Be Ifwenyo Gik Manyiso ni Nyasaye Tayowa?

ONGE kinde moro amora ma ne Jo-Israel kata Jo-Misri noseneno gima koro ne timoreno. Kane Jo-Israel wuok Misri, siro mar bor polo ne ochung’ malo e wigi kuom odiechienge duto. Gotieno, sirono ne lokore mar mach. Mano kaka ne en hono miwuoro! Kata kamano, sirono ne owuok kanye? Ang’o momiyo ne entie? To kata obedo ni higini 3,500 osekalo, ang’o mwanyalo puonjore kuom kaka Jo-Israel ne neno ‘sirono mar mach gi bor polo’?​​—⁠Wuok 14:24.

Wach Nyasaye lero kuma ne sirono owuokie koda gimomiyo ne entie, kowacho kama: “Godiechieng’ Jehova notelo nyimgi e siro mar bor polo, mondo nyisgi yo; kendo gotieno e siro mar mach, mar miyogi ler; ni mondo giwuothi godiechieng’ gotieno.” (Wuok 13:⁠21, 22) Jehova Nyasaye notiyo gi siro mar mach gi mar bor polo mondo ota joge wuok Misri nyaka e thim. Ne nyaka giikre wuotho ka giluwo sirono. Kane jolweny mag Misri chiegni monjo jo Nyasaye, sirono ne obet e kind Jo-Israel gi Jo-Misri ka ogeng’o Jo-Israel kuom wasigugo. (Wuok 14:⁠19, 20) Kata obedo ni sirono ne ok onyiso yo moriere tir, luwo sirono kende ema ne dhi miyo Jo-Israel ochop e Piny Manosingi.

Sirono ne miyo jo Nyasaye bedo gadier ni Jehova ne nikodgi. Bende ne onyiso bedoe mar Jehova, kendo kinde moko ne owuoyo koa kanyo. (Kwan 14:14; Zab. 99:7) E wi mano, sirono ne nyiso ni Musa e jal ma Jehova ne omiyo migawo mar tayo ogandano. (Wuok 33:9) Kamano bende, bor polono ne onenore mogik kane borno onyiso ni Jehova ema nowalo Joshua mondo okaw kar Musa. (Rapar 31:⁠14, 15) Kuom adier, mondo omi wuodhgi mar wuok Misri odhi maber, ne dwarore ahinya mondo Jo-Israel ofweny gima ne nyiso ni Nyasaye ne tayogi, kae to giluw kaka ne otayogi.

Wigi ne Owil gi Gima ne Nyiso ni Nyasaye Tayogi

Kane Jo-Israel okwongo neno sirono, nyaka bed ni mano ne omiyogi wuoro ahinya. Kata kamano, gimalit en ni, neno honono pile ka pile ne ok ochwalo Jo-Israel bedo gi yie motegno kuom Jehova. Kinde mang’eny, ne gichayo yo ma Nyasaye ne tayogigo. Sama ne jolweny mag Misri lawogi, ne ok gigeno kuom teko mar Jehova mar resogi. Kar mano, ne gichako donjo ne Musa jatich Nyasaye, ni ne oterogi e tho. (Wuok 14:⁠10-​12) Bang’ kane oseresgi mi ging’ado Nam Makwar, ne ging’ur ne Musa, Harun, koda ne Jehova ka gitemo wacho ni chiemo gi pi ne onge. (Wuok 15:⁠22-​24; 16:⁠1-3; 17:⁠1-3, 7) Kendo jumbe matin bang’ mano, ne gimiyo Harun oloso roya mar dhahabu. Par ane wachni! E bath kambi kamachielo, Jo-Israel ne nyalo neno siro mar mach kod bor polo, ma ne nyiso bedoe mar Jal ma ne ogologi Misri. Kata kamano, ma ok bor gi kanyo, ne gichako lamo kido maonge gi ngima, ka giwacho: “Magi e nyisecheu, A Israel, ma nogoloi e piny Misri.” Mano kaka ne en ‘tim maduong’ ’ manyiso achaye ahinya!​​—⁠Wuok 32:4; Neh. 9:⁠18.

