Wuoth Kuom Roho Mondo Idag Kaluwore gi Chiwruok Mari

‘Wuothuru kuom roho, eka ok unutim gombo mag ringruok.’—GAL. 5:16.

1. Gin batiso mage ma ne otimore e odiechieng’ Pentekost?

KANE jolup Yesu owuoyo gi dhok mayore e odiechieng’ Pentekost higa 33 E Ndalowa, mano ne en bang’ kane oyudo osebatisgi kuom roho maler. Ne gitimo gik manyiso ni ne gin gi mich mar roho. (1 Kor. 12:4-10) Michno koda twak ma jaote Petro nogolo, ne omiyo ang’o otimore? Wachno ‘nochwowo chuny’ joma ng’eny. Bang’ Petro jiwogi, ne giloko chunygi mi obatisgi. Muma wacho ni: ‘Joma norwako wachne ne obatisi, mi chieng’no nomednigi ji kar gana adek.’ (Tich 2:22, 36-41) Mana kaka Yesu nosechiko, ne obatisgi e pi e nying’ Wuoro, gi Wuowi, gi roho maler.—Math. 28:19.

2, 3. (a) Ler ane pogruok mantie e kind batiso kuom roho maler kod batiso e nying roho maler. (b) Ang’o momiyo batiso mar pi en okang’ madwarore kuom Jokristo duto madier ndalogi?

² Kata kamano, be nitie pogruok e kind batiso kuom roho maler kod batiso e nying roho maler? Ee, nitie. Jogo ma ibatiso kuom roho maler inyuolo manyien mondo  gibed nyithind Nyasaye mowal kuom roho. (Joh. 3:3) Iwalogi kuom roho mondo gibi gibed ruodhi kendo jodolo e bwo Kristo e Pinyruodh Nyasaye me polo, kendo gin ema giloso ringruok mar Kristo. (1 Kor. 12:13; Gal. 3:27; Fwe. 20:6) Omiyo, batisoni—batiso kuom roho maler—e batiso ma Jehova notimo, kane oyiero jomoko e odiechieng’ Pentekost koda bang’e, mondo gibi gibed jocham gikeni kaachiel gi Kristo. (Rumi 8:15-17) To nade batiso mar pi e nying roho maler, ma en gima pile jatimore e chokruoge alwora koda distrikt mitimo gi jo Jehova e ndalowa?

³ Batiso mar pi en okang’ ma Jokristo madier kawo kaka ranyisi mar chiwruokgi chuth ne Jehova Nyasaye. En kamano kuom jogo mayudo luong mar polo. Kata kamano, batiso mar pi en okang’ madwarore bende kuom ji tara gi tara e ndalogi, ma nigi geno mar dak nyaka chieng’ e piny. Maonge dewo ni ng’ato nigi geno mar yudo ngima kune, batiso e nying’ Wuoro, gi Wuowi, gi roho maler, en okang’ ma ng’ato nyaka kaw mondo omi Nyasaye oyie kode. Omiyo, dwarore ni Jokristo duto mibatiso e yo ma kamano odhi nyime ‘wuotho kuom roho.’ (Som Jo Galatia 5:16.) Be iwuotho kuom roho mondo inyis ni idak kaluwore gi chiwruok mari?

Tiend ‘Wuotho Kuom Roho’

4. ‘Wuotho kuom roho’ tiende ang’o?

⁴ ‘Wuotho kuom roho’ en rwako tij roho maler kuomi, kiweyo rohono mondo ochiki. E yo machielo wanyalo wacho ni, wuotho kuom roho en weyo mondo roho maler ochik gik mitimo e ngimani pile ka pile. Jo Galatia sula 5 konyowa ng’eyo pogruok mantie e kind ng’at ma roho maler chiko, kod ng’at ma ringruok chiko.—Som Jo Galatia 5:17, 18.

5. Bedo ng’at ma roho chiko dwaro ni kik idonji e timbe mage?

⁵ Ka in ng’at ma roho maler chiko, itemo mondo kik idonji e timbe mag ringruok. Timbego gin kaka “terruok, dhoch, tim ma ok ler, anjawo, lamo nyiseche manono, timbe jwok, sigu, dhawo, nyiego, mirima, ich lit, pogruok, kanyakla, gombo, mer, tugo e thum.” (Gal. 5:19-21) Mano dwaro ni ‘ineg timbe ringruok kuom roho.’ (Rumi 8:5, 13) Timo kamano biro konyi keto pachi kuom weche roho kendo luwo kaka ochiki, kar weyo mondo gombo mag ringruok ochiki.

