E KINDE Lweny Mokwongo mar Piny Mangima e higa mar 1914, thoth ji nofwenyo ni Jopuonjre mag Muma ne ok dhi riwo lwedo kata kedo e lwenyno. (Isa. 2:​2-4; Joh. 18:36; Efe. 6:​12) Jotich Nyasaye man Britain notimo ang’o?

Chik matayo tij lweny (Military Service Act) mar higa 1916, ne dwaro ni chwo ma johigini 18 nyaka 40 man Britain mapok okendo odonj e lweny. Chikno nochiwo thuolo mar weyo joma ne ok dwar tij lweny nikech “weche mag din kata nikech gikawo mapek wach mar bedo gi timbe makare.” Sirkal noyiero komiti mag nono joma onego owe kik dhi e lweny kendo nono ni onego omigi thuolo maromo nade.

Bang’ kinde matin kende, Jopuonjre mag Muma 40 notwe e jela mag jolweny, to 8 ne oter e lweny githuon e piny Faransa. Nikech mano, owete man Britain nondiko barua ne jatelo maduong’ (Prime Minister) Herbert Asquith ka gikwedo ahinya gima ne otimoreno, kendo ne gindiko barua moro moketie sei mag ji 5,500 ka gikwayogo mondo ogony owetego.

Ripot moro nowuok e piny Faransa ni Joneno aboroka ogo bunde nikech ne gidagi lweny. Kata kamano kane giriedo mondo ogogi bunde, nong’adnegi bura ni koro ibiro tweyogi kuom higini apar. Omiyo ne odwokgi England mondo kuno ema gitiekie twechgi e jela mag raia.

Kane lweny dhi nyime, chwo mokendo bende koro ne indiko e lweny. Kaluwore gi bura moro ma ne otim Manchester, England, ne odonjne owadwa moro miluongo ni Henry Hudson ma ne en laktar. E dwe mar Agosti 3, 1916, kot nong’ado ni en jaketho, ma ogoye fain kendo otere e lweny. E kindeno bura machielo bende ne dhi nyime Edinburgh, e piny Scotland. James Frederick Scott, owadwa ma jahigini 25 ma ne en jakolpota, ok ne oyud gi ketho moro amora. Sirkal nong’ado apil, to bang’e giweyo burano nikech ne giluwo bura machielo ma ne iyalo London. E bura machieloni, owadwa Herbert Kipps ne oyud gi ketho, ma ogoye fain mi otere e lweny.

Chop Septemba higa 1916, owete 264 noyudo osendiko ka gikwayo mondo kik tergi e lweny. Abich kuomgi ne owinj kwayogi, to 154 ne omi tije mochuno kaka gero ndara, koda kunyo kite mag gedo gi mamoko, kendo 23 ne omi tije mamoko e kambi mag jolweny, to 82 ne ochun odhi e lweny, to moko ne oter e od ng’ado bura mar jolweny mondo ong’adnegi bura. Ji ne ong’ur kaka ne isando jogo, omiyo sirkal ne ogologi e kambi mag jolweny ma oterogi e kembe ma ne itimoe tije mamoko.

 Edgar Clay gi Pryce Hughes, ma bang’e nobedo jorit matayo ofis mar Britain, notiyo e yawo maduong’ man Wales. To Herbert Senior, achiel kuom owete aboro ma noyudo oseduogo kowuok Faransa, ne oter mondo oti e jela miluongo ni Wakefield Prison man Yorkshire. Jomoko ne oter otim tije matek e jela miluongo ni Dartmoor Prison, kama ne gilosoe grup maduong’ mar joma ne otamore dhi e lweny.

Japuonjre Muma miluongo ni Frank Platt, ma noyudo oyie timo tije mamoko to ok lweny, ne osand ahinya kane okete githuon e lweny mondo oked to otamore. Atkinson Padgett, ma nopuonjore adiera mapiyo bang’ donjo e lweny, bende ne osand ahinya gi jotend jolweny kuom tamruok lweny.

Kata obedo ni higini mia achiel mosekalo owetewa ok nong’eyo mathoth kuom kaka Jakristo onego ochung’ motegno maok oriwo lwedo weche mag lweny, pod ne ging’ado mar moro chuny Jehova Nyasaye. Jogo moluong nyinggi e ripodni noketo ranyisi maber mar chung’ motegno maok giriwo lwedo weche mag lweny e ‘ndalo mag tem.’ (Fwe. 3:​10)—⁠Moa e giwa machon e piny Britain.