1. En chuny mane maber ma jotich Jehova osebedo ka nyiso kuom higni mang’eny?

 BE IKAWO mapek winjruok manie kindi gi Jehova? Onge kiawa ni en kamano! Ng’e ni ok in kendi. Chakre higni machon, ji tara gi tara osewinjo kamano e chunygi. (Zab. 104:33, 34) Ji mang’eny oseyie tuonore gik ma gihero mondo giti ne Jehova. Mano e gima Jo-Nazir e kinde Jo-Israel machon notimo. Jo-Nazir ne gin jomage, to ang’o ma wanyalo puonjore kuom ranyisigi?

2. (a) Jo-Nazir ne gin jomage? (Kwan 6:1, 2) (b) Ang’o momiyo Jo-Israel moko noyiero timo singruok mar bedo Jo-Nazir?

² E dho Hibrania, wach molok ni “Ja-Nazir” tiende en “Ng’at Moyiedhi,” “Ng’at Moket Tenge,” kata “Ng’at Mochiwore.” Wachno owinjore ahinya gi Jo-Israel ma ne jokinda kendo ma noyie tuonore gik ma ne gigeno mondo giti ne Jehova e yore makende. Chik Musa noyie ne dichwo kata dhako singore ne Jehova ni oyiero tiyo ne kaka Ja-Nazir kuom kinde moro. a (Som Kwan 6:1, 2.) Singruogno noriwo luwo chike moko ma ne ok ochuno ni Jo-Israel mamoko oluw. Ka bedo Ja-Nazir ne en gima ok ochuno, kare ang’o momiyo Ja-Israel ne nyalo yiero migawo ma kamano? Nyaka bed ni gima duong’ ma ne nyalo chwalo Ja-Israel mondo obed Ja-Nazir ne en hera matut ma noherogo Jehova  kod kaka nomor gi yo ma Jehova noseguedhego.—Rap. 6:5; 16:17.

3. Jotich Nyasaye ma kindewagi chalre gi Jo-Nazir e yo mane?

³ Chenro mar bedo gi Jo-Nazir norumo ka ne owil Chik Musa gi “chik Kristo.” (Gal. 6:2; Rumi 10:4) Kata kamano, mana kaka Jo-Nazir, jotich Jehova e kindewagi dhi nyime tiyo ne Jehova gi chunygi duto, pachgi duto, kod tekogi duto. (Mar. 12:30) Wasingore timo kamano sama wachiwo ngimawa ne Jehova. Dak ka luwore gi singruogno oriwo timo dwach Jehova kendo tuonore gik ma wahero mondo watine. Sama wanono kaka Jo-Nazir nodak ka luwore gi singruok ma ne gitimo, wanyalo puonjore gik mang’eny ma nyalo konyowa mondo wan bende wadag ka luwore gi singruokwa. b (Mat. 16:24) We wane ane ranyisi moko.

YIE TUONORI

4. Ka luwore gi Kwan 6:3, 4, en ang’o ma ne Jo-Nazir oyie tuonore?

⁴ Som Kwan 6:3, 4. Jo-Nazir ne ok onego omadh kong’o kata gimoro amora molos gi mzabibu, bed ni en mzabibu mosechiek kata mosetwo. Jomamoko to ne nyalo chamo achama gigo nikech timo mano ne ok en richo. Muma wacho ni “divai ma miyo chuny dhano mor” en mich mowuok kuom Nyasaye. (Zab. 104:14, 15) To e ma Jo-Nazir noyie tuonore thuolo mar yudo mor kuom gigo. c

