1-2. Ang’o momiyo Jokristo onego obed gi siso mar nono bug Tim Jo-Lawi?

JAOTE PAULO nondiko ne Timotheo osiepne niya: “Ndiko duto okudh gi much Nyasaye kendo gikonyo.” (2 Tim. 3:16) Mano oriwo nyaka bug Tim Jo-Lawi. In inenoga bugno nade? Jomoko nyalo nene kaka buk moting’o chike mang’eny ma ok nyal tiyo e kindewagi. Kata kamano, Jokristo madier to ok nene kamano.

² Kata obedo ni nondik bug Tim Jo-Lawi higni moko 3,500 mosekalo, Jehova noneno ni ber mondo bugno oyudre nyaka sani mondo weche ma ni e iye opuonjwa. (Rumi 15:4) Nikech bugno konyowa ng’eyo pach Jehova, onego wabed gi siso mar none maber. Adier, nitie puonj mang’eny ma wanyalo yudo e bugno. We wanon ane ang’wen kuomgi.

3. Ang’o momiyo nichiwo misengni higa ka higa e Odiechieng Pwodhruok?

³ Puonj mokwongo: Mondo Jehova obed ma mor gi gik ma watimo e tije, nyaka wabed joma oyiego. E Odiechieng Pwodhruok higa ka higa, oganda mar Jo-Israel ne chokorega kanyachiel kendo ne gichiwo misengni mag le. Misengnigo ne paro ne Jo-Israel ni ne gin joricho kendo ni ne dwarore ni opwodhgi. E odiechiengno, ka ne jadolo maduong’ pok odonjo gi remb le Kama Ler Moloyo, nitie gimoro ma ne nyaka okwong otim, kendo ne en gima  duong’ moloyo kata mana wach weyo ne ogandano richogi.

4. Kaka oler e Tim Jo-Lawi 16:12, 13, ang’o ma jadolo maduong’ ne timoga sama okwongo donjo e i Kama Ler Moloyo e Odiechieng Pwodhruok? (Ne picha manie nyim gaset.)

⁴ Som Tim Jo-Lawi 16:12, 13. Tem ane paro gik ma ne timore e Odiechieng Pwodhruok: Jadolo maduong’ donjo e tabenakel. Mae e donjone kanyo mokwongo e odiechieng’no; bang’ mano, obiro donjo kendo diriyo. E lwete achiel, en gi gir ting’o ma nigi ubani e iye, to e lwete machielo en gi gir ting’o molos gi dhahabu to chuk mach ni e iye. Ochung’ matin e nyim pasia mogeng’go Kama Ler Moloyo. Kae to odonjo e i Kama Ler Moloyo konyiso luor matut, kendo ochung’ e nyim sandug singruok. E yor ranyisi, ochung’ e nyim Jehova Nyasaye achiel kachiel! Kae to jadolono olo ubani e wi chuk mach, kendo i Kama Ler Moloyo pong’ gi suya mamit. * Bang’e obiro donjo iye kanyo kendo koting’o remb le motimgo misango. Ne ni jadolono wang’o ubani ka pok ochiwo remb le motimgo misango.

5. Ubani ma nitiyogo e Odiechieng Pwodhruok puonjowa ang’o?

⁵ Ubani ma nitiyogo e Odiechieng Pwodhruok puonjowa ang’o? Muma wacho ni sama jotich Jehova wuoyo kode e lamo, gichalo joma otero ubani e nyime. (Zab. 141:2; Fwe. 5:8) Par ni jadolo maduong’ ne tero ubani e nyim Jehova konyiso luor matut. E yo ma kamano, sama walemo, wanyiso luor matut e nyim Jehova. Wamor ahinya ni Jachuech mar polo gi piny oyienwa mondo wadhi e nyime kendo wasud machiegni kode, mana kaka nyathi matin dhiga ir wuon mare. (Jak. 4:8) Ee, oyienwa bedo osiepene! (Zab. 25:14) Waneno ni Jehova odhialowa ahinya ma ok dwaher timo gimoro amora ma nyalo chwanye.

