1, 2. Ang’o momiyo kinde duto Jehova wachonwa ni ochalo gi jakwath?

JEHOVA wachonwa kinde duto ni ochalo gi jakwath. (Eze. 34:11-14) Mano en wach maduong’ ahinya nikech okonyowa ng’eyo ni Jehova chalo nade. Jakwath mohero rombene, jakawo ting’ mar rito kendo tayo rombe. Otayogi koterogi e lege mang’ich koda kama pi maler yudore (Zab. 23:1, 2); ong’iyo chalgi odiechieng’ gotieno (Luka 2:8); oritogi mondo le marach kata jasigu kik hinygi (1 Sam. 17:34, 35); oting’o nyirombe mayom e bade koda e kore (Isa. 40:11); omanyo rombe molal, kendo okonyo rombe mohinyore.—Eze. 34:16.

² To nikech oganda Jehova machon ne odak e ngima mar pur gi pidho jamni, ne ginyalo winjo mapiyo sama Jehova Nyasaye wacho ni ochalo jakwath mohero rombene. Ne ging’eyo ni rombe dwarore omi rit mowinjore eka mondo gidong maber. Kamano e kaka dhano bende dwarore ni ota gi Jehova. (Mari. 6:34) Ka ok Jehova ema oritogi eyo makare kendo tayogi e yo mowinjore, to chandruok nyalo betie. Nyalo bedo mayot mondo giba yo mana kaka “rombe maonge jokwath” timoga. (1 Ruo. 22:17) Kata kamano, kuom jogo mayie mondo Jehova otagi, giyudo gik moko duto ma gidwaro.

3. En ang’o ma wabiro puonjore e sulani?

³ Wan bende e kindewagi wang’eyo kaka Jehova ritowa kaka jakwath. Waneno kaka orito kendo otayo joge ma gin kaka rombene e ndalogi. We waneane kaka ochiko rombene e kindegi koda kaka ochopo dwaro maggi kaka owinjore. Wabiro neno bende gigo ma rombene onego otim mondo giyud kony koda gweth chuth kuom rit ma Jehova miyogi.

4. Yesu dewo kendo rito rombe mag Jehova e yore mage?

⁴ Jehova oseketo Yesu obed Wi kanyakla mar Jokristo. (Efe. 1:22, 23) Yesu ma en “jakwath maber,”  nyisowa kido, dwaro koda gik ma Wuon mare ohero. Ohero rombe mag Wuon mare kendo odewogi ahinya. Ne oyie chiwo kata mana ngimane nikech rombego. (Joh. 10:11, 15) To mano kaka misango mar rawar ma Kristo nochiwo en mich maber ne dhano duto! (Math. 20:28) En mich kendo gweth nikech dwaro mar Jehova en ni “ng’a ma oyie kuome [Yesu] kik lal, to obed gi ngima mochwere.”—Joh. 3:16.

5, 6. (a) Gin jomage ma Yesu oketo mondo ota rombe mage? Rombe onego otim ang’o mondo giyud gweth kuom chenro ma Yesu noketoni? (b) Gimaduong’ moloyo mamiyo wadwaro winjo kendo luwo chenro ma jodong-kanyakla oketo en mane?

⁵ Rombe to nyiso nade ni Yesu Kristo en Jakwadhgi Maber? Yesu nowacho niya: “Romba winjo dwonda, kendo an ang’eyogi, kendo giluwa.” (Joh. 10:27) Winjo dwond Jakwath Maber tiende en luwo kaka ochikowa kinde duto kendo e yore duto. Mani oriwo winjo kendo riwo lwedo jokwath matindo moketo mondo okonye e rito rombe mag Wuon-gi. Yesu nonyiso ni jootene kod jopuonjre mage ne biro dhi nyime tiyo tich ma nochako. Ne gidhi ‘puonjo’ kendo ‘pidho rombene.’ (Math. 28:20; som Johana 21:15-17.) Kaka wach maber ne medo landore kendo kwan mar jopuonjre bende ne medore, Yesu notimo chenro mondo Jokristo motegno obed jokwath e kanyakla.—Efe. 4:11, 12.

