MUMA wuoyo kuom ji mopogore opogore ma noyiecho lepgi kane gin e chal moko. Tim ma kamano nyalo bwogo joma somo wechego e kindewagi, kata kamano kuom oganda mar Jo-Yahudi, timo kamano ne nyiso ni ng’ato nigi lit mang’eny e chunye nikech kuyo, wich kuot maduong’, ich wang’, kata nikech oywago ng’ate motho.

Kuom ranyisi, Reuben “noyiecho lepe” ka nofwenyo ni ne ok onyal reso owadgi ma Josef nikech noseuse mondo obed misumba. Jakobo wuon-gi bende “noyiecho lepe” kane oparo ni ondiek moro marach osenego Josef wuode. (Chak. 37:18-35) Ayub “noyiecho aroche” kane onyise ni nyithinde duto osenegi. (Ayub 1:18-20) Jaote moro nochopo ir Eli Jadolo Maduong’ ka “nenge oyiech” ka nokelo wach ni oselo Jo-Israel e lweny kendo ni oseneg yawuot Eli ariyo ma jowasigu okawo ark mar Nyasaye. (1 Sam. 4:12-17) Kane Josia owinjo kisomone Chik mofwenyo ni ogandane nosebedo katimo marach e wang’ Jehova, “noyiecho lepe.”—2 Ruo. 22:8-13.

Kane iyalo Yesu, Kaiafa Jadolo Maduong’ “noyiecho lepe” bang’ winjo weche ma Yesu ne wacho ma oparo ni Yesu piem gi Nyasaye. (Math. 26:59-66) Kaluwore gi chik ma jorabi noketo, ng’ato ang’ata ma nowinjo kiluongo nying Nyasaye goyiem, ne nyaka yiech lepe. Kata kamano, chik moro machielo mar jorabi ma ne oket bang’ ka noseketh hekalu mar Jerusalem, ne wacho ni “ng’ato ang’ata mowinjo ka iluongo Nying Maler mar Nyasaye goyiem e ndalowagi, ok onego oyiech lepe, nikech mano ne dhi miyo ng’ato obed gi lewni mang’eny moyiech.”

En adier ni tim mar yiecho law ok ne nyis gimoro amora e wang’ Nyasaye kapo ni ng’atno ok ne nigi kuyo madier. Omiyo, Jehova nonyiso joge ni ‘giyiech chunygi to ok lepgi mondo gilokre ire.’—Joel 2:13.