6. Bedo ni jadolo maduong’ ne nyaka wang’ ubani ka pok ochiwo remb le motimgo misango puonjowa ang’o?

⁶ Par ni jadolo maduong’ ne nyaka wang’ ubani ka pok ochiwo remb le motimgo misango. Kuom timo kamano, nodwaro ni okwong obed gadier ni Nyasaye oyie kode e ka ochiw misango. En puonj mane ma wanyalo yudo kanyo? Ka ne Yesu ni e piny, nitie gimoro maduong’ ahinya ma ne nyaka otim ka pok ochiwo ngimane kaka misango. Ne en gima duong’ moloyo kata mana reso oganda dhano. Ne en ang’ono? Ne nyaka owinj Jehova e ngimane duto e piny mondo Jehova obi oyie gi misangone. Kuom timo kamano, nodhi nyiso ni timo gik moko kaka Jehova dwaro e gima berie mogik. Nodhi nyiso ma onge kiawa kata matin ni Jehova kende e ma nigi ratiro mar bedo jaloch e piny gi polo.

7. Ang’o momiyo ngima Yesu te e piny kae nomoro Jehova?

⁷ E ngima Yesu duto e piny ka, nomakore chuth gi chike Jehova. Onge gimoro amora ma ne nyalo mone riwo loch Wuon mare lwedo. Kata mana tho ne ok nyal mone timo kamano! (Fil. 2:8) Ka noromo gi tembe, nolemo “koywak malit kendo ka pi wang’e chuer.” (Hib. 5:7) Lamogo nowuok e chunye kendo nomiye teko mar dhi nyime makore gi  Jehova. Jehova noneno lamb Yesu kaka ubani ma golo suya mamit. Ngima Yesu te nomoro Jehova ahinya kendo nonyiso ni Jehova e ma nigi ratiro mar bedo jaloch e wi gik moko duto.

8. Ere kaka wanyalo luwo ranyisi mar Yesu?

⁸ Wanyalo luwo ranyisi mar Yesu kuom timo kinda duto mondo wane ni wasiko ka wan joma tir kendo wamakore gi chike Jehova kod puonjge. Sama waromo gi tembe, walamo Jehova ka wakwaye mondo okonywa wasik ka watimo gik ma more. Sama watimo kamano, wanyiso ni wariwo loch Jehova lwedo. Wang’eyo ni Jehova ok bi winjo lamowa ka po ni watimo gik ma ok oyiego. To ka wasiko ka waluwo chike Jehova kod puonjge, wanyalo bedo gadier chuth ni sama walemo, Jehova neno lambwa kaka ubani ma golo suya mamit. Bende, wanyalo bedo gadier ni yo ma wamakorego kode miyo chunye mor.​—Nge. 27:11.

9. Ang’o momiyo Jo-Israel ne chiwoga misengni mag kue?

⁹ Puonj mar ariyo: Watiyo ne Jehova nikech wamor gi gik motimonwa. Mondo wawinj kor wachno maber, wanon ane gima chielo ma Jo-Israel ne timo e lamo maler, ma en chiwo misengni mag kue. * E bug Tim Jo-Lawi, waneno ni Ja-Israel ne nyalo golo misango mar kue kaka yo mar “goyo erokamano.” (Lawi 7:11-13, 16-18) Nogolo chiwono mana kodwaro, ma onge achune.  Notimo mano nikech nohero Jehova Nyasache. Ng’at ma golo chiwono, joode, kod jodolo ne chamo ring le mochiwno kanyachiel. Kata kamano, nitie lemo moko mag leno ma nichiwo ne Jehova kende. Gin lemo mage?

10. Misengni mag kue milero wachgi e Tim Jo-Lawi 3:6, 12, 14-16 konyowa ng’eyo nade gima ne chwalo Yesu mondo otim dwach Jehova?

