Chiwo Misengini ne Jehova gi Chunywa Duto

‘Gimoro amora mutiyo, tiuru gi chunyu duto, kaka ni Jehova.’—KOL. 3:23.

NE ANE KABE INYALO DWOKO:

Ere kaka wanyalo miyo Jehova duong’ e tijewa mapile mag ngima?

Gin misengini mage mwatimo motudore gi lamo Nyasaye?

Ere kaka wanyalo chiwo ne Jehova giwa mag ringruok?

1-3. (a) Be tho mar Yesu e yadh-sand ne nyiso ni koro onge misango moro amora madwarore kuomwa? Ler ane. (b) En penjo mane manyalo betie kuom wach misengini ma ndalogi?

KINDE Jokristo mokwongo, Jehova nokonyo joge ng’eyo ni rawar mar misango Yesu, norucho oko Chik Musa. (Kol. 2:13, 14) Misengini duto ma Jo-Yahudi nosebedo ka chiwo kuom higini mang’eny ne koro ok dwarore, kendo koro ne ok gikony. Chik nosechopo gino ma ne dwarore, tiende ni bedo ‘jarit ma kowo ji ir Kristo.’—Gal. 3:24.

² Mano ok nyis ni koro onge misengini ma Jokristo onego otim ndalogi. Kar mano, jaote Petro nowuoyo konyiso ni dwarore ‘watim misengini mag chuny malong’o ne Nyasaye kuom Yesu Kristo.’ (1 Pet. 2:5) E wi mano, jaote Paulo nosenyiso maler ni kit ngima duto mar Jakristo mosechiwore, inyalo luong kare ni “misango.”—Rom. 12:1.

³ Kuom mano, Jakristo nyalo timo ne Jehova misango kuom chiwone gik moko, kata kuom weyo luwo yore moko nikech Jehova. Ka waketo e paro chike ma ne dwarore ni Jo-Israel oluw, ere kaka wanyalo bedo gadier ni misengini duto mwachiwo e ndalogi gin ma Jehova morgo?

E KIT NGIMA MAPILE

4. En ang’o ma nyaka wang’e e wi yore mapile mag ngima?

⁴ Sama waluwo yorewa mapile e ngima, nyalo bedo matek neno tudruok mantie e kind gik mwatimo kod chiwo misengini ne Jehova. Tich mag ot, dhi e skul, tije mag yuto, ng’iepo, gi mamoko, nyalo nenore ka gima ok gitudore gi winjruokwa gi Jehova. Kata kamano, ka isechiwo ngimani ne Jehova, kata kapo ni igeno timo kamano machiegni, ber ng’eyo ni chuny mitimogo gik mapilego, en  gima onego ikaw gi pek. Wan Jokristo kuom seche duto. Dwarore ni wati gi puonj mag Ndiko e yore duto mag ngimawa. Mano emomiyo Paulo nojiwowa kama: ‘Gimoro amora mutiyo, tiuru gi chunyu duto, kaka ni Jehova, ok ni ji.’—Som Jo Kolosai 3:18-24.

5, 6. Gin weche mage monego ochik timbe koda rwakruokwa mapile?

⁵ Tich ma Jakristo timo pile ka pile e ngimane, ok gin gik motudore gi tiyo ne Nyasaye. Kata kamano, nikech Paulo jiwowa ni tiuru gi ‘chunyu duto, kaka ni Jehova,’ miyo waparo matut kuom yorewa duto e ngima. Omiyo, ere kaka wanyalo tiyo gi puonjno kuomwa wawegi? Be watimo gik moko kendo rwakore e yo mowinjore kinde duto? Koso dibed ni seche mwaluwo yorewa mapile mag ngima wanyalo bedo gi wichkuot hulo ni wan Joneno mag Jehova, nikech kaka watimre kata kaka warwakore? Mad kik wabed kamano ngang’! Jo Jehova ok diher timo gimoro amora manyalo ketho nying’ Nyasaye.—Isa. 43:10; 2 Kor. 6:3, 4, 9.

⁶ Weuru wanon ane kaka bedo gi gombo mar timo gik moko gi ‘chunywa duto, kaka ni Jehova,’ mulo weche mopogore opogore mag ngima. Sama watimo kamano, waket e paro ni misengini duto ma Jo-Israel ne chiwo ne Jehova, ne nyaka bed mabeyo moloyo.—Wuok 23:19.