Tim ng’anjo mar Jo-Israel nonyiso ayanga ni ne ok gine kaka Jehova ne tayogi. Mano ok nyis ni wengegi masie ne ok nen, to en mana ni ne ok gifweny kaka Jehova ne tayogi kendo  chikogi. Ne gineno sirono, to wigi nowil gi tiende. Kata obedo ni timbegi ne ‘onyoro Jaler mar Israel,’ Jehova ne odhi nyime tayogi e yor ng’wono kokalo kuom sirono nyaka Israel nochopo e Piny Manosingi.​​—⁠Zab. 78:⁠40⁠-⁠42, 52⁠-⁠54; Neh. 9:⁠19.

Fweny Gik Manyiso ni Nyasaye Tayowa e Kindegi

E kindegi bende, Jehova pok ne ojwang’o joge ka ok onyisgi ayanga yo monego giluw. Mana kaka ne ok ojwang’o Jo-Israel maok onyisogi yo ma ne onego giluw, kamano bende, ok oweyowa mondo wan wawegi ema wamany yo materowa e piny manyien mosingi. Yesu Kristo e Jatelo moket e wi kanyakla. (Math. 23:10; Efe. 5:⁠23) Osechiwo teko mar tayo, ne kweth mar jatichno mogen, ma en kweth mar Jokristo mowal kuom roho. Jatich mogenno bende keto jodongo matayo e kanyakla mar Jokristo.​​—⁠Math. 24:⁠45-​47; Tito 1:⁠5-9.

Ere kaka wanyalo fwenyo kwethno mar jatich kata jaritno mogen? Ne ane kaka Yesu owuon leronwa: “Ere jaritno mogen kendo mariek, ma ruoth noket kuom joode mondo opognigi chiemo e kinde mowinjore? Jatichno en ng’at moguedhi ma ruodhe kobiro nonwang’ kotimo kamano.”​​—⁠Luka 12:⁠42, 43.

Kuom mano, kweth mar jaritno en kweth “mogen,” ok onyal ndhogo kata weyo Jehova, Yesu, adiera mag Muma, kata jo Nyasaye ngang’. Nikech en jarit “mariek,” ong’ado paro e yo makare kotayo tich maduong’ ahinya mar lando ‘wach maber mar pinyruoth,’ koda ‘timo ogendini duto jopuonjre.’ (Math. 24:14; 28:⁠19, 20) Kweth mar jaritno chiwo chiemo mabeyo kendo magero ji e yor wach Nyasaye kotimo mano “e kinde mowinjore.” Gimanyiso ni Jehova oyie gi kwethno nenore kuom kaka ogwedho joge komiyo kwan-gi medore, ochikogi e ng’ado paro kuom weche madongo, okonyogi ng’eyo tiend adiera mag Muma, oritogi mondo kik tiekgi gi wasikgi, kendo omiyogi kuwe mar paro gi chuny.​​—⁠Isa. 54:17; Fili. 4:7.

Yie Mondo Nyasaye Otayi

Ere kaka wanyalo nyiso ni wayie mondo Nyasaye otawa? Jaote Paulo nowacho kama: “Winjuru jotendu, kendo migiuru duong’.” (Hib. 13:17) Timo kamano ok yot kinde duto. Kuom ranyisi: Wawach ni in Ja-Israel modak e kinde Musa. Isebedo ka iwuotho kuom kinde moko, kae to siro mar bor polo chung’. Ichako penjori kama, to obiro siko kochung’ kuom kinde maromo nade? Kuom odiechieng’? Juma? Koso kuom dweche? Idhi nyime penjri kama, ‘Be onego agony osikena duto? ’ Mokwongo, inyalo gonyo mana gigo madwarore ahinya. Kata kamano, bang’ odiechienge moko, ichako gonyo osike duto nikech imanyo gimoro. To sama ichiegni tieko gonyo gigo ni i, ineno ka sirono chako sudo​​—⁠kendo koro dwarore ni ichak tweyo gigo kendo! Mano nyalo bedo matek matin. Kata kamano, bang’ sirono sudo, ne dwarore mapiyo ni Jo-Israel ‘omak wuoth.’​​—⁠Kwan 9:⁠17-​22.