6. Chiw ane ranyisi mar gima dwarore mondo omi wanyis nyak mar roho.

⁶ Kaka roho maler tiyo kuomi, ibiro nyiso kido kaka mag Nyasaye, ‘nyak mar roho.’ (Gal. 5:22, 23) Kata kamano, ing’eyo ni mano dwaro ni itim kinda korka kori. Kuom ranyisi: Japur puro puodho. En adier ni ler mar chieng’ koda pi dwarore; nono to ok dogen kayo gimoro. Wanyalo poro roho maler gi ler mar chieng’. Mondo omi wanyis nyak mar roho, roho maler dwarore. Kata kamano, be puodhono nyalo nyago gimoro ka japur ok otiyo matek? (Nge. 10:4) Ee, kaka iloso chunyi ma en kaka lowo, ema nyalo miyo ibed gi  nyak mogundho kendo mabeyo mar roho maler. Kuom mano, penjri ane kama, ‘Be aweyo ne roho maler thuolo mar nyago nyak mare kuoma kuom luwo kaka ochika?’

7. Ang’o momiyo puonjruok koda paro matut dwarore ahinya mondo omi wabed gi nyak mar roho maler?

⁷ Mondo giyud keyo maber, dwarore bende ni jopur ool pi ne cham ma gipidho. Mondo in bende ibed gi nyak mar roho, dwarore ni iti gi pi adiera mayudore ei Muma koda kuom kanyakla mar Jokristo ndalogi. (Isa. 55:1) Nyalo bedo ni isenyiso ji mang’eny ni Ndiko Maler ne obiro kokalo kuom roho maler. (2 Tim. 3:16) Bende, jatichno mogen kendo mariek chiwo puonj madwarore e ng’eyo tiend pi adiera maler mar Muma. (Math. 24:45-47) Puonj mwayudo kuom wachni nenore maler. Mondo omi wabed jogo ma roho maler chiko, nyaka wasom kendo wapar matut kuom Wach Nyasaye. Kapo ni itimo kamano, iluwo ranyisi maber mar jonabi ma “nodwaro matek” ng’eyo tiend weche ma ne ichiwonegi. Ber ng’eyo ni kata mana malaike osebedo gi gombo ahinya mar ng’eyo tiend adiera motudore gi wach Kodhi ma ne osingi, koda kanyakla mar Jokristo mowal.—Som 1 Petro 1:10-12.

Roho Chikowa—E Yo Mane?

8. Ang’o momiyo dwarore ni ikwa Jehova omiyi rohone?

⁸ Ok en mana puonjruok Ndiko kod paro matut kende. Dwarore ni idhi nyime kwayo Jehova mondo okonyi kendo otayi. Onyalo timonwa mang’eny ‘ahinya moloyo duto mwakwayo kata mwaparo.’ (Efe. 3:20; Luka 11:13) Kata kamano, ere kaka inyalo dwoko ka ng’ato openjo niya, “Ang’o momiyo onego adhi nyime kwayo ka koni to Nyasaye oseng’eyo ‘gigo machando kapok akwaye’?” (Math. 6:8) Lamo kikwayo roho maler, nyiso ni igeno kuom Jehova. Kuom ranyisi, kapo ni ng’ato obiro kwayi kony, ibiro timo duto minyalo mondo ikonye, ka achiel kuom gimomiyo itimone kamano en nikech ng’atno nobiro iri mondo ikonye, konyisogo ni ogeni. (Pim gi Ngeche 3:27.) Kamano bende, Jehova mor sama ikwaye roho mare, kendo obiro miyigo.—Nge. 15:8.

9. Ere kaka dhi e chokruoge mag Jokristo miyo roho mar Nyasaye chiki?

⁹ Nyalo bedo ni iseng’eyo ni yo machielo ma roho mar Nyasaye chikowago, en kokalo kuom chokruogewa mag kanyakla, alwora, koda mag distrikt. Timo kinda mar bedo e chokruogego kendo chiko itwa ne gigo mipuonjo en gima dwarore ahinya. Timo kamano konyi winjo tiend “gik matut mag Nyasaye.” (1 Kor. 2:10) Nitie ber mabende yudore kuom bedo joma chiwo paro ma waseiko. Tem ane paro kuom chokruoge ma isedhiyoe kuom jumbe ang’wen mosekadho. Ne iting’o badi nyadidi, michiwo dwoko ka inyisogo yie ma in-go? Be ineno ka nitie kuonde minyalo timoe dongruok kuom wachni? Ka iyudo ni nitie, ng’ad kaka ibiro timo e jumbe mabiro. Jehova biro neno chuny moikore ma in-go mar chiwo paro, kendo obiro  miyi roho maler mabiro miyo chokruok midhiyoe okonyi moloyo.

