho e wi pi kochomo ir Yesu.” Ne ane gima notimore bang’ mano. “Ka [Petro] noneno yamo mager, nobedo maluor mochako nimo. Noywak matek niya: ‘Ruoth, resa!’” Gikanyono Yesu norieyo bade morese. Nenore maler ni Petro ne nyalo dhi nyime wuotho e wi pi ma nosetugorego mana ka noketo pache kuom Yesu. To ka Petro nong’iyo yamo magerno, nobedo gi luoro kod kiawa, mochako nimo.​—Mat. 14:24-31.

7. En ang’o ma wanyalo puonjore kuom ranyisi mar Petro?

⁷ Wanyalo puonjore weche moko e wi ranyisi mar Petro. Ka ne Petro owuok e yie  mochako wuotho e wi pi, ne ok opar ni gimoro amora ne nyalo gale mochak nimo. Nogombo ni owuoth awuotha e wi pi nyaka ochop ir Yesu. Kata kamano, kar keto pache kuom Yesu, noketo pache kuom yamo mager ma noneno. En adier ni ok wanyal wuotho e wi pi, kata kamano, waromoga gi gik ma temo yiewa. Ka waweyo keto pachwa kuom Jehova kod singo mage, wanyalo chako nimo e yor ranyisi, tiende ni, yiewa nyalo chako dok chien mosmos. Kata warom mana gi tem maduong’ ma chalo nade, onego kinde duto waket pachwa kuom Jehova kod nyalo ma en-go mar konyowa. Ere kaka wanyalo timo mano?

8. En ang’o ma nyalo konyowa mondo kik waparre ahinya e wi gige ringruok?

⁸ Dwarore ni waket genowa kuom Jehova kar bedo gi parruok e wi chandruogewa. Par ni Jehova Wuonwa ma jahera osesingonwa ni obiro miyowa gige ringruok ma wadwaro, ka waketo dwache obedo mokwongo e ngimawa. (Mat. 6:32, 33) Jehova osebedo ka timo kamano ne jotichne. (Rap. 8:4, 15, 16; Zab. 37:25) Ka Jehova nyalo rito winy gi maua, donge ok onego waparre kuom gik ma wabiro chamo kata rwako! (Mat. 6:26-30; Fil. 4:6, 7) Mana kaka jonyuol ma johera miyoga nyithindgi gik ma gidwaro, e kaka Wuonwa ma jahera miyo joge gige ringruok ma gidwaro. Ee, wanyalo bedo gadier ni Jehova biro ritowa!

9. Ranyisi mar owadwa moro gi jaode puonji ang’o?

⁹ Ne ane ranyisi ma konyowa bedo gadier ni Jehova ritowaga e yore mag ringruok. Owadwa moro gi jaode ma tiyo ne Jehova kuom thuologi duto noriembo mtokgi moro ma noti kuom sa achiel kama, mondo gidhi gikaw nyimine moko ma nodak e kambi moro mar joma oringo moweyo thuchegi. Ne gidwaro ni giter nyiminego e chokruok moro mar Jokristo. Owadwano nowacho kama: “Bang’ chokruok, ne wagwelo nyiminego mondo gibi gichiem kodwa, to ne wafwenyo ni ne waonge chiemo.” Owadwano gi jaode ne dhi timo nang’o? Owadwano dhi nyime wacho kama: “Ka ne wachopo e odwa, ne wayudo bege ariyo madongo moting’o chiemo e nyim dho odwa. Ne wakia ng’at ma nokelogi kanyo. Jehova noritowa.” Kinde moko bang’e, mtok owadwano nokethore. Ne gitiyoga kode e tij lendo; kata kamano, ne gionge pesa mar lose. Ne gitero mtokano e garaj moro, ka gidwaro ng’eyo ni lose ne dhi dwaro pesa adi. Kae to dichwo moro nobiro e garaj kanyo mopenjo niya: “Ma en mtok ng’a?” Owadwano nonyise ni mano en mtoke, to okele e garaj kanyo mondo olose. Ng’atno nonyiso owadwano niya: “Onge wach. Jaoda dwaroga mtoka kaka mae kendo ma nigi rangi kaka mae. Diher usonago pesa adi?” Owadwano nowuok e garajno ka en gi pesa moromo nyiewo mtoka machielo. Notieko kama: “Ne wamor ma tamre gi nono e giko odiechiengno! Ne wang’eyo ni wachno ok opore apoya, to Jehova e ma notayo weche.”

