Sama itemo mondo ing’e ng’ato e yo maber, thothne gima ibiro kwongo penje en ni, “Nyingi ng’a?” Dabed ni inyalo penjo Nyasaye penjono, iparo ni dodwoki nang’o?

“An Jehova; ma e nyinga.”​—Isaiah 42:8.

Nyasaye owuon neno nyingno kaka gima duong’. Onge ng’ato ang’ata ma noyiero ne Nyasaye nyingno; en owuon e ma nomiyore nyingno. Jehova nowacho kama: “Ma e nyinga nyaka chieng’, kendo ma e raparna nyaka tienge duto.” (Wuok 3:15) E Muma, nying Jehova otigo nyading’eny moloyo nyinge mamoko mipakego, kaka Ma Nyalo Duto, Wuoro, Ruoth, kata Nyasaye. Bende, nyingeno yudore nyading’eny moloyo nyinge jomamoko kaka Ibrahim, Musa, Daudi, kata Yesu. Bende, Jehova dwaro ni ji ong’e nyinge. Muma wacho kama: “Ni mondo ging’e ni in, ma nyingi Jehova, in kendi e ng’a Ma Malo Chutho e piny ngima.”​—Zaburi 83:18.

Yesu neno nyingno kaka gima duong’. E Lamo mar Ruoth ma bende ong’ere kaka Alam mar Ruodhwa, Yesu nopuonjo jolupne mondo okwa Nyasaye niya: “Nyingi mondo obed maler.” (Mathayo 6:9) Yesu owuon nokwayo Nyasaye e lamo kama: “Wuora, mi nyingi duong’.” (Johana 12:28) Yesu notemo ahinya mondo oket nying Nyasaye obed motelo. Mano e momiyo nonyalo nyiso Jehova gi chir niya: “Asemiyo nyingi ong’erenegi kendo abiro miyo omed ng’ere.”​—Johana 17:26.

Joma ong’eyo Nyasaye neno nyingno kaka gima duong’. Jotich Nyasaye ma kinde mokalo nong’eyo maber ni resruokgi notudore achiel kachiel gi nying Nyasaye. Achiel kuomgi nondiko kama: “Nying Jehova en ot matek moting’ore malo; Ng’at makare oringoe, mi okuwo.” (Ngeche 18:10)  Machielo be nowacho niya: “Ng’ato ka ng’ato ma noluong nying Jehova to norese.” (Joel 2:32) Muma wacho ni nying Nyasaye ne dhi konyo e pogo joma tiyone gi joma ok tine. Onyisowa kama: “Ogendini duto nowuothi ng’ato ka ng’ato koluoro nying nyasache, to wan wanawuothi kwaluoro nying Jehova Nyasachwa ndalo duto nyaka chieng’.”​—Mika 4:5; Tich Joote 15:14.

Nyingno konyowa ng’eyo Nyasaye e yo makende. Jonon Muma mang’eny oseyudo ni nying Jehova tiende en ni “Omiyo Gima Odwaro Timore.” Weche ma Jehova nonyiso Musa konyowa ng’eyo tiend nyingeno e yo maler. Nonyise niya: “Anabed Gima Adwaro Bedo.” (Wuok 3:14, New World Translation) Nyingno ok nyis mana migap Nyasaye kaka Jachuech kende. Kar mano, nyingno nyiso nyalo ma en-go mar miyo en owuon kata chuechne obed gimoro amora ma dwarore mondo ochop dwache. Kata obedo ni nying mang’eny mag telo ma Nyasaye nigo nyiso lochne kod tekone, nyinge mar Jehova kende e ma okwako kite duto kod nyalo ma en-go.

Nyingno konyowa ng’eyo ni Nyasaye oherowa. Tiend nying Nyasaye nyiso kaka ohero chuechne, moriwo nyaka wan. E wi mano, bedo ni Nyasaye osefulonwa nyinge nyiso ni doher ni wang’eye. Donge en e ma nokawo okang’ mar nyisowa nyinge kata ka ne pok wapenje! Nenore maler ni Nyasaye dwaro ni wanene kaka ng’ato madier ma wanyalo makogo osiep kata sudogo machiegni, to ok kaka teko moro ma ni mabor kodwa.​—Zaburi 73:28.

Tiyo gi nyingno en yo ma wanyisogo Nyasaye ni wahere. Par ane ranyisini. Inyalo nyiso ng’at ma diher makogo osiep ni oti gi nyingi masie sama odwaro luongi. Inyalo winjo nade ka ng’atno otamore tiyo gi nyingi kata bang’ kisenwoyonego nyading’eny? Onge kiawa ni mosmos ibiro chako wuoro ka be ng’atno dwaro bedo osiepni adier. Jehova bende neno nyinge e yo ma kamano. Osenyiso dhano nyinge kendo ojiwogi ni giti gi nyingno. Sama watiyo gi nyingno, wanyiso Jehova ni wahere kendo dwaher sudo machiegni kode. To parie ni omor malich sama owinjo ka joma ‘paro nyinge’ kata mohero nyinge wuoyo!​—Malaki 3:16.

Ka wadwaro ng’eyo Nyasaye e yo maber, okang’ mokwongo en ng’eyo nyinge. To ok wawe gi kanyo. Dwarore ni wang’e wuon nyingno. Ber mondo wang’e ni kite chalo nade.