⁶ Kane owuoyo gi jodong-kanyakla e dala mar Efeso, jaote Paulo nowacho ni roho maler ema noketogi ‘jokwath, mondo gikwa kanyakla mar Nyasaye.’ (Tich 20:28) Kamano e kaka jodong-kanyakla ma kindegi timo. Ang’o momiyo wawacho kamano? En nikech oseketgi kaluwore gi kaka Muma ma en Wach Nyasaye mondik kuom teko mar roho maler, chiko. Kuom mano, winjo gima Jokristo ma gin jodong-kanyakla wachonwa, nyiso ni wachiwo luor ne Jehova kod Yesu, ma gin Jokwath ariyo madongo. (Luka 10:16) Ka kuom adier, mano e gimaduong’ mokwongo mamiyo wadwaro bolore ne jodong-kanyakla. Kata kamano, nitie gik mamoko mamiyo wadwaro winjo kendo luwo kaka gitayowa.

7. Ere kaka jodong-kanyakla konyowa rito winjruok ma wan-go gi Jehova?

⁷ Sama gichiwo puonj moro kata jiwo owete gi nyimine gi paro moro, kinde duto jodongo onego oten kata osir weche ma giwachogo gi Ndiko. Timo kamano nyiso ni gin giwegi ok gidwar chiko ngima owete gi nyimine. (2 Kor. 1:24) Kar mano, gimiyo Jokristo wetegi puonj mawuok e Ndiko mondo okonygi ging’ad paro makare, kendo mano miyo riwruok koda kuwe betie e kanyakla. (1 Kor. 14:33, 40) Muma wacho ni jodong-kanyakla ‘rito chunywa.’ Mano tiende ni gidwaro konyo ng’ato ka ng’ato e kanyakla mondo orit winjruok maber ma en-go gi Jehova. Kuom mano gibiro timo mapiyo chiwo kony kapo ni gineno ni owadwa kata nyaminwa moro dwaro kawo kata osekawo okang’ moro maok ni kare. (Gal. 6:1, 2; Juda 22) Donge magi gin gik mowinjore ahinya manyiso gimomiyo onego ‘wawinj’ jodong-kanyakla ma wan-go e kanyaklawa?—Som Jo Hibrania 13:17.

8. Jodong-kanyakla rito chal mar rombe mag Jehova e yo mane?

⁸ Jaote Paulo ma ne en jakwath madewo ahinya chal mar owete gi nyimine, nochiwo siem ne owete e kanyakla mar Kolosai niya: “Ritreuru mondo kik ng’ato omaku gi riekone kod wuond manono, ma wuok kuom puonj dhano kod tim machon mag piny, to ok kuom Kristo.” (Kol. 2:8) Wechegi miyowa siem machielo ka ginyiso gimachielo maber mamiyo onego wawinj puonj ma jodongo miyowa kowuok  e Ndiko. Ginyiso ni jodongo rito owete gi nyimine kik hinyre gi puonj mag joma dwaro ketho yiegi. Jaote Petro nochiwo siem e wi “jonabi mariambo” koda “jopuonj mariambo” ma ne dhi temo yondho Jokristo ma nigi “chuny mayomyom” mondo odonj e richo. (2 Pet. 2:1, 14) Jodong-kanyakla ma kindegi bende nyaka chiw siem machalo kamago kapo ni mano owinjore. Jodong-kanyakla gin Jokristo motegno kendo mosekalo e chal moko mopogore opogore e ngima. E wi mano, kane pok oketgi jodong-kanyakla, ne ginyiso ni ging’eyo Ndiko e yo maler kendo ni gilony e chiwo puonj mangima. (1 Tim. 3:2; Tito 1:9) Nikech gin Jokristo motegno kendo molony, gitemo ng’iyo gik moko kik kal tong’ ahinya, kendo temo tiyo gi rieko sama gitayo rombe Jehova ei kanyakla.

