SULA MAR PUONJRUOK 41
Chung’ Motegno e Kinde “Masira Maduong’”
“Heruru Jehova un jo momakore kode duto! Jehova rito ngima jo moyie kuome.”—ZAB. 31:23, NW.
WER 129 Wabiro Dhi Nyime Nano
GIMA SULANI WUOYE *
1-2. (a) En wach mane ma joloch mag pinyni biro lando? (b) Gin penjo mage ma dwarore ni wayud dwokogi?
PAR ane kaka weche biro chalo ka koro joloch mag pinyni oselando ni “kuwe nitie kendo weche beyo!” Samoro gibiro pakore ka giwacho ni piny koro nigi kue moloyo kinde moro amora. Gibiro dwaro ni ji duto oyie ni piny koro ber. Kata kamano, gimoro biro timore mapiyo ma ok ginyal geng’o kata matin! En ang’o? Ka luwore gi weche mokor e Muma, “kethruok ma apoya nobi kuomgi gikanyono, . . . kendo ok ginitony ngang’.”—1 The. 5:3.
2 Dwarore ni wayud dwoko mag penjo ma luwogi: Ang’o ma biro timore e kinde “masira maduong’”? Ang’o ma Jehova biro dwaro ni watim e kindeno? To ere kaka wanyalo ikore mondo wasik ka wamakore motegno gi Jehova e kinde masira maduong’?—Mat. 24:21.
ANG’O MA BIRO TIMORE E KINDE “MASIRA MADUONG’”?
3. Ka luwore gi Fweny 17:5, 15-18, ere kaka Nyasaye biro ketho “Babilon Maduong’”?
3 Som Fweny 17:5, 15-18. Ibiro keth “Babilon Maduong’.” Mana kaka wasewacho, jopiny ok bi geng’o gik ma biro timore e kindeno. Nikech ang’o? En nikech ‘Nyasaye noket e i chunygi mondo gitim ka luwore gi pache.’ En paro mane ma Nyasaye noket e i chunygi? Paro mar ketho dinde duto mag miriambo, moriwo nyaka dinde ma luongore ni Jokristo. * Nyasaye biro keto parono e i chuny “tunge apar” mag “ondiek ma kwar ma rieny.” Tunge apargo ochung’ ne sirkende duto ma riwo lwedo “ondiek,” ma en Riwruok mar Pinje (United Nations). (Fwe. 17:3, 11-13; 18:8) Sama sirkendego omonjo dinde mag miriambo, mano biro nyiso ni masira maduong’ osechakore. Wachno biro poyo kendo bwogo ji duto modak e piny.
4. (a) Joloch mag pinyni biro wacho ni ang’o momiyo gimonjo dinde mag miriambo? (b) Ang’o ma joma ni e dindego biro timo?
4 Ok wang’eyo ni joloch mag pinyni biro wacho ni ang’o momiyo gimonjo dinde mag miriambo. Samoro ginyalo wacho ni dindego osebedo ka monogi kelo kue e piny kendo ni gisebedo ka gidonjore e wechegi mag siasa. Kata ginyalo wacho ni dindego osebedo ka choko mwandu mang’eny ahinya. (Fwe. 18:3, 7) Nenore ni monjno ok bi tieko ji duto ma ni e dinde mag miriambogo. Kar mano, samoro gibiro tieko riwruoge duto mag dindego. Ka osetiek riwruogego, joma ne ni e riwruogego biro fwenyo ni jotendgi ne olalogi, kendo samoro gibiro chako wacho ni ne ok gin e dindego.
5. Ang’o ma Jehova osesingo ni obiro timo e kinde masira maduong’, to nikech ang’o?
5 Muma ok wach ni biro kawo kinde ma romo nade ketho Babilon Maduong’, kata kamano, gima wang’eyo en ni kethruokno ok bi kawo kinde malach. (Fwe. 18:10, 21) Jehova osesingo ni obiro ‘ng’ado ndalo’ mag masirano obed machuok mondo ores “joma oyier” kachiel gi din madier. (Mar. 13:19, 20) Kata kamano, Jehova biro dwaro ni watim ang’o sama masira maduong’ ochakore nyaka e kinde lweny mar Har–Magedon?
DHI NYIME RIWO LAMO MADIER LWEDO
6. Ang’o momiyo ng’ado ang’ada tudruok kod dinde mag miriambo ok oromo?
6 Mana kaka ne waneno e sula mokalo, Jehova dwaro ni joma lame owere chuth gi Babilon Maduong’. Mano nyiso ni ng’ado ang’ada tudruok kodgi ok oromo. Nyaka wadhi nyime riwo lamo madier lwedo. Ne ane yore ariyo ma wanyalo timogo kamano.