10. Wuotho kuom roho oriwo koda gwelo jomoko ne ang’o?

¹⁰ Wuotho kuom roho dwaro bende ni wawinj gima wasomo e Fweny 22:17 kama: “Roho gi Miaha wacho ni, ‘Bi!’ Kendo ng’a mowinjo, mondo owach ni, ‘Bi!’ Kendo ng’a ma riyo omako, obi, mondo oyud pi mar ngima nono.” Roho matiyo kokalo kuom kweth mowal mar miaha, gwelo ji mondo obi oyud pi ngima. Ka osegweli ni “bi!” mi ibiro, be in gi kinda mar wacho ne jomoko ni, “Bi!”? Mano kaka wan gi gweth makende mar tiyo tich mareso ngima ji!

11, 12. Ere kaka roho maler chiko tij lendo?

¹¹ Sani, roho maler chiko tich makendeni. Wasomo kaka roho maler ne chiko tijni e ndalo Jokristo mokwongo, ka okonyo owete dhi e gwenge manyien kaka jomisonari. ‘Roho maler nokwero’ jaote Paulo kaachiel gi joma ne en-go e wuoth, mondo kik ‘giyal wach e Asia,’ kendo ne ok oyienegi dhi Bithunia. Ok wang’eyo chutho kaka roho notamogi dhi e gwengego, kata kamano nenore maler ni roho notayo Paulo e gweng’ maduong’ mar Ulaya. Ne oyudo fweny manyiso Ja-Makedonia moro ka kwayo kony e tij lendo.—Tich 16:6-10.

¹² Ndalogi, roho mar Jehova bende chiko tij lendo mitimo e piny mangima. Jehova ok tawa gi fweny mag honni, kar mano otayowa kokalo kuom jogo mowal kuom roho maler. Kendo roho jiwo owete gi nyimine e timo duto ma ginyalo e tij lendo koda puonjo. Onge kiawa ni isebedo ka itimo tich madwarore ahinyani. Be inyalo medo ilo mari e timo tich majaberni?

13. Ere kaka inyalo weyo mondo roho maler otayi? Chiw ane ranyisi.

¹³ Inyalo weyo mondo roho maler ochiki kuom tiyo gi puonj michiwo ne oganda Nyasaye. Non ane ranyisi mar Mihoko, rawera moa Japan. Kaka japainia manyien, noneno ni ok olony e dok timo limbe, koneno ni ok nong’eyo kaka onyalo wuoyo mi wuon ot rwak wechege. E kar kindeno, Tijwa mar Pinyruoth nochiwo paro makonyo kuom kaka wanyalo dok timo limbe. Kae to ne ogo brosua miluongo ni Jinsi ya Kupata Maisha Yenye Kuridhisha. Brosuano nokonyo ahinya e tij lendo e piny Japan. Mihoko notiyo gi paro ma ne ochiw kuom kaka inyalo ti gi brosuano, to moloyo kaka inyalo dog timo limbe e yo machuok. Mapiyo, nochako puonjore Muma gi jogo ma ka chon, dine otamore puonjruok. Owacho kama, “Ne abedo gi jopuonjre mang’eny ahinya—ma kinde moro ne an-gi 12—ma ne chuna kwayo moko mondo orit kapok achako puonjogi!” Kuom adier, sama iwuotho kuom roho, kitiyo gi puonj ma imiyo jotich Jehova, inyalo yudo nyak mogundho.

Gen Kuom Roho mar Nyasaye

14, 15. (a) Ere kaka dhano ma joricho nyalo dak kaluwore gi chiwruokgi? (b) Ere kaka inyalo yudo osiepe mabeyo moloyo?

¹⁴ Kaka jatich Nyasaye mosechiwore, in gi tich monego itim. (Rumi 10:14) Inyalo neno ni ok iwinjori chuth e chopo tich ma kamano. Kata kamano, mana kaka  kuom jogo mowal, Nyasaye ema miyo ibedo moromo kata mowinjore. (Som 2 Jo Korintho 3:5.) Inyalo dak kaluwore gi chiwruokni kuom timo duto minyalo kendo geno kuom roho mar Nyasaye.

