Kik Umi Roho Maler mar Jehova Chuny Lit
Kik Umi Roho Maler mar Jehova Chuny Lit
‘Kik umi roho maler mar Nyasaye chuny lit, nikech en e kido ma noketnu.’—EFE. 4:30.
1. Ang’o ma Jehova osetimo ne ji tara mang’eny, to gin gi ting’ mane?
JEHOVA osetimo gimoro makende ne tara mang’eny mag jo modak e piny mopong’ gi chandruokni. Oseloso chenro mamiyo ginyalo sudo machiegni kode kokalo kuom Wuode ma miderma, Yesu Kristo. (Joh. 6:44) In bende in achiel kuom jogo kapo ni isechiwori ne Nyasaye kendo itimo dwache. Kaka ng’at mobatisi e nying roho maler, in gi ting’ mar dak e ngima maluwore gi kaka rohono chiko.—Math. 28:19.
2. Gin penjo mage mwabiro nono?
2 Wan kaka joma ‘chuoyo kuom roho,’ warwako dhano manyien. (Gal. 6:8; Efe. 4:17-24) Kata kamano, jaote Paulo chiwonwa siem ni mondo kik wami roho maler mar Nyasaye chuny lit. (Som Jo Efeso 4:25-32.) Koro wadwaro nono adimba siem ma jaoteno nochiwo. Tiend gima Paulo ne wacho kane owuoyo kuom miyo roho mar Nyasaye chuny lit, en ang’o? Ere kaka ng’at mosechiwore ne Jehova nyalo timo gima kamano? To ere kaka wanyalo tang’ mondo kik wami roho mar Jehova chuny lit?
Tiend Gima Paulo ne Wacho
3. Ere kaka inyalo lero tiend weche mondiki e Jo Efeso 4:30?
3 Mokwongo tik, ne ane weche Paulo mondiki e Jo Efeso 4:30. Nondiko kama: ‘Kik umi roho maler mar Nyasaye chuny lit, nikech en kido ma ne oketnu ne chieng’no mar resruok.’ Paulo ok ne dwar ni Jokristo wetene ma nohero, otim gima ne nyalo ketho winjruokgi gi Nyasaye. Roho mar Jehova ema ‘noketonegi kido ne chieng’no mar resruok.’ Roho maler mar Nyasaye ema ne keto kido, kendo podi otimo kamano, kobedo kaka “singo mar gima biro” ne jogo ma chung’ motegno e bwo tem. (2 Kor. 1:22, Luo New Testament, 2003) Kidono nyiso ni gin mwandu mag Nyasaye kendo ni ngima mar polo oritogi. Kwan mar jogo ma gikone iketo kido kuomgi gin ji 144,000.—Fwe. 7:2-4.
4. Ang’o momiyo tang’ mondo kik wami roho mar Nyasaye chuny lit en gima dwarore ahinya?
4 Miyo roho chuny lit nyalo bedo okang’ mokwongo mar miyo teko mar Nyasaye olal chuth e ngima Jakristo. Gima nyiso ni mano en gima nyalore, nenore kuom weche ma Daudi nowacho bang’ ka nosetimo richo gi Bathsheba. Daudi noloko chunye mosayo Jehova kama: “Kik iwita aa e nyimi; kendo kik igol kuoma roho mari maler.” (Zab. 51:11) Mana jogo mowal mosechung’ motegno ‘gadier nyaka e tho’ ema biro yudo “osimbo” mar ngima maok nyal kethi, e polo. (Fwe. 2:10; 1 Kor. 15:53) Jokristo ma nigi geno mar dak e piny bende dwarore ni obed gi roho maler mondo omi gisiki ka gichung’ motegno e nyim Nyasaye, eka giyud michne mar ngima kokalo kuom keto yie kuom rawar mar misango Kristo. (Joh. 3:36; Rumi 5:8; 6:23) Omiyo, waduto nyaka watang’ kik wami roho maler mar Jehova chuny lit.
Ere Kaka Jakristo Nyalo Miyo Roho Chuny Lit?
5, 6. Ere kaka Jakristo nyalo miyo roho mar Jehova chuny lit?
5 Kaka Jokristo mosechiwore, wanyalo tang’ mondo kik wami roho chuny lit. Mano nyalore ka wadhi nyime ‘wuotho kendo bedo mangima kuom roho,’ nimar mano ema biro miyo gombo maok kare mag ringruok kik lowa kendo ok wabi nyiso kido maricho. (Gal. 5:16, 25, 26) Kata kamano, kitwa nyalo lokore. Wanyalo miyo roho mar Nyasaye chuny lit e okang’ moro kapo ni wabayo yo mosmos, kamoro maok wang’eyo kata, kendo donjo e tim ma Wach mondiki kuom roho mar Nyasaye kwedo.
