Penjo Moa Kuom Josombwa

Ere kaka tho mar jo Nyasaye nigi “nengo maduong’ e nyim Jehova”?

▪ Jandik-zaburi nowero kokalo kuom much Nyasaye kama: “Tho jo maler mage ni gi nengo maduong’ e nyim Jehova.” (Zab. 116:15) Ngima mar moro kamoro kuom jolamo madier mag Jehova nigi nego maduong’ e nyime. Kata kamano, tiend weche moa hul e Zaburi 116 ok wuo mana kuom tho mar ng’at achiel kende.

Sama igolo twak mar yik mar Jakristo moro motho, ok owinjore tiyo gi Zaburi 116:15 kuom jal mothono, kata kapo ni ne otho ka en jatich Jehova momakore kode. Nikech ang’o? En nikech tiend weche mag jandik-zaburino oriwo gik mamoko. Tiende wechego en ni Nyasaye kwano tho mar ogandane mangima momakore kode kaka gima nigi nengo matek ahinya maok onyal weyo mondo otimre.—Ne Zaburi 72:14; 116:8.

Zaburi 116:15 singonwa ni Jehova ok bi weyo jotichne momakore kode ka gin kaka oganda mondo ogolgi chutho e piny. Kuom adier, sigandwa ma ndalogi nyiso kaka wasenano e bwo tem koda sand mager, kendo mano nyiso ayanga ni Nyasaye ok bi weyo mondo otiekwa ngang’.

Nikech Jehova nigi gi teko maonge giko kendo dwaro mare nyaka chopi, ok obi weyo mondo okethwa ka wan kaka oganda. Kapo ni Nyasaye nyalo weyo mondo gima kamano otimre, mano nyalo nyiso ni wasike nigi teko moloye—mano ok nyalre chuth! Bende, dwaro mar Jehova mondo piny opong’ gi jomomakore kode ok nyal chopo—dwarone to nyaka chopi. (Isa. 45:18; 55:10, 11) Kata mana tich maler mar Jehova nyalo rumo e piny kapo ni onge dhano modong’ malame e laru mar hekalune mar ranyisi e piny! Dhano ma dhi bedo kaka mise e “piny manyien” dine obedo maonge—tiende ni, dhano makare modak e piny e bwo “polo manyien.” (Fwe. 21:1) Bende, Loch Kristo mar Higini Gana Achiel ok bi bedo maonge dhano milocho e wigi.—Fwe. 20:4, 5.

Inyalo ket kiawa kuom ratiro mar Nyasaye kaka Jaloch koda ler mar nyinge kapo ni oweyo wasike mondo otiek ogandane e piny. Kapo ni gimakamano otimore mano nyalo keto mbala kuom ratiro mar Jehova kaka Jaloch e Wi Gik Moko Duto. E wi mano, nikech luor ma en-go kuome owuon koda kuom nyinge maler, Jehova ok bi weyo mondo joge momakore kode ka gin kaka oganda mondo otho. Kendo par ane wachni: Nikech Nyasaye ‘onge gi ketho,’ ok obi weyo ngang’ maok orito oganda joge mosebedo ka tiyone ka gimakore kode. (Rapar 32:4; Chak. 18:25) E wi mano, weyo mondo otiek joge ka gin kaka oganda ok bi winjore gi Wach Nyasaye mawacho niya: “Jehova ok anojwang’ joge nikech nyinge maduong’.” (1 Sam. 12:22) Kuom adier, “Jehova ok nowit joge, kata jwang’o gikeni mare.”—Zab. 94:14.

Mano kaka ng’eyo ni Jehova ok bi weyo joge ngang’ mondo otiek e piny en gima jiwo chuny! Kuom mano, weuru mondo wanyis ni wamakore motegno gi Nyasaye, ka wageno wachne mosingo niya: “Onge gir lueny mothedh mar kedo kodi ma dinyal timo gi moro; kendo ng’ato ka ng’ato mawacho marach kuomi e bura, ning’adne bura in. Ma e gikeni mar jotich Jehova, ma bende e tim makare ma gingo moa kuoma, Jehova owacho.”—Isa. 54:17.

[Weche manie ite mar 22]

Nyasaye ok bi weyo ngang’ mondo otiek joge