9. Yesu pidho kendo tayo nade kanyakla mar Jokristo e kindegi?

⁹ Kokalo kuom riwruok mar oganda mare, Jehova chiwo chiemb chuny mogundho ne owete duto e piny mangima. Thoth puonjgo mowuok kuom Ndiko yudore e buge koda gasedewa. E wi mano seche moko jodong-kanyakla yudo weche matayogi achiel kachiel kokalo kuom barupe mindikonegi kata kokalo kuom jorit alwora. Kokalo kuom yore machalo kaka mago, rombe Jehova ng’eyo gima onego gitim.

10. En ting’ mane ma jodong-kanyakla nigo sama owadwa kata nyaminwa oweyo kanyakla?

¹⁰ Jokwath mabeyo nigi ting’ mar rito chal mar owete gi nyimine e kanyakla, to  ahinya wuon jogo ma yie margi osedok chien, kata motimo gik maok ni kare. (Som Jakobo 5:14, 15.) Moko kuom owete gi nyimine e kanyakla nyalo bedo ni osebayo yo ma giweyo tiyo ne Nyasaye. E chal ma kamago, donge jaduong’ madewo rombe adier biro timo kar nyalone mondo omany rombono kendo ojiwe oduog e kweth ma tiendeni kanyakla? Timo kamano nyalo bedo maber miwuoro. Yesu nowacho niya: “Ok en dwaro mar Wuonu me polo ni achiel kuom jo matindogi olal.”—Math. 18:12-14.

11. Ang’o momiyo jomoko nyalo yudo ka teknegi luwo gima jodongo nyisogi?

¹¹ Jehova gi Yesu gin jokwath makare chuth. Kata kamano, jokwath matindo ma gimiyo ting’ mar rito kanyakla gin mana dhano morem. Mani en adier manyalo miyo jomoko owinj ka teknegi luwo kaka jodongo tayogi. Joma kamago nyalo bedo gi paro niya: ‘Jodongogi gin mana dhano morem kaka wan. Ang’o momiyo onego ginyisa gima onego aluw? ’ En adier ni jodongo gin dhano morem. Kata kamano dwarore wabed gi paro mowinjore kendo makare kuom nyawo ma waneno kuomgi.

12, 13. (a) E ndalo machon, ne gin ketho mage ma jotich Jehova moko ma ne nigi migepe madongo notimo? (b) Ang’o momiyo Jehova ne dwaro ni ondik e Muma nyawo mag chwo ma ne nigi migepe?

¹² Muma nyiso maler nyawo mag jogo ma Jehova ne tiyogo e tayo joge e kinde machon. Kuom ranyisi, Daudi ne en ruoth mowal gi mo kendo jatend Israel. Kata kamano, tem noloye modonjo e terruok ma kendo oneko. (2 Sam. 12:7-9) Par ane ranyisi mar jaote Petro bende. Kata obedo ni ne omiye migawo maduong’ ahinya e kanyakla Jokristo, ne ojatimo ketho madongo kinde ka kinde. (Math. 16:18, 19; Joh. 13:38; 18:27; Gal. 2:11-14) Mopogore gi Yesu, onge dhano moro amora man kare chakre Adam gi Hawa tim richo.

¹³ Ang’o momiyo Jehova noyie mondo ondik e Muma nyawo mag chwo ma notiyogo e migepe mopogore opogore? Achiel kuom gimomiyo notimo kamano, ne en ni mondo onyis ni onyalo tiyo gi dhano morem mondo ota godo joge. Ka kuom adier, osebedo kotimo kamano chakre chon. Omiyo, ok onego wati gi nyawo mag owete matayowa e kindegi mondo wabed joma ng’ur kata weyo luwo kaka gichikowa. Jehova dwaro ni wachiw luor kendo winjo owete machalo kamago.—Som Wuok 16:2, 8.

14, 15. Wanyalo puonjore ang’o kaluwore gi kaka Jehova ne chiko joge e kinde machon?