10. Ere kaka Zaburi 37:5 jiwowa ni wawe bedo gi parruok e wi gige ringruok?

¹⁰ Sama wawinjo dwond jakwadhwa maber kendo waweyo bedo gi parruok e wi gige ringruok, wanyalo bedo gadier ni Jehova biro ritowa. (Som Zaburi 37:5; 1 Pet. 5:7) Par ane chandruoge ma wasewuoye e paragraf mar 5. Samoro nyaka chop sani, Jehova osebedo ka miyowa gik mochuno e ngima kokalo kuom tij andika ma watimo, janyuolwa, kata ng’ama chielo e odwa. Ka po ni ng’atno koro ok nyal miyowa gik mochuno, kata walalo  tijwa mar andika, Jehova pod biro yawonwa yo ma wayudogo gik mochuno. Wan gadier gi wachno. Wawuouru ane kuom wach machielo ma jakwath maber nonyisowa ni kik watim.

11. Ka luwore gi Mathayo 7:1, 2, en ang’o ma Yesu nonyisowa ni wawe timo, to ang’o momiyo seche moko luwo puonjno nyalo bedonwa matek?

¹¹ Som Mathayo 7:1, 2. Yesu nong’eyo ni nikech joma ne winje ne gin joma orem, ne nyalo bedonegi mayot keto pachgi kuom ketho mag jowetegi. Mano e momiyo nowacho ni: “Weuru ng’ado ne ji bura.” Wanyalo timo kinda ahinya mondo kik wang’ad ne Jokristo wetewa bura. Kata kamano, waduto warem. Ka po ni wafwenyo ni nitie seche moko ma waketoga pachwa ahinya kuom ketho mag jowetewa, en ang’o monego watim? Winj dwond Yesu kendo item matek mondo iwe ng’ado ne jomamoko bura.

12-13. Ere kaka paro matut kuom yo ma Jehova ne nenogo Daudi nyalo konyowa weyo ng’ado ne jomamoko bura?

¹² Wanyalo yudo ber ka waparo matut e wi ranyisi mar Jehova. Kinde duto oketoga pache kuom gik mabeyo ma ji timo. Wanyalo neno mano ka wanono gima Jehova notimo bang’ ka Daudi nosetimo richo moko madongo. Kuom ranyisi, Daudi noterore gi Bathsheba, kendo nogolo chik mondo oneg chwore. (2 Sa. 11:2-4, 14, 15, 24) Mano nomiyo Daudi okelo chandruok ne en owuon, joode, kaachiel gi mondene mamoko. (2 Sa. 12:10, 11) Kinde moro bende, Daudi noweyo geno kuom Jehova mi ogolo chik mondo okwan chwo mag Israel. To mano gima Jehova ne ok ochike mondo otim. Samoro Daudi notimo kamano nikech nodwaro pakore ni en gi oganda maduong’ mar lweny, kendo ni jolwenygo e ma nogeno. Ang’o ma ne wachno okelo? Jo-Israel ma dirom 70,000 notho nikech tuo malich!​—2 Sa. 24:1-4, 10-15.

¹³ Wawach ni ne idak e ndalogo, di ne ineno nade Daudi? Be di ne iwacho ni Jehova ne ok onego onyise ng’wono? Jehova to ne ok otimo kamano. Noketo pache e gik mabeyo ma Daudi nosebedo ka timo, kendo noneno ni Daudi noseloko chunye gadier. Mano nomiyo Jehova oweyone richonego. Jehova nong’eyo ni Daudi nohere ahinya kendo notemoga ahinya mondo otim gik makare. Donge imor ng’eyo ni Jehova Nyasachwa ng’iyoga mana gik mabeyo ma watimo?​—1 Ru. 9:4; 1 We. 29:10, 17.

14. En ang’o ma nyalo konyo Jokristo mondo kik ging’ad ne jowetegi bura?

¹⁴ Jehova ok gen-ga ni wabiro timo gik makare chuth. Wan bende ok onego wagen ni jomamoko biro timo gik makare chuth. Dwarore ni waket pachwa mana kuom gik mabeyo ma jowetewa timo. Yotga ahinya neno nyawo mag jowetewa kendo jarogi. Kata kamano, ng’at ma nigi winjruok motegno gi Jehova nyalo neno nyawo mag jomamoko to pod onano anana kodgi. Kidi moro miluongo ni diamond nyalo bedo mochido, kata kamano, ng’at mariek biro keto pache kuom nengo ma kidino biro bedogo koselwoke maler. Mana kaka Jehova kod Yesu, dwarore ni kik wane mana jowetewa gi oko, to wang’i kido mabeyo ma gin-go.

