Chung’ Motegno Mondo Ikwed Obadho mag Satan!

‘Tamuru wuond mariek mag Satan.’​​—⁠EFE. 6:​11.

INYALO DWOKO NADE?

Ere kaka jatich Jehova nyalo kwedo obadho mar hero mwandu?

Ang’o manyalo konyo Jakristo manie kend mondo kik donj e obadho mar terruok?

Ang’o momiyo iyie ni dwarore ni ichung’ motegno kik idonj e obadho mar hero mwandu koda terruok?

1, 2. (a) Ang’o momiyo Satan ok ohero Jokristo mowal kod ‘rombe mamoko’? (b) Gin obadho mage mag Satan ma wabiro nono e sulani?

SATAN JACHIEN ok ohero dhano kata matin to moloyo, ok ohero jogo matiyo ne Jehova. Kuom adier, Satan kedo lweny mager gi Jokristo mowal mapod nie piny. (Fwe. 12:17) Jokristo ma jochirgo osebedo kotelo e tij lando wach Pinyruoth kendo gisenyiso ji ayanga ni Satan e jaloch mar pinyni. Jachien bende ok ohero jogo ma gin ‘rombe mamoko’ ma riwo lwedo Jokristo mowal, ka gin gi geno mar yudo ngima mochwere, geno ma Satan owuon to ongego. (Joh. 10:16) Kendo mano emomiyo oger! Kata bed ni wan gi geno mar dak e polo kata e pinyka, Satan en jasikwa. Dwarone maduong’ en ni mondo watim dwache.​​—⁠1 Pet. 5:8.

² Mondo omi ochop dwacheno, Satan osebedo katiyo gi obadho mopogore opogore. Otimo duto monyalo mondo ‘ogeng’ pach’ jogo makiya Nyasaye, omiyo ok ginyal puonjore wach maber kendo neno obadho mag Satan. Kata kamano, Jachien bende tiyo gi obadho ne jomoko kuom jogo moserwako wach Pinyruoth. (2 Kor. 4:​3, 4) Sula mokalo nonyisowa kaka wanyalo kwedo obadho adek mag Satan: (1) tiyo gi lep e yo marach, (2) luoro dhano, kod (3) paro ni Nyasaye ok nyal weyonwa richowa. Koro we wanon ane kaka wanyalo chung’ motegno e kwedo obadho moko ariyo mag Satan ma gin⁠—⁠hero mwandu, koda tem mar donjo e terruok.

HERO MWANDU​​—⁠OBADHO MA THUNG’O JI

3, 4. Ere kaka parruok mag piny nyalo miyo ng’ato ochak hero mwandu?

³ E achiel kuom ngero ma ne otiyogo, Yesu nowuoyo  e wi kodhi ma ne ochwo ei kudho. Nolero ni ng’ato nyalo winjo wach maber mar Pinyruoth to kata kamano, “parruok mar piny kod wuond mar mwandu thung’o wach, mi ok onyak.” (Math. 13:22) Kuom adier, mwandu en achiel kuom obadho ma jasikwa Satan tiyogo.

⁴ Nitie gik moko ariyo ma koket kanyachiel, to nyalo thung’o wach Pinyruoth. Achiel kuomgi en “parruok mar piny.” E kindegi ma gin “ndalo mag giko,” nitie gik mathoth manyalo miyo ng’ato obed gi parruok. (2 Tim. 3:⁠1) To nikech nengo gik moko medo bedo matek, kendo tije mag andika bende medo bedo manok, yudo gik ringruok mochuno nyalo bedo matek. Bende inyalo chako bedo gi parruok kuom kinde mabiro mipenjri niya, ‘Be chieng’ ka aseti, be nayud pesa moromo rita?’ Nikech parruok machalo kamago, jomoko osetemo mondo gimany mwandu nikech giparo ni pesa ema biro miyo gidag maber e kinde mabiro.

5. Ere kaka “mwandu” nyalo wuondo ng’ato?

⁵ Gimachielo ma Yesu nowuoyoe en “wuond mar mwandu.” Wuond ma mwandu kelo, kaachiel gi parruok, nyalo thung’o wach mar Pinyruoth. Muma wacho ni ‘fedha en rageng’.’ (Ekl. 7:​12) Mani tiende en ni pesa nyalo konyowa yudo gigo ma wadwaro. Kata kamano ok en gima nyiso rieko dwaro bedo gi mwandu. Ji mathoth oseyudo ni kaka gimedo temo matek mondo giyud mwandu, e kaka gimedo donjo e obadho mar hero mwandu. Moko osebedo kata wasumbini mag mwandu.​​—⁠Math. 6:​24.

