“AMOSI! Idhi nade?”

Nyaka bedie ni isegamoso ng’ato e yo ma kamano. Samoro imosoga ji gi lweti kata ikwakogi. Yo ma ji mosoregago kod weche ma gitiyogo nyaloga pogore, kata kamano, gima mos timo to chalre. Kinde mang’eny, ng’ama ok mos ji kata ma imoso to ok dwoki ineno kaka ng’ama ok ohero ji kata mochayo ji.

Kata kamano, nitie joma ok oheroga moso ji. Kuom ranyisi, jomoko ok mosga ji nikech giluoro wang’ ji kata gichayore giwegi. Jomoko to ok ohero moso joma pien dendgi opogore, joma ok opon e ogandagi, kata joma nigi nyadhi e alwora. Kata kamano, moso ng’ato kata mana kuom dakika matin nyalo kelo ber mathoth.

Penjri kama: ‘Moso ji nyalo kelo ber mage? To Wach Nyasaye puonja ang’o e wi moso ji?’

Kornelio e ng’at ma ok Ja-Yahudi ma nokwongo bedo Jakristo. Ka ne jaote Petro rwake e kanyakla, Petro nowacho niya: “Nyasaye ok buon ng’ato ang’ata.” (Tich 10:34) Bang’e, Petro nondiko ni Nyasaye dwaro ni ‘ji duto olok chunygi gia e richo.’ (2 Pet. 3:9) Kinde mang’eny, wanyalo paro ni wechego wuoyo mana kuom joma e ka puonjore adiera. Kata kamano, Petro nojiwo nyaka joma nosebedo Jokristo niya: “Miuru ji mopogore opogore duto duong’, beduru gi hera ne riwruok duto mar owete.” (1 Pet. 2:17) Donge nyalo bedo maber ka wamoso ji duto ma ok wadewo pien dendgi, oganda ma giwuokie, kata kaka ne gipon? Timo kamano en achiel kuom yore ma wanyisogo ni wamiyogi luor kendo waherogi.

Jaote Paulo nojiwo Jokristo niya: “Rwakuru joweteu mana kaka Kristo bende norwakowa.” (Rumi 15:7) Paulo nowuoyo maber e wi owete ma ne ‘ohoye ahinya.’ Sani wadak e kinde ma mirimb Satan ni malo ahinya gi jotich Nyasaye. Donge magi e kinde ma owetewa gi nyiminewa dwaroe hoch moloyo?—Kol. 4:11; Fwe. 12:12, 17.

Ranyisi moko ma ni e Muma nyiso ni mos nyalo konyo kama duong’ moloyo mana miyo ng’ato owinj ni orwake.

Ka ne kinde ochopo mondo Nyasaye odar ngima Yesu kotere e i Maria, nooro malaika moro mondo odhi owuo gi Maria. Ka ne malaikano ochopo, nokwongo omoso Maria niya: “Misawa, in ng’at moguedh ahinya, Jehova ni kodi.” Chuny Maria “nochandore ahinya” nikech ne ok ong’eyo gimomiyo malaikano nowuoyo kode. Ka ne malaikano ofwenyo mano, nonyiso Maria niya: “Kik ibed maluor Maria, nimar Nyasaye oseyie kodi.” Nonyise ni Nyasaye noseyiere mondo en e ma onyuol Mesia. Chuny Maria noweyo chandore, mowacho niya: “Ne! an misumba mar Jehova! We mondo otimrena kaka isewacho.”—Luka 1:26-38.

Malaikano noyudo migawo maber ahinya mar wuoyo e lo Jehova, kata kamano, ne ok oneno ni Jehova ochaye ka ne oore ir dhano morem. Nochako mana gi moso Maria. Donge mano puonjowa gimoro? Onego wamos ji kendo wajiwgi. Weche matin kende ma wawacho sama wamoso ng’ato oromo miye obed gadier ni owete gi nyimine ohere, kendo ni en bende ogene e riwruok mar oganda Jehova.