6 Kapo ni wasiko kwatimo gik moko mopogore gi kaka roho maler chiko, nyalo bedo ni wamiye chuny lit koda jalo ma e Soko mar rohono, Jehova. Nono Jo Efeso 4:25-32 biro nyisowa kaka timbewa onego obedi, kendo onyalo konyowa tang’ mondo kik wami roho mar Nyasaye chuny lit.
Kaka Wanyalo Tang’ Mondo Kik Wami Roho Chuny Lit
7, 8. Ler ane gimomiyo nyaka wabed joadier.
7 Nyaka wabed joadier. Kaluwore gi Jo Efeso 4:25, Paulo nondiko niya: “Weuru miriambo, kendo ng’ato ka ng’ato owach ni wadgi adiera, nikech wan fuond ringruok achiel.” Nikech wariwore kaka “fuond ringruok achiel,” ok onego wabed jo miriambo kata matemo wuondo Jokristo wetewa goyiem, nimar mano romre gi riambonegi. Ng’ato ang’ata masiko e tim ma kamano, gikone ok bi bedo gi winjruok maber gi Nyasaye.—Som Ngeche 3:32.
8 Weche koda timbe mag miriambo nyalo ketho winjruok ei kanyakla. Omiyo, onego wabed joadier kaka janabi Daniel, ma jomoko ne ok nyal yudo wach moro marach kuome. (Dan. 6:4) Kendo onego wang’e puonj ma Paulo nochiwo ne Jokristo ma nigi geno mar dhi e polo ni, fuoni ka fuoni mar “ringre Kristo” en mar fuoni mamokogo duto, kendo dwarore ni gisiki e winjruok gi jolup Yesu mowal kendo ma joadier. (Efe. 4:11, 12) Ka wadwaro dak nyaka chieng’ e Paradis e piny, wan bende nyaka wawach adier, ka mano miyo wakonyo e miyo winjruok obedie e riwruokwa mar owete e piny mangima.
9. Ang’o momiyo dwarore ahinya ni waluw weche manie Jo Efeso 4:26, 27?
9 Nyaka wakwed Jachien, maok wamiye thuolo mar ketho winjruokwa gi Nyasaye. (Jak. 4:7) Roho maler konyowa e kwedo Satan. Kuom ranyisi, wanyalo timo kamano kuom ritruok kik wabed gi mirima mokalo tong’. Paulo nondiko niya: “Ka iu owang’, kik utim richo; kik uwe chieng’ podhi ka pod un gi mirima. Kik umi Satan kinde.” (Efe. 4:26, 27) Kapo ni nitie gimomiyo wabedo gi mirima, lamo ma sanosano e chunywa nyalo konyowa bedo gi ‘chuny mang’ich,’ kendo nyiso kido mar ritruok kar timo gik moko e yo manyalo miyo roho mar Nyasaye chuny lit. (Nge. 17:27) Omiyo, kik wasiki gi mirima kwamiyo Satan kinde mar miyo watim gimoro marach. (Zab. 37:8, 9) Yo achiel mwanyalo kwedego en kuom tieko ywaruok manie kindwa mapiyo kaluwore gi puonj ma Yesu nochiwo.—Math. 5:23, 24; 18:15-17.
10, 11. Ang’o momiyo ok onego wakwel ngang’, kata timo gima ok kare?
10 Kik wadonj ngang’ e tem mar kwelo kata timo gima ok kare. Kowuoyo e wi kwo, Paulo nondiko kama: “Ng’a ma kwelo kik okwal kendo, to moloyo mondo oti matek tich modimbore, kotiyo gi lwete, mondo obed kod gimoro monyalo miyo ng’a mochando.” (Efe. 4:28) Kapo ni Jakristo mosechiwore okwelo, kuom adier mano nyalo nyiso ni ‘orocho nying Nyasaye’ kuom miyo oyany nyingno. (Nge. 30:7-9) Kata mana dhier ok onego omi ng’ato ratiro mar kwelo. Jogo mohero Nyasaye koda jowetegi ong’eyo ni onge ratiro ngang’ mar kwelo.—Mari. 12:28-31.