5. Gin ang’o ma Madián gi Marcela noyie tuonore, to nikech ang’o?

⁵ Mana kaka Jo-Nazir, wan bende wayie tuonore gik mang’eny mondo wati ne Jehova gi chunywa duto. Ne ane ranyisi mar Madián gi Marcela jaode. d Ne gidak e ngima mayom. Madián ne tiyo tich ma nigi osara mabup ma ne miyo ginyalo dak e ot ma jaber. Kata kamano, ne gigombo timo mathoth e tij Jehova. Omiyo, ne ging’ado ni ne gidhi timo lokruoge moko. Giwacho kama: “Ne wachako dwoko piny gik ma wanyiewoga. Ne wadar ma wadhi e ot matin kendo ne wauso mtokwa.” Ne ok ochuno ni  Madián gi Marcela otim lokruoge ma kamago, kata kamano, ne giyiero timo kamano mondo giti ne Nyasaye kuom thuolo momedore. Gimor ahinya gi yiero ma ne gitimono.

6. Ang’o momiyo Jokristo ma kindewagi oyie tuonore gik ma gihero? (Ne picha bende.)

⁶ Jokristo mathoth e kindewagi oyie tuonore gik mang’eny mondo gibed gi thuolo momedore mar timo tij Jehova kendo mano kelonegi mor mang’eny ahinya. (1 Kor. 9:3-6) Ok ni Jehova dwaro ni watuonre gik ma waherogo; to bende, thoth gik ma watuonorego ok gin gik maricho. Kuom ranyisi, nitie joma oyie weyo tijegi mabeyo kata utegi. Jomoko bende oseyiero mondo kik gidonj e kend kuom kinde kata weyo bedo gi nyithindo. Jomoko bende oseyiero dhi tiyo ne Jehova kuonde ma jolendo dwaroree moloyo kata kochuno ni gidag mabor gi joodgi. Thothwa kawoga okenge ma kamago nikech dwaher miyo Jehova gima berie mogik. Bed gadier chuth ni Jehova ogeni ahinya nikech iyie tuonori gik mihero mondo itine, bed ni gima ituonori en gima duong’ kata matin.—Hib. 6:10.

YIE BEDO MOPOGORE

7. En pek mane ma Ja-Nazir ne nyalo romogo sama otemo matek mondo omakre gi singruokne? (Kwan 6:5) (Ne picha bende.)

⁷ Som Kwan 6:5. Jo-Nazir nosingore ni ne ok gidhi lielo wigi. Mano ne en yiero ma nyiso ni gibolore chuth ne Jehova. Bed ni Ja-Israel moro noyiero bedo Ja-Nazir kuom higni manok kata mang’eny, ne yot mondo Jo-Israel mamoko ofweny ni ne ok olielga wiye. Ka po ni wedene gi osiepene ne riwe lwedo e migape kaka Ja-Nazir, ne nyalo bedone mayot bedo mopogore. Gima lit en ni higni moko bang’e, nitie Jo-Israel moko ma ne ok ohero Jo-Nazir kata riwogi lwedo. E kinde janabi Amos, Jo-Israel ma noseng’anyo ‘ne siko miyo Jo-Nazir divai mondo gimadhi,’ to nenore ni ne gitimo kamano mondo gimi Jo-Nazir owe makore gi singruok ma ne gisetimo e wach divai. (Amos 2:12) Mano nyiso ni seche moko, mondo ne Ja-Nazir omakre gi migape kendo obed mopogore, ne nyaka obed gi chir makende.

8. Ranyisi mar Benjamin jiwi nade?

⁸ Wan bende Jehova nyalo konyowa kata ka po ni ne wanyuolore joma luor-luor. Ne ane ranyisi mar Benjamin ma en Janeno  ma jahigni apar e piny Norway. Skundgi nobago nyasi mar riwo piny Ukraine lwedo e lweny ma dhi nyime. Nonyis nyithindo ni giwer wer moro ka girwako lewni ma nigi rangi mag bendera mar Ukraine. Mondo Benjamin kik donj e nyasino, nochano bedo gichien. Kata kamano, japuonjgi moro nonene moluonge matek niya: “Bi iriwri kodwa kae. In e ma wariti!” Benjamin nochoko chir monyiso japuonjgino niya: “An ok adonjra e ywaruok mag pinyni kata weche siasa. Nitie kata Joneno mag Jehova mang’eny manie jela nikech gidagi dhi e lweny.” Japuonjno norwako wachno, moyie ne Benjamin bedo mabor gi kama nitimoe nyasino. Kata kamano, bang’e joklasgi nochako penje gimomiyo ne ok oriwore kodgi. Luoro nomake ma nochiegni mana ywak, kata kamano, nochoko chir monyiso joklasgi duto mana gima nonyiso japuonjcha. Bang’e, Benjamin nonyiso jonyuolne ni nowinjo e chunye ni Jehova e ma nokonye mondo osir yiene gi chir.