Paulo nong’eyo owete gi nyimine mathoth e kanyakla buora ma ne ni Asia Minor gi Europe. E barupe ma nondiko, nitie joma nokowonegi mos achiel kachiel. Kuom ranyisi, e Jo-Rumi sula mar 16, nokowo mos ne Jokristo mathoth. Ne omoso Fibi koluonge ni “nyaminwa,” kendo nojiwo  owete mondo ‘girwake kuom Ruoth e yo mowinjore gi joma ler, kendo mondo gimiye kony moro amora ma nonyalo dwaro.’ Bende, nomoso Priska gi Akwila kowacho kama: “Aduokonegi erokamano, to ok mana an kenda, to bende kanyakla duto mag ji moa e ogendni mamoko.” Nomoso nyaka jomoko ma ok ong’ere ahinya e kindegi, kaka Epaineto ma noluongo ni “owadwa ma ahero,” to gi “Trufena kod Trufosa, ma [ne] gin mon ma tiyo matek kuom Ruoth.” Ee, Paulo nomoso owete gi nyimine.—Rumi 16:1-16.

Parie kaka owete gi nyiminego ne mor ng’eyo ni Paulo ne oherogi kendo ne parogi kamano! Onge kiawa ni mano nomiyo gimedo hero Paulo, kendo gin be ne gimedo herore! Jokristo mamoko ma ne owinjo kimoso jogo bende noyudo jip ahinya, kendo ne gimedo bedo gi yie motegno. Ee, sama wamoso ji kowuok e chunywa kendo wapwoyogi, osiep ma ni e kindwa kodgi medo bedo motegno, kendo winjruok ma nie kind jo Jehova bende medore.

Ka ne Paulo ochopo e dho wath mar Puteoli kodhi Rumi, Jokristo ma ne ni kuno nodhi mose. Sama Paulo nonenogi ka pod gin mabor, “nogoyo ne Nyasaye erokamano kendo nobedo gi chir.” (Tich 28:13-15) Nitie seche ma bwonjo abwonja gi ng’ato kata fwayone gi chien oromo mose. To mano kende oromo duogo chuny ng’ato, to ahinya-ahinya ng’ama chunye onyosore kata mokuyo.

Nitie kinde ma ne dwarore ni Jakobo ochiw siem motegno ahinya. Jokristo moko ne chalo joma terore nikech ne gimako osiep gi joma ne ok lam Jehova. (Jak. 4:4) Kata kamano, ne ane kaka Jakobo nochako barua ma nondikonegi:

“An Jakobo, misumba mar Nyasaye kod mar Ruodhwa Yesu Kristo, andikonu un dhoudi 12 mokere kuonde mopogore opogore: Amosou!” (Jak. 1:1) Jokristogo norwako siem nikech yo ma Jakobo nomosogigono nonyiso ni ne pod gin jotich Jehova giduto. Ee, mos nyalo yawo yo mar wuoyo e wi weche moko ma korgi tek.

Mos ma wamosogo ng’ato kata mana kuom dakika matin oromo nyise ni wadewe kendo wahere gadier. Mano en adier kata ka wan to ok wafwenyo mano. (Mat. 22:39) Kuom ranyisi, nitie chieng’ ma nyaminwa moro ma ni e piny Ireland nodonjo e Od Romo mana ka chokruok chiegni chakore. Sama noreto mondo obed piny, owadwa moro nobwonjo kode ka nyise niya: “Amosi. Amor neno ka ichopo.” Nyaminwano ne ok odwoko.

Bang’ jumbe manok, nodhi ir owadwano mi onyise ni nosebedo konyagore gi chandruok moro e ode ma ne kelone parruok mang’eny. Nonyiso owadwano kama: “Chieng’ ma nimosa to ok adwokicha, ne an gi gik mang’eny ma ne chando pacha ma nachiegni kata mana bara ne chokruok. Ok anyal kata paro thoth gik ma nopuonj e chokruok chieng’no, kata kamano, mosni to aparo maber malich. Nimiyo awinjo ni an e kind owetena. Erokamano ahinya.”

Owadwano to ne ok ong’eyo ni kare mos ma nomosogo nyaminwano nomulo chunye ahinya. Owadwano wacho kama: “Ka ne onyisa kaka mosnano nojiwe, nabedo mamor ni kare kinda ma natimono ne ok odhi nono. Nawinjo maber ahinya.”

Solomon nondiko kama: “Bol chiembi e nam; mi niyude bang’ ndalo mang’eny.” (Ekl. 11:1) Ka watimo kinda e moso ji duto, to ahinya-ahinya Jokristo wetewa, mano jiwogi, to wan bende wadong’ ka wawinjo maber. Omiyo, kinde duto waparuru ni mos nigi teko!