1, 2. (a) En ang’o ma Yesu nonyiso jopuonjrene kodong’ mana matin to otho? (Ne picha man malo.) (b) Ang’o momiyo onego waket e paro kinde duto gimomiyo onego walend? (c) Ang’o ma wadwa puonjore e sulani?

E OTIENO mogik ka ne Yesu pok otho, ne owuoyo gi jootene kuom thuolo malach konyisogi kaka noherogi ahinya. Bende, ne ogoyonegi ngero e wi mzabibu mana kaka ne waneno e sula mokalo. Kokalo kuom ngerono, Yesu nojiwo jopuonjrene ni ‘gidhi nyime nyago olemo mang’eny,’ tiende ni gidhi nyime nano ka gilando wach Pinyruoth.​—Joh. 15:8.

² Kata kamano, Yesu nonyiso jopuonjrene gima nonego gitim kod gimomiyo nonego gitime. Nonyisogi gimomiyo nonego gilendi. Ang’o momiyo dwarore ni wanon gigo? Ka waketo e paro kinde duto gimomiyo onego wadhi nyime lendo, mano chwalowa mondo wanan sama ‘wachiwo neno ne ogendni duto.’ (Mat. 24:13, 14) Kuom mano, wane ane weche moko ang’wen mosir gi Ndiko ma konyowa ng’eyo gimomiyo onego walendi. E wi mano, wadwaro nono gik moko ang’wen ma Jehova omiyowa ma konyowa nano ka wadhi nyime nyago olemo.

3. (a) Ang’o momiyo onego walend ka luwore gi Johana 15:8? (b) Olemb mzabibu e ngero ma Yesu nogoyo ochung’ ne ang’o, to ang’o momiyo owinjore opim yadh mzabibu gi tijwa mar lendo?

³ Wach mokwongo tik tik momiyo wadhiga lendo en ni mondo wami Jehova duong’ kendo waket nyinge obed maler e nyim ji duto. (Som Johana 15:1, 8.) Ne ni Yesu nopimo Jehova Wuon mare gi japur ma pidho mzabibu. Nowacho ni en e kor mzabibu to jopuonjrene nopimo gi bede mzabibu. (Joh. 15:5) Omiyo, olembe mag mzabibu ochung’ ne olembe mag Pinyruoth ma jolup Kristo nyago. Yesu nonyiso jootene niya: “Wuora yudo duong’ nikech ma: ni udhi nyime nyago olemo mang’eny.” Mana kaka yadh mzabibu monyago olemo mabeyo kelo duong’ ne japur, e kaka wan bende wamiyo Jehova duong’ sama watimo duto mwanyalo mondo waland wach Pinyruoth.​—Mat. 25:20-23.

4. (a) Gin yore mage ma waketogo nying Nyasaye obed maler? (b) Thuolo ma wan-go mar keto nying Nyasaye obed maler miyo iwinjo nade?

⁴ Ere kaka tijwa mar lendo miyo nying Nyasaye duong’? Ok wanyal keto nying Nyasaye obed maler moloyo kaka oler sani. Nyingno ler e okang’ mamalo chutho. Par ni janabi Isaya nowacho niya: “Jehova mar ogendini mag lueny, e ma nuwal.” (Isa. 8:13) Yo achiel ma waketogo nying Nyasaye bedo maler en kuom wale ka wapoge gi nyinge mamoko kendo kuom konyo jomoko mondo okete maler. (Mat. 6:9) Kuom ranyisi, sama wapuonjo ji adiera e wi kido mabeyo ma Jehova nigo kaachiel gi dwache ne dhano, wakonyo ji mondo one ni gik maricho duto ma Satan wacho e wi Jehova gin miriambo. (Cha. 3:1-5) E wi mano, sama wakonyo ji e alworawa mondo ong’e ni Jehova e ma owinjore ‘oyud duong’, gi luor, kod teko,’ wamiyo nyinge bedo maler. (Fwe. 4:11) Rune ma osebedo painia kuom higni 16 wacho niya: “Ng’eyo ni omiya thuolo mar bedo janeno mar Jachuech polo gi piny miyo agoyo erokamano. Mano miya gombo mar dhi nyime lendo.”

5. (a) Kaluwore gi Johana 15:9, 10, ang’o momiyo onego walend? (b) Ere kaka Yesu nonyiso gimomiyo dwarore ni wanan?