11 Paulo ok hul ahula gigo maok onego watim; to onyiso bende gigo monego watim. Ka wadak kendo wawuotho kuom roho maler, wabiro timo matek mondo omi wabed gi nyalo mar rito joodwa, mi wabed bende gi ‘gimoro mwanyalo miyo ng’a mochando.’ (1 Tim. 5:8) Yesu kod jootene noketo tenge pesa mar konyo jodhier, kata kamano Judas Iskariot nokawo moko kuom pesago. (Joh. 12:4-6) Kuom adier, ne ok oweyo mondo roho maler ochike. Wan kaka joma roho mar Nyasaye chiko, ‘wawuotho kare e weche duto,’ mana kaka Paulo notimo. (Hib. 13:18) Timo kamano miyo ok wami roho maler mar Jehova chuny lit.
Yore Mamoko mag Tang’ Mondo Kik Wami Roho Chuny Lit
12, 13. (a) Mana kaka onyis e Jo Efeso 4:29, onego watang’ gi weche kaka mage? (b) Weche mwawacho onego obed machalo nade?
12 Nyaka waritre kuom weche mwawacho. Paulo nowacho kama: “Wach moro marach kik owuog e dhou, to mana mano maber kendo ma gedo, kaka owinjore, mondo okony jo ma winjo.” (Efe. 4:29) Kaendi bende, jaoteno ok wuo mana kuom gigo maok onego watim; to owachonwa gigo monego obed ni watimo. Ka roho mar Nyasaye chikowa, wabiro bedo joma ‘wacho weche mabeyo kendo ma gero, kaka owinjore, mondo okony joma winjo.’ E wi mano, ok onego wawe “wach moro marach” owuog e dhowa. E dho Grik, wach molok kanyo ni “marach” osetigo kiwuoyo kuom olemo, kata rech, kata ring’o motop. Mana kaka ok diwamor gi chiemo ma kamano, e kaka wasin bende gi weche ma Jehova neno ni richo.
13 Weche mwawacho onego obed weche mabeyo, mang’won, kendo “obed gi ndhadhu.” (Kol. 3:8-10; 4:6) Sama ji winjo weche mwawacho, onego obed ni ginyalo fwenyo ni wapogore. Omiyo, weuru wakony jomoko kuom wacho weche ‘mabeyo ma gero.’ Kendo mad wabed gi paro kaka mar jandik-zaburi ma nowero niya: “Mi weche me dhoga gi paro mabudhogo e chunya obedi mimorgo, A Jehova, lwandana kod jawara.”—Zab. 19:14.
14. Kaluwore gi Jo Efeso 4:30, 31, gin ang’o manyaka wagol kuomwa?
14 Nyaka wagol kuomwa kecho, mirima, ayany, kod himruok duto. Bang’ chiwo siem ni kik wami roho mar Nyasaye chuny lit, Paulo nondiko kama: “Kecho duto mondo uwit oa kuomu, kod mirima gi ich wang’, gi koko gi ayany kod himruok duto.” (Efe. 4:30, 31) Kaka dhano monyuol e richo, dwarore ni waduto watim matek mondo waritre kuom weche mwaparo koda mwatimo. Ka dibed ni wanyiso ‘kecho, mirima, kod ich wang’’ maok waritre, wabiro miyo roho mar Nyasaye chuny lit. Kamano bende e kaka biro bet kapo ni wamako sadha nikech ketho moko mosetimnwa, kendo ka watamore loso winjruok e kindwa gi jal mokethonwa. Kata mana kapo ni wachako chayo siem mag Muma, wanyalo chako bedo gi kido manyalo miyo watim richo ne roho, kendo wanyalo donjo e chandruok makelonwa kethruok.
15. Kapo ni otimnwa gimoro marach, ang’o monego watim?
15 Onego wabed jomang’won, makecho ji, kendo maweyo ne ji richogi. Paulo nondiko kama: “Ng’wonreuru ng’ato gi ng’ato, kukechoru, kuweyoru richo ng’ato gi ng’ato, kaka Nyasaye e i Kristo bende noweyonu richou.” (Efe. 4:32) Kata kapo ni otimnwa gimoro ma chwanyowa ahinya, wabeduru joma weyo ne ji kethogi mana kaka Nyasaye timo. (Luka 11:4) Wawach ni Jakristo wadwa owacho gimoro e wiwa maok owinjore. Nikech wadwaro loso wachno, wakawo okang’ mar dhi ire. Owachonwa kaka wachno litne gadier kendo okwayo ni mondo wawene. Wabiro weyone, to kata kamano nitie gimachielo madwarore ni watim. Tim Jo-Lawi 19:18 wacho niya: “Kik ichul kwor, kata kik chunyi omon gi nyithind jou, to iniher jabuti kaka in iwuon: An e Jehova.”