Kamano bende, ere kaka watimo bang’ winjo wach moro ma Nyasaye tayowago? Be watemo “mako wuoth” gikanyono, kuom luwo wachno? Koso wadhi nyime timo gik moko mana kaka wasebedo ka watimo pile? Be walony gi paro manyien mosechiw motudore gi kaka onego watim puonjruok gi ji Muma, lendo ne joma wacho dhok mawendo, timo lamo mar joot maok wabare, tiyo e winjruok gi Komiti Matudore gi Osiptende, kod nyiso timbe bidhruok sama wan e chokruoge mag distrikt? Wanyiso bende ni wayie gi yo ma Nyasaye tayowago kuom rwako puonj moting’o siem. Sama onego watim yiero kuom weche madongo e ngima, ok waket geno kuom riekowa wawegi, to wageno Jehova koda riwruok mar oganda mare mondo  otawa. Kendo mana kaka nyathi matin dhi ir jonyuolne mondo ogeng’e kuom kodh yamo mager, wamanyo kar buok e riwruok mar oganda Jehova, sama waromo gi chandruoge mag pinyni machalo gi kodh yamo mager.

En adier ni jogo matayo e bad-riwruok mar oganda Nyasaye me piny, gin dhano morem​​—⁠to Musa bende ne ni kamano. Kata kamano, siro mar bor polo ne en gima nyiso ni Nyasaye ema ne okete e migawono kendo ne oyie gi Musa. Ne bende ni, Ja-Israel ka Ja-Israel ok ema ne yier sa mar sudo. Kar mano, ji ne sudo “kuom chik mar Jehova e luet Musa.” (Kwan 9:⁠23) Kuom mano, Nyasaye ne tiyo gi Musa e chiwo ranyisi mar sudo.

E kindegi, kweth mar jaritno ma Jehova tiyogo, chiwonwa ranyisi manenore maler sa asaya madwarore wasud. Otimo kamano e yo mane? Kokalo kuom sula ma igoyo e Ohinga mar Jarito kod Tijwa mar Pinyruoth, buge manyien, koda twege migolo e chokruoge alwora koda mag distrikt. Weche matayowa bende ichiwonwa kokalo kuom jorit malworo, kata kokalo kuom barupe, kata kuom weche mipuonjo e romo mag owete ma nigi migepe e kanyakla.

Be ineno maler gik manyiso ni Jehova tayowa? Jehova tiyo gi riwruok mar ogandane e tayowa kaka joge, mondo wakal “e thim” ma kindegi mar piny marach mar Satan. Nikech mano, wan gi winjruok, hera, kod kuwe.

Kane Jo-Israel ochopo e Piny Manosingi, Joshua nowacho kama: “Ung’eyo e chunyu duto kendo e parou duto ni, gimoro ne ok orem kuom gik mabeyo duto ma ne Jehova Nyasachu owacho kuomu; duto osetimorenu.” (Josh. 23:14) Kamano bende, onge kiawa ni jo Nyasaye ma ndalogi bende biro chopo e piny manyien mosingi. Kata kamano, yie luwo kaka Nyasaye tayowa ka wabolore, e gimaduong’ mabiro miyo ng’ato ka ng’ato kuomwa ochop kuno. Kuom mano, weuru mondo waduto wadhi nyime fwenyo gik manyiso ni Jehova tayowa!

[Piche manie ite mar 5]

Itayowa gi riwruok mar oganda Jehova e ndalogi

Buge manyien e chokruog-distrikt

Skul mar tiego owete e tij Nyasaye

Tiego ji ne tij dhi lendo