⁵ Som Johana 15:9, 10. Hera ma waherogo Jehova kod Yesu e gima duong’ momiyo walando wach Pinyruoth. (Mar. 12:30; Joh. 14:15) Yesu nonyiso jopuonjrene ni ‘gisik e herane’ to ok here ahera kende. Nikech ang’o? En nikech mondo wadag kaka jopuonjre Kristo madier nyaka wanan kinde duto. E Johana 15:4-10 Yesu nojiwo ahinya gimomiyo dwarore ni jopuonjrene onan ka ne owacho nyadinwoya ni “sikuru.”

6. Ere kaka wanyiso ni wadwaro siko e hera mar Kristo?

⁶ Ere kaka wanyalo nyiso ni wadwaro siko e hera mar Kristo mondo odhi nyime yie kodwa? Mana ka waluwo chikene. E yo mayot Yesu nyisowa ni, ‘Winjauru.’ Kata kamano, Yesu kwayowa mana ni watim gik ma notimo. Nowacho niya: “Aserito chike Wuora kendo asiko e herane.” Yesu noketonwa ranyisi maber.​—Joh. 13:15.

7. Hera kod chik otudore nade?

⁷ Yesu nowacho ni rito chik kod hera gin gik motudore ka ne onyiso jootene niya: “Ng’ato ang’ata ma nigi chikena kendo  ma ritogi, mano e ng’at mohera.” (Joh. 14:21) E wi mano, sama waluwo kaka Yesu nochikowa ni walendi wanyiso kaka wahero Nyasaye kod Yesu nikech chike Yesu nyiso paro ma Wuon mare nigo. (Mat. 17:5; Joh. 8:28) Sama wanyiso hera ma kamano, Jehova kod Yesu bende dhi nyime herowa.

8, 9. (a) Gimachielo momiyo onego walendi en mane? (b) Ang’o momiyo weche ma yudore e Ezekiel 3:18, 19 kod 18:23 chwalowa mondo wadhi nyime gi tijwa mar lendo?

⁸ Nitie gimachielo momiyo wadhi nyime gi tijwa mar lendo. Walendo mondo wachiw siem. Muma wacho ni Noa ne en “jayal wach.” (Som 2 Petro 2:5.) Tij lendo ma ne otimo ka ne ataro pok obiro noriwo nyaka chiwo siem e wi kethruok ma ne dhi biro. Ang’o momiyo wanyalo wacho kamano? Ne ane gima Yesu nowacho: “Nimar mana kaka e ndalogo ka Ataro ne podi, ji ne chiemo kendo ne gimetho, chwo ne kendo to mon ne ikendo, nyaka e chieng’no ma Noa nodonjo e yie, to ne ok gidewo nyaka Ataro nobiro moyweyogi giduto, mano e kaka notimre e ndalo ma Wuod dhano nitie.” (Mat. 24:38, 39) Noa nodhi nyime lando ote mar siem kaka nochike, kata obedo ni ji ne ok dew.

⁹ E kindegi, walando wach Pinyruoth mondo ji duto oyud thuolo mar puonjore dwach Nyasaye ne dhano. Mana kaka Jehova, dwaher ahinya ni ji duto orwak wach mondo ‘gibed mangima.’ (Eze. 18:23) Sama walendo ot ka ot kod e lela, wachiwo siem ne ji mang’eny kaka nyalore ni Pinyruodh Nyasaye chiegni biro kendo obiro ketho piny marachni.​—Eze. 3:18, 19; Dan. 2:44; Fwe. 14:6, 7.

10. (a) Mathayo 22:39 nyisowa wach mane momiyo onego walendi? (b) Ler ane kaka Paulo gi Sila noreso jarit jela e taon mar Filipi.

¹⁰ Wach machielo maduong’ momiyo wadhi nyime gi tijwa mar lendo en ni: Wahero dhano wetewa. (Mat. 22:39) Hera ma kamano e ma chwalowa mondo wadhi nyime nano e tijwa nikech wang’eyo ni ji nyalo loko chunygi kapo ni lokruoge moko otimore e ngimagi. Ne ane gima ne otimore ne jaote Paulo gi Sila. Ka ne gin e taon mar Filipi, joma ne kwedogi ne omakogi ma obologi e jela. Ka ne ochopo chuny otieno, apoya nono piny ne oyiengni matek ma dhoudi mag jela oyawore. Jarit jela noluor ni joma ne otwe e jela noseringo, omiyo ne odwa dere. Kata kamano, Paulo nokok matek niya: “Kik ihinyri!” Jarit jelano nopenjo Paulo niya: “En ang’o ma nyaka atim mondo oresa?” Ne gidwoke kama: “Yie kuom Ruoth Yesu to ibiro resi.”​—Tich 16:25-34.

