1. En ote mane ma janabi Isaya ne nigo ne Jo-Israel wetene?

 JANABI Isaya nowacho ni Jehova en “Nyasaye ma ja adiera.” Wach molok ni “adiera” en “amin.” (Isa. 65:16) Tiend “Amin” en ni “obed kamano,” kata “ma onge kiawa.” Sa asaya ma Muma tiyo gi “amin” kowuoyo kuom Jehova kata Yesu, mano nyiso ni weche miwuoyego gin adier. Kuom mano, nenore maler ni Isaya ne nyiso Jo-Israel wetene kama: Gima Jehova owacho nyaka timre. Kuom adier, Jehova osebedo ka chopo singoge duto.

2. Ang’o momiyo wanyalo geno gik ma Jehova osingo e wi kinde mabiro, to gin penjo mage ma wabiro nono?

² Be wanyalo geno ni Jehova biro chopo gik mosingonwa e wi kinde mabiro? Higni ma dirom 800 bang’ kinde Isaya, jaote Paulo nolero gimomiyo kinde duto wanyalo geno singo mag Nyasaye. Nowacho kama: ‘Nyasaye ok nyal riambo chuth.’ (Hib. 6:18) Mana kaka soko achiel ok nyal golo pi maber kod pi chumbi, e kaka Jehova ma e Soko mar adiera, ok nyal wacho miriambo. Kuom mano, wanyalo geno weche duto ma Jehova nyisowa, moriwo nyaka gik mosingonwa e wi kinde mabiro. E sulani, wabiro nono penjo ma luwogi: Ang’o ma Jehova osingo ni obiro miyowa e kinde mabiro? To ere kaka osemiyo wabedo gadier chuth ni obiro chopo singone?

3. (a) En singo mane ma jotich Nyasaye oheroga ahinya? (Fweny 21:3, 4) (b) Jomoko wachoga ang’o sama wasomonegi singono?

³ Singo ma wadwaro wuoye en singo ma jotich Jehova  duto e piny ngima oheroga ahinya. (Som Fweny 21:3, 4.) Jehova osingonwa ni e kinde mabiro, “tho ok nobedie kendo, kata kuyo, kata ywak, kata rem ok nobedie kendo.” Thothwa oheroga somo ndikono sama wahoyo joma walendonegi kendo nyisogi kaka ngima biro chalo e Paradiso. Jomoko wachoga ang’o sama wasomonegi wechego? Ginyalo penjo kama: “Be gigi biro timore adier?”

4. (a) Ka ne Jehova osingo Paradiso, nong’eyo ni ang’o ma ne dhi timore e kindewagi? (b) Bang’ singonwa Paradiso, en ang’o machielo ma ne Jehova otimo?

⁴ En adier ni ka ne Jehova otayo jaote Johana mondo ondik singo mar dak e Paradiso, Jehova nong’eyo ni e kindewagi ne wadhi nyiso jomamoko geno maberno sama walandonegi wach Pinyruoth. Bende, Jehova nong’eyo ni thoth ji e kindewagi ne dhi yudo ka ok yotnegi yie gi “gik manyien” mosingo. (Isa. 42:9; 60:2; 2 Kor. 4:3, 4) Kuom mano, ere kaka wanyalo konyo jomamoko mondo gibed gadier chuth ni gueth molernwa e Fweny 21:3, 4 biro chopo kare? To ere kaka wanyalo tego genowa kuom singono? Jehova ne ok owacho awacha singono kae to oweyo gi kanyo, to nonyisowa bende gimomiyo wanyalo bedo gadier chuth ni singono biro chopo. Ang’o ma Jehova nowacho ma miyo wabedo gadier gi singono?

5. Ang’o momiyo wanyalo bedo gadier chuth gi singo ma Jehova nochiwo e wi Paradiso?

⁵ Wanyalo bedo gadier chuth gi singo ma Jehova ochiwono, nikech weche mowach bang’ singono. Wechego wacho kama: “Jal mobet e kom-lojno nowacho kama: ‘Neuru! Aloso gik moko duto obed manyien.’ Bende, owacho niya: ‘Ndik wechegi nikech gin weche migeno kendo madier.’ Eka nowachona niya: ‘Wechego koro osetimore! An e Alfa kendo an e Omega, chakruok kendo giko.’”—Fwe. 21:5, 6a.

