Ere Kaka Inyalo Konyo Jomoko gi Paro?

Be jomoko osega nyisi ni mondo ikonygi gi paro moro? Kuom ranyisi, be osegapenjie penjo moko kaka: ‘En ang’o monego atim? Be onego adhi e romono kata e nyasino? be onego ayie kawo tijno? be onego atim osiep gi jalno mondo wabi wakendore kode?’

Joma dwaro ni ikonygi gadier nyalo kwayi ni mondo ikonygi ng’ado paro moko—paro manyalo mulo winjruokgi gi osiepe, joot, to kata mana gi Jehova. Ibiro tiyo gang’o e chiwonegi dwoko? Ihinyo tiyo gang’o e konyo jomoko ng’ado paro? Kata bed ni wach monego ong’ad en wach matin kata maduong’, Ngeche 15:28 wacho ni, “ng’ato makare oparo e chunye kaka doduok wach.” Non ane puonj abich maluwo, mowuok ei Muma, manyalo miyo wakony jomoko ng’ado paro.

1 Tem Ng’eyo Chal mar Weche.

“Ng’a maduoko wach ka pok owinjo en ng’a mofuwo, okelone wich kuot.”—NGE. 18:13.

Mondo mi wakony ng’ato e ng’ado paro, nyaka wang’e chalne koda paro ma jalo nigo. Kuom ranyisi: Kapo ni ng’ato ogoyoni simo kopenji yo maber manyalo kele dalani, gin weche mage monego ing’e eka ikonye? Be inyalo nyise yo maber monego oluw kapok ing’eyo kama entie? Ok ibi timo kamano! Kamano bende, mondo ikony ng’ato ng’ado paro, ber ikwong ing’e chal mare koda paro ma en-go kuom wachno. Be nyalo bedo ni nitie weche moko manyalo mulo paro midwaro chiwo? Ka ok wang’eyo maber chal mar weche, wanyalo chiwo paro mamedo mana chocho ng’ato moloyo.—Luka 6:39.

Tem Ng’eyo ni Jalo Osetimo Nonro e Okang’ Maromo Nade. En gimanyalo nyiso rieko ka wapenjo bende jal mamanyo parono penjo kaka: “Iparo ni puonj mage mag Muma manyalo konyo kuom wachni?” “Gin ber kata rach mage manyalo betie e yiero midwaro timo?” “Nyaka chop sani, isetimo nonro mage?” “En kony mane ma ji kaka jodong-kanyakla, jonyuolni, kata jata puonjruokni mar Muma, osemiyi nyaka chop sani?”

Dwoko ma jalo omiyowa nyalo konyowa ng’eyo kinda moseketo e manyo kony. Bende, wabiro keto e paro weche ma jomoko osewachone nyaka chop kanyo. Wanyalo fwenyo bende kabe jalo manyo ng’ama biro ‘sako ite’ kuom miye mana paro ma more.—2 Tim. 4:3.

  2 Kik Irikni Chiwo Paro.

“Ng’ato ka ng’ato mondo owinj mapiyo, oter mos kuom wuoyo.”—JAK. 1:19.

Nikech wadwaro konyo ng’ato, yot mondo warikni chiwo paro. Kata kamano, be mano nyalo nyiso rieko, to moloyo, kapo ni wachno en gima pok watimoe nonro mong’ith? Ngeche 29:20 wacho kama: “Ineno dhano marikini kuom wuoyo? Inyalo geno ni ng’a mofuwo biro bet maber moloyo en.”

Kaw kinde mar neno ni paro midwaro chiwo luwore chuth gi rieko mar Nyasaye. Inyalo penjri kama, ‘Be dibed ni paro koda “chuny mar piny” temo donjo e pacha?’ (1 Kor. 2:12, 13) Bedo gi chuny mar konyo ng’ato kende ok oromo. Bang’ ka jaote Petro noseng’eyo migawo matek mar Yesu, notemo chiwone paro kama: “Ooyo, ngang’, Ruoth; mano ok notimreni ngang’.” Ang’o mwanyalo puonjore kuom gima Petro notimono? Wapuonjore ni kaok watang’, kata mana ng’at ma chunye dwaro konyo nyawadgi nyalo jiwo, “ok paro mar Nyasaye, to mana mar dhano.” (Math. 16:21-23) Mano kaka dwarore ahinya ni wapar matut kapok wawuoyo! Donge lony ma wan-go tin ahinya kopor gi rieko mar Nyasaye?—Ayub 38:1-4; Nge. 11:2.

3 Nyis Bolruok Kuom Tiyo gi Wach Nyasaye.

“Ok atim gimoro gi tekona awuon, to awacho wechegi mana kaka Wuoro nopuonja.”—JOH. 8:28.

Be ibiro wacho ne ng’ato ni, “An ka dabed in, datimo kama kata kama”? Kata kapo ni dwoko nenoreni ayanga, biro bedo maber kipuonjori kuom ranyisi ma Yesu noketo mar bolruok kod ng’eyo tong’ maok onego ikal. Ne en gi rieko kod lony mokalo dhano moro amora; to ema pod nowacho kama: “Ok asewacho gi tekona awuon, to Wuoro . . . ema nomiya chik gi ma onego awachi, kendo gi ma onego aluw.” (Joh. 12:49, 50) Kinde duto, puonj koda paro ma Yesu ne chiwo ne luwore gi dwaro mar Wuon mare.