Kik wawe chokore kanyachiel ne lamo kata mana e kinde ma weche tek (Ne paragraf mar 7) *
7. (a) Ere kaka wanyalo mako matek timbe makare ma Jehova puonjowa? (b) Ang’o momiyo ndiko mar Jo-Hibrania 10:24, 25 wacho ni onego wachokre kanyachiel, to moloyo e kindegi?
7 Mokwongo, onego wamak matek timbe makare ma Jehova puonjowa. Ok wanyal luwo puonj kod timbe mag pinyni. Kuom ranyisi, ok wanyal yie gi timbe mag terruok ma itimo e pinyni, moriwo nyaka kend e kind chwo gi chwo kata mon gi mon kod timbe motudore gi wechego. (Mat. 19:4, 5; Rumi 1:26, 27) Mar ariyo, nyaka wadhi nyime chokore gi Jokristo wetewa. Watimo mano e Od Romo, e utewa, kata kuonde mopondo sama weche tek. Kata ang’o ma timre, ok wanyal weyo chokore kanyachiel mondo walam Jehova. Onego wadhi nyime timo kamano, ‘to moloyo sama waneno ni chieng’no medo sudo machiegni.’—Som Jo-Hibrania 10:24, 25.
8. Ote ma walando nyalo lokore nade e kinde ma biro?
8 E kinde masira maduong’, ote ma wabiro walando samoro biro lokore. Sani walando wach maber mar Pinyruoth kendo watemo loko ji mondo gibed jopuonjre Yesu. Kata kamano, nenore ni e kindeno, wabiro lando ote mapek ma goyo ji ka pe madongo. (Fwe. 16:21) Samoro wabiro lando ni giko mar piny Satan osechopo. Ibiro nyiswa ote ma wabiro lando kod kaka wabiro lande. Be wabiro lando oteno ka watiyo gi yore ma wasebedo ka watiyogo e lando wach maber kuom higni mia achiel gi wiye mosekalo? Koso wabiro tiyo gi yore manyien? Warit wanane. Gima duong’ en ni nenore ni wabiro yudo thuolo ma jaber mar lando kum mag Jehova gi chir!—Eze. 2:3-5.
9. Jotelo mag pinyni biro kawo nade ote ma walando, to ang’o ma wan-go gadiera chuth?
9 Nenore ni ote ma wabiro lando biro wang’o i jotelo mag piny kendo gibiro temo tiekowa chuth. Jehova biro konyowa e tijno kaka osebedo ka otimo e kindewagi. Wan gadier chuth ni Nyasaye biro miyowa teko mar timo dwache.—Mika 3:8.
SIK KIIKORI NE MONJ MIBIRO MONJGO JO NYASAYE
10. Kaka okor e Luka 21:25-28, ji biro winjo nade e kinde masira maduong’?
10 Som Luka 21:25-28. E kinde masira maduong’, ji biro hum ahinya ka gineno ka gimoro amora ma ne giparo ni biro siko koro rumo. Gibiro dhier nono kendo luoro biro makogi ka gineno ni tho ochomogi. (Zef. 1:14, 15) E kindeno, nenore ni ngima biro bedo matek ne jotich Jehova bende. Nikech ok wan mag pinyni, wabiro yudo chandruoge moko. Samoro kata yudo gik mochuno e ngima biro bedonwa matek.
11. (a) Ka oseketh dinde mag miriambo, ang’o momiyo jopiny, joloch, kod Satan biro chomo wang’gi kuom Joneno mag Jehova? (b) Ang’o momiyo onge tiende luoro masira maduong’?
11 Biro chopo kama joma oketh dindegi biro sin ahinya ka gineno ka din mar Joneno mag Jehova to pod dhi nyime. Gibiro nyiso mirimbgi e yore mang’eny, moriwo nyaka e intanet. Joloch mag pinyni kod Satan jatendgi bende biro mon kodwa. Gibiro fwenyo ni kare pok gitieko dinde duto kaka ne giparo. Wan e ma koro gibiro chomo wang’gi kuomwa. Mano e sama pinjego biro bedo Gog mar Magog. * Gibiro nywako mondo gimonj jotich Jehova gi monj ma pok none. (Eze. 38:2, 14-16) Samoro wanyalo parore nikech nitie weche moko ma ok wang’eyo e wi kaka masira maduong’ biro chalo. Kata kamano, gima wan-go gadier en ma: Onge tiende luoro masira maduong’. Jehova biro nyisowa gik monego watim mondo watony. (Zab. 34:19) Wabiro ‘chung’ tir kendo ting’o wiwa malo’ ka wan gadier ni ‘resruokwa osekayo machiegni.’ *
12. Ere kaka “jatich mogen kendo mariek” osebedo ka ikowa ne gik ma biro timore e kinde ma biro?
12 “Jatich mogen kendo mariek” osebedo ka ikowa mondo wabi wachung’ motegno e kinde masira maduong’. (Mat. 24:45) Gisetimo mano e yore mang’eny. Kuom ranyisi, par ane chokruoge madongo ma wasebedogo chakre higa mar 2016 nyaka 2018. E chokruogego, nojiwwa mondo wabed gi kido ma biro miyo wachung’ motegno kaka odiechieng Jehova medo kayo machiegni. We wawuo machuok kuom kidogo.
