Timo Kamano Konyo Ahinya!

LAMO MAR JOOT koda puonjruok Muma gin gik madwarore ahinya e ‘pidho nyithindo kendo rieyogi kuom Ruoth.’ (Efe. 6:4) Kata kamano, ka in janyuol, ing’eyo ni yot ahinya mondo pach nyithindo ool gi gimoro. Ere kaka inyalo miyo giket pachgi kuom gima dwarore? Non ane moko kuom yore ma jonyuol moko osetiyogo.

George, man California, e piny Amerka wacho kama, “E kinde ma nyithindwa ne pod tindo ahinya, an kod chiega ne watemo miyo puonjruokwa mar Muma kaka joot obed manyien, kwatiyo gi yore mopogore opogore. Seche moko waduto ne warwakore kaka jogo ma sigandgi iwuoyoe ei Muma, kendo timo ranyisi mar gigo mwasomo e bug Buga Moting’o Sigendini mag Muma. Ne wajoloso koda gige timo ranyisigo kaka​​—⁠ligangla, ludh ruoth, adita, koda gik ma kamago. Bende ne watugo tuke Muma, ma ng’ato timo kata wacho weche mag jal moro ei Muma, kae to openjo jomoko otem fwenyo ni en ng’ano ei Muma. Bende ne waloso tugo ma waketo penjo mag Muma e bod moro, penjo mayot koda matek. Kae to ne waloso yie mar Noa kata ndiko higini ma weche mondikie ei Muma ne otimoree. Seche moko ne wagoro jogo manie Muma kata goro sigendini moko manie Muma. Sani, wachano mar goro gik lweny mag Nyasaye ma iwuoyoe e Jo Efeso 6:​11-​17, kendo ng’ato ka ng’ato kuomwa biro lero tiend gir lweny ka gir lweny. Yoregi osekonyowa ahinya neno ber mar puonjruokwa mar joot.”

Debi, ma en miyo moro e gweng’ mar Michigan, e piny Amerka, wacho kama: “An kaachiel gi chwora ne wayudo ka teknwa konyo nyarwa oket pache e gima watimo, e diere ma ne ojahigini adek kama. Kae to chieng’ moro kane asomo gi dwol maduong’ sigand Isaka gi Rebeka e buk mar Buga Moting’o Sigendini mag Muma, ne akawo gik tugo moko ariyo molos kaka dhano kendo timo ka gima gigo ema ne wuoyo. Koro ne ochiko ite ne weche duto! E dweche ma ne oluwo, ne watiyo gi gik ariyogo e timo ranyisi mang’eny mopogore mag joma nie Muma. Bang’ somo wach moro ei Muma, nyarwa ne manyo e ot mondo oyud gik tugo kata gimoro amora ma ne inyalo timgo ranyisi mar sigana mwasomo. Mano ne chalo mana kaka manyo mwandu! Ne watiyo gi sanduk moro mar kano wuoche mondo ochung’ne od Rahab ma ne nigi tol makwar. Ne wan gi gimoro molos kaka thuol ma ne en mita achiel gi nus, kendo ne odole e yadh ywech mabor kendo mano ne otiyo kaka thuol ma iwuoyoe e Kwan 21:​4-9. Gik tugo duto ma ne watiyogo ne wakano e ogunia moro maduong’. Ne morowa ahinya neno kaka kinde mang’eny nyarwa ne bet but ogundeno komanyo gik timo tuke sigendini mag Muma. Ne ber ahinya neno kaka en bende ne otugo sigendinigo e yore owuon! ”

Pidho nyithindo ok yot, kendo miyo gibed gi gombo mar tiyo ne Jehova dwaro kinda ahinya, maok mana puonjruok mar juma ka juma kende. Kata kamano, lamo mar joot kaachiel kod puonjruok mar Muma nyalo bedo yor chiwonegi puonj Nyasaye. Onge kiawa ni, timo kamano konyo ahinya!