¹⁴ Dwarore ahinya mondo wabed joma winjo jogo matayowa e kindegi. Par ane kaka Jehova nowuoyo gi joge e kinde machon mondo okonygi gitony. Kuom ranyisi, kane oganda Jo-Israel owuok Misri, Nyasaye notiyo gi Musa gi Harun e chiwonegi chike ma ne dwarore giluw. To bende, mondo gitony e masira mar apar ma Nyasaye nokelo e piny Misri, e udi duto mag Jo-Israel ne nyaka yang’ie nyarombo makende, kendo wiro moko kuom remb nyarombono e sis dhoot koda e wi dhoudi. Be Nyasaye nowuoyo achiel kachiel gi ogandano? Ooyo, ogandano ne yudo weche kokalo kuom jodongo maggi, to jodongogo ne yudo chikego kuom Musa. (Wuok 12:1-7, 21-23, 29) Kamano e kaka Jehova ne tiyo gi Musa koda jodongo e chiwo chikene ne ogandane. Ndalogi, Jehova tiyo gi Jokristo ma gin jodong-kanyakla e timo kamano.

¹⁵ En adier ni inyalo paro kinde mamoko machon ma Jehova ne chiko joge kaka onego gitim kotiyo gi dhano kata malaika.  E chalgo duto, Nyasaye noneno ni ber mondo omi jomoko migawo mar wuoyo e loye kendo ginyis joge gima nonego gitim mondo gitony e chal moro. Wan gadier chuth ni Jehova biro timo kamano bende e kinde Har–Magedon. Kata kamano, jaduong’-kanyakla moro amora, matiyo e lo Jehova kata e lo riwruok mar ogandane ndalogi, nyaka bed motang’ ahinya mondo kik oti marach gi migawo momiye.

16. “Wach” madwarore wachikne itwa ahinya en mane?

¹⁶ Oganda Jehova e kindegi loso “kueth achiel,” e bwo “jakwath achiel” ma en Yesu Kristo. (Joh. 10:16) Yesu nowacho ni ne odhi bedo gi jopuonjrene “ndalo duto nyaka giko mar ndalo.” (Math. 28:20) Ka en Ruoth manie polo, en gi teko duto mar chiko gik mabiro timore kapok okawo okang’ mar ketho piny marachni. Wanyalo timo ang’o mondo wasik ka wariwore kendo medo yudo rit ma rombe mag Nyasaye yudo? Dwarore ni wachik itwa ne ‘wach mawuok bang’wa,’ kanyisowa yo monego waluw. ‘Wachni’ oriwo gima roho mar Nyasaye wachonwa kaka ondiki e Muma, koda gima Jehova gi Yesu wachonwa ka gitiyo gi chwo ma giketo mondo obednwa jokwath e kanyaklawa.—Som Isaiah 30:21; Fweny 3:22.

17, 18. (a) En jasigu mane manyalo hinyo rombe mag Jehova, kata kamano wanyalo bedo gadier kuom wach mane? (b) Sula maluwo mae biro wuoyo e wi ang’o?

¹⁷ Muma wacho ni Satan “bayo ka sibuor ma goyo asumbi, kodwaro ng’a ma dongam.” (1 Pet. 5:8) Mana kaka le ma jocham jowadgi, Satan luro ne rombe, korito yudo thuolo moro amora mondo ongam jogo maok ong’eyo kata mobayo yo. Mano e achiel kuom gimaduong’ie moloyo mamiyo wadwaro siko machiegni ahinya gi kanyakla, kendo bedo e bwo ‘Jakwath gi Jarit chunywa.’ (1 Pet. 2:25) Kowuoyo e wi joma biro tony e sand maduong’, Fweny 7:17 wacho ni: “Nyarombo [Yesu] . . . nobed jakwadhgi. Kendo notelnigi e sokini mag pi ngima, to Nyasaye noywe pi wang’gi duto.” En singo mane manyalo bedo maber maloyo mano?

¹⁸ Bang’ nono migawo maduong’ ma jodong-kanyakla chopo ka gin kaka jokwath, ber mondo wapenjre niya: Jodong-kanyakla nyalo timo ang’o mondo gibed gadier ni girito rombe mag Yesu e yo mowinjore? Wabiro nono dwoko mar penjoni e sula maluwo.