11, 12. (a) Gima notimore ne jarit jela otudore nade gi tijwa mar lendo? (b) Onego watim ang’o gi thuolo moro amora ma wayudo?

¹¹ Wach jarit jelano otudore nade gi tijwa mar lendo? Ne ane wachni: Jarit jelano noloko chunye mokwayo ni mondo okonye mana bang’ ka piny oseyiengni. E yo machalo kamano, moko kuom joma  pok ne orwakoga adiera nyalo loko chunygi ma giyie puonjore Muma mana bang’ ka giseyudo masira moro e ngimagi. Kuom ranyisi, moko kuom joma nie alworawa nyalo bedo ni olalo tich ma ne gigeno. Jomoko to chunygi nyalo nyosore nikech kend margi okethore. Jomoko bende chunygi nyalo nyosore ka ofweny ni gin gi tuwo moro marach kata samoro wedegi kata osiepegi ma ne gigeno ahinya otho. Sama gik ma kamago otimore, jomoko ma chunygi onyosore nyalo chako penjore penjo moko ma otudore gi ngima dhano ma samoro ne ok gipenj ka weche ne dhinegi maber. Ginyalo kata penjore kama, ‘Ang’o monego atim mondo oresa?’ Sama waromo kodgi, mano e kinde ma ginyalo hango winjoe wach ma miyogi geno e ngimagi.

¹² Omiyo, ka wadhi nyime makore motegno gi tijwa mar lendo, wabiro tiyo maber gi thuolo moro amora ma wayudo e jiwo ji sa ma giikore mar winjowa. (Isa. 61:1) Charlotte ma osebedo ka tiyo ne Jehova gi thuolone duto kuom higni 38 wacho niya: “Piny otaro ji mang’eny e kindegi. Onego walandnegi wach maber.” Ejvor ma osebedo painia kuom higni 34 wacho kama: “Kindegi e ma chuny ji onyosoree moloyo kinde moro amora. Agombo ahinya konyogi. Ng’eyo wachno jiwa mondo alendi.” Hera ma waherogo dhano wetewa miyo watimo duto ma wanyalo mondo wadhi nyime gi tijwa mar lendo.

13, 14. (a) En ang’o ma iwuoye e Johana 15:11 ma konyowa nano? (b) Ere kaka wabiro bedo gi mor ma Yesu bende nigo? (c) Mor konyowa nade e tijwa mar lendo?

¹³ Odhiambo mogik ka Yesu pok otho, nonyiso jopuonjrene gik mopogore opogore ma ne dhi konyogi nano ka ginyago olemo. Gigo gin ang’o to gikonyowa nade?

¹⁴ Mor. Be luwo chik ma Yesu nomiyowa ni walend en ting’ mapek? Ooyo. Ka Yesu nosegoyo ngero mar yadh mzabibu, nowacho ni joma lando wach Pinyruoth ne dhi bedo mamor. (Som Johana 15:11.) Nosingonwa ni mor ma ne en-go e ma wan bende ne wadhi bedogo. E yo mane? Mana kaka ne waseneno motelo, Yesu nowacho ni en e yadh mzabibu to jopuonjrene e bedene. Yadh mzabibu siro bedene. Sama bedene omakore motegno e yath, mano miyo yadhno keyonegi pi kod gik mamoko ma dwarore mondo gidhi nyime dongo maber. E yo ma kamano, ka wan bende wasiko e winjruok achiel gi Kristo kendo waluwo ranyisine, wabedo gi mor ma en bende en-go sama otimo dwach Wuon-gi. (Joh. 4:34; 17:13; 1 Pet. 2:21) Hanne ma osebedo painia kuom higni mokalo 40 wacho kama: “Mor ma ayudoga bang’ dhi e tij lendo e ma chwala mondo adhi nyime tiyo ne Jehova.” Kuom adier, mor ma wan-go e chunywa e ma miyowaga teko mar dhi nyime lendo nyaka e alwora ma tek lendee.​—Mat. 5:10-12.

15. (a) En ang’o ma iwuoye e Johana 14:27 ma konyowa nano? (b) Ang’o momiyo kuwe konyowa dhi nyime nyago olemo?

