YESU nokoro ni jolupne ne dhi keyo mathoth e ndalo mag gikogi. (Mat. 9:37; 24:14) Ne ane kaka wechego osechopo kare e yo makende e gweng’ miluongo ni Transcarpathia, e piny Ukraine. Taonde adek man machiegni gi gweng’no nigi kanyakla 50 kod jolendo mokalo 5,400. * Koriw kwan mar ji duto e taondego, yudore ni ng’at 1 kuom ji 4 en Janeno mar Jehova!

Alwora milendee chalo nade? Owadwa moro ma wuok e gweng’no miluongo ni Vasile wacho niya: “Joma odak kae omiyo Muma luor, gihero gik mitimo e yo makare, gin gi winjruok maber e kindgi gi joutegi, kendo gihero konyo jowetegi. Nitie puonjwa moko ma ok giyiegago. Kata kamano, ka inyisogi wach moro mowuok e Muma to gichiko itgi.”

En adier ni owete gi nyiminewago romoga gi pek moko makende sama gilendo e alwora ma Joneno ng’enyie moloyo joma ilendonegi. Kuom ranyisi, nitie kanyakla moro ma nigi jolendo 134 to alwora ma gilendee nitie mana mier 50! Ang’o ma jolendogo timoga mondo okonygi?

Owete gi nyimine mang’eny osechiwore mondo gidhi gilend kuonde ma jolendo dwaroree moloyo. Owadwa moro miluongo ni Ionash ma jahigni 90 wacho niya: “E alworawa, jalendo achiel onego olend e mier ariyo. Sani alendo e gweng’wa. Kata kamano, chon ka ne pok achako tuwora ahinya, nadhiga lendo ka atiyo gi dho Hungary e alwora moro ma onge kanyakla ma lendee ma borne romo kilomita 160.” Jolendo nyaka chiwre ahinya mondo gidhi gilendi e alwora mamoko. Ionash medo wacho niya: “Mondo nayud gach reru e wang’ sa, ne nyaka achiew sa 10 okinyi kae to alendo nyaka sa 12 odhiambo sama ne gach reruno dok e gweng’wa. Nadhiga lendo kuno diriyo kata didek e juma.” Be oneno ni kinda ma notimono ne kayiem nono? Owacho niya: “Lendo e yo ma kamano ne miyo abedoga ma mor. Ne ayudo thuolo ma jaber ma akonyo joot moro ma nodak kama bor gi jowetegi mondo ging’e adiera.”

Ok ji duto manie kanyakla man kuondegi ma nyalo dhi lendo kuonde maboyo boyo. Kata kamano, ji duto moriwo nyaka jolendo ma hikgi oniang’ timo kinda mondo gilend e alworagi e yo mong’ith. Nikech mano, e higa mar 2017 joma nobiro e Rapar e taonde adekgo koriw, kwan-gi nohingo mar jolendo nyadiriyo, kata inyalo wach ni nus mar joma odak e taondego duto nobiro e Rapar. Onge kiawa ni kamoro amora ma watiyo ne Jehova, pod wan gi thuolo mar ‘bedo modich e tij Ruodhwa.’​—1 Kor. 15:58.