HIGNI 2,000 mokalo, Yesu nowacho kama: “Tij keyo duong’, to jotich e ma nok. Omiyo, kwauru Ruodh keyo mondo oor jotich e keyone.” (Luka 10:2) Mano e kaka weche chalo e piny Myanmar e ndalowagi. Ang’o momiyo wawacho kamano? En nikech nitie ji milion 55 e pinyno, to joland wach maber gin mana ji 4,200!

Kata kamano, Jehova ma e “Ruodh keyo” osechwalo owete gi nyimine mathoth ma wuok e pinje mamoko mondo odhi e piny Myanmar ma ni Asia mondo gikony e tij keyo kuno. Ang’o momiyo ne giwuok e pinjegi? Ere kaka ne okonygi kawo okang’ ma kamano? To gin gueth mage ma giyudo sani? We wane ane.

Higni moko mokalo, tuo ndulme nogoyo painia ma nyinge Kazuhiro ma a e piny Japan mi pache olal, kendo noring kode e osiptal. Laktar nonyise ni ne ok odhi riembo mtoka kuom higni ariyo. Wachno nomako dho Kazuhiro. Nopenjore niya: ‘Ere kaka abiro dhi nyime timo tich ma ahero mogik, ma en tij painia?’ Nolemo kosayo Jehova mondo oyawne yo mar dhi nyime bedo painia.

Kazuhiro wacho kama: “Bang’ dwe achiel, owadwa moro ma ne lendo e piny Myanmar nowinjo wach tuona. Nogona simu konyisa niya: ‘E piny Myanmar thoth ji idho mana bas. Ka ibiro koni, ibiro dhi nyime gi tij painia ma ok ochuno ni iriemb mtoka!’ Napenjo laktar ma ne thiedha ka be ne anyalo dhi Myanmar gi tuo ma kamano. Dwoko ma nomiya nomiyo ahum nono. Nonyisa niya: ‘Nitie laktar moro molimowa kae kowuok Myanmar, to olony ahinya e tuoche mag obwongo. Abiro tudi kode mondo ka tuono ogoyi piny kendo, to okonyi.’ Naneno ni Jehova e ma nodwoko lamona.”

Mapiyo nono, Kazuhiro nondiko barua ne ofis ma Myanmar konyisogi ni nogombo dhi kuno gi jaode mondo gilend kaka jopainia. Ndalo abich bang’e, ofisno nomiyogi dwoko ka nyisogi niya, “Biuru, wadwaro jopainia momedore!” Kazuhiro gi Mari jaode nouso mtoknigi, ne gimanyo visa, kae to giidho ndege ma gidhi. Sani gin e grup moro mar sign-language ma ni Mandalay. Kazuhiro wacho kama: “Gik mosetimorenwagi osemiyo wamedo bedo gadier gi weche ma ni e Zaburi 37:5 ma wacho niya: ‘Kwa Jehova mondo oriti e yori; gen kuome bende, mi notimni kaka ikwaye.’”

E higa mar 2014, Joneno mag Jehova ma Myanmar noyudo thuolo makende mar bedo gi chokruok  moyiedhi e pinyno. Joneno mang’eny ma a e pinje mamoko nodhi e chokruogno. Achiel kuomgi miluongo ni Monique ma jahigni 30 gi wiye ma wuok Amerka wacho kama: “Bang’ wuok e chokruogno, nakwayo Jehova mondo okonya ng’eyo okang’ ma nonego akaw. Bende, nanyiso jonyuolna kaka nagombo tiyo ne Nyasaye e okang’ momedore. Waduto ne wawinjore ni ne onego adog Myanmar, mak mana ni ne okawo kinde malach kod lamo mathoth ka ne pok ang’ado paro mogik.” Monique nyisowa gimomiyo.

“Yesu nojiwo jolupne mondo ‘okwan nengo’ ka pok gikawo okang’ moro amora. Omiyo napenjora kama: ‘Be abiro nyalo dar adier? Be abiro yudo gik ringruok ma dwarore ma ok ochuno ni ati gi thuolo malach e tij yuto?’” Owacho niya: “Nafwenyo mapiyo ni naonge pesa moromo ma ne anyalo dhi konyorago e piny machielo.” To kare ere kaka nokelo dhi Myanmar?—Luka 14:28.

Monique wacho niya: “Chieng’ moro, jatenda noluonga. Ne adhi ka aluor luor ka aparo ni ne odhi riemba e tich. Ka nachopo ire, nayudo ka kare nodwaro mana goyona erokamano kuom tich maber. Nonyisa ni nodwaro miya pesa moro matin mogoyonago erokamano. To gimiwuoro en ni pesa ma nomiyano ne romre gi pesa duto ma ne adwaro mondo alogo dije mag pesa ka pok adar!”

