Be isesomo adimba gocho mosekalo mag Ohinga mar Jarito? Ka en kamano, ne ane kabe inyalo dwoko penjo maluwogi:

Ne en karang’o ma Yesu noyalo ne ‘chunygo ma ne nie tuech’? (1 Pet. 3:19)

Nenore kare ni bang’ chier mare, Yesu noyalo ne malaike marichogo e wi kum ma ne gibiro yudo.—6/15, ite mar 23.

Gik moko adek manyalo mono kend mari mar ariyo kik odhi maber gin mage?

Gin: weyo paro mag kend machon ochoch kend ma intiere sani; tudruok gi osiepe machon maok ong’iyo gi jaodi mikendo sani; ichich gi jaodi mikendo sani nikech jaodi mokwongo noweyi.—7/1, ite mag 9-10.

Yesu biro ng’ado bura karang’o ne jogo ma gin kaka rombe kata diek? (Math. 25:32)

Mano biro timore ka Yesu ng’ado bura ne ji e kinde ma masira maduong’ pod dhi nyime, bang’ koseketh dinde duto mag miriambo.—7/15, ite mar 6.

Jogo duto matimo richo miwuoyo kuomgi e ngero mar ng’ano gi ogolo biro ywagore kendo muodo lekegi karang’o? (Math. 13:36, 41, 42)

Gibiro timo kamano e kinde masira maduong’ ka gisefwenyo maler ni ok gibi tony e kethruok mochomogi.—7/15, ite mar 13.

Weche ma Yesu nowacho kuom jatichno mogen kendo mariek nochopo kinde mage? (Math. 24:45-47)

Ne gichako chopo e ndalo mag giko, bang’ higa 1914 to ok e Pentekost 33 E Ndalowa. E higa mar 1919, jatichno ne omi migawo mar rito jood ruodhe, ma en migawo moriwo pidho Jokristo duto madier gi chiemb chuny.—7/15, ite mag 21-23.

En karang’o ma Yesu biro keto jatichno mogen e wi gige duto?

Mano biro timore kinde mabiro, e kinde masira maduong’ sama jatichno mogen yudo pok mare e polo.—7/15, ite mar 25.

Be Muma weyo maok nyiswa nyinge jomoko nikech ne gin joma richo kata joma nono?

Ok onego wabed gi paro machalo kamano. Muma ok nyiswa nyinge jomoko ma notimo gik mabeyo koda ma notimo gik maricho. (Ruth 4:1-3; Math. 26:18) Muma nyisowa mana nyinge ariyo kende mag malaike makare.—8/1, ite mar 10.

Mopogore gi teko maduong’ ma Nyasaye ne miyogi, ang’o machielo ma nokonyo Joneno 230 mondo otiek wuoth ma rabora ma nogologi e kambi mar Sachsenhausen?

Kata obedo ni tuoche gi kech ne hinyo owete gi nyimine ka ne gin e wuodhno, ne gisiko gijiwore ng’ato gi nyawadgi mondo gidhi nyime gi wuoth.—8/15, ite mar 18.

Ang’o momiyo sigana mar kaka Jo Israel nong’ado Aora Jordan ka gidhi e Piny Manosingi en sigana ma jiwowa?

Kata obedo ni aorano ne opong’ chuth, Jehova nochunge mondo joge okadh. Nyakabed ni mano ne ojiwo yie margi ma gimedo geno Jehova, kendo wan bende wechego jiwowa.—9/15, ite mar 16.

Ang’o manenore maler kuom bedo ni Muma siko wuoyo e wi kit rangi mag gik moko?

Kaka Muma tiyo gi kido mag rangi, nyiso ni Nyasaye ong’eyo ni rangi nyalo mulo chuny ji ahinya kendo rangi nyalo konyowa paro gik moko.—10/1, ite mag 14-15.

Weche ma ne okor e Mika 5:5 e wi jokwath koda jotelo madongo chopo nade e kindewagi?

Wang’enyo ni ‘jokwath abiriyo kod jotelo madongo aboro’ miwuoyo kuomgi e Mika 5:5 ochung’ne jodong-kanyakla momi migawo mar jiwo oganda Nyasaye ne monj mabiro timore kinde mabiro.—11/15, ite mar 20

Moko kuom gimomiyo owinjore Nyasaye ota ngimawa gin mage?

Dwarore Nyasaye ota ngimawa mondo wang’e kaka wanyalo nyagore gi chandruoge mayudowa e ngima. Nyasaye ema nyalo miyowa puonj ma konyowa dak e ngima ma nigi mor, kendo obiro chopo singo mage duto mokor e Muma.—12/1, ite mag 4-6.