¹⁵ En adier ni kaka dhano ma joricho, ok yot dak kaluwore gi chiwruokwa ne Jehova, Nyasaye makare chuth. Achiel kuom gik mamiyo mano bedo matek en ni, moko kuom osiepeni machon nyalo wuoro ahinya kuom yor ngima makoro iluwo sani, kendo ginyalo wuoyo ka ‘gihango’ wach kuomi. (1 Pet. 4:4) Kata kamano, wiyi kik wil ni nyaka a kindeno, koro iseloso osiepe manyien, kendo maduong’ kuomgi moloyo en manie kindi gi Jehova koda Yesu Kristo. (Som Jakobo 2:21-23.) Bende en gima dwarore ni imed ng’eyo owete koda nyimine manie kanyaklau, ma gin jogo maloso riwruok mar “owete” e piny mangima. (1 Pet. 2:17; Nge. 17:17) Kokalo kuom roho mare, Jehova biro konyi bedo gi osiepe mabiro medo konyi bedo gi timbe mabeyo.

16. Mana kaka Paulo, ang’o momiyo inyalo ‘yie gi nyawo’?

¹⁶ Kata ka in gi osiepe mabeyo ei kanyakla, podi inyalo yudo pek e kedo gi chandruoge mapile. Gigo ma ikedogo nyalo weyi ka iol ahinya kineno ni in e chandruok mochwere. Mano e kinde madwarore ahinya ni idhi ir Jehova, kikwaye roho mare maler. Jaote Paulo nondiko ni: “Kanyap, eka atek.” (Som 2 Jo Korintho 4:7-10; 12:10.) Paulo nong’eyo ni roho mar Nyasaye nyalo umo nyawo ma dhano nigo, kata bed mana ni gichalo nade. Kuom mano, roho mar Nyasaye nyalo tegi sa asaya miwinjo ka iol kendo idwaro kony. Paulo nondiko konyiso ni ne ‘oyie gi nyawo.’ Nimar e kinde ma nonyap, ema ne owinjoe ka roho maler tiyo kuome. In bende inyalo winjo kamano!—Rumi 15:13.

17. Ere kaka roho maler nyalo konyi chopo kuma idhiye?

¹⁷ Roho mar Nyasaye dwarore mondo eka wadag e ngima manyiso ni wachiworene. Ketri ane kaka jata yie e nam. Dwaroni en ni mondo iti ne Jehova nyaka chieng’. Roho maler chalo kaka yamo midwaro ni okonyi e kwang’o yie nyaka ichop maber kuma idhiye. Ok idwar ni chuny manie piny Satan oyuki ka tagi kendo rundi koni gi koni. (1 Kor. 2:12) Nyaka ing’e kit yamo mowinjore monego otayi. Mano en roho maler. Kokalo kuom Wach Nyasaye kod ogandane ma roho tayo, roho maler biro tayi e yo mowinjore.

18. Iseng’ado mar timo ang’o sani, to nikech ang’o?

¹⁸ Kapo ni isebedo kipuonjori gi Joneno mag Jehova, kichokori kodgi, to pok ikawo okang’ mar chiwruok kod batiso, penjri ane kama, ‘Ang’o momiyo adeko?’ Ka iyie gi gigo ma roho maler chopo e miyo dwaro mar Jehova otimre ndalogi, kare kaw okang’ mar luwo gik makare misepuonjori. Jehova biro gwedhi ahinya. Obiro miyi roho mare maler e okang’ mogundho. Kane obatisi higini mokalo machiegni, kata higini pieche mosekalo, kuom adier iseneno teko mar roho maler katiyo kuomi. Iseneno kendo isewinjo e chunyi kaka Nyasaye nyalo tegi kokalo kuom rohone. Ee, onyalo dhi nyime timoni kamano nyaka e ndalo mabiro, mochwere. Omiyo, ng’ad e chunyi mar dhi nyime wuotho kuom roho maler.

Be Iparo?

• Tiend ‘wuotho kuom roho’ en ang’o?

• Ang’o manyalo konyi dhi nyime ‘wuotho kuom roho’?

• Ere kaka inyalo dak kaluwore gi chiwruok mari?

[Penjo mag Puonjruok]

[Picha manie ite mar 15]

Loso chunyi ma en kaka lowo dwaro kinda

[Picha manie ite mag 16, 17]

Be roho mar Nyasaye chiki?