Mana kaka María, Raúl, Arne, kod jomamoko mang’eny osegawacho, lamo en mich makende. Gineno lamo kaka yo mar wuoyo gi Nyasaye, goyone erokamano, kendo kwaye mondo okonygi. Giyie gi chunygi duto gi gima Muma nyisowa e wi lemo niya: “Adiera ma wan-go kuom Nyasaye e ma, ni gimoro amora ma wakwaye kaluwore gi dwache, owinjowa.”​—1 Johana 5:14.

Kata kamano, nitie jomoko ma ok yotnegi yie gi gima Muma wacho e wi lamo. Jago moro ma nyinge Steve lero paro ma ne en-gago e wi lemo. Owacho niya: “Ka ne an jahigni 17, osiepena adek notho e aksident ariyo mopogore. Achiel mtoka e ma nonego, to ariyo mamoko notho e pi.” Steve nokawo okang’  mane? Owacho kama: “Nalemo ka apenjo Nyasaye gimomiyo mago duto notimore, to ne ok ayudo dwoko. Omiyo, nawacho e chunya ni, ‘Onge tiende mondo ng’ato olem!’” Ji mang’eny osegabedo gi paro ma kamano nikech gineno ni gilemo to onge ng’ama dwokogi.

Nitie gik mamoko ma bende miyo jomoko wuoro ka be lemo konyo. Kuom ranyisi, jomoko wacho ni nikech Nyasaye ong’eyo gik moko duto, mano nyiso ni ong’eyo nyaka chandruogewa; omiyo, onge tiende nyise kendo.

Jomoko to wacho ni Nyasaye ok winjgiga sama gilemo nikech richo moko ma ne gitimo chon. Dhako moro ma nyinge Jenny wacho kama: “An gima chanda en ni anenoga ni an ng’ama nono e nyim Nyasaye. Asegatimo gik maricho mang’eny ma chando chunya, omiyo, an gadier ni onge gima dimi Nyasaye winja.”

In to in gi paro mane e wi lemo? Ka po ni isegabedo gi kiawa ka be Nyasaye winjiga sama ilemo kata ka be nitie tiende lemo, ng’e ni Muma lero weche ma kamago e yo ma nyalo jiwi. Wanyalo bedo gadier chuth gi gik ma Muma wacho e wi lemo. * Bende, Muma nyalo konyi yudo dwoko mag penjo ma luwogi:

• Be Nyasaye winjowaga sama walemo?

• Ang’o momiyo Nyasaye ok dwokga lamo moko?

• Ere kaka onego ilem mondo Nyasaye owinji?

• Lemo nyalo konyi nade?