Dwarore ni Watang’
16. Chiw ane ranyisi manyiso kaka nyalo dwarore ni watim lokruok moko mondo omi kik wami roho mar Jehova chuny lit.
16 Kata mana sama wan kar kendwa, wanyalo donjo e tem mar timo gimoro maok mor Nyasaye. Kuom ranyisi, wawach ni owadwa moro osebedo ka winjo thumbe maok owinjore gi Jokristo. Gikone, chunye chako chandore nikech ok oseluwo puonj koda siem michiwo e buge “jatichno mogen, kendo mariek.” (Math. 24:45) Onyalo wuoyo gi Nyasaye e lamo kuom wachno, mi opar koda weche Paulo mondiki e Jo Efeso 4:30. Bang’ timo kinda mar neno ni ok otim gimoro amora manyalo miyo roho mar Nyasaye chuny lit, a kanyo, ong’ado ni ok obi winjo thumbe marichogo. Jehova biro gwedho chuny ma owadwano nyiso. Kuom mano, wasikuru kwatang’ mondo kik wami roho mar Nyasaye chuny lit.
17. Ang’o manyalo timore ka ok watang’ kendo siko gi chuny mar lamo?
17 Ka ok watang’ kendo siko gi chuny mar lamo, wanyalo donjo e obadho mar timo gima ok ler kata maok kare manyalo miyo roho chuny lit. Nikech roho maler en yo ma Wuonwa me polo nyisowago kite, ka wamiyo rohono chuny lit, wamiyo Wuoro chuny lit kata wachwanye—ma kuom adier en gima ok dwaher timo ngang’. (Efe. 4:30) Jondiko ma Jo-Yahudi notimo richo kuom wacho ni Yesu ne timo honni gi teko mar Satan. (Som Mariko 3:22-30.) Jowasik Kristogo ‘noyanyo roho maler,’ omiyo ne gitimo richo maok nyal wenegi. Mad kik wabed kamano ngang’!
18. Ere kaka wanyalo ng’eyo ni pok watimo richo maok nyal wenwa?
18 Nikech ok wadwar kata mana sudo machiegni gi timo richo maok diwenwae, dwarore ni wapar gima Paulo nowacho kuom wach miyo roho chuny lit. To nade kapo ni wasedonjo e richo moro maduong’? Ka waseloko chunywa waa e richo, mi jodong-kanyakla osekonyowa, wanyalo bedo gadier ni Nyasaye oseweyonwa kendo ni pok watimo richo ne roho maler. Kokalo kuom kony ma Nyasaye chiwo, wanyalo timo bende gigo maok bi miyo wami roho chuny lit e yo moro amora kendo.
19, 20. (a) Moko kuom gik monego watang’ kik watim gin mage? (b) Onego wang’ad mar timo ang’o?
19 Kokalo kuom roho maler, Nyasaye jiwo hera, mor, kod winjruok omed bedoe e kind joge. (Zab. 133:1-3) Kuom mano, onego watang’ kik wami roho chuny lit kuom donjo e kuoth maricho, kata kuom wacho weche manyalo mono jomoko chiwo luor ne jogo ma gin jokwath ma roho oseketo e migawono. (Tich 20:28; Juda 8) Kar mano, onego wajiw chuny mar winjruok kod luor e kindwa ng’ato gi ng’ato ei kanyakla. Kuom adier, ok onego wajiw chuny mar bedo gi osiepe maketo ji e grubegrube, ka miyo pogruok bedoe e kind oganda mar jo Nyasaye. Paulo nondiko niya: ‘Owetewa, asayou kuom nying Ruodhwa Yesu Kristo, ni uduto wachuru gimoro achiel, eka mondo pogruok obed maonge e kindu; to mondo uriwru chuth kuom paro achiel, kod ng’ado bura achiel.’—1 Kor. 1:10.
20 Jehova dwaro kendo en gi nyalo mar konyowa mondo kik wami rohone chuny lit. Weuru wadhi nyime kwayo mondo omiwa roho maler kendo wang’ad mar timo matek mondo kik wamiye chuny lit. Mad wamed dhi nyime ‘chuoyo kuom roho,’ kwatimo kinda e kwayo mondo rohono otawa gie sani kendo nyaka chieng’.
Inyalo Dwoko Nade?
• Tiend miyo roho mar Nyasaye chuny lit en ang’o?
• Ere kaka ng’at mosechiwore ne Jehova nyalo miyo roho mare chuny lit?
• Wanyalo tang’ mondo kik wami roho maler chuny lit e yore mage?
[Penjo mag Puonjruok]
[Picha manie ite mar 30]
Tiekuru ywaruok manie kindu mapiyo
[Picha manie ite mar 31]
En olemo mane minyalo tigo e lero kit weche maa e dhogi?