Ripod Romo Mar Higa Ka Higa

Romo Manyiso Chuny mar Riwruok Koda Chenro Mabeyo

ROMO mar Watch Tower Bible and Tract Society of Pennsylvania mitimo higa ka higa, kinde duto osebedo kakelo mor ahinya. Kamano e kaka ne en e romo mar 127 ma ne otim chieng’ Ngeso Oktoba, tarik 1 higa mar 2011. Welo duto ma ne obiro kowuok e tung’ piny, nochokore e Od Chokruok mar Joneno mag Jehova e taon mar Jersey, mayudore New Jersey, e piny Amerka.

Gerrit Lösch ma en achiel kuom jokanyo mar Bura Maduong’, norwako ji e chokruogno gi mor. Nowacho ne welogo ma nowuok e pinje 85 ni gin ei riwruok makende mar owete mayudore e piny mangima. Riwruok makendeno chiwo neno maber kendo miyo Jehova duong’. Ka kuom adier, bedo gi chuny mar riwruok ema ne ojiw ahinya e romono.

RIPOT MABER MOWUOK MEXICO

Kare mokwongo mar programno ne onyiso kaka oganda Jehova oriwore. Baltasar Perla nowuoyo gi owete adek mawuok e Bethel ma Mexico kaluwore gi wach riwo ofise auchiel ma ne yudore e Central America to koro oriwgi e bwo ofis ma Mexico. Nikech riwo ofisego e bwo ofis achiel, koro Bethel man Mexico nigi ji mawuok e kit ogendini mopogore opogore e piny mangima. Medruok mar joma wuok e pinje mopogore opogore kamano, osemiyo gibedo gi jiwruok momedore ahinya. Chal ka gima Nyasaye orucho oko tong’ mag pinje.

Pek ma ne nitie bang’ riwo ofise mopogore opogore e bwo ofis achiel, ne en kaka dikony jolendo ong’e ni pod gin e riwruok mar oganda Jehova, kata obedo ni ofise me pinjegi olor. Nikech mano, kanyakla ka kanyakla noketne e-mail ma ginyalo tudorego gi ofis matayogi kata obedo ni gin mabor gi ofisno.

WECHE MANYIEN MOWUOK JAPAN

James Linton mawuok e ofis ma Japan, nolero kaka yiengni mar piny kod tsunami ma ne otimore e pinyno dwe mar Mach 2011, nokelo hinyruok ne owetewa. Joneno mang’eny nolalo joodgi e tho kaachiel gi lalo mwandugi. Joneno ma ne wuok e alwora ma masirano ne ok otimore nogero ne jowetegigo udi mokalo 3,100 kendo chiwo geche modhuro e konyo tije mopogore opogore. Owete gi nyimine mochiwore tiyo e bwo Komiti Mochung’ ne Tije Gedo e Alwora, notiyo maonge yweyo mondo gilos ute mag owete gi nyimine ma ne okethore. Chiegni owete gi nyimine 1,700 nochiwore konyo kamoro amora ma ne oorgie. Owete gi nyimine 575 nochiwore e uro Ute mag Romo.

Ne otim chenro bende mondo ojiw chuny owete gi nyimine kendo konyogi gichung’ motegno e winjruokgi gi Nyasaye. Chiegni jodong-kanyakla 400 nolimo owete gi nyimine mondo gijiwgi. Bura Maduong’ nooro jorit ariyo kowuok e ofis maduong’ man Brooklyn mondo odhi ojiw owete gi nyimine ma noyudo masira. Joneno mawuok e piny mangima, bende osebedo ka hoyo ahinya owete gi nyimine ma noyudo masira.

