Nicolas gi Céline to noromo gi pek mopogore. Ne giyie gi migawo manyien ma bad ofis ma France nomiyogi mar dhi e kanyakla machielo. Giwacho kama: “Mokwongo okwongo, ne wamor. Kata kamano, kaka kinde ne medo kalo, ne wachako gombo osiepewa ma ne waweyo chien. Ne pok wang’iyo ahinya gi owete gi nyimine e kanyakla manyien ma ne wadhiyeno.” a Nikech pek kaka mago, ere kaka inyalo siko kimor kendo ka in gi winjruok maber gi Jehova sama idhi e kanyakla manyien? Ang’o ma jomamoko nyalo timo mondo gikonyi? To ere kaka in kaachiel gi joma nie kanyakla manyien midhiyeno unyalo jiworu?

PUONJ MOKO ANG’WEN MA NYALO KONYI

1. Gen kuom Jehova. (Zab. 37:5) Ka ne jaod Kazumi modak Japan omi tich kama chielo, nochuno Kazumi weyo kanyakla ma nosebedoe kuom higni 20. Ere kaka ‘Jehova notayo yorene’? Owacho kama: “Nawuoyo gi Jehova e lamo ka anyise kaka nawinjo e chunya, luoro ma ne an-go, kod parruok ma ne an-go. Sa asaya ma nanyiso Jehova kaka awinjo, nomiyaga teko ma dwarore.”

Ere kaka inyalo dhi nyime geno Jehova? Mana kaka yien dwaro pi mondo odong maber, e kaka yiewa bende dwaro pi e yor ranyisi mondo odong kendo obed motegno. Nicolas ma nosewuo kuome motelo wacho ni paro matut e wi Ibrahim, Yesu, kod Paulo—chwo ma noweyo gik mang’eny mondo gitim  dwach Nyasaye—nomiyo omedo geno Jehova. Puonjruok Muma pile ka pile biro konyi nyagori gi pek miromogo sama in e kanyakla manyien kod kaka inyalo jiwo joma nie kanyaklano.

2. Kik ipim kanyaklani manyien gi ma niae. (Ekl. 7:10) Ka Jules nodhi e piny Amerka kowuok Benin, noyudo ka ji timo gik moko e yo mopogore ahinya gi thurgi. Owacho kama: “Naparo ni ne nyaka anyis ng’ato ang’ata e wi ngimana.” To nikech mano gima ji ok ong’iyogo e piny Benin, nochako bedo mabor gi owete gi nyimine. Noloko paro ma ne en-go bang’ ng’eyo owete gi nyimine e yo maber. Owacho kama: “Sani koro ang’eyo ni ji duto chalre bed ni gidak kanye. En mana ni yo ma gitimogo gik moko e ma nyalo bedo ni opogore gi ma wang’iyogo. Omiyo, dwarore ni wang’i bende gi yo ma jomamoko timogo gik moko.” Kuom mano, kik ipim kanyakla ma intie sani gi kanyaklani machon. Nyaminwa moro ma en painia miluongo ni Anne-Lise wacho kama: “Ka nadar, nang’eyo ni nadhi yudo kitimo gik moko e yo mopogore gi kaka nang’iyogo, kendo nang’eyo ni nadhi puonjora gik manyien.”

Jodong-kanyakla bende ok onego opim kanyaklagi manyien gi ma ne gintie chon. Bedo ni ji timo gik moko e yo mopogore gi ma wang’iyogo, mano ok nyis ni gibayo yo. Nyalo bedo maber kipuonjori ng’eyo kaka gitimo gik moko ka pok ichiwo paro. (Ekl. 3:1, 7b) Bende, en gima maber kiweyo mondo owete opuonjre ka luwore gi ranyisi maber miketonegi, kar chunogi gi pachi iwuon.—2 Kor. 1:24.

3. Bed Modich. (Fil. 1:27) Dar ok yotga kendo okawoga thuolo mang’eny. Nyalo bedo maber kidhi e chokruoge mag kanyakla manyien mapiyo, kendo ka nyalore to idhi aching’. Nyalo bedo matek ne jo kanyakla manyien midhiye mondo gikonyi ka ok gineniga. Nyaminwa miluongo ni Lucinda, ma nodar modhi e taon maduong’ mar South Africa wacho kama: “Osiepena nojiwa ni atem matek mondo abed machiegni gi owete gi nyimine e kanyakla ma nadhiye, adhi kodgi e tij lendo, kendo achiw paro e chokruoge. Bende, ne wayie mondo oti gi odwa e timo romo mar dhi lendo.”

