“Sikuru ka uneno nikech ok ung’eyo chieng’no kata sano.”​—MATHAYO 25:13.

“Sikuru ka utang’, sikuru ka uneno, nimar ok ung’eyo ni kinde moket en karang’o.”​—MARIKO 13:33.

Kuom mano, onge ng’ato ang’ata e pinyni mong’eyo odiechieng’ sie ma giko nobie. Kata kamano, nitie ‘kinde ma Nyasaye oseketo,’ tiende ni ‘odiechieng’ kod sa’ ma giko nobie. (Mathayo 24:36) Be mano nyiso ni ok dwang’e chuth-chuth ka giko okayo machiegni? Yesu nomiyo jopuonjrene ranyisi ma ne dhi konyogi ng’eyo ni giko koro chiegni.

Gik ma Yesu nowacho ni ne dhi timore ne dhi bedo ranyisi mar “giko mar ndalo.” Nowacho kama: “Oganda noked gi oganda kendo pinyruoth noked gi pinyruoth, bende chiemo nobed manok kendo yiengni mag piny nobedie kamoro bang’ machielo.” (Mathayo 24:3, 7) Nowacho bende ni ‘tuoche ma landore ne dhi betie.’ (Luka 21:11) Be iseneno ka gik ma nowachogo timore?

Lwenje, kech, yiengni piny, kod tuoche ma landore opong’o kamoro amora e piny sani. Kuom ranyisi, e higa mar 2004 piny noyiengni matek e i Nam Chumbi (Indian Ocean) mokelo tsunami ma nonego ji 225,000 kama. Kuom higni adek, tuo mar korona nonego ji mokalo milion 6.9 e piny ngima. Yesu nowacho ni gik ma kamago ne dhi nyiso ni giko pinyni okayo machiegni.

Muma nowacho ni thuolo matin ma ne dhi betie ka giko pok ochopo ne idhi luong ni “ndalo mag giko.” (2 Petro 3:3, 4) Ka luwore gi 2 Timotheo 3:1-5, e ndalo mag giko, ji ne dhi bedo gi timbe maricho ahinya. (Ne sanduk ma wiye wacho ni “ Kodong’ Matin to Giko Chopo.”) Be iseneno kaka kindegi ji mang’eny oherore giwegi, igi lach, giger, kendo gionge hera? Kido kaka mago nyiso ni giko chiegni ahinya.

Ndalo mag giko ne dhi kawo kinde ma romo nade? Muma wacho ni “mana kinde manok.” Bang’ mano, Nyasaye biro “ketho jo ma ketho piny.”​—Fweny 11:15-18; 12:12.

Nyasaye oseketo odiechieng’ sie kod sa ma obiro tiekoe gik maricho duto e pinyni. (Mathayo 24:36) To pod nitie wach moro maber moloyo, ma en ni Nyasaye ‘ok odwar ni oketh ng’ato ang’ata.’ (2 Petro 3:9) Omiyo ji duto thuolo mar loko yoregi mondo gitine. Nikech ang’o? En nikech doher ni watony ka giko pinyni ochopo, kendo wadag e piny manyien mosingonwa ka koro oseloke mobedo paradiso.

Nyasaye oseloso chenro mar puonjo ji Muma e piny ngima mondo okonygi ng’eyo gik monego gitim e ka gibi gidag e piny manyien e bwo Pinyruodhe. Yesu nowacho ni ne idhi yal wach maber mar Pinyruodh Nyasaye “e piny mangima.” (Mathayo 24:14) Joneno mag Jehova e piny mangima tiyoga gi seche bilionde e yalo wach maber kendo puonjo ji Muma. Yesu nowacho ni wach maberno ne idhi yal e piny duto ka pok giko ochopo.

Loch dhano chiegni chopo e gikone. Kata kamano, wach maber en ni in bende inyalo tony ka giko pinyni ochopo ma idag e paradiso e piny kae mana kaka Nyasaye osingo. Sula ma luwo biro nyiso gik minyalo timo mondo idag e piny manyien.