LOYO BUCHE MANIE KOT

Jowinjo nochiko itgi ahinya sama Stephen Hardy mawuok e ofis ma Ingresa ne wuoyo kuom buche  ma Joneno oseloyo e kot. Kuom ranyisi, sirkal mar Faransa ne dwaro ni Joneno man e pinyno ochul osuru maromo dola milion 82 (mag Amerka). Burano ne otieki kane Od Bura ma Ulaya mar Ratiro mag Dhano odok ne Joneno, ka giwacho ni sirkand Faransa noketho Chik namba 9 mar Winjruok ma Ulaya Marito Ratiro mag Dhano kuom wach lemo. Weche ma ne kot otiyogo e ng’ado burano nonyiso malong’o ni burano ne ok en mar wach osuru kende nimar gima kot nondiko wacho kama: “Tamruok miyo din moro ratiro mar lamo, kendo temo loro dinno, tiyo gi weche maketho nying din moro, gin gik maketho Chik namba 9 mar Winjruok ma Ulaya Marito Ratiro mag Dhano.”

Od Bura ma Ulaya mar Ratiro mag Dhano, bende nodok ne Joneno e kes mar Armenia. Chakre higa mar 1965, Od Burano nowacho ni Winjruok ma Ulaya Marito Ratiro mag Dhano ok norito ratiro mag jogo ma ne ichuno mondo odonj e tij lweny. Grand Chamber mar Od Bura ma Ulaya​​—⁠nong’ado ni “tamruok donjo e tij lweny nikech ng’ato neno ni obiro ketho chik moro maduong’,” en gima Winjruok ma Ulaya Marito Ratiro mag Dhano onego oyiego. Wach ma ne ong’adno chuno ni pinje kaka Armenia, Azerbaijan kod Turkey nyaka rit ratiro mag jogo maok dwar donjo e tij lweny.

TIJE MAG GEDO

Guy Pierce ma en achiel kuom jokanyo mag Bura Maduong’, nowacho kaka joma nie romono gombo ahinya ng’eyo kaka weche mag gedo dhi nyime e dala maduong’ mar New York State. Ne onyiso ji vidio manyiso okang’ ma tij gedo osechopoe e Wallkill, Patterson, kod kuonde ma nyocha osenyiewie lowo e dala mar Warwick kod Tuxedo, mayudore New York. Nitie ute mokalo 300 mamoko migero e dala mar Wallkill, mabiro rumo e higa mar 2014.

Nitie chenro mar nyiewo puodho eka 248 Warwick. Owadwa Pierce nowacho niya: “Kata obedo ni pok wang’eyo dwaro mar Jehova kaluwore gi tij gedo midwaro chak Warwick, pod wadhi nyime gi gedo ka wan gi paro mar daro ofis maduong’ mar Joneno mag Jehova obed kuno.” Nitie chenro ma pod iketo mar tiyo gi eka 50 mar puodho moro man kilomita 10 yo masawa mar Warwick minyalo kanoe masinde kod gik mamoko mag gedo. Owadwa Pierce nomedo wacho ni: “Bang’ kosechiw thuolo mar gedo, wageno ni wabiro tieko gedo bang’ higini ang’wen. Kae to wabiro uso ofiswa man Brooklyn.”

Owadwa Pierce nopenjo jowinjo niya: “Be dibed ni Bura Maduong’ oseloko paro ni koro masira maduong’ pod ni mabor? ” Nodwoko ni, “Ooyo ngang’, kapo ni masira maduong’ obiro kapok watieko, to mano pod biro bedo gimaber miwuoro! ”

TANG’ NE SIBUOR MA RUTO

Stephen Lett, jakanyo machielo mar Bura Maduong’ nowuoyo e wi ndiko mar 1 Petro 5:⁠8, mawacho ni: “Ritreuru, kiuru; nikech jasiku, Satan, bayo ka sibuor ma goyo asumbi, kodwaro ng’a ma dongam.” Owadwa Lett noketo maler kaka kido ma sibuor nigo, miyo weche mag Petro winjore ahinya gi kaka Jachien ohero timo.