6, 7. (a) Ere kaka hero mwandu nyalo bedo obadho kama itiyoe? (b) Gin ang’o ma Jakristo onego oket e paro kapo ni dwarore oti kuom seche momedore?

⁶ Gombo mar hero mwandu nyalo chakore mos mos ka ng’ato ok ong’eyo. Ne ane ranyisini. Wuon tich biro iri kae to onyisi kama: “An gi wach moro maber! Kambiwa osemako tich moro maduong’. Mani nyiso ni wabiro tiyo kuom seche momedore kuom dweche moko matin maluwo. To gima awachnie en ni chudo mari dhi medore ahinya.” Inyalo timo nade kaluwore gi wachno? En adier ni ting’ mar chiwo gik ringruok ne joodi en ting’ maduong’ ahinya, kata kamano mano kende ok e ting’ ma in-go. (1 Tim. 5:8) Nitie gik mamoko bende ma nyaka ipar. Ibiro tiyo kuom seche momedore e okang’ maromo nade? Be tijino biro miyo obedni mayot tiyo ne Nyasaye kendo miyi thuolo mar dhi e chokruoge mag kanyakla kaachiel gi timo Lamo mar Joot?

⁷ Sama ing’ado paro kuom wachno, iparo ni ang’o monego iket obed mokwongo​​ —⁠pesa mang’eny mibiro yudo kuom tiyo seche momedore, koso rito winjruok mari gi Jehova? Be ibiro weyo keto dwaro mag Pinyruoth obed mokwongo e ngimani nikech idwaro yudo pesa mang’eny? Be inyalo neno kaka hero mwandu nyalo miyo in kaachiel gi joodi uketh winjruok maru gi Jehova? Kapo ni mano e gima timore e ngimani sani, inyalo timo ang’o mondo ichung’ motegno mondo ikwed obadho mar hero mwandu?​​—⁠Som 1 Timotheo 6:⁠9, 10.

8. Gin ranyisi mage mayudore e Ndiko manyalo konyowa nono ngimawa kinde ka kinde?

⁸ Mondo kik idonj e obadho mar hero mwandu, dwarore inon ngimani kinde ka kinde. Ok onego ibed kaka Esau, ma nonyiso gi timbene ni nochayo singo mag Jehova! (Chak. 25:34; Hib. 12:16) Kendo ok onego ibed kaka jamoko ma Yesu nonyiso ni ous mwandune mondo opog jo modhier kae to oluw Yesu. Kar timo kamano, jamokono “nodhi ka litne, nikech ne en ng’at ma ramoko.” (Math. 19:⁠21, 22) Nikech nosemoko e obadho mar hero mwandu, jalno nowito thuolo maduong’ ahinya​​—⁠ma en thuolo mar luwo Yesu jal maduong’ie moloyo kuom dhano duto mosedak e piny! Tang’ mondo kik ilal thuolo mar bedo japuonjre Yesu Kristo.

9, 10. Kaluwore gi Ndiko onego wabed gi paro mane e wi wach mwandu?

⁹ Mondo kik wadonj e obadho mar hero mwandu, dwarore waluw siem ma Yesu nochiwo niya: “Kik uparru kuwacho ni, ‘Wanacham ang’o? ’ kata, ‘Wanamadh ang’o? ’ kata ‘Wanarwakre gang’o? ’ Nikech mago duto e ma jo ma ok oyie dwaro; to Wuonu me polo ong’eyo ni uchando magi duto.”​​—⁠Math. 6:⁠31, 32; Luka 21:⁠34, 35.

¹⁰ Kar donjo e obadho mar hero mwandu, weuru watem matek mondo wabed gi paro kaka mar Agur jandik Muma ma nowacho kama: “Kik imiya dhier kata mwandu mang’eny; pidha gi chiemo mowinjore ayudi.” (Nge. 30:8) En adier ni Agur nong’eyo kaka pesa chiwo rit, to bende nong’eyo wuond ma hero mwandu kelo. Ng’e ni parruok mag piny kod wuond ma hero mwandu kelo, nyalo ketho winjruokwa gi Jehova. Keto paro ahinya kuom mwandu, nyalo miyo kik ibed gi thuolo, teko kod gombo mar keto dwaro mag Pinyruoth obed mokwongo e ngimani. Omiyo, ng’ad e chunyi ni ok ibi donjo e obadho ma Satan tiyogo mar hero mwandu!​​—⁠Som Jo Hibrania 13:5.

TERRUOK​​—⁠BUR MATUT MOPONDO

11, 12. Ere kaka Jakristo nyalo podho e obadho mar tim terruok kama otiyoe?

