Nonyuola kama iluongo ni Ciudad Mante, ma yudore Tamaulipas e piny Mexico. Joma odak kuno ng’won-ga ahinya kendo gin jochiwo. Gima lit en ni alwora ma jaberno ne dakie rach ahinya nikech mahundu.

Ne wan nyithindo ang’wen ma yawuoyi e odwa, kendo ne an wuoyi mar ariyo. Jonyuolna notimo chenro mi ayudo batiso e Kanisa mar Katholik, kendo bang’e ne abedo jawer e kwaya. Ne agombo moro Nyasaye nikech ne aluor ni ka ok atimo kamano, to Nyasaye ne nyalo ng’adona bura mi owang’a nyaka chieng’ e mach mager.

Ka ne an jahigni abich, wuonwa nodar oweyowa kendwa gi mama. Mano nomiyo akuyo marach, kendo chunya nonyosore. Ne awuoro ahinya gimomiyo nobukore oweyowa to wan to ne wahere malich. Minwa koro ne nyaka ti kuom seche mathoth e ka wanwang’ gima waketo e bund iwa.

Nikech minwa nodich e menyo, ne ajabara ne skul ma ok ofwenyo, mondo atug gi nyithindo moko. Nyithindogo nopuonja timbe maricho kaka kuong’ruok, madho ndawa, kuo, kod goyo ji adhong’. Nikech nadwa ni alo jowetena gi teko, napuonjora angum, karate, kod kedo gi ligangla mopogore opogore. Nabedo rawera mager ahinya. Seche moko ne wadhawo gi bunde. Kinde moko joma ne wadhawogo ne weya e bath ndara ka remo otiap kuoma ka giparo ni asetho. Minwa ne winjoga malit ahinya koyuda ka ahewora e bath ndara, kendo nojatera e osiptal.

Ka ne koro an jahigni 16, osiepna moro ma ne wapon-go ma nyinge Jorge nobiro limowa. Nowachonwa ni en achiel kuom Joneno mag Jehova kendo ni nitie wach moro ma nodwaro nyisowa. Nochako leronwa yiene kotiyo gi Muma. Ne pok asomoga nying Nyasaye e Muma nyaka nene, kendo namor ahinya ng’eyo nyingno kod singo mag Nyasaye. Jorge nopenjo ka nonyalo puonjore kodwa Muma. Ne wayie.

Fwenyo ni Muma ok wuo kuom mach misandoe ji nokueyo chunya ahinya. (Zaburi 146:4; Eklesiastes 9:5) Chakre kanyo, luoro ma ne an-go ni Nyasaye  wang’o ji e mach norumo. Kendo koro nachako nene kaka Wuoro ma jahera ma dwaro mana gik mabeyo ne nyithinde.

Kaka namedo puonjora Muma, nafwenyo ni ne dwarore ni atim lokruoge moko e ngimana. Ne dwarore ni anyag kido mar bolruok kendo awe mahundu. Achiel kuom Ndiko ma nokonya en 1 Jo-Korintho 15:33 ma wacho ni osiepe maricho “ketho timbe mabeyo.” Nafwenyo ni mondo atim lokruok e ngimana, nonego awe tudora gi osiepe maricho. Omiyo, naweyo osiepena machon kendo nachako manyo osiepe manie kanyakla mar Jokristo—osiepe ma ka nigi ywaruok to giloso weche ka gitiyo gi puonj mag Muma, to ok adhong’ gi lweny.

Ndiko machielo ma ne omulo chunya ahinya en Jo-Rumi 12:17-19. Ndikono wacho niya: “Kik uchul richo kar richo ne ng’ato ang’ata. . . . Ka nyalore, to temuru matek mondo udag gi kuwe gi ji duto. . . . Kik uchul kuor e lou uwegi, . . . nimar ne ondik niya: ‘Jehova owacho, “Chulo kuor en mara; abiro chulo.” ’ ” Naduogo ayie ni Jehova biro kawo okang’ mar tieko gik maricho ma timore e piny e kinde mowinjore kendo kaka ohero. Mosmos, naweyo bedo ng’ama ger.

Wiya ok nyal wil gi gima notimorena chieng’ moro godhiambo ka ne an e yo ka adok ot. Rowere moko ma ne wajokedogo chon nomonja, kendo jatendgi nogoyo ng’eya matek kokok ni, “Tem ane kedo kodwa inee! ” Gie kindeno, nalemo gi chunya mondo Jehova okonya kik adhaw kodgi. Kata obedo ni iya nowang’ matek kendo nawinjo e chunya ni achul kuor, ne ok akedo kodgi; kar mano, nachako wuoth ka adhi kuma nadhiye. Odiechieng’ maluwo, naromo gi jatend rowerego ka en kende. Mirima nomaka matek, to nachak alemo kendo ka akwayo Jehova mondo okonya kik amwomra. Rawerano notimo gima nomako dhoga. Nobiro nyaka ira, kae to owacho niya: “Ng’wonna kuom gima natimo nyoro. Kiwacho awacha adier, daher chalo kodi. Daher puonjora Muma.” Kare natimo maber kuom tamora chulo kuor! Timnano nomiyo oyie puonjore Muma.

Gima rach en ni e kindeno joodwa noweyo puonjore Muma. Kata kamano, an to nang’ado mar dhi nyime gi puonjruok kendo ne ok ayie mondo gimoro amora osinda. Nang’eyo ni tudruok gi Jokristo wetena ne dhi konya tieko parruok mang’eny kendo ne gidhi bedona kaka joodwa. Namedo dhi maber e weche Nyasaye, kae to e higa mar 1991, nobatisa mi abedo achiel kuom Joneno mag Jehova.

Chon ne an jamirima ma ger pino, ne ok ahero ni ng’ato oloya, kendo nahero dhawo. To Wach Nyasaye oseloko kit ngimana chuth. Sani koro alando weche mag kue manie Muma ne joma diher winjo. Asebedo ka atiyo ne Jehova kuom thuolona duto kuom higni 23 mosekalo.

Kinde moro bende, nachiwora dhi tiyo e ofis mar Joneno mag Jehova man Mexico. Ka ne an kuno, naromo gi Claudia ma ne en nyamiyo ma jakinda ahinya, kendo ne wakendore kode e higa mar 1999. Adwoko ne Jehova erokamano kuom guedha gi dhako ma riwa lwedo e weche duto!

Nitie kinde ma ne wabedo e kanyakla moro mitiyoe gi Mexican Sign Language ka wakonyo momni man kono ng’eyo Jehova. Bang’e ne oorwa Belize mondo wapuonj ji Muma kuno. Kata obedo ni wadak e ngima mayot, wan-gi gik moko duto ma wadwaro mondo wabed mamor. Onge gimoro amora ma wanyalo pimo gi kit ngima ma wadakie.

Kaka kinde ne medo kalo, minwa nochako puonjore Muma kendo, mi obatise. Owadwa maduong’, jaode, kaachiel gi nyithindgi bende sani gin Joneno mag Jehova. Moko kuom osiepena machon ma bang’e ne alandonegi wach Pinyruoth bende koro tiyo ne Jehova.

Gima lit en ni moko kuom joodwa sani osetho nikech ne ok giweyo timbe gero kod ich-wang’. Ka dine adhi nyime luwo yoregi, samoro dikoro nasetho chon. Adwoko erokamano ne Jehova kuom ywaya ire kendo ir joge ma nohore ka gipuonja tiyo gi puonj mag Muma e ngimana.