To nikech sibuor tek kendo nyalo ringo moloyo dhano, ok onego watem kedo kata ringo Satan gi tekowa wawegi. Wadwaro kony mowuok kuom Jehova. (Isa. 40:31) Sibuor lidhoga mos sama omanyo le ma dongam, omiyo nyaka wabed motang’ gi bedo e mudho mar kiya wach Nyasaye ma Satan ngamoe ji ahinya. Mana kaka sibuor janego mwanda kata nyathi magwar ma nindo, Satan bende ok oherowa kendo odwaro mana negowa. Kendo bang’ ka sibuor oseyieng’, le monegono ok nyal fweny, kamano bende e kaka ng’at ma Satan osengamo bedo, nimar “achien dokonigi marach moloyo.” (2 Pet. 2:⁠20)  Omiyo dwarore wakaw okang’ motegno e kwedo Satan kendo wamakre motegno gi puonj mag Muma mwaseng’eyo.​​—⁠1 Pet. 5:9.

BED MAMOR GI KARI E OD JEHOVA

Jagol-twak machielo, Samuel Herd mabende en jakanyo mar Bura Maduong’ nowacho kama: “Waduto wan gi karwa e od Jehova.” Jokristo nigi kargi e “od” Nyasaye, tiende ni hekalu mar Nyasaye ma en chenro moseketo mar lame kokalo kuom misango mar Yesu mar rawar. En kama onego wamorgo nimar en thuolo makende lamo Jehova e hekaluno. Mana kaka Daudi, wan gi gombo mar ‘dak e od Jehova ndalo duto mag ngimawa.’​​—⁠Zab. 27:4.

Owadwa Herd nowuoyo e wi ndiko mar Zaburi 92:⁠12-​14 kae to openjo niya, “Ere kaka Jehova miyo wamewo? ” Nodwoko kama: “E paradis mar chuny, Nyasaye ritowa, kendo omiyowa pige mag adiera maduogo chunywa. Weuru wadwokne erokamano kuom timonwa mano.” Owadwa Herd nojiwo jowinjo mage niya: “Weuru wasik ka wamor e bedo e od Jehova​​—⁠ok mana kuom kinde matin, to nyaka chieng’.”

JOKRISTO CHIWO LUOR NE WACH NYASAYE MONDIKI

David Splane, mabende en achiel kuom jokanyo mar Bura Maduong’, nolero e twak maluwo ni kinde duto Jokristo madier osebedo ka chiwo luor ne Wach Nyasaye. E ndalo Jokristo mokwongo, ne gitiyo kode e tieko ywaruok e wi wach tero nyangu. (Tich 15:⁠16, 17) Kata kamano, e senchari mar ariyo, joma ne luongore ni Jokristo, ma noyudo otiegore e filosofi mag Jo-Grik, nochako tiyo gi puonjgo kar luwo gima Ndiko wacho. Bang’e, jomoko nowilo puonj moko mag Muma gi paro mag jogo ma ne iluongo ni Jopuonj mag Kanisa koda ruodhi mag Jo Rumi, ma gichako luwo puonj mang’eny mag miriambo.

Owadwa Splane nowacho ni ngero moro ma Yesu notiyogo, ne nyiso ni pod Jokristo madier mowal kuom roho, ne dhi bedoe e piny ka gikedo ne adiera mondo olandre. (Math. 13:​24-​30) Ok wanyal wacho gadiera ni Jokristogo ne gin ng’a gini. Kata kamano, kuom higinigo duto mosekalo, ji mang’eny osekwedo puonj koda timbe maok winjre gi ndiko. Moko kuomgi gin kaka Akbishop Agobard mawuok Lyons  ma nodak e senchari mar 9, Peter mawuok Bruys, Henry mawuok Lausanne, kod Valdès (kata, Waldo) ma ne odak e senchari mar 12, John Wycliffe ma nodak e senchari mar 14, William Tyndale ma nodak e senchari mar 16, kod Henry Grew kaachiel gi George Storrs ma nodak e senchari mar 19. E kindegi, Joneno mag Jehova pod dhi nyime makruok motegno gi puonj mawuok e Ndiko kendo giyie ni Muma e buk moting’o adiera. Mano emomiyo Bura Maduong’ oseyiero ndiko marwa mar higa 2012, obed Johana 17:17: “Wachni en adiera.”

