Penjo Moa Kuom Josombwa

Ang’o momiyo Musa ne obedo gi mirima kuom yawuot Harun, Eleazar kod Ithamar bang’ tho Nadab kod Abihu owetegi, to ne okwe mirimbeno e yo mane?​​—⁠Lawi 10:⁠16-​20.

Kinde matin bang’ walo tij dolo, Jehova ne onego Nadab gi Abihu yawuot Harun, nimar ne gichiwo mach maok kare e nyim Jehova. (Lawi 10:​1, 2) Musa nochiko yawuot Harun ma ne odong’ ni kik giyuag tho mar owetegi. Mapiyo bang’ mano, Musa nobedo gi mirima kuom Eleazar kod Ithamar nikech ne ok gichamo diel ma ne osetigo kaka misango mar richo. (Lawi 9:3) Ang’o momiyo Musa nobedo gi mirima kamano?

Chike ma Jehova nosemiyo Musa nonyiso maler ni jadolo machiwo misango mar richo nonego ocham ring’o mar misangono e laro mar hema mar chokruok. Timo kamano ne nyiso ni jadolono ne ting’o richo mag jogo ma ne ochiwo misangono. Kata kamano, kapo ni moko kuom remo mag misango ne oter e Ka Maler, ma ne en kama opogi e hema mikwongo donjoe, misangono ne ok onego ocham. Kar mano, ne onego owang’ misangono.​​—⁠Lawi 6:​24-​26, 30.

Nenore ni bang’ tho yawuot Harun, Musa ne dwaro bedo gadier ni chike duto mag Jehova ne iluwo chutho. Bang’ fwenyo ni diel mar misango richo ne osewang’, Musa nopenjo Eleazar kod Ithamar ka en gi mirima, gimomiyo ne ok gichamo diendno kaka chik ne dwaro, nimar noyudo remb diendno ok osechiw e nyim Jehova e Ka Maler.​​—⁠Lawi 10:⁠17, 18.

Harun nodwoko penjo mar Musa, nikech nenore ni en ema ne oyie ne yawuote ma jodolo otim kamano. Kaluwore gi nek mar yawuote ariyo, nyalo bedo ni Harun ne owuoro kabe jadolo moro amora ne dhi bedo maonge bura kapo ni ochamo ring’o mar misango e odiechieng’ achielno. Dibed kata ni Harun ne paro ni chamo ring’ono ne ok dhi moro Jehova, kata obedo ni ne gionge gi ketho kuom gima Nadab kod Abihu noyudo osetimo.​​—⁠Lawi 10:19.

To moloyo, nyalo bedo ni Harun ne oparo e chunye ni nikech odiechieng’no ema joode nochakoe tiyo kaka jodolo, ne onego gitem ahinya moro Nyasaye kata mana e luwo weche matindo. Kata kamano, Nadab kod Abihu noketho nying Jehova, kendo mano emomiyo mirimb Nyasaye ne olwar kuomgi. Omiyo, nyalo bedo ni Harun ne oparo ni jood dolo ma richo kaka mano oyud kuomgi, ne ok onego ocham misango maler.

Nenore ni Musa ne oyie gi dwoko mar Harun, nimar ndikono tieko kawacho kama: “Ka Musa nowinjo mano, ne long’one.” (Lawi 10:20) Nenore ni Jehova bende ne oyie gi dwoko mar Harun.