¹¹ Jodwar madwaro mako le maduong’ kendo maratego nyalo kunyo bur matut e yo kama leno jaluwo. Ginyalo geng’o dho burno gi kete kae to giporo lowo moko e wiye mamiyo leno ok nyal fwenyo. Achiel kuom tembe ma Satan tiyo godo maber, chalo gi obadhono. En richo mar terruok. (Nge. 22:14; 23:27) Jokristo moko osepodho e burno nikech ne ok gitang’ gi gigo ma ne nyalo rwakogi e tim terruok. Jokristo moko manie kend osepodho e tim terruok bang’ chako osiep mar kisera gi ng’at maok gin-go e kend.

¹² Osiep mar kisera maok kare nyalo chakore gi ng’at ma utiyogo kar tich. Nonro mosetim nyiso ni kuom mon duto mosedonjo e tim terruok, kwan mokalo nus mar mon-go noterore gi joma gitiyogo, to kuom chwo mosedonjo e tim terruok, adek kuom ang’wen notimo kamano gi ng’at ma gitiyogo. Be tiji mar andika chuni ni iti gi joma mon kata chwo? Ka en kamano, to kare tudruok mantie e kindi kodgi chalo nade?  Be iketo tong’ mondo tudruok manie kindu obed mana mar tich maok kal kanyo? Kuom ranyisi, nyaminwa ma Jakristo nyalo hero goyo mbaka gi dichwo ma gitiyogo, kae to bang’e ochako nyiso jalno chandruok ma en-go e kend mare. To komachielo bende, bang’ bedo gi tudruok machiegni gi jatich wadgi madhako, owadwa moro ma Jakristo nyalo chako paro e chunye kama: “Ochiko ite maber ne paro machiwo, kendo owinja sama awuoyo kode. Omiya luor ahinya. Mad ne bed ni chiega be timona kama! ” Be inyalo neno kaka Jokristogo nyalo donjo e tim terruok e yo mayot?

13. Osiep mar kisera gi ng’at maok un-go e kend, nyalo chakore nade e kanyakla mar Jokristo?

¹³ Osiep mar kisera gi ng’at maok jaodi bende nyalo timore ei kanyakla mar Jokristo. Par ane ranyisini. Daniel kod Sarah, * jaode ne gin jopainia mapile. Daniel ne en jaduong’-kanyakla ma ne yie timo migawo moro amora ma ne imiye e kanyakla. Nopuonjo chwo abich Muma kendo adek kuomgi ne obatisi. Owete ma ne eka obatisigo ne dwarore ojiw kendo oho chunygi ahinya. To nikech kinde duto Daniel nodich gi migepene mopogore opogore mag kanyakla, Sarah ne jachiwo jip kod hoch ne owetego. Mapiyo nono ne ging’iyo: Owetego ma yande Daniel puonjorego Muma ne manyo ng’at ma ne nyalo hoyogi, to Sarah ema ne timo mano. Sarah bende ne dwaro ng’ama ne nyalo winje, to owetego ne timo mano. Obadho malich ne ni nyime. Daniel wacho kama: “Bedo ni chiega ne chiwore mar hoyo jomoko, koriwo bende ni ne ok ayud thuolo mar bedo kode machiegni, nomiyo chandruok odonjo e oda. Chiega noterore gi achiel kuom joma ne gin jopuonjrena mag Muma. Noyudo osebedo mayom yom e winjruokne gi Nyasaye to mana ka antie, nimar naketo pacha ahinya e migepena mag kanyakla.” Inyalo timo ang’o mondo igeng’ masira machalo kamano?

14, 15. Gin ang’o manyalo konyo Jokristo manie kend mondo kik gidonj e obadho mar terruok?

¹⁴ Mondo itang’ gi obadho mar terruok, par matut kuom tiend singo mar keny ma ne itimo. Yesu nowacho ni: “Gi ma Nyasaye oseriwo, kik dhano opogi.” (Math. 19:6) Kik ipar ni migepe ma in-go e kanyakla duong’ moloyo jaodi. E wi mano, ng’e ni bedo mabor gi jaodi ka ok ochuno nyalo nyiso ni kend maru yom yom kendo mano nyalo kelo tem ma udonj e richo maduong’.

¹⁵ En adier ni ka in jaduong’-kanyakla, onego irit kweth. Jaote Petro nondiko niya: “Rituru kuedh Nyasaye manie lwetu, kurangogi ok kochunu, to gi chuny mohero kaka Nyasaye dwaro; ok nikech ohala makelo wich kuot, to kod chuny mongino.” (1 Pet. 5:2) Ok onego ijwang’ kanyakla. Kata kamano, en tim manono kedo matek mondo ibed jaduong’ maber e kanyakla to ok in dichwo maber e ot. Onge tiende konyo owete gi nyimine e kanyakla ka jaodi to ijwang’o. Daniel ma nowuo kuome motelo wacho niya: “Ok onego ibed modich ahinya gi migepe mag kanyakla machop kama koro ijwang’o joodi.”