¹⁰ Puonj mar adek: Wamiyo Jehova gik mabeyo mogik nikech wahere. Jehova ne neno ni boche e gik mabeyo mogik e i le. Lemo mamoko ma siro kama duong’ e ngima le be nokwano kaka lemo mabeyo, kuom ranyisi, nyiroke. (Som Tim Jo-Lawi 3:6, 12, 14-16.) Omiyo, Jehova ne morga moloyo ka Ja-Israel ochiwone lemo makendego to kod boche. Ja-Israel ma ne chiwo misangono ne nyiso ayanga ni nogombo chiwo ne Nyasaye gik mabeyo mogik. E yo ma kamano, Yesu nochiwo ne Jehova gima ber mogik, ma en tiyone gi chunye duto nikech nohere. (Joh. 14:31) Yesu ne mor ahinya timo dwach Jehova, kendo nohero chike Jehova ahinya. (Zab. 40:8) Donge nyaka bed ni Jehova ne mor matek ka noneno ka Yesu ochiwore tiyone?

11. Yo ma watiyogo ne Jehova chalre nade gi misengni mag kue, to mano hoyowa nade?

¹¹ Mana kaka misengni mag kue nichiwo ma onge achune, e kaka wan be watiyo ne Jehova ma onge achune. Wamiyo Jehova gik mabeyo mogik, tiende ni, watiyone gi chunywa duto nikech wahere gi chunywa duto. Onge kiawa ni Jehova mor ahinya sama oneno jotichne tara gi tara ka tiyone nikech gihere kendo gimor gi yorene! Ng’eyo ni Jehova neno gik ma watimo kaachiel gi gimomiyo watimo gigo hoyo chunywa ahinya. Kuom ranyisi, ka po ni iseti ma ok ditim mathoth e tij Jehova kaka diher, bed gadier ni Jehova ong’eyo maber gik minyalo kod ma ok inyal. In inyalo neno ni ok itim mang’eny, kata kamano, Jehova to neno hera miherego kod kaka herano chwali mondo itim duto minyalo e chalnino. Orwako gimoro amora mimiye ka mano e gima ber mogik minyalo gie sani.

12. Yo ma ne Jehova morgo sama nitimo misengni mag kue miyo wabedo gadier gi wach mane?

¹² Misengni mag kue puonjowa ang’o? Sama mach ne wang’o lemo mabeyo mag le, iro ne dum kochomo malo kendo Jehova ne mor sidang’. Kuom mano, bed gadier ni Jehova mor ahinya sama oneno kichiwori tiyone gi chunyi duto. (Kol. 3:23) Parie kaka omor kodi. Okwano gimoro amora mitimo e tije kaka mwandu mabeyo mobiro parigo nyaka chieng’.​—Mat. 6:20; Hib. 6:10.

13. Ka luwore gi Tim Jo-Lawi 9:23, 24, ere kaka Jehova nonyiso ni nomor gi chenro mar bedo gi jodolo e Israel?

¹³ Puonj mar ang’wen: Jehova guedho riwruok mar ogandane ma ni e piny ka. Par ane gima notimore e higa mar 1512 Ka Kristo Podi e kinde ma ne ochung tabenakel e tie Got Sinai. (Wuok 40:17) Musa notayo nyasi mar keto Harun kod yawuote mondo gibed jodolo. Oganda Israel nochokore mondo gine ka jodologo timo migapgi mokwongo tik-tik mar chiwo misengni mag le. (Lawi 9:1-5) Jehova nonyiso nade ni nomor gi chenro mar bedo gi jodologo? Sama Harun gi Musa ne guedho ji, Jehova nokelo mach mowuok e polo  mi owang’o misengni ma ne ni e wi kendo mar misango.​—Som Tim Jo-Lawi 9:23, 24.