Monique osebedo ka lendo e piny Myanmar chakre Desemba 2014. Dhi lendo kuonde ma jolendo dwaroree ahinya miyo owinjo nade sani? Owacho kama: “Lendo kae mora sipwap. An gi ji adek ma apuonjo Muma. Achiel kuomgi en jahigni 67. Okwakaga kobwonjo sama omosa. Ka ne opuonjore ni nying Nyasaye en Jehova, nomor ma pi wang’e orengni. Nowacho niya: ‘Nyaka ne nyuola, kawuono e ma ahangoe winjo ni nying Nyasaye en Jehova. In nyathi matin ahinya kuoma, kata kamano, ipuonja gima duong’ ahinya ma ne pok ang’eyoga e ngimana te.’ An bende pi wang’a norengni. Weche kaka magi miyo lendo kuonde ma jolendo dwaroree ahinya bedo ma mit.” Kinde matin mokalo, Monique noyudo thuolo mar dhi e Skul mar Joland-Injili mar Pinyruoth.

Gima chielo ma nojiwo ji mondo odhi olend e piny Myanmar ne en Kitabu cha Mwaka ma higa 2013 ma ne owuoyo e wi pinyno. Nyaminwa ma nyinge Li ma jahigni 30 gi wiye nodakga Asia. Notimoga tij andika kuom thuolone duto, kata kamano, weche ma nondik e Kitabu cha Mwaka nomiyo ochako paro ka be nonyalo dhi lendo Myanmar. Owacho niya: “E higa mar 2014 ka ne adhi e chokruok moyiedhi ma notim Yangon, naromo gi owadwa moro gi jaode ma nochiwore dhi lendo ne joma wacho dho China e piny Myanmar. Nikech ang’eyo dho China, ne ayiero mar dhi siro grup ma wacho dho China e piny Myanmar. Ne atudora gi Monique kae to wadhi Mandalay. Jehova noguedhowa ma wayudo skul ma ne wanyalo puonjee kuom odiechienge moko, kendo ne wayudo ot ma ne wanyalo dakie mana machiegni gi skundno. Kata obedo ni piny liet ahinya koni kendo nitie pek mamoko, tij lendo mora kae malich. Jo-Myanmar ok odak e ngima ma malo, kata kamano, gibolore kendo giikore winjo wach maber. En gima ber neno kaka Jehova medo chwalo tij lendo mondo otimre e okang’ mapiyo. An gadier ni Jehova e ma ne dwaro ni abi alend Mandalay.”

Owete gi nyimine mosechiwore dhi lendo e piny Myanmar oseneno kaka Jehova osebedo ka dwoko lamogi. Ne ane ranyisi mar Jumpei kod Nao chiege ma gin johigni 30 gi wiye. Chon ne gin-ga e kanyakla mar sign-language e piny Japan. Ang’o ma nochwalogi mondo gidhi Myanmar? Jumpei wacho niya: “Nyaka a chon, ne wan gi gombo mar dhi lendo  e piny ma jolendo dwaroree ahinya. Owadwa moro ma ne wan-go e kanyakla mar sign-language nodar ma odhi Myanmar. Kata obedo ni ne wasekuno mana pesa matin, ka nochopo Mei 2010, wan be ne wadhi Myanmar. Owete gi nyimine ma kuno norwakowa gi mor ma tamre gi nono!” Jumpei neno nade lendo ne momni e piny Myanmar? Owacho kama: “Ji mang’eny nigi siso mar puonjore Muma. Sama wanyiso momni vidio mag sign-language ka walendonegi, gibedoga ma mor ahinya. Wamor ahinya ni ne wayiero biro tiyo ne Jehova koni!”

Ere kaka Jumpei gi Nao osebedo ka nyagore gi weche mag pesa? Jumpei wacho kama: “Bang’ higni adek, pesawa ne dhi ka rumo. Ma nodong’ ne ok nyal romowa chulo ot e higa ma luwo. An gi jaoda ne walemo gi kinda ahinya mondo Jehova okonywa. Ne wabwok ahinya ka mapiyo nono ne wayudo barua mowuok e ofis ka nyisowa ni omiwa migawo mar bedo jopainia makende kuom kinde! Ne wageno kuom Jehova, kendo nodhi nyime sirowa. Osebedo ka okonyowa e yore duto.” Jumpei gi Nao yande oyudo thuolo mar dhi e Skul mar Joland-Injili mar Pinyruoth.

Ne ane ranyisi mar Owadwa Simone ma jahigni 40 gi wiye ma Ja-Italy kod Anna jaode ma hike hawo 40 ma Nya-New Zealand. Ang’o ma nochwalogi mondo gidhi Myanmar? Anna dwoko kama: “Kitabu cha Mwaka ma 2013 ma nowuoyo e wi Myanmar e ma nochwalowa!” Simone wacho kama: “Lendo e piny Myanmar en thuolo ma jaber ahinya. Ngima ok oridore koni ahinya, kendo an gi thuolo mang’eny mar tiyo ne Jehova. En gima morowa neno kaka Jehova ritowa maber sama walendo e alwora ma jolendo dwaroree.” (Zab. 121:5) Anna wacho kama: “Ne pok abedoga mamor kama! Wadak e ngima mayot. Sani ayudo thuolo mang’eny mar bedo kanyachiel gi jaoda. Bende, waseyudo osiepe manyien ma wageno ahinya. Ji mang’eny ok ochayo Joneno mag Jehova, kendo lendo e alworani mit miwuoro!” Ang’o momiyo?