‘Waduto onego waked matek ka wan e achiel’ sama watiyo ne Nyasaye kanyachiel gi owete gi nyimine e kanyakla manyien ma wadhiye. Mano en achiel kuom yore ma wategogo “yie ma [wan-go] kuom wach maber.” Jodong-kanyaklagi Anne-Lise ma ne osewuo kuome motelo nojiwe ni otem matek mondo olend gi ji duto manie kanyakla. Mano nobedo gi nyak mane? Owacho kama: “Nayudo thuolo mar bedo machiegni gi owete gi nyimine.” Bende, riwo lwedo chenro mar timo ler kod rito Od Romo mondo osik ka ber, gin yore ma nyiso gadier ni imor gi kanyaklano.  Kaka imedo bedo modich e kanyakla, e kaka owete gi nyimine biro bedo machiegni kodi kendo ibiro nenogi kaka joodu.

4. Many osiepe manyien. (2 Kor. 6:11-13) Dewo ji gadier en yo maber mar loso osiep, omiyo, tem matek mondo iyud thuolo mar ng’eri gi owete gi nyimine ka pok chokruok ochakore kod bang’ chokruok. Tem matek mondo ing’e nyingegi. Sama iparo ji gi nyingegi kendo imor kodgi, biro bedonegi mayot mako osiep kodi.

Kar keto pachi e timo gik manyalo miyo ji oyie kodi, nyalo bedo maber kimiyogi thuolo mar ng’eyi maber. Inyalo timo gima Lucinda notimo. Owacho kama: “Osiep ma wan-go gi owete gi nyimine sani otegno nikech ne wakawo okang’ mar gwelogi e odwa.”

“RWAKURU JOWETEU”

Nyalo bedo matek ne jomoko dhi e Od Romo ma pok gidheyega. Ere kaka inyalo konyo welo mobiro e kanyaklau? Jaote Paulo nojiwo Jokristo wetene kama: “Rwakuru joweteu, mana kaka Kristo bende norwakowa.” (Rumi 15:7) Jodongo luwo ranyisi mar Yesu kuom konyo welo mobiro e kanyaklagi mondo giwinj ni orwakgi. (Ne sanduk ma wiye wacho ni, “ Gik ma Nyalo Konyi Dar Maber.”) Kata kamano, ji duto mobiro e kanyakla, moriwo nyaka nyithindo, onego okony joma odar mobiro e kanyaklagi.

Rwako jomoko oriwo gwelogi e odi kata miyogi kony ma dwarore. Kuom ranyisi, nyaminwa moro nokawo thuolone mondo owuoth gi nyaminwa moro ma nodar mobiro e alworagi konyise taon kendo kuonde ma iidhoe geche . Timno nomoro chuny nyaminwano kendo nokonye ng’iyo gi e alworano.

THUOLO MAR TIMO DONGRUOK

Sama dede dongo, orochga nyadi ng’eny mondo buombene otegno ka pok ochako  fuyo. E yo ma chalo kamano, sama wadar ma wadhi e kanyakla machielo, dwarore ni walony kido moro amora manyalo monowa fuyo e yor ranyisi e tij Jehova. Nicolas gi Céline wacho kama: “Dar en yo maber mar yudo tiegruok. Ng’iyo gi joma odak e alwora manyienno kendo ng’eyo alworano maber nokonyowa nyago kido moko ma ne waongego.” Jean-Charles ma nowuo kuome e chak sulani wacho ber ma joode noyudo. Owacho kama: “Bedo e kanyakla ma nyienni osekonyo nyithindwa medo bedo machiegni gi Jehova. Mana bang’ dweche matin, nyarwa nochako yudo migepe e chokruok ma kor juma, kendo wuodwa nobedo jalendo ma pok otisi.”

To nade ka chalni ok oyieni dar dhi e kanyakla machielo, kuom ranyisi, kanyakla manie alwora ma jolendo dwarore moloyo? Pod inyalo tiyo gi paro ma ochiwgo e kanyakla ma intie. Dhi nyime geno Jehova kendo ibed modich e tije mag kanyakla kaka dhi e tij lendo, loso osiepe manyien, kendo tego osiep manie kindi gi jomamoko. Donge inyalo kawo okang’ mokwongo mar konyo joma nyien mobiro e kanyaklau? Nikech hera e ma ifwenyogo Jokristo madier, onge kiawa ni timo kamano nyalo miyo isud machiegni gi Jehova. (Joh. 13:35) Inyalo bedo gadier ni “Nyasaye mor ahinya gi misengni ma kamago.”—Hib. 13:16.

Kata obedo ni inyalo romo gi pek moko e kanyakla manyien midhiye, ng’e ni ji mang’eny oseyudo ber e kanyakla kaka mago. Omiyo, in bende inyalo yudo ber. Anne-Lise wacho kama: “Dhi e kanyakla manyien nomiyo abedo gi osiepe mang’eny.” Kazumi wacho ni en gadier ni ka idar midhi e kanyakla machielo, to “Jehova biro konyi e yo ma ok ipar kata.” Jules to wacho kama: “Osiepe manyien ma an-go osekonya bedo mamor gi kanyakla manyienni. Sani amor gi owete gi nyimine e kanyaklani ma ok agomb kata dar.”