KAKA WACHNI MULO NGIMANI

7. Chiwruok kaka Jakristo oriwo timo ang’o?

⁷ Kane ichiwo ngimani ne Jehova, donge ne itimo yierono maok iriwoe kiawa moro? Tiende ni ne isingori ni, e kit ngimani duto, ibiro keto dwach Jehova motelo. (Som Jo Hibrania 10:7.) Mano ne en yiero maber. Onge kiawa ni iseneno ni kiketo dwaro mar Jehova e wach moro, kendo temo timo kaluwore gi dwarono, ber ema bedoe. (Isa. 48:17, 18) Oganda Nyasaye gin joma ler kendo mamor nikech ginyiso kido mar Jalo mapuonjogi.—Lawi 11:44; 1 Tim. 1:11, New World Translation.

8. Wapuonjre ang’o kuom ng’eyo ni Jehova ne kawo misengini machon kaka gik maler?

⁸ Misengini ma Jo-Israel ne chiwo ne Jehova ne ikawo kaka gik maler. (Lawi 6:25; 7:1) E dho Hibrania, wach molok ni “maler,” en wach manyiso gima owal, moket tenge, kata mopwodhi ne Nyasaye. Mondo Jehova oyie gi misengini magwa, nyaka gibed maler, mowal mana ne en kende, maok okiki gi weche mag piny. Ok onego waher gimoro amora ma Jehova osin-go. (Som 1 Johana 2:15-17.) Kuom adier, mano nyiso ni nyaka watang’ gi osiepe, koda timo gik manyalo miyo wabed mochido  e wang’ Nyasaye. (Isa. 2:4; Fwe. 18:4) Mano bende dwaro ni kik waket wang’wa e ng’iyo gik mochido, kata keto pachwa kuom gik ma kamago.—Kol. 3:5, 6.

9. Ang’o momiyo kaka Jakristo timo ne jomoko en gimaduong’?

⁹ Paulo nojiwo Jokristo wetene niya: ‘Kik wiu wil ngang’ gi timo maber kod pogo giu ne jo moko maongego, nikech mago e misengini ma Nyasaye morgo.’ (Hib. 13:16) Omiyo, bedo ng’amaber kendo matimo ne jomoko gik mabeyo en gima Jehova kawo kaka misango moyiego. Kido ma kamano mar dewo jomoko e yor hera, en kido mifwenyogo Jokristo madier.—Joh. 13:34, 35; Kol. 1:10.

MISENGINI MOTUDORE GI LAMO

10, 11. Ere kaka Jehova neno tij lendo mar Jokristo koda weche motudore gi lamowa, to mano onego omi watim nade?

¹⁰ Achiel kuom yore manenore maler, ma wan kaka Jokristo watimogo ne jomoko gik mabeyo, en kokalo kuom “genono mwahulo.” Be itemo lendo gi thuolo moro amora moyudore? Paulo noluongo tich ma Jokristo onego otimno ni, “misango ma en pak ma wuok kaka olemo e dhok ma hulo nyinge [Nyasaye].” (Hib. 10:23; 13:15; Hos. 14:2) Nyalo bedo maber paro e wi thuolo mwatiyogo koda chuny mwatimogo tij lando wach maber mar Pinyruoth, kendo thoth migepe mag Chokruok mar Tijwa, olos mondo ochiew pachwa kuom wachni. Kata kamano, kokete e yo machuok, nikech dhi tij lendo koda lendo kata sama ok wan e tij lendo, gin “misango ma en pak,” tiende ni gitudore gi lamowa, onego gibed misango maber moloyo. Kata obedo ni chalwa opogore, en adier ni kinde mang’eny, thuolo mwatiyogo e lando wach maber en gima nyiso pek mwakawogo weche Nyasaye.