15. Ere kaka nono ngima ma jomamoko odakie nyalo konyowa mondo kik wang’adnegi bura ma ok owinjore?

¹⁵ Mopogore gi keto pachwa kuom gik mabeyo ma jowetewa timo, en ang’o machielo ma nyalo konyowa mondo kik wang’ad ne ji bura ma ok owinjore? Tem ane paro ngima ma gidakie. Ne ane ranyisini: Chieng’ moro ka Yesu ne ni e hekalu, noneno chi liel  moro modhier ka luto pesa ariyo ma mingli e sandug keno. Yesu ne ok openjo ni: “Ang’o momiyo ochiwo mana matin kamano?” Yesu ne ok oketo pache kuom gima chi lielno nochiwo, kar mano, noneno chuny maler ma miyono ne nigo kod ngima ma nodakie, mi nopwoye nikech nochiwo duto ma nonyalo.​—Luka 21:1-4.

16. Ranyisi mar Veronica puonji ang’o?

¹⁶ Ranyisi mar Nyaminwa Veronica nyalo konyowa neno gimomiyo dwarore ni wang’e ngima ma jowetewa odakie. E kanyakla ma ne entie, ne nitie nyaminwa moro ma janyuol achiel, kendo ne en gi nyathi ma wuoyi. Veronica wacho kama: “Nyaminwano gi wuode seche moko ne jabarega ne chokruok kod tij lendo. Wechego nomiyo ne ok aherogi. Kata kamano, chieng’ moro ne adhi lendo gi nyaminwano. Nonyisa pek ma nosebedo koromogo nikech wuodeno ne nigi tuo mar wich. Notimoga duto monyalo mondo giyud gige ringruok kod mag chuny. Seche moko ne chunega dhi e chokruok mar kanyakla machielo nikech tuo mar wuodeno.” Veronica notieko kama: “Ne ok ang’eyo pek ma nyaminwano ne kalee. Sani ahero nyaminwano ahinya kendo apwoyega nikech kinda duto motimo mondo oti ne Jehova.”

17. En ang’o ma Jakobo 2:8 nyisowa ni watim, to ere kaka wanyalo timo mano?

¹⁷ Ang’o monego watim ka wafwenyo ni wang’ado ne Jakristo wadwa moro bura ma  ok kare? Onego wang’e ni Muma nyisowa ni nyaka waher jowetewa. (Som Jakobo 2:8.) Bende, onego wakwa Jehova e lamo gi kinda mondo okonywa wawe ng’ado ne jowetewa bura. Wanyalo timo ka luwore gi lamowa kuom kawo okang’ mar wuoyo gi ng’at ma wasebedo ka wang’adone burano. Mano nyalo konyowa ng’eye maber. Wanyalo kwaye mondo wadhi kode e tij lendo. Bende, wanyalo gwele e gago e utewa. Kaka wamedo ng’ere kode maber, e kaka dwarore ni wamed luwo ranyisi mar Jehova kod Yesu kuom keto pachwa mana kuom gik mabeyo motimo. Ka watimo kamano, wabiro nyiso ni wawinjo dwond jakwadhwa maber ma nyisowa ni kik wang’ad ne jomamoko bura.

18. Ere kaka wanyalo nyiso ni waluwo dwond jakwadhwa maber?

¹⁸ Mana kaka rombe winjoga dwond jakwadhgi, e kaka jolup Yesu winjoga dwonde. Ka watemo matek mondo kik wabed gi parruok e wi gige ringruok kendo wawe ng’ado ne jomamoko bura, Jehova gi Yesu biro guedho kindawa. Bed ni wan e “kueth matin” kata “rombe mamoko,” wadhiuru nyime winjo dwond jakwadhwa maber kendo luwo kaka ochikowa. (Luka 12:32; Joh. 10:11, 14, 16) E sula ma luwo, wabiro nono gik moko ariyo ma Yesu nonyiso jolupne mondo gitim.