9. En yo mane ma wanyalo miyogo chuny Jehova mor?

⁹ Nikech wayiero timo dwach Jehova, jomamoko nenoga ni wan joma opogore. Chir dwarore ahinya mondo wanyis jotich wetewa kata joskul wetewa ni wan Joneno mag Jehova. To kaka pinyni medo bedo marach moloyo, e kaka wabiro medo yudo ka ok yot ahinya dak ka luwore gi puonj mag Muma kendo lando ne jomamoko wach maber. (2 Tim. 1:8; 3:13) Kata kamano, par kinde duto ni ka wabedo gi chir kendo nyiso ni wapogore gi joma ok ti ne Jehova, wamiyo ‘chunye mor.’—Nge. 27:11; Mal. 3:18.

KET JEHOVA OBED MOKWONGO E NGIMANI

10. Ere kaka luwo chik manie Kwan 6:6, 7 ne nyalo bedo tem maduong’ ne Jo-Nazir?

¹⁰ Som Kwan 6:6, 7. Jo-Nazir ne ok onego osud machiegni gi ng’at motho. Nyalo nenore ka gima mano ne ok en wach malich ahinya. Kata kamano, e ndalo Jo-Israel, Ja-Nazir ne nyalo yudo ka luwo chikno tek ahinya sama watne moro machiegni kode otho. Achiel kuom gik ma ji ne timoga sama giywago ng’at motho ne en dhi machiegni gi ringrene. (Joh. 19:39, 40; Tich 9:36-40) Ja-Nazir ne ok nyal timo kamano. Kata sama achiel kuom joodgi e ma notho, pod  ne nyaka gimakre gi singruokgi. Onge kiawa ni Jehova ne miyoga Jo-Nazirgo teko mar nyagore gi pek ma ne giromogago.

11. Ang’o ma Jakristo nyaka ng’ad ni obiro timo sama otimo yiero ma mulo joodgi? (Ne picha bende.)

¹¹ Nikech wan Jokristo, wakawo mapek ahinya chiwruok ma ne watimo ne Jehova. Mano mulo nyaka yiero moko ma watimoga motudore gi joodwa. En adier ni wakawo mapek ting’ ma Ndiko omiyowa mar rito joodwa. Kata kamano, ok waket joodwa obed motelo ne dwach Jehova. (Mat. 10:35-37; 1 Tim. 5:8) Mano seche moko nyalo miyo walal kata mana kuwe manie kindwa gi joodwa mana ni mondo wamor Jehova.

12. Ka ne jaod Alexandru kwede, ang’o ma notimo, to ang’o ma ne ok otimo?

¹² Ne ane ranyisi mar Alexandru kod Dorina jaode. Ne gichako puonjore Muma, to higa achiel bang’e Dorina noweyo puonjruok kendo nodwaro ni Alexandru bende owe. Kata kamano, Alexandru nonyise gi rieko kendo e yo mamuol ni ne ok odhi weyo puonjruok. Wachno ne ok omoro Dorina kendo notemo chuno jaode mondo owe puonjore. Alexandru wacho ni notemoga ketore e chal mar jaode, kata kamano, weche ne ok yot. Kinde moko ka ne Dorina kwede matek kendo dwoke marach, nochiegni jok gi puonjruok Muma. Kata kamano, Alexandru nonano kendo noketo Jehova obed motelo e ngimane, ka e sechego bende otimo gik ma nyiso ni ohero chiege kendo omiye luor. Gikone, ranyisine maber nojiwo Dorina mondo ochak puonjore Muma kendo, morwako adiera.—Ne vidio ma yudore e jw.org/luo ma wiye wacho ni, Alexandru gi Dorina Văcar: “Hera Hore Mos Kendo Ong’won” e bwo “Adiera Loko Kit Ngima Ji.”