6. Ang’o momiyo weche manie Fweny 21:5, 6 medo tego genowa kuom singo mar Nyasaye?

⁶ Ang’o momiyo wechego tego genowa kuom singo mar Nyasaye? Bug Upeo wa Ufunuo wacho kama e wi wechego: “Chal ka gima Jehova keto sei mare e gueth mosingo ne jotichne momakore kode, kata chiwo title deed mar guethgo.” b Fweny 21:3, 4 nyisowa gima Jehova osingo. Kata kamano, e kwan matindo 5 kod 6, wanyalo wacho ni Jehova keto sei mare mondo wabed gadier chuth gi gima osingo. Koro, we wanon ane weche ma Jehova tiyogo e ndikono mondo okonywa bedo gadier chuth gi singone.

7. En ng’a ma chako wuoyo e Fweny 21:5, to ang’o momiyo mano en wach makende?

⁷ Weche ma yudore e kwan matindo 5 chako kama: “Jal mobet e kom-lojno nowacho.” (Fwe. 21:5a) Mae en achiel kuom kuonde adek e bug Fweny ma Jehova owuon wuoyoe. Kuom mano, wechegi ok owach awacha gi malaika moro ma ratego, kata mana Yesu, to owachgi gi Jehova owuon! Mano konyowa bedo gadier chuth gi weche ma luwo. Nikech ang’o? En nikech Jehova “ok nyal riambo.” (Tito 1:2) Omiyo, onge kiawa ni weche ma wasomo e Fweny 21:5, 6 biro chopo kare.

8. Ang’o ma Jehova nowacho mondo ojiw ni obiro chopo singone? (Isaya 46:10)

⁸ Koro, we wanon ane wach mondik ni “Neuru!” (Fwe. 21:5) E dho Grik, wach molok ni “neuru!” otigo nyadinwoya e bug Fweny. Nonro moro wacho ni alama moket bang’ “neuru” en “yo mar nyiso jasomo ni oket pache e weche ma luwo.” Gin weche mage ma luwo? Nyasaye wacho kama: “Aloso gik moko duto obed manyien.” En adier ni Jehova wuoyo e wi kinde mabiro, kata kamano, en gadier chuth ni obiro timo gima osingo, to mano e momiyo owuoyo ka gima gigo osechako timore.—Som Isaya 46:10.

9. (a) Weche ma wacho ni “aloso gik moko duto obed manyien” nyiso ni Jehova biro timo gik mage ariyo? (b) Ang’o ma biro timore ne “polo machon” kod “piny machon”?

⁹ We koro wawuo kuom weche manie Fweny 21:5 ma wacho niya: “Aloso gik moko duto obed manyien.” Wechego nyiso gik moko ariyo ma Jehova biro timo. Mokwongo, obiro ketho piny Satanni. Mar ariyo, obiro kelo piny manyien. Fweny 21:1 wacho kama: “Polo machon gi piny machon kargi ne oselal nono.” Tiend “Polo machon” en sirkende mag dhano michiko gi Satan kod jochiendene. (Mat. 4:8, 9; 1 Joh. 5:19) Nitie kinde moko ma sama Muma wuoyo e wi piny, owuoyo kuom dhano modak e piny. (Cha. 11:1, The Bible in Luo, 1968; Zab. 96:1) Kuom mano, tiend “piny machon” en dhano maricho modak e kindewagi. Jehova ok bi bero “polo machon” kod “piny machon,” kar mano, obiro kethogi chuth. Kae to obiro kelo “polo manyien gi piny manyien,” tiende ni sirkal manyien ma biro locho e wi dhano makare.

10. Ang’o ma Jehova biro loso mondo obed manyien?

¹⁰ Fweny 21:5 nyisowa gik ma Jehova biro loso mondo obed manyien. E ndikono, Jehova ne ok owacho ni, “Aloso gik manyien duto.” Kar mano nowacho kama: “Aloso gik moko duto obed manyien.” Ee, Jehova biro miyo piny kod dhano obed manyien. Ere kaka obiro timo mano? Mana kaka Isaya nokoro, Jehova biro loso piny duto obed ma jaber mana kaka puodho mar Eden. Bende, obiro chango ng’ato ka ng’ato kuomwa mondo wabed joma kare chuth. Rong’onde, muofni, kod momni biro chango, kendo obiro chiero jomotho.—Isa. 25:8; 35:1-7.