Kuom ranyisi, wasomo e Luka 22:49 ni, jopuonjre Yesu nopenjo kabe onego gikedi sama ne ji chiegni make. Japuonjre achiel notiyo gi ligangla. Kisomo Mathayo 26:52-54 mabende wuoyo kuom wachno, ibiro yudo ni kata mana e bwo chal makamago, Yesu nokawo thuolo mar konyo jopuonjre bedo gi paro mawinjore gi dwaro mar Jehova. Nikech nong’eyo puonj mayudore e Chakruok 9:6 koda weche mokor e Zaburi 22 kod Isaiah 53, Yesu ne nigi nyalo mar chiwo paro manyiso rieko, paro ma kuom adier noreso ngima ji kendo nomoro Jehova.

  4 Ti gi Gige Timo Nonro ma Jehova Chiwonwa.

“Ere jatichno mogen, kendo mariek, ma ruodhe noketo kuom joode mondo opognigi chiemo e kinde makare?”—MATH. 24:45.

Yesu oseketo kweth mar jatichno mogen mamiyowa chiemb chuny madwarore. Sama ikonyo ng’ato ng’ado paro e wi weche madongo, be ikawo thuolo mar timo nonro matut e bugewa malero Muma?

Fahirisi kod Watchtower Library * miyo bedonwa mayot yudo weche mang’eny moler maber. Mano kaka dibed gima ok kare kaok wati gi gige yudo weche mabeyo makamano! Thuond weche modhuro onyis kanyo kaachiel gi sula mang’eny manyalo konyo ng’ato ng’ado paro. In gi lony marom nade e konyo jomoko timo nonro mondo ging’e puonj mag Muma kendo paro matut ka gitiyo gi Wach Nyasaye? Mana kaka map mar piny nyalo konyo ng’ato ng’eyo kama entiere kendo taye nyaka kuma odhiye, gige timo nonro bende nyalo konye neno yo ma entiere, kendo fwenyo kaka onyalo siko e yo madhi e ngima.

Jodongo mang’eny osetiego jolendo mondo omany weche kuom tiyo gi Fahirisi kata Watchtower Library, kendo mano osemiyo gikonyo owete gi nyimine tiyo gi Ndiko e ng’ado paro. Timo kamano ok kony mana jolendo ng’eyo kaka ginyalo loyo gik machandogi gie sano, to mano bende konyogi bedo joma ohero timo nonro kendo mageno kuom yore ma Jehova tiyogo e miyowa chiemb chuny. E yo makamano, gibedo joma “nyalo margi mar paro osetieg e pogo e kind ber gi rach.”—Hib. 5:14, New World Translation.

5 Kik Item Timo Yiero e Lo Jomoko.

“Ng’ato ka ng’ato nyaka oting’ ting’ne owuon.”—GAL. 6:5.

Gikone, ng’ato ka ng’ato onego oyier en owuon paro mobiro luwo. Jehova miyowa waduto thuolo mar yiero kabe wadwaro luwo puonj koda chikene, kata ok kamano. (Rapar 30:19, 20) Nitie chal moko madwaro ni waket e paro puonj mogwaro ei Muma, kendo gikone jal mamanyo kony nyaka tim yierone owuon. Kaluwore gi chal mar wachno kata hik jal mamanyo kony, nyalo dwarore bende ni wapenjre wawegi niya, ‘Be kuom adier an gi ratiro mar chiwo paro kuom wachni?’ Nitie weche moko ma dibed maber ka oter ne jodong-kanyakla, kata tero ne jonyuol kapo ni jal mapenjowa en ng’at mapod tin.

[Weche Moler piny]

[Sanduk/Picha manie ite 8]

Chenro Munyalo Bedogo e Lamo mar Joot

Kaka chenro mar puonjruok, donge unyalo timo nonro mondo uyud dwoko e wi weche moko ma jomoko osepenjou machiegni? Gin sula mage ei bugewa koda puonj mag Muma munyalo yudo mondo ukonygo ng’at mopenjou weche makamago? Kuom ranyisi, nyalo bedo ni owadwa kata nyaminwa moro openji e wi mako osiep gi ng’ato ka en gi paro mar donjo kode e kend. Sama itiyo gi Fahirisi kata Watchtower Library, non mondi sula mawuoyo achiel kachiel kuom wachno. Kuom ranyisi, e Fahirisi, inyalo manyo kama wacho ni “Osiep mar Kisera” kata “Kend.” Kae to inon wiye matindo man e bwo sulago. Sama inono wi wach moro maduong’, ng’i bende ka nitie kamoro mabende wacho ni “Ne bende,” manyalo teri e wich moro machielo motudore abidha gi nonro midwaro timo.

[Sanduk manie 9]

Gik ma Jehova chiwonwa kokalo kuom riwruok mar oganda mare, konyowa chiwo paro maber, to wan bende jomoko nyalo timonwa kamano. Eklesiastes 12:11, NW wacho kama: “Weche mag jo mariek chalo ka ludhe riwi mag chiko ruedhi, kendo mana kaka musmal mogur matek, e kaka jogo machiwore e choko weche; ma jakwath achiel osemiyogi.” Mana kaka “ludhe riwi mag chiko ruedhi,” paro maber kendo manyiso hera nyalo chiko jogo ma chunygi tir e yo makare. “Musmal mogur matek” miyo gik moger bedo motegno. Kamano bende, konyo jomoko ng’ado paro maber nyalo miyo gibed motegno. Jomariek ‘chiwore,’ kata gibedo mamor ahinya gi ‘choko weche’ manyiso rieko moa kuom ‘jakwadhgi achiel,’ ma en Jehova.

Ti gi weche mag Jakwadhno seche mikonyo jomoko ng’ado paro. Mano kaka en gweth maduong’ chiko itwa kendo chiwo paro ne jomoko e kinde ma mano nyalore! Sama wachiwo paro motenore adier e puonj mag Muma, parono biro bedo maber kendo makonyo jalo kuom kinde mosiko.