16, 17. (a) Jokristo manie kend nyalo timo ang’o mondo ng’ato ang’ata ong’e ni ok gidwar chako osiep mar kisera gi ng’at maok gikendorego? (b) Chiw ranyisi mag sula moko mayudore e gasedewa manyalo konyo Jokristo mondo kik donj e terruok.

¹⁶ Gasede mag Ohinga mar Jarito koda Amkeni! osebedo ka chiwo puonj mabeyo ahinya mondo okony Jokristo manie kend kik donj e obadho mar terruok. Kuom ranyisi, Mnara wa Mlinzi mar Septemba 15, 2006, nochiwo puonj niya: “E kar tich koda  kuonde mamoko, tang’ gi gigo manyalo miyo ichak mako osiep mar kisera gi ng’at maok en jaodi. Kitiyo gi ng’at maok en jaodi kuom seche momedore bang’ seche mag tich, mano nyalo rwaki e tem. In kaka dichwo kata dhako manie kend, onego iket maler kokalo kuom wecheni koda timbeni ni ok idwar oyuma. Kaka jal mochiwore timo dwaro mar Nyasaye, ok onego item ywayo pach ji kokalo kuom rwakruok marach kata tiyo gi gik mamedi ber e yo mokalo tong’. . . . Keto picha mar jaodi koda mar nyithindi kama itiyoe, nyalo konyi koda jomoko ong’e ni mago e joma iketo mokwongo e ngimani. Ng’ad e chunyi ni ok ibi yie mondo ng’ato ang’ata otem tugo kodi e yor kisera.”

¹⁷ Sula manie Amkeni! mar April 2009 ma wiye wacho ni “Uaminifu Katika Ndoa Unamaanisha Nini Hasa?” nochiwo siem kuom bedo gi paro mag nindruok gi ng’at maok en jaodi. Sulano nomedo wacho ni bedo gi paro ma kamago nyalo miyo ng’ato odonj e tim terruok e yo mayot. (Jak. 1:⁠14, 15) Kapo ni isedonjo e kend, nyalo bedo maber ka in gi jaodi unwoyo somo sula machalo kaka mago kanyachiel kinde ka kinde. Kend en chenro ma Jehova owuon ema nochako kendo Jehova nene kaka gima ler. Kawo kinde mondo uwuo kanyachiel gi jaodi e wi weche mag kend maru, en yo maber manyiso ni ukawo mapek gigo ma Jehova neno ni ler.​​—⁠Chak. 2:​21-​24.

18, 19. (a) Gin gik mage ma terruok nyalo ketho e kend? (b) Bedo joma ritore e kend kelo gweth mage?

¹⁸ Kapo ni in e tem mar chako osiep mar kisera gi ng’at maok ikendorigo, par matut kuom lit ma chode kod terruok jakelo. (Nge. 7:⁠22, 23; Gal. 6:7) Ng’at madonjo e terruok, ketho winjruokne gi Jehova kendo okelo lit e chunye owuon koda e chuny jaode. (Som Malaki 2:⁠13, 14.) Par bende gweth ma joma ok donj e timbe terruok yudo. Gibedo gi ngima maber e okang’ moromo e kindegi, moriwo nyaka bedo gi chuny maok chandre, kendo gibedo gi geno mar dak nyakachieng’.​​—⁠Som Ngeche 3:​1, 2.

¹⁹ Jandik-zaburi nondiko niya: “Jogo ma hero chikni gin gi kuwe maduong’; onge gi ma dimi gichwanyre.” (Zab. 119:165) Omiyo heruru adiera kendo “ritreuru ahinya kaka uwuotho, ok ka jo ma onge rieko, to ka jo mariek” nikech ndalogi opong’ gi richo. (Efe. 5:⁠15, 16) Yore duto mwaluwo opong’ gi obadho mag Satan moketo mondo omakgo jotich Nyasaye madier. Kata kamano, osemiwa kony makare mondo waritre. Jehova osemiyowa gik ma wadwaro ‘mondo wanyal tamo kendo nego aserini makakni mag ng’a marachno’!​​—⁠Efe. 6:⁠11, 16.

[Weche moler piny]

[Penjo mag Puonjruok]

[Picha manie ite mar 26]

Hero mwandu nyalo thung’o ng’ato kik luw wach Nyasaye. Kik iwe mano timreni

[Picha manie ite mar 29]

Ngero ng’ato gi weche mochido, kata yie mondo ng’ato ongeri gi weche mochido, nyalo miyo idonj e terruok