Jehova dwaro ni ji ariyo mokendore osik ka gimor kendo gimed tego winjruok manie kindgi. (Mat. 19:4-6) Ka po ni idwaro donjo e kend, en kanye minyalo yudoe ng’at mowinjore minyalo kendorigo? Nikech Jehova en Jachuechwa, ong’eyo maber gik ma dwarore ni watim mondo kendwa odhi maber. Omiyo, ka iluwo puonj ma omiyowa, ibiro bedo gi kend ma nigi mor. Ne ane moko kuom puonjgo.

Mokwongo, dwarore ni wang’e wachni: “Chuny otimo wuond mang’eny moloyo gimoro amora, kendo onyalo kelo hinyruok.” (Jer. 17:9) Sama ji ariyo ochako timo kisera, ginyalo ng’iyo mapiyo, kendo ng’iyono nyalo miyo kik ging’ad paro e yo mariek. Ka ji ariyo oyiero ni gibiro kendore ka giluwo mana kaka chunygi tayogi kende, kinde mang’eny mano keloga chandruok. (Nge. 28:26) Mano e momiyo ok ber ka ji ariyo chako nyisore hera ahinya sama e ka gichako timo kisera. Bende, ok ber timo singruok moko ka pok ging’ere maber.

Ngeche 22:3 wacho kama: “Ng’at mariek neno masira ka biro kendo opondo, ng’at ma riekone tin to dhi adhiya kendo ohinyore.” Gin chandruoge mage ma ng’ato nyalo yudo komanyo ng’at monyalo kendorego e websait? Nitie joma oseae gi rach bang’ fwenyo ni joma ne gitudorego e websaitgo nowuondogi. Bende, nitie joma oseloso akaunt moko mag miriambo e websait mondo gimago joma riekogi tin pesa. Nitie kinde ma joma wuondoga ji e yore kaka mago wachoga ni gin Joneno mag Jehova.

Ne ane chandruok moro machielo. Websait moko tiyoga gi program mag kompyuta mondo gigo kwano ka be ji ariyo ma dwa kendore owinjore maber. Kata kamano, onge gimoro amora ma nyiso ni yorno osetiyo maber. Be en gima nyiso rieko temo tiyo gi program ma dhano e ma oloso sama ng’ato timo yiero e wach maduong’ kaka kend? Be inyalo pim weche ma program mag kompyuta kaka mago nyalo miyi gi puonj migeno ma yudore e Muma?​—Nge. 1:7; 3:5-7.

Puonj ma yudore e Ngeche 14:15 nyalo konyowa ahinya. Ndikono wacho ni: “Ng’at ma riekone tin yie gi gimoro amora, to ng’at mariek paro ka pok okawo okang’ moro amora.” En gima ber ka ing’eyo ng’ato e yo maber ka pok ing’ado  ni en e ma ibiro kende kata ni obiro kendi. Kata kamano, ok yot ng’eyo ng’ato e yo maber ka po ni utudoru mana kode e intanet. Kata ka po ni iorenega pichni magi kod gik mamoko to en bende ooroni meke, kendo utiyoga gi thuolo malach kutudoru e intanet, be inyalo wacho ni kuom adier ing’eyo ng’atno maber? Jomoko ma ne paro ni giyudo ng’at mowinjore gikendrego e intanet, nobwok ahinya ka ne giromo gi ng’atno wang’ gi wang’.

Jandik zaburi moro nowacho kama: “Ok ariwra gi jomiriambo, kendo ok awuoth gi jo ma pando kitgi.” (Zab. 26:4) Thoth ji riamboga sama giketo weche motudore gi ngimagi e intanet mondo ginenre ka joma beyo. Ginyalo pando kitgi kendo ginyalo nenore ka joma beyo ahinya sama gitudore gi jomamoko e intanet. Kata obedo ni nitie joma nyalo wacho ni gin Joneno mag Jehova, be kuom adier gin Jokristo mosebatisi? To be gin Jokristo motegno? Be gin gi winjruok maber gi Jehova? Be gin joma Jokristo wetegi omiyo luor e kanyakla? Koso ginyalo bedo joma ranyisigi ok beyo e kanyakla kata “osiepe maricho”? (1 Kor. 15:33; 2 Tim. 2:20, 21) To ka luwore gi Muma, be gin thuolo donjo e kend? Dwarore ahinya ni ing’e weche kaka mago, kata kamano, ok yot ng’eyo adiera mag wechego ka ok itudori gi Joneno mamoko mong’eyo ng’atno maber. (Nge. 15:22) Kendo kuom adier, Jakristo motegno kendo momakore gi Jehova ok onego opar kata matin donjo e “jok achiel” gi ng’at ma ok ni e yie.​—2 Kor. 6:14; 1 Kor. 7:39.

Nitie yore mabeyo ma ng’ato nyalo tiyogo sama omanyo ng’at monyalo donjogo e kend kar tiyo gi websait ma nyalo kelo ne chandruoge. Gin thuolo kaka mage ma inyalo tiyogo e manyo ng’at minyalo kendorigo? Jonego mag Jehova nyalo tiyo gi thuolo kaka mag dhi e chokruoge mag kanyakla, chokruoge mag alwora, chokruoge madongo, kod romo mamoko ka po ni onge chike ma geng’o chokruoge kata romo ma kamago.

Ka po ni ok wanyal dhi e chokruoge kata romo ma kamago, kaka kuom ranyisi e kinde mag tuo mar COVID-19, pod wanyalo dhi e chokruoge mag kanyakla ka watiyo gi gige tudruok kaka simu kod vidio kendo kanyo wanyalo yudo thuolo mar romo gi owetewa gi nyiminewa ma bende ok ni e kend. Inyalo neno kaka gigolo twege kendo kaka gichiwo paro mochwiny. (1 Tim. 6:11, 12) Bende, unyalo yudo thuolo mar goyo mbaka bang’ chokruoge kutiyo gi yore kaka breakout room kod mamoko kaka mago. Kokalo kuom romo mamoko kaka tafrija ma itimo gi Joneno mamoko e yor vidio, inyalo neno kaka ng’at momako wang’ino wuoyo gi jomamoko, kendo mano nyalo konyi ng’eyo ni en ng’at ma chalo nade. (1 Pet. 3:4) Mosmos, kaka umedo ng’eru e kaka ubiro neno ka be chenro magu chal, kendo ka be ng’at momako wang’ino owinjore kodi.

Ka ng’ato oluwo puonj mag Muma sama omanyo ng’at monyalo kendorego, obiro neno adiera mag wechegi: “Ng’at ma oyudo dhako [kata dichwo] maber oyudo gima ber, kendo oyudo ng’wono moa kuom Jehova.”​—Nge. 18:22.