Ji mang’eny e piny mangima ong’eyo ni nyasi mar Krismas en-ga paro odiechieng’ ma nonyuole Yesu Kristo. Kata kamano, be iparo ni Jokristo mokwongo, moriwo nyaka jopuonjre Yesu, ne timoga nyasi mar Krismas? Be ing’eyo gima Muma wacho e wi paro odiechieng’ ma ne onyuole ng’ato? Yudo dwoko mag penjogi nyalo konyowa ng’eyo ka be Jokristo onego otim nyasi mar Krismas.

Mokwongo, Muma ok wach ni Yesu ne oparo odiechieng’ nyuolne, to be onge jatich Nyasaye moro amora ma ne otimo kamano. Muma wuoyo kuom ji ariyo kende ma ne otimo nyasino. Giduto ne ok gilam Jehova ma en Nyasaye madier kendo ne gitimo gik maricho ahinya e nyasigo. (Chakruok 40:20; Mariko 6:21) Buk miluongo ni Encyclopædia Britannica wacho ni Jokristo mokwongo nokwedo nyasi mag paro odiechieng’ ma onyuolie ng’ato, ma joma ne lamo nyiseche manono e ma ne timo.

Muma ok nyiswa odiechieng’ sie ma ne onyuolie Yesu. Buk miluongo ni Cyclopedia mar McClintock gi Strong wacho kama: “Onge kama inyisowa e Ndiko mag Mathayo nyaka Fweny kata kamoro amora odiechieng’ sie ma ne onyuolie Yesu.” Ka Yesu ne dwaro ni jopuonjrene opar odiechieng’ ma ne onyuole, dine onyisogi tarigno.

Mar ariyo, onge kamoro amora e Muma ma wacho ni Yesu kata japuonjrene moro amora notimo nyasi mar Krismas. Kaluwore gi New Catholic Encyclopedia, kalenda mar Jo-Rumi ma nondik e higni mag 336 bang’ Kristo e ma nokwongo wuoyo e wi nyasi mar Krismas. Kalendano nondik bang’e ka ne osendik Muma duto kendo ka Yesu ne osedok e polo. Omiyo, bug McClintock gi Strong medo wacho ni “timo nyasi mar Krismas ok en chik mowuok kuom Nyasaye kendo ok en puonj ma yudore e Ndiko mag Mathayo nyaka Fweny.” *

Yesu ma en Japuonj Maduong’ nowacho achiel kachiel gik ma jolupne onego otim kendo gigo ondik e Muma. Kata kamano, timo nyasi mar Krismas ok en achiel kuom gik ma Yesu nowachogo. Mana kaka japuonj ok dwar ni nyithindo otim gik ma ok onyisogi, e kaka Yesu bende ok dwar ni jolupne ‘okadh weche mosendik’ e Muma.​—1 Jo-Korintho 4:6.

Mopogore gi mano, Jokristo mokwongo nong’eyo mana nyasi achiel kende ma en Rapar mar tho Yesu. Yesu owuon nonyiso jopuonjrene kinde ma nonego giparie thone kod kaka nonego gitime. Weche ma Yesu nowacho e wi kaka nonego opar thone kod tarik ma nonego otimie kamano oket maler e Muma.​—Luka 22:7, 19; 1 Jo-Korintho 11:25.

Mana kaka waseneno, Krismas en nyasi ma ji timo ka giparogo nyuol Yesu kendo Jokristo mokwongo ne ok tim nyasino. E wi mano, onge kamoro amora e Muma ma wacho ni Yesu notimo nyasi mar Krismas, kata ni jotich Nyasaye mamoko notimo nyasino. Ka luwore gi weche ma wasenenogo, Jokristo mathoth e piny mangima ok tim nyasi mar Krismas.