11. Jehova nochiko Johana ni otim ang’o, to nikech ang’o?

¹¹ En ang’o machielo ma Nyasaye wacho ma miyo wabedo gadier gi singone? Jehova nonyiso Johana kama: “Ndik wechegi nikech gin weche migeno kendo madier.” (Fwe. 21:5) Jehova ne ok ochiko Johana ni “ndik wechegi,” kae to oweyo gi kanyo. Nolero gimomiyo nochike kamano. Nowacho kama: “Nikech gin weche migeno kendo madier,” tiende ni wechego biro timore mana kaka owachgi. Wamor ahinya ni Johana notimo mana kaka nochike ni ‘ondik wechego.’ Sani koro wanyalo somo e wi singo Nyasaye mar Paradiso kendo paro matut e wi gueth mang’eny moritowa.

12. Ang’o momiyo Jehova ne nyalo wacho ni, “Wechego koro osetimore”?

 ¹² Ang’o kendo ma Nyasaye wacho? Owacho kama: “Wechego koro osetimore!” (Fwe. 21:6) Ang’o momiyo Jehova koro wuoyo ka gima gik moko duto mosingo e wi Paradiso osetimore? En nikech onge gimoro amora ma nyalo geng’e mondo kik ochop dwache. Jehova wacho gimoro machielo ma miyo wabedo gadier chuth ni singone biro chopo kare. En ang’o mowachono?

13. Ang’o momiyo Jehova nowacho ni, “An e Alfa kendo an e Omega”?

¹³ Mana kaka ne wasewacho motelo, Jehova owuon nowuoyo kuonde adek e fweny ma nomi Johana. (Fwe. 1:8; 21:5, 6; 22:13) Kuonde adekgo duto notiyoe gi wechegi: “An e Alfa kendo an e Omega.” Alfa en nyukta mokwongo e dho Grik, to omega en nyukta mogik. Sama Jehova wacho ni en ‘e Alfa kendo en e Omega,’ okonyowa ng’eyo ni sama ochako gimoro, nyaka otieke maber chuth.

14. (a) Chiw ane ranyisi ma konyowa ng’eyo kinde ma Jehova nonyisoe ni en e “Alfa,” kod kinde ma obiro nyisoe ni en e “Omega.” (b) Chakruok 2:1-3 konyowa bedo gadier gi wach mane?

¹⁴ Bang’ chueyo Adam gi Hawa, Jehova nonyisogi dwache ne piny. Muma wacho kama: “Nyasaye noguedhogi, kendo nowachonegi niya: ‘Nyuolreuru mondo upong’ piny, kendo ubed gi teko e wi piny.’” (Cha. 1:28) Sama Jehova nowacho dwacheno, nonyiso ni en e “Alfa.” E kinde ma nyikwa Adam duto ma winjo Nyasaye biro bedo joma kare chuth kendo pong’o piny mi gilose obed paradiso, mano e kinde ma Jehova biro nyisoe ni en e “Omega.” Bang’ “chueyo polo  gi piny kod gik moko duto man e igi,” Jehova nowacho wach moro ma miyo wabedo gadier ni dwache ne dhi chopo. Wachno yudore e Chakruok 2:​1-3. (Som.) Jehova nowalo odiechieng’ mar abiriyo mondo obed odiechieng’ maler. Mano tiende en ang’o? Jehova miyo wabedo gadier chuth ni dwache ne piny biro chopo kare e giko odiechieng’ mar abiriyo.

15. Ang’o momiyo Satan ne nyalo paro ni nogeng’o dwach Nyasaye ne dhano?

¹⁵ Richo kod tho nodonjo e piny nikech jonyuolwa mokwongo nong’anyo ne Nyasaye. (Rumi 5:12) Mano ne nyalo miyo onenre ka gima Satan nogeng’o dwach Nyasaye mar miyo piny obed paradiso mopong’ gi dhano makare chuth ma winje. Ne chalo ka gima Satan nomono Jehova bedo “Omega.” Samoro Satan ne paro ni onge yo moro amora ma Jehova ne dhi chopogo dwacheno. Nyalo bedo ni noparo ni Jehova ne dhi nego Adam gi Hawa kae to ochueyo dichwo gi dhako machielo mondo ochop dwache ne piny kod dhano. Di ne Nyasaye otimo kamano, Jachien di ne ohangone ni en jamiriambo. Nikech ang’o? En nikech kaka onyiswa e Chakruok 1:28, Jehova nosenyiso Adam gi Hawa ni nyithindgi ne dhi pong’o piny.