¹¹ Jokristo keto kinde mar luwo weche mag lamo pile, kendo gitimo kamano ka gin kendgi, kata kaachiel gi jomoko. Jehova dwaro ni watim kamano. En adier ni sani ok wan e bwo chik moridi mar rito yueyo mar Sabato, kata dhi e wuodhe mang’eny mag nyasi e Jerusalem. Kata kamano, chike ma ne iluwo chon-go nigi gik machal kodgi e ngima Jakristo. Nyasaye pod dwaro ni wawere gi tich manono, kendo wapuonjre Wachne, walem, kendo wadhi e  chokruoge mag Jokristo. Kendo jogo ma gin wiye udi kawo okang’ mar tayo lamo mar joot gi joodgi giwegi. (1 Thes. 5:17; Hib. 10:24, 25) Kuom weche motudore gi lamowa, ber ka wapenjore kama, ‘Be nitie kaka anyalo medo bero yo ma atiyogo ne Nyasaye?’

12. (a) Chiwo mar ubani e lamo machon inyalo por gi ang’o ndalogi? (b) Ng’eyo mano onego omul nade weche mwatiyogo e lamo?

¹² Ruoth Daudi nowero ne Jehova niya: “Kwayona mondo obedi kaka ubani e nyimi.” (Zab. 141:2) Par ane matin kuom lamo ma magi—par kuom nyadidi mitimogie koda chalgi. Bug Fweny poro “lemo mag jo maler” gi ubani, tiende ni lemo ma Jehova oyiego bedone kaka ubani maber mang’we ng’ar. (Fwe. 5:8) E Israel machon, ubani ma ne ihinyo chiw e altar mar Jehova ne nyaka ik maber kendo e yo mong’ith. Jehova ne yie gi chiwono mana kane ochiwe kaluwore gi chike ma noseketo. (Wuok 30:34-37; Lawi 10:1, 2) Ka lamo mawuok e chunywa oik maber kamano, to wanyalo bedo gadier ni Jehova biro yie kodgi.

CHIWO KOD KAWO

13, 14. (a) Epafrodito koda kanyakla mar Jo-Filipi nokonyo nade Paulo, to jaoteno nowinjo nade nikech mano? (b) Ere kaka wanyalo luwo ranyisi mar Epafrodito kod Jo-Filipi?

¹³ Chiwo mag pesa masiro tij lendo mar piny mangima inyalo por gi misango, kata bed ni wachiwo mang’eny kata matin. (Mari. 12:41-44) E ndalo Jokristo mokwongo, kanyakla mar Filipi nooro Epafrodito e dala mar Rumi mondo odhi okony Paulo gi gik ringruok ma nochando. Nenore ni jal ma Jo-Filipi noorono, ne oting’o bende mich mag pesa ma kanyakla ne omiye. Mano ok ema ne kinde mokwongo ma Jo-Filipi nochiwo ne Paulo kony. Kuom konyo Paulo, ne gidwaro gonye e parruok mag pesa mondo mi oket thuolone momedore kuom tij Nyasaye. Ere kaka Paulo nokawo michno? Ne oluonge ni “tik mang’we ng’ar, misango ma Nyasaye oyiego, kendo ma long’one.” (Som Jo Filipi 4:15-19.) Kuom adier, Paulo ne mor gi tim ng’wono mar Jo-Filipi, to Jehova bende ne morgo.

¹⁴ Kamano bende e ndalogi, Jehova mor ahinya gi chiwowa ne tij lendo mar piny mangima. E wi mano, osingonwa ni ka wadhi nyime keto wach Pinyruoth motelo e ngimawa, obiro konyowa e duto mwachando, gibed mag chuny kata mag ringruok.—Math. 6:33; Luka 6:38.

NYIS CHUNY MAR EROKAMANO

15. Moko kuom gik monego wadwoknie Jehova erokamano gin mage?

¹⁵ Nitie gik mang’eny ahinya momiyo onego wanyis erokamano ne Jehova. Donge en adier ni onego wadwokne erokamano odiechieng’ kodiechieng’ nikech mich mar ngima? Omiyowa duto madwarore e rito ngimawa—chiemo, lewni, kod kar dak kaachiel gi muya ma wayueyo. E wi mano, yie ma wan-go nikech bedo gi ng’eyo malong’o, miyowa geno. Kuom mano, onego walam Jehova kendo wachiwne misengini mag pak, nikech en e Jachwech koda nikech gik mosetimonwa.—Som Fweny 4:11.