14. Bedo ni Jehova noriwo lwedo chenro mar keto Harun gi yawuote obed jodolo mulowa nade?

¹⁴ Mach ma noa e polo chieng’ ma niketo jodolo mokwongogo nonyiso ang’o? Majno nonyiso ni Jehova noriwo lwedo chuth chenro mar keto Harun gi yawuote mondo obed jodolo. Wachno nojiwo oganda Israel mondo gin be giriw jodologo lwedo. Be wachno mulowa wan bende? Ee! Chenro mar bedo gi jodolo e piny Israel nochung’ ne dolo machielo ma ne dhi betie, ma en dolo maduong’ moloyo mano. Kristo ma koro e Jadolo Maduong’ nigi jodolo mamoko 144,000 ma obiro tiyogo kanyachiel e polo.​—Hib. 4:14; 8:3-5; 10:1.

15-16. Ere kaka Jehova osenyiso ni oriwo “jatich mogen kendo mariek” lwedo?

¹⁵ E higa mar 1919, Yesu noketo grup moro matin mar Jokristo mowal mondo obed “jatich mogen kendo mariek.” Jatijno e ma tayo tij yalo e piny kae, kendo omiyo jolup Kristo ‘chiemo e kinde mowinjore.’ (Mat. 24:45) Be waneno gik ma nyiso maler ni Jehova riwo jatich mogen kendo mariek lwedo?

¹⁶ Satan gi pinyeni osetemo ahinya mondo gichoch tij jatich mogen kata chungo tijno chuth. Da bed ni Jehova ok riw jatich mogen lwedo, di koro jatijno osejony moweyo tich. Kata obedo ni lwenje ariyo mag piny ngima osebetie, sand ng’eny, kendo weche yuto rach, jatich mogen kendo mariek osedhi nyime chiwo chiemb chuny ne jolup Kristo e piny  ngima. Parie kaka wayudo chiemb chuny modhuro e kindewagi ma ok wachulo gimoro amora, kendo e dhok mokalo 900! Mano nyiso maler ni Jehova riwo jatich mogen lwedo. Gima chielo ma nyiso ni Jehova guedho ogandane en tijwa mar lendo. Sani walando wach maber “e piny mangima.” (Mat. 24:14) Kuom adier, Jehova tayo riwruokne ma ni e piny kendo oguedhe ahinya.

17. Ere kaka wanyalo nyiso ni wariwo lwedo riwruok mar oganda Jehova?

¹⁷ Onego wapenjre kama: ‘Be amor ni atiyo kanyachiel gi riwruok mar oganda Jehova ma ni e piny ka?’ Nitie gik mang’eny ma Jehova osetimo ma nyiso maler ni oriwo riwruok mar ogandane lwedo, mana kaka nonyiso mano gi mach e ndalo Musa gi Harun. Nitie gik mang’eny monego omi wago erokamano. (1 The. 5:18, 19) Ere kaka wanyalo nyiso ni wariwo lwedo riwruok mar oganda Jehova? Watimo kamano kuom luwo puonj mowuok e Muma mimiyowa e bugewa, chokruogewa mag kanyakla, mag alwora, kod chokruogewa madongo mag ndalo adek. Bende, wariwo riwruogno lwedo kuom timo kinda e tij lendo gi puonjo.​—1 Kor. 15:58.

18. Ang’o ming’ado e chunyi ni ibiro timo?

¹⁸ Wang’aduru e chunywa ni wabiro tiyo gi puonj ma wayudo e bug Tim Jo-Lawi. Watimuru duto ma wanyalo mondo Jehova oyie gi misengni ma wachiwone, tiende ni gik ma watimo e tije. Watiuru ne Jehova nikech wamor gi gik motimonwa kendo nikech wahere gi chunywa duto. Bende, wariwuru riwruok mar ogandane lwedo e weche te. Ka watimo gigo te, wanyiso Jehova ni wakawo mapek thuolo makende momiyowa mar bedo Jonenone!