16. Ang’o momiyo Satan ne nyalo hango ne Jehova ni dwache otame chopo?

¹⁶ En ang’o machielo ma samoro Satan ne paro ni Nyasaye ne nyalo timo? Samoro noparo ni Jehova ne dhi yie ayiea mondo Adam gi Hawa onyuol nyithindo morem ma onge kaka ginyalo chopo kama gibedoe joma kare chuth. (Ekl. 7:20; Rumi 3:23) Ka gima kamano ne nyalo timore, Jachien di ne ohango ne Jehova ni en Jaloch marach nikech dwache mar pong’o piny gi joma kare chuth kendo ma winje, otame chopo.

17. Kata obedo ni Satan kod jonyuolwa mokwongo nong’anyo, ere kaka Jehova noloso weche, to mano biro kelo ber mane? (Ne picha bende.)

¹⁷ Kata obedo ni Satan gi jonyuolwa mokwongo nong’anyo, okang’ ma Jehova nokawo mondo olosgo weche, nomako dho Satan. (Zab. 92:5) Nikech Jehova noyie ne Adam gi Hawa mondo onyuol nyithindo, mano nonyiso ni Jehova en Nyasaye ma ja adiera. Bende, Jehova nonyiso ni onge gimoro amora  ma nyalo mone chopo dwache. Ere kaka nonyiso mano? Nosingo “kodhi” ma ne dhi waro nyikwa Adam gi Hawa momakore gi chikene. (Cha. 3:15; 22:18) Nyaka bed ni chenro ma Jehova noketo mar waro dhano e richo kod tho, nomiyo dho Satan omoko! Nikech ang’o? En nikech rawar en chenro michwalo gi hera. (Mat. 20:28; Joh. 3:16) To Satan onge gi hera kata matin! Kuom mano, ang’o ma biro timore nikech rawar? E giko Loch Kristo mar Higni Aluf Achiel, dhano makare chuth ma winjo Nyasaye biro dak e paradiso e piny kae mana kaka Jehova nosewacho. Gie kindeno, Jehova biro nyiso ni en e “Omega.”

18. Gin weche mage adek ma Nyasaye nyisowa ma miyo wabedo gadier chuth gi singone? (Ne sanduk ma wiye wacho ni, “ Weche Adek ma Miyo Wabedo Gadier Chuth gi Gima Jehova Osingo.”)

¹⁸ Ka luwore gi gik ma wasenono e sulani, gin ang’o ma wanyalo nyiso jogo ma nigi kiawa e wi singo ma Jehova ochiwo mar Paradiso? Mokwongo en ni Jehova owuon e ma omiyowa singono. Bug Fweny wacho kama: “Jal mobet e kom-lojno nowacho kama: ‘Neuru! Aloso gik moko duto obed manyien.’” Jehova nigi rieko, teko, kod gombo mar chopo gima osingo. Mar ariyo, Jehova ni gadier chuth ni gimoro amora mowacho nyaka timre. Mano e momiyo owacho kama: ‘Wechegi gin weche migeno kendo madier. Wechego koro osetimore!’ Mar adek, sama Jehova ochako gimoro, nyaka otieke maber chuth, to mano nyisore maler e weche ma nowacho ni, “An e Alfa kendo an e Omega.” Jehova biro nyiso maler ni Satan en jamiriambo kendo ni Satan ok onyal mone chopo dwache.

19. Ang’o minyalo timo sama joma ilendonegi nigi kiawa gi singo mar Paradiso?

¹⁹ Par ni sa asaya minyiso jomamoko kaka Jehova miyo wabedo gadier chuth gi singone mar Paradiso, in bende imedo tego yie mari kuom singono. Kuom mano, chieng’ machielo kisomo ne ng’ato singo mar Paradiso kaka olernwa e Fweny 21:4, to ng’atno openji ka be gigo biro timore adier, ang’o minyalo timo? Donge inyalo somone kwan matindo 5 kod 6 kendo ilerne wechego? Nyise kaka Jehova miyo wabedo gadier chuth gi singone kuom keto sei mare e singono.—Isa. 65:16.