SIK KIMAKORI GI JEHOVA, TIM SINANI, KENDO IBED GI CHIR
Ikri sani mondo ibi itony e “masira maduong’” (Ne paragraf mar 13-16) *
13. Gin gik mage ma nyalo konyowa makore gi Jehova, to ang’o momiyo onego wachak makore gi Jehova sani?
13 Makruok gi Jehova: Wi chokruok maduong’ ma higa mar 2016 ne en “Sik Kimakori gi Jehova!” E chokruogno, nopuonjwa ni ka wabedo gi winjruok motegno gi Jehova, biro bedonwa mayot makore kode. Bende, noparnwa ni wanyalo sudo machiegni gi Jehova kuom lamo kod puonjruok Muma. Ka watimo kamano, wabiro yudo teko mar loyo pek ma nyalo nenore ni dongo. Kaka giko mar piny Satanni medo sudo machiegni, e kaka wabiro medo yudo tembe ma biro nyiso okang’ ma wamakorego gi Jehova kod Pinyruodhe. Joma jarowa pod biro dhi nyime jarowa ajara. (2 Pet. 3:3, 4) Mano biro timore ahinya-ahinya nikech ok wariw piny Satan lwedo e yo moro amora. Mondo wabi wamakre gi Jehova e kinde masira maduong’no, nyaka wachak makore kode sani.
14. (a) En lokruok mane ma biro timore e joma tayowa? (b) Ang’o momiyo biro dwarore ni wamakre ahinya gi Jehova e kindeno?
14 E kinde masira maduong’, owete ma tayo riwruogwa biro bedo mopogore. Biro chopo kama owete mowal duto modong’ e piny biro dhi e polo mondo gikony e lweny mar Har–Magedon. (Mat. 24:31; Fwe. 2:26, 27) Mano nyiso ni e kindeno, Bura Matayo biro bedo ma onge e piny ka. To mano ok nyis ni oganda mang’ongo biro bedo ma onge joma tayogi. Owete molony ma ni e kind rombe mamoko biro tayo. Wabiro nyiso ni wamakore gi Jehova kuom riwo owetego lwedo kendo luwo kaka gitayowa. Mano e ka wabiro tony!
15. Ang’o ma nyalo konyowa siko ka wanano, to ang’o momiyo ber ka wachako nano sani?
15 Sinani: Wi chokruok maduong’ ma higa mar 2017 ne en “Kik Chunyi Ol!” Chokruogno nokonyowa ng’eyo kaka wanyalo dhi nyime nano e tembe. Ne opuonjwa ni sinani dwarore kinde duto, bed ni weche beyo kata richo. Wanyalo siko ka wanano mana ka watenore kuom Jehova. (Rumi 12:12) Kinde duto waparuru gima Yesu nosingonwa niya: “Ng’at monano nyaka giko ibiro res.” (Mat. 24:13) Mano nyiso ni nyaka wasik ka wachung’ motegno kata bed ni wakalo e pek ma chalo nade. Mondo wabi wanan e tembe duto ma wabiro romogo e masira maduong’, nyaka wachak timo sinani sani.
16. Be nyalo ma wan-go e ma miyo wabedo gi chir? Ler ane.
16 Chir: Wi chokruok maduong’ ma higa mar 2018 ne en “Bed gi Chir!” E chokruogno, noparnwa ni nyalo ma wan-go ok e ma mi wabed jochir. Mana kaka sinani, chir madier bende ng’ato bedogo mana kotenore kuom Jehova. En ang’o ma nyalo konyowa timo mano? En somo Muma pile kendo paro matut kuom kaka Jehova noreso joge e kinde mokalo. (Zab. 68:20; 2 Pet. 2:9) Sama ibiro monjwa e kinde masira maduong’, biro dwarore ni wanyis chir kendo wagen kuom Jehova moloyo kinde moro amora mosekalo. (Zab. 112:7, 8; Hib. 13:6) Mondo wabi wagen chuth kuom Jehova e kinde monj mar Gog, nyaka wachak geno kuome sani. *
RIT RESRUOKNI GI SISO
Machiegnini, Yesu, malaike, kod Jokristo mowal mosedhi e polo biro kedo e lweny mar Har–Magedon mondo gitiek jowasik Nyasaye! (Ne paragraf mar 17)
