Be Iyudo Mor mar ‘Chiwo gi Ng’wono’?

JOKRISTO ma ne ni Filipi ne ong’ere ahinya kuom bedo gi chuny mar siro lamo madier. E barua mokudh kuom much Nyasaye ma Paulo ne ondikonegi, nowacho kama: “Agoyo erokamano ni Nyasacha kinde duto maparou, kendo pile kakwayonu uduto, alamo gi mor, nikech un achiel kodwa e tich lando Wach Maber, chakre chieng’ mokwongo nyaka chil kawuono.” (Fili. 1:3-5) Paulo ne nyalo paro maler kinde ma Ludia kaachiel gi joode ne obatisi, kendo Ludia ne orwako Paulo koda jolendo wetene kosayogi mondo gibi gibed e ode.—Tich 16:14, 15.

Kinde matin bang’ mano, kanyakla manyien ma ne ni Filipi ne oorone Paulo diriyo gik ma dokonyrego kane odak Thessalonika kuom jumbe mogwaro gi Jokristo wetene, kuma borne ne en kilomita 160 a Filipi. (Fili. 4:15, 16) Higini moko bang’e,  kane owete ma ne ni Filipi gi Makedonia ne kalo e bwo masiche gi ‘chan’ ahinya, ne giwinjo wach chandruok mar Jokristo ma ne isando e Jerusalem kendo ne gidwaro konyogi. Paulo ne owacho ni ne gitimo gima ‘noloyo kar tekregi.’ Kata kamano, ne ondiko kama: “Gihombowa ahinya kuom wach ng’wononi.”—2 Kor. 8:1-4; Rumi 15:26.

Higini apar kama bang’ bedo Jokristo, Jo-Filipi pod ne nyiso chuny mar chiwo. Kane giwinjo ni Paulo ne nie twech Rumi, ne gioro Epafrodito mondo oter ne jaoteno gik madokonyrego, e wuoth ma ne kalo e nam gi kuonde motuwo ma borne duto ne en kilomita 1,287. Kuom adier, Jo-Filipi ne dwaro konyo Paulo mondo odhi nyime tego owete kod tiyo tij lendo, kata mana kane en e twech.—Fili. 1:12-14; 2:25-30; 4:18.

E ndalogi, Jokristo madier kawo wach siro tij lando wach Pinyruoth kod timo ji jopuonjre kaka thuolo makende. (Math. 28:19, 20) Omiyo, gikonyo e lando dwaro mag Pinyruoth kuom tiyo gi sechegi, tekogi, kod chiwo mwandugi. Sanduk motudore gi wachni nyiso yore ma inyalo tiyogo e siro tijni ma Nyasaye omiyowa.

[Sanduk manie ite 22]

MOKO KUOM YORE MA JOMOKO YIERO TIYOGO E GOLO CHIWO

CHIWO NE TIJ PINY MANGIMA

Ji mang’eny keto tenge pesa moko ma gibiro keto e sanduge mag chiwo mondiki ni, “Tij Piny Mangima.”

Dwe ka dwe, kanyakla oro pesago ne ofis mar Joneno mag Jehova matayo tij lendo e pinygi. Chiwo mag pesa bende inyalo or achiel kachiel ne Watchtower Bible and Tract Society of New York, Inc., Attention Treasurer’s Office, 25 Columbia Heights, Brooklyn, New York 11201-2483, kata orogi ne ofis mar Joneno mag Jehova matayo tij lendo e pinyu. (Yore mag chiwo moler pinyka bende inyalo tigo e oro chiwo ne ofis mar Joneno mag Jehova manie pinyu.) Chek mag bengi mioro kitiyo gi adres moket malo kanyo onego oor kinyiso ni pesago dhi ne “Watchtower.” Gik mamoko ma nengogi tek inyalo gol kaka chiwo bende. Barua machuok manyiso ni gik ma kamago ochiwgi kaka mich onego oor kanyachiel gi chiwogo.