Anna wacho kama: “Chieng’ moro nalendo ne nyako moro ma ja yunivasiti e chiro kae to wachano mondo warom kendo. Ka ne waromo, ne obiro gi osiepne moro. Chieng’ machielo, ne okelo osiepene mamoko. Bang’e, nobiro gi mamoko kendo momedore. Sani apuonjora gi ji abich moko kuomgi.” Simone wacho kama: “Joma waromogo e tij lendo gin joma beyo kendo gin gi penjo mang’eny. Ng’enygi dwaro ng’eyo mathoth. Ging’eny ma koro thuolo ok romwa mar puonjogi giduto.”

Gin okenge mage mamoko ma ng’ato nyalo kawo ka doher dhi e piny ma jolendo dwaroree? Nyaminwa Mizuho ma wuok Japan wacho niya: “An gi Sachio jaoda ne wagombo ahinya dhi lendo e piny ma jolendo dwaroree ahinya, kata kamano, ne ok wang’eyo piny ma ne wanyalo dhiye. Kitabu cha Mwaka ma 2013 ma ne wuoyo kuom Myanmar ne omulo  chunywa ahinya mi wachako paro ka be ne wanyalo dhi lendo e pinyno.” Sachio medo wacho niya: “Ne wayiero dhi limo taon mar Yangon kuom juma achiel mondo wane anea komondi kaka ngima ma kuno chalo. Limbe machuokno nomiyo wabedo gadier ni ne wanyalo dhi kuno.”

Rodney gi Jane jaode mag gin Jo-Australia ma johigni 50 gi wiye, kaachiel gi wuodgi ma Jordan kod nyargi ma Danica osechiwore lendo e piny Myanmar chakre higa mar 2010. Rodney wacho niya: “Neno kaka ji mang’eny nigi riyo mar ng’eyo Nyasaye nojiwowa ahinya. Anyalo jiwo joot mamoko mondo gibi gibilie abila tij lendo e piny Myanmar kae.” Nikech ang’o? Omedo kama: “Chiwruok ma ne wachiworego kae osemiyo joodwa obedo machiegni ahinya gi Jehova! Rowere mang’eny tinde odichga mana gi simbegi, mtokni, tije andika, kod gik mamoko ma kamago. Nyithindwa to odich gi puonjore dhok ma ginyalo lendonego ji. Gitemo ng’eyo kaka ginyalo wuoyo gi ji ma giromogo e tij lendo ma ok olony gi Muma, kaka ginyalo chiwo paro e chokruoge, kod dije mamoko motudore gi tij Nyasaye.”

Owadwa Oliver ma hike hawo 40 ma wuok Amerka wacho gimomiyo onyalo jiwo jomamoko mondo ochiwre tiyo ne Jehova e pinje ma jolendo dwaroree ahinya. Owacho niya: “Tiyo ne Jehova e alwora ma ok ang’iyogo osekelona ber mathoth. Bedo mabor gi pinywa osemiyo amedo bedo gi chir, kendo asepuonjora geno kuom Jehova bed ni weche tek kata yot. Tiyo kanyachiel gi joma ne ok wapon kamoro achiel osemiyo amedo bedo gadier chuth ni onge gimoro amora e pinyni ma nyalo riwo ji kaka Pinyruodh Nyasaye timo.” Sani, Oliver gi Anna jaode tiyo ne Jehova gi kinda ka gilendo ne joma wacho dho China.

Nyaminwa Trazel ma sani jahigni 50 gi wiye ma wuok Australia osebedo ka lendo e piny Myanmar chakre higa mar 2004. Owacho niya: “Ka onge gimoro ma dimoni dhi lendo e piny ma jolendo dwaroree ahinya, to ajiwi ni ichiwri mapiyo. Gik ma aseneno kae osemiyo abedo gadier ni ka ng’ato ochiwore tiyo ne Jehova e okang’ malach, Jehova guedho kindane. Chon ne ok aparga ni chieng’ moro nanyalo dak e ngima ma mit kama. En e ngima maberie mogik, kendo ma nigi gueth mang’eny.”

Donge weche mabeyo ma wasomo mowuok kuom owete gi nyimine mochiwore e piny Myanmar onego ojiwi mondo in be ichiwri dhi konyo joma nigi riyo mar ng’eyo Nyasaye kuonde ma jolendo dwaroree ahinya? Ee, owetewa gi nyiminewa mosechiwore e piny Myanmar goyoni milome ka giwacho niya: “Bi ane Myanmar koni mondo ikonywa!”