¹⁵ Kuwe. (Som Johana 14:27.) Motelo e odhiambono, ka ne Yesu pok otho nonyiso jootene niya: “Amiyou kuwe mara.” Kuwe ma Yesu nomiyowano konyowa nade nyago olemo? Sama wanano wabedo gi kuwe makende e chunywa nikech wang’eyo ni Jehova kod Yesu oyie kodwa. (Zab. 149:4; Rumi 5:3, 4; Kol. 3:15) Ulf ma osebedo ka tiyone Nyasaye gi thuolone duto kuom higni 45 wacho niya: “Tij lendo miyo seche moko aol matek  kata kamano, omiyo abedo mamor kendo ngimana bende bedo maber.” To mano kaka wamor ni wan-gi kuwe ma kamano!

16. (a) En ang’o ma iwuoye e Johana 15:15 ma konyowa nano? (b) Ang’o ma joote ne nyaka tim mondo gisik ka gin osiepene?

¹⁶ Osiepe. Ka ne Yesu osenyiso jootene ni nodwaro ni gibed mamor, ne oleronegi gimomiyo nyiso hera madier ne en gima duong’. (Joh. 15:11-13) Bang’e nonyisogi niya: “Aseluongou ni osiepena.” To mano kaka en thuolo makende bedo osiepe Yesu! Ang’o ma joote ne nyaka tim mondo gisik ka gin osiepene? Ne nyaka ‘gidhi ginyag olemo.’ (Som Johana 15:14-16.) Higni moko ariyo motelo Yesu nosenyisogi niya: “Sama udhi, yaluru ka uwacho niya: ‘Pinyruodh polo osekayo machiegni.’” (Mat. 10:7) Omiyo, e odhiambo mogikno ne ojiwogi ni ginan e tich ma ne gisechako. (Mat. 24:13; Mar. 3:14) Timo kaka Yesu ne ochikogi ne ok yot kata kamano, pod ne ginyalo time ma gisik ka gin osiepene. E yo mane? Mana ka gitiyo gi gima chielo ma ne idhi migi mondo okonygi.

17, 18. (a) En ang’o ma iwuoye e Johana 15:16 ma konyowa nano? (b) Ere kaka gima Yesu nowacho e ndikono ne dhi konyo jopuonjrene? (c) Gin gik mage ma tegowa e kindegi?

¹⁷ Jehova dwoko lamowa. Yesu nowacho niya: “Gimoro amora mukwayo Wuora e nyinga, obiro miyou.” (Joh. 15:16) To mano kaka wechego ne ojiwo joote! * Kata obedo ni ne teknegi yie ni Jatendgi ne dhi tho, ne ok gidhi dong’ ma onge jakony. Jehova ne oikore dwoko lamogi kendo miyogi kony moro amora ma ne gidwaro mondo gidhi nyime lando wach Pinyruoth. Kuom adier, bang’ kinde matin ne gineno kaka Jehova ne odwoko lamogi.​—Tich 4:29, 31.

¹⁸ Mano be e gima timore e kindegi. Sama wadhi nyime nano ka wanyago olemo, wabedo mamor ni wan osiepe Yesu. E wi mano, wan gadier ni Jehova oikore dwoko lamo magwa mondo okonywa loyo chandruoge ma wanyalo romogo sama wadhi nyime lando wach maber mar Pinyruoth. (Fil. 4:13) Mano kaka wamor ni wan joma oguedhi nikech Jehova dwoko lamowa kendo wan osiepe Yesu! Gik ma Jehova miyowago tegowa kendo konyowa mondo wadhi nyime nyago olemo.​—Jak. 1:17.

19. (a) Ang’o momiyo wadhi nyime lendo? (b) Ang’o ma biro konyowa mondo watiek tich ma Nyasaye omiyowa?

¹⁹ Mana kaka waneno e sulani, wadhi nyime lendo mondo wami Jehova duong’ kendo waket nyinge obed maler, mondo wanyis ni wahero Jehova kod Yesu, mondo wachiw siem ne ji, kendo mondo wanyis ni wahero dhano wetewa. E wi mano, mor, kuwe, osiep, kod kaka Jehova dwoko lamowa tegowa mondo watiek tich ma omiyowa. To mano kaka Jehova biro bedo mamor sama watimo kinda gi chunywa duto mondo ‘wadhi nyime nyago olemo mang’eny’!