LOKRUOK MABEYO MAG TIEGO OGANDA NYASAYE

Anthony Morris mabende en achiel kuom jokanyo mag Bura Maduong’, nolando wacho moro manyiso lokruok mosetim kuom jomisonari kod jopainia makende. Kochakore dwe mar Septemba 2012, klase mag Skund Muma ne Jokristo Mokendore ibi tim e pinje moko moyier. Skul mar Gilead sani itimo e yo mopogore. Chakre Oktoba mokalo, jogo ma yudo tiegruok e Gilead gin mana jogo moseketi oti tij lendo kuom thuologi duto kaka​​—⁠jomisonari mapok odhi Gilead, jopainia makende, jorit-alwora, kata jood Bethel. Jogo mosetiegi e skundno, ibiro or mondo ojiw kendo oteg jotich Nyasaye ka gin e ofise mag Bethel, e tij alwora, kata kuonde ma ji odakie mang’eny ma ginyalo jiwoe kanyakla e tij lendo.

Ibiro med jopainia mamoko makende mondo odhi olend e gwenge man maboyo ahinya gi taon. Kochakore Januar 1, 2012, moko kuom joma osetiegi e Skund Muma ne Owete Maok Nie Kend koda Skund Muma ne Jokristo Mokendore, nonego chak or kaka painia makende kuom kinde matin, kendo ibi ti kodgi mondo gichak kendo gimed yaro tij lendo e alwora man maboyo. Gibiro dhi e migawo mar painia makende ka ofis nono dongruok ma gitimo higa ka higa kuom higini adek. Jogo mabiro bedo gi nyak e okang’ madwarore kuom higini adekgo, ema koro ofis nyalo keto obed kaka jopainia makende.

Romo mar higa 2011 nopong’ gi mor sidang’. Wageno ni Jehova biro gwedho chenro manyien moketgi mondo tijwa mar lendo odhi nyime kendo omed jiwo riwruok mar owete, mondo Jehova ema oyud duong’ gi pak.

[Sanduk/Piche manie ite mag 18, 19]

Medo Ng’eyo Nyiminewagi E Yo Maber Moloyo

E programno, bende ne nitie thuolo mar wuoyo gi abich kuom nyimine ochiko ma noselalo chwogi e tho, ka gin jokanyo mag Bura Maduong’. Nyiminewago gin Marina Sydlik, Edith Suiter, Melita Jaracz, Melba Barry, kod Sydney Barber ma ne jowuoyo kuom kaka ne gipuonjore adiera kendo chako tiyo ne Nyasaye kuom thuologi duto. Moro kamoro kuomgi nonyiso jowinjo gik mabeyo ma ne oparo e wi jaode koda gweth ma ne giyudo kane pod gin kanyachiel. Kane programno rumo, jowinjo ne otieko gi wer namba 86, ma wiye wacho ni “Wanawake Waaminifu, Dada Wakristo.”

[Piche]

(Malo) Daniel kod Marina Sydlik; Grant kod Edith Suiter; Theodore kod Melita Jaracz

(Piny) Lloyd kod Melba Barry; Carey kod Sydney Barber

[Map manie ite mar 16]

(Mondo ine kaka ochang-gi chuth ne gaset wuon)

Ofise auchiel mag Bethel ma ne oriw mondo obed e bwo ofis ma Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Picha manie ite mar 17]

Picha manyiso kaka ofis maduong’ mar Joneno mag Jehova biro chalo e dala mar Warwick, New York