17. Ang’o momiyo ok onego waluor lweny mar Har–Magedon? (Ne picha manie nyim gaset.)
17 Mana kaka sula mokalo nowacho, ng’enywa osebedo kodak e ndalo mag giko e ngimagi duto. To ng’enywa bende biro dak e kinde masira maduong’ mi gitony. Lweny mar Har–Magedon e ma biro kelo giko mar ndalo mag giko. Kata kamano, ok onego waluor lwenyno. Nikech ang’o? En nikech mano en lweny mar Nyasaye owuon, kendo wan ok wabi kedo. (Nge. 1:33; Eze. 38:18-20; Zek. 14:3) Sama Jehova biro dwaro ni lwenyno ochakre, Yesu Kristo biro telo e lwenyno. Jokristo mowal mosedhi e polo kod malaike tara gi tara biro riwore kode. Gibiro kedo gi Satan, jochiendene, kod langgi ma ni e piny.—Dan. 12:1; Fwe. 6:2; 17:14.
18. (a) En ang’o ma Jehova osingonwa? (b) Ere kaka Fweny 7:9, 13-17 miyi chir sama irito gik ma biro?
18 Jehova osingonwa kama: ‘Onge gir lweny mothedh mar kedo kodi ma dinyal timo gimoro.’ (Isa. 54:17) “Oganda mang’ongo” moting’o jotich Jehova mochung’ motegno biro tony e “masira maduong’,” kendo gibiro dhi nyime tiyo ne Jehova. (Som Fweny 7:9, 13-17.) To mano kaka weche ma ni e Muma miyo wabedo gi chir sama warito gik ma biro! Wan gadier ni “Jehova rito ngima jo moyie kuome.” (Zab. 31:23, NW) Ji duto mohero Jehova kendo ma pake biro mor ahinya ka gineno ka oketo nyinge obed maler.—Eze. 38:23.
19. En geno mane ma jaber ma wan-go?
19 Par ane kaka inyalo ndik weche ma ni e 2 Timotheo 3:2-5 kiwuoyo kuom joma biro dak e piny manyien ka koro Satan onge. (Ne sanduk ma wiye wacho ni, “ Kaka Kit Ji Biro Chalo e Piny Manyien.”) Owadwa George Gangas * ma kinde moro ne ni e Bura Matayo nowuoyo kuom kindeno kowacho kama: “To mano kaka piny biro bedo maber ka koro ji duto modakie gin joma lamo Jehova! Machiegnini, ibiro yudo thuolo mar dak e piny manyien. Ibiro dak kuom higni duto ma Jehova biro betie. Ee, ibiro dak nyaka chieng’.” Mano geno ma jaber ndi!
WER 122 Chung’uru Motegno ma Ok Uyiengni!
^ par. 5 Wang’eyo ni machiegnini “masira maduong’” nobi ne dhano duto. Ang’o ma biro timore ne jotich Jehova e kindeno? Ang’o ma Jehova biro dwaro ni watim e kindeno? Gin kido mage ma onego wamed nyago mondo wabi wachung’ motegno e kindeno? Wadwaro yudo dwoko mag penjogo e sulani.
^ par. 3 WECHE MOLER: Sama wawuoyo kuom dinde ma luongore ni Jokristo, wawuoyo kuom dinde duto ma wacho ni gin Jokristo, to ok gipuonj ji lamo Jehova ka luwore gi chikene.
^ par. 11 WECHE MOLER: Gog mar Magog (miluongo e yo machuok ni Gog) itiyogo kiwuoyo kuom pinje moriwore mondo gimonj jotich Jehova e kinde masira maduong’.
^ par. 11 Ka diher nono matut gik ma biro timore ka wachomo Har–Magedon, som sula mar 21 e buk miluongo ni Pinyruodh Nyasaye Locho! Ka diher yudo weche momedore e wi monj mar Gog mar Magog kod kaka Jehova biro reso jotichne e Har–Magedon, som sula mar 17 gi 18 e buk miluongo ni Hatimaye Ibada Safi ya Yehova Yarudishwa!
^ par. 16 Wi chokruok maduong’ ma higa mar 2019 en “Hera Ok Rem Ngang’!” Olose mondo okonywa bedo gadier ni kinde duto Jehova Nyasachwa ma jahera biro ritowa.—1 Kor. 13:8.
^ par. 19 Som sula ma wiye wacho ni, “Matendo Yake Yamfuata” e Mnara wa Mlinzi ma Desemba 1, 1994.