13. Ere kaka wanyalo nyiso ni wahero Jehova kod joodwa?

¹³ Jehova e ma nochako chenro mar joot, kendo doher ni joot odag gi mor. (Efe. 3:14, 15) To mondo wabed gi mor madier, nyaka watim gik ma Jehova dwaro. Bed gadier chuth ni Jehova mor ahinya gi kinda mitimo mondo ilame gi chunyi duto, ka e sechego bende irito joodu e yo maber, iherogi, kendo imiyogi luor.—Rumi 12:10.

JIW JOMAMOKO MONDO GIBED GI CHUNY KAKA MAR JO-NAZIR

14. Gin jomage monego wajiw?

¹⁴ Ji duto moyiero tiyo ne Jehova onego oikre tuonore gik moko nikech gihere.  Timo mano ok yotga kinde duto. Ere kaka wanyalo konyo jowetewa mondo obed gi chuny ma kamano? En kuom jiwogi. (Ayub 16:5) Be nitie jomoko e kanyaklau ma temo keto ngimagi obed mayot mondo giti ne Jehova e okang’ momedore? Be ing’eyo rowere moko moyie bedo mopogore gi jowetegi e skul kata obedo ni timo mano ok yot? To nade jopuonjre Muma kod Jokristo wetewa moko ma nyaka ked matek ahinya mondo gisik ka gimakore gi Jehova nikech joodgi kwedogi? Watiuru gi thuolo moro amora moneno e jiwo joma kamago ka wanyisogi kaka wamor gi chuny ma ginyiso kod chir ma gin-go.—File. 4, 5, 7.

15. Ere kaka jomoko osegasiro owete gi nyimine ma tiyo ne Nyasaye kuom thuologi duto?

¹⁵ Seche moko wanyalo bedo gi nyalo mar chiwo kony mag ringruok ne Jokristo wetewa ma tiyo ne Nyasaye kuom thuologi duto. (Nge. 19:17; Hib. 13:16) Mano e gima nyaminwa moro ma hike ng’eny manie piny Sri Lanka ne gombo timo. Nomedne pesa mar ritaya kendo nodwaro ni okony nyimine moko ariyo ma jopainia ma ne nigi pek mag yuto mondo gidhi nyime gi migapgi. Omiyo, nong’ado ni ne odhi miyogi pesa moro matin dwe ka dwe mondo okonygi e garama mag goyo simu. To mano kaka nyaminwano nonyiso chuny maber!

16. Ang’o ma wanyalo puonjore kuom chenro mar bedo gi Jo-Nazir e ndalo Jo-Israel?

¹⁶ Wanyalo puonjore gik mathoth ahinya kuom ranyisi maber ma Jo-Nazir noketonwa. Kata kamano, chenro mar bedo gi Jo-Nazir fwenyonwa wach moro bende e wi Jehova Wuonwa manie polo. Jehova ni gadier ni wagombo more kendo ni waikore tuonore gik ma wahero mondo wadag ka luwore gi singruok ma ne watimo ka ne wachiworene. Odhialowa gi thuolo mar yiero wawegi yore ma wanyalo nyisogo ni wahere. (Nge. 23:15, 16; Mar. 10:28-30; 1 Joh. 4:19) Chenro mar bedo gi Jo-Nazir nyiso maler ni Jehova neno gik ma watuonore mondo watine, kendo omor kodwa ahinya nikech mano. Kuom mano, wang’aduru ni wabiro dhi nyime tiyo ne Jehova gi chunywa duto.