CHIWO MIBIRO DWOK KENDO

Ng’ato nyalo miyo Watch Tower Bible and Tract Society of Pennsylvania pesa mondo otigo e tij piny mangima. Kata kamano, kapo ni okwa pesago to ibiro dwoknegi. Mondo iyud weche momedore kuom chenroni, inyalo ndiko ne ofis miluongo ni Treasurer’s Office, kitiyo gi adres moket malo kanyo kata goyo simo kitiyo gi namba maluwogi (718) 560-7500.

CHIWO MOCHAN

E wi golo pesa kaka mich, nitie yore mamoko minyalo gologo chiwo mondo okony tij Pinyruoth mitimo e piny mangima. Magi gin kaka:

Insuarans: Inyalo ti gi nying Watch Tower Bible and Tract Society of Pennsylvania kaka riwruok mabiro yudo chudo moa kuom chenro mar Insuarans mar ngima kata penson bang’ ritaya.

Akaunt mag Bengi: Akaunt mag bengi, kalatese manyiso pesa mokan, kata akaunt ma ng’ato oyawo mokanoe pesa mobiro tiyogo bang’ ka oseritaya, inyalo nyis ni omi Watch Tower Bible and Tract Society of Pennsylvania, bang’ tho ng’ato, kaluwore gi chenro mar bengi manie pinyu.

Stok kod Bond: Stok kod bond inyalo chiw ne Watch Tower Bible and Tract Society of Pennsylvania kaka mich, kata inyalo ket nying Watch Tower Bible and Tract Society of Pennsylvania kaka riwruok mabiro yudo chudo kuomgi kapo ni weggi otho.

Ute gi Puothe: Ute koda puothe minyalo ng’iew inyalo chiw kaka mich, to kapo ni en ot kata puodho ma wuon-go pod odakie, onyalo dhi nyime gi dak kanyo nyaka chieng’ thone. Tudri gi ofis mar Joneno mag Jehova manie pinyu kapok ing’ado mar golo ute kata puothe kaka chiwo.

Chudo mar Higa: Ma en chenro ma ng’ato chiwo pesa kata mwandune ne achiel kuom riwruoge ma Joneno mag Jehova tiyogo. Kae to, ng’at mogolo chiwono, kata ng’at ma jagol chiwono oyiero, ibiro mi chudo moro higa ka higa e ngimane duto. Kae to osur ma ng’at mogolo chiwono onego ochul ibiro duok piny chakre higa ma chenrono nochakoree.

Ndiko Wil: Mwandu kata pesa inyalo mi Watch Tower Bible and Tract Society of Pennsylvania kokalo kuom wil mondik kaluwore gi chik sirkal, kata ndiko nying Watch Tower Bible and Tract Society of Pennsylvania kaka riwruok mabiro yudo chudo kuom chenrono. Chiwo mimiyo riwruok mar din nyalo konyo korka wach osuru.

Kaka wach motigo ni “chiwo mochan” nyiso, chiwo kaka mago dwaro ni jalo ma gologi otim chenro motelo. E konyo jogo magombo chiwo kony ne tij piny ngima ma Joneno mag Jehova timo kokalo kuom chiwo mochan, osego brosua e dho Ingresa kod Spain miluongo ni Charitable Planning to Benefit Kingdom Service Worldwide. Ne ogo brosuano mondo okony e lero yore mopogore opogore ma mich migolo kaka chiwo inyalo chiw gie sani kata bang’ ka ng’ato osetho. Bang’ somo brosuano kendo tudore gi joma olony gi chik sirkal kor weche osur, ji mang’eny osebedo gi nyalo mar konyo tijwa mitimo e piny mangima, kendo osegonygi kuom chulo osur mang’eny nikech timo kamano. Inyalo kwayo ofis mar Charitable Planning Office brosuano achiel kachiel.

Mondo iyud weche momedore inyalo tudori gi ofis miluongo ni Charitable Planning Office kokalo kuom ndikonegi, kata goyonegi simo, kitiyo gi adres monyis piny kae, kata inyalo tudori gi ofis mar Joneno mag Jehova matayo tij lendo e pinyu.