16. Rawar mar misango Kristo onego omi watim ang’o?

¹⁶ Mana kaka ne waseneno e sula motelo, mich maduong’ moloyo ma Nyasaye osemiyo oganda dhano, en rawar mar misango Kristo. Mano en yo maduong’ ahinya ma Nyasaye oherowago. (1 Joh. 4:10) Wan onego watim nade nikech mano? Paulo nonyiso ayanga kama: “Hera mar Kristo chunowa; kwang’ado  wach kama, ni ng’at achiel notho ni ji duto, . . . kendo notho ni ji duto, mondo jo mangima kik obed mangima ni gin giwegi, to ni en ma nothonigi, kendo nochiernigi.” (2 Kor. 5:14, 15) Tiend gima Paulo ne wacho en ni, ka wamor adier gi ng’wono maok wawinjore yudo ma Nyasaye nonyisowa, to wabiro tiyo gi ngimawa e miye duong’ kaachiel gi Wuode. Hera koda erokamano marwa ne Nyasaye gi Kristo, en gima wanyiso kokalo kuom winjogi, koda bedo gi gombo mar lendo kendo timo ji jopuonjre.—1 Tim. 2:3, 4; 1 Joh. 5:3.

17, 18. Jomoko osemedo nade okang’ ma gichiwogo misengini mag pak ne Jehova? Chiw ane ranyisi.

¹⁷ Be en gima nyalore mondo imed bero yo michiwogo misango mar pak ne Nyasaye? Bang’ paro matut kuom duto mabeyo ma Jehova osetimonegi, ji mathoth osechano thuologi koda tijegi mondo gimed seche ma gitiyogo e tij lando Pinyruoth, kata tije mamoko mag Nyasaye. Moko osebedo painia makonyo kuom dwe achiel kata mokalo kanyo e higa, to moko osebedo jopainia mapile. To moko osedonjo e tije gedo mag Pinyruoth. Donge mago gin yore mabeyo ahinya ma ng’ato nyalo nyisogo erokamano? Ka watimogi gi chuny mowinjore—ni mondo wanyisgo erokamano—to tich mwatimo ne Nyasaye e yorego bedo tich moyiego.

¹⁸ Jokristo mang’eny oseneno ni gin kaka jogop Jehova kendo mano osejiwogi kawo okang’. Achiel kuomgi en Morena. Ne en gi penjo moko e wi Nyasaye, omiyo ne odhi manyo dwoko e Katholik, ma en din ma ne oponie, ne otemo bende manyo dwoko e puonj mag riekni Jo-Asia. Kata kamano, ne ok oyudo dwoko mowinjore. Mana bang’ kane Joneno mag Jehova osechako puonjore kode Muma, eka ne olone riyo ma ne en-go kuom wach Nyasaye. Morena ne mor ahinya gi dwoko mag Ndiko ma noyudo e wi penjo duto ma ne en-go, koda kaka dwokogo ne okonyo ngimane, omiyo nodwaro goyo ne Jehova erokamano e yor tiyo gi tekone duto e tich Nyasaye. Mapiyo bang’ batisone, nochako gi bedo japainia makonyo kuom kinde ka kinde, kendo mapiyo bang’ ka chalne ne oseyiene, nobedo japainia mapile. Mano ne en higini 30 mokalo, to Morena podi tiyo ne Nyasaye kuom thuolone duto.

19. Ere kaka inyalo medo okang’ michiwogo misango ne Jehova?

¹⁹ En adier ni nitie thoth jotich Jehova mochung’ motegno ma chalgi ok yienegi tiyo kaka jopainia. Kuom gimoro amora mwanyalo timo e tij Jehova, waduto wan gi nyalo mar chiwo misengini mag chuny, ma oyiego. Kuom timbewa, dwarore ni warit puonj koda chike makare, kwang’eyo ni seche duto wating’o nying’ Jehova. Kuom yie, waketo genowa duto kuom kaka Nyasaye chopo dwaro mage. Kuom tich mabeyo, wakonyo e lando wach maber. Nikech erokamano maduong’ ma wan-go kuom duto ma Jehova osetimonwa, weuru wadhi nyime chiwo ne Jehova misengini gi chunywa duto.

[Penjo mag Puonjruok]

[Weche manie ite mar 25]

Be ber mar Jehova jiwi mondo imed okang’ michiwogo misangoni mar pak?

[Picha manie ite mar 23]

Be ilendo gi thuolo moro amora moyudore?