JI NIGI paro mathoth mopogore opogore e wi ngima kod tho. Jomoko paro ni ka gisetho, to gidhi nyime bedo ma ngima e ringruok machielo ka gidak kama chielo. Moko paro ni ka gisetho to gilokore gibedo chuech mopogore. Jomoko to neno ni ka ng’ato otho, to wachne orumo mana kamano.

Nyalo bedo ni gima iyiego e wi gima timore ka ng’ato otho otudore gi kama ne idonge kata oganda miwuokie. Nikech ji nigi paro mopogore opogore kamano e wi wachno, be nitie ng’at ma nyalo konyowa ng’eyo wachno e yo maler, kata be nitie gima nyalo konyowa ng’eyo adiera e wi penjo ma kore tekni?

Kuom higni mang’eny, jotend dinde osepuonjo ji ni chuny dhano ok tho. Ji manie dinde mong’ere ahinya moriwo Jokristo, Jo-Hindu, Jo-Yahudi, Jo-Islam, kod mamoko oyie ni nitie chuny ma ok tho kendo giwacho ni chunyno dhi nyime dak kama chielo sama ng’ato otho. Jo-Budha to oyie ni ka ng’ato osetho, osiko kolokore chuech mopogore opogore mochop kama ber. Lokruok ma kamano miyo ng’ato chopo kama ber miluongo ni Nirvana.

Ka luwore gi puonjgo, ji mang’eny e piny ma ngima oyie ni tho e ma yawo ne ng’ato thuolo mar dak e ngima machielo. Omiyo, gineno ni tho en gima duong’ ahinya e ngima dhano kendo ni en dwaro mar Nyasaye. Kata kamano, Muma wacho ang’o e wi wachni? Wakwayi ni isom sula ma luwo mae. Dwoko ma Muma chiwo nyalo yawo wang’i.