1. Jehova neno tich nade, to mano osemiyo otimo ang’o?

JEHOVA en Nyasaye mohero tich kendo omor gi gik motimo. (Zab. 135:6; Joh. 5:17) Mondo dhano gi malaike obed mamor gi tich ma gitimo, Jehova osemiyogi tije mabeyo kendo mamorogi. Kuom ranyisi, nomiyo Wuode makayo thuolo mar chuecho kode. (Som Jo Kolosai 1:15, 16.) Muma nyisowa ni kane Yesu pok obiro e piny, ne en gi Nyasaye e polo kotiyo kode kaka “jatich molony.”—Nge. 8:30.

2. Ang’o manyiso ni kinde duto malaike osebedo ka tiyo tije madongo kendo ma morogi?

² Muma oting’o ranyisi mathoth a Chakruok nyaka Fweny manyiso kaka Jehova osebedo ka miyo malaikene tich. Bang’ Adam gi Hawa timo richo mi oriembgi giwuok e Paradiso, Nyasaye ‘noketo jokerubi kod mil ligangla malokore koni gi koni mondo orit yor yadh ngima.’ (Chak. 3:24) Bug Fweny 22:6 wacho ni Jehova nooro “malaikane mondo onyis wasumbnine gik ma nyaka timre machiegni.”

3. Ere kaka Yesu noluwo ranyisi mar Wuon mare?

³ Kane Yesu nie piny, ka en dhano makare notimo tich ma  Jehova nomiye gi mor. Noluwo ranyisi mar Wuon mare kuom miyo jopuonjrene tich moro maduong’. Nomiyo gibedo gi siso gi tich ma ne gidhi timono ka nonyisogi niya: “Adier, adier, awachonu, ng’at ma yie kuoma, tije matimo, en bende notim; kendo notim tije madongo moloyo magi, nikech adhi ka Wuora.” (Joh. 14:12) Konyiso kaka tijno nonego tim mapiyo, nonyisogi kama: “Onego watim tich Jal ma noora, ka pod odiechieng’; otieno biro, ma ng’ato ok nyal tiyoe.”—Joh. 9:4.

4-6. (a) Ang’o momiyo waduoko erokamano ni Noa gi Musa notimo gik ma Jehova nonyisogi? (b) Tije duto ma Nyasaye osebedo ka miyo jotichne chopoga weche mage?

⁴ Kata kapok Yesu obiro e piny, Nyasaye nosegamiyo dhano tije moko mabeyo mondo gitim. Kata obedo ni Adam gi Hawa ne ok otimo tich ma Nyasaye nomiyogi, jomoko to notimo gik ma Nyasaye nochikogi. (Chak. 1:28) Nyasaye nomiyo Noa chik ma achiel kachiel kaka nodhi gero yie ma ne dhi reso ngima dhano ka Ataro obiro. Noa notimo gik moko duto ma Nyasaye nonyise mondo otim. Chike ma noluwogo, e momiyo wangima sani!—Chak. 6:14-16, 22; 2 Pet. 2:5.

⁵ Musa bende ne omi chike ma achiel kachiel manyiso kaka nonego oger tabernakel kendo chano tije jodolo, to noluwo chikego duto. (Wuok 39:32; 40:12-16) Kata mana e kindegi, nitie ber ma wayudo nikech nomakore gi tich ma nomiyeno. Jaote Paulo nolero ni tije mag tabernakel kod tij dolo ne nyiso “gik mabeyo” ma ne dhi biro bang’e.—Hib. 9:1-5, 9; 10:1.

⁶ Tije ma Nyasaye jamiyo jotichne bedoga mopogore opogore kaluwore gi kaka dwache dhi ka chopo. Kata kamano, tije ma gisebedo ka gitimo miyo Jehova duong’ kendo konyo dhano duto ma winje. Mani nenore ayanga e tije ma ne Yesu otimo kapok obiro e piny kendo ka en e piny. (Joh. 4:34; 17:4) E yo machalo kamano, tije momiwa mondo watim e kindegi bende miyo Jehova duong’. (Math. 5:16; som 1 Jo Korintho 15:58.) Ang’o momiyo inyalo wach kamano?

7, 8. (a) Ler ane tije ma omi Jokristo mondo otim e kindegi. (b) Onego wane nade lokruok ma Jehova timo e riwruok mar ogandane?

⁷ En gima iwuoro ni Jehova odhialo dhano morem mondo oti kaachiel kode. (1 Kor. 3:9) Jokristo duto ma konyo e tij gero Ute Chokruok mag Alwora, Ute mag Romo, kod ofise Joneno nigi thuolo makende mar timo tij gedo kaka Noa gi Musa notimo. Bed ni ikonyo loso kuonde mokethore e Ute mag Romo manie alwora ma intiere kata ikonyo e gero ofiswa maduong’ man Warwick, New York, bed mamor gi thuolo ma in-go mar tiyo tijno. (Ne picha manie chak sulani ma pod en mana gima ogor.) En tich maler ma Nyasaye oyiego. Kata kamano, inyalo wachi ni Jokristo duto timo tich moro makende minyalo pim gi tij gedo. Tijni bende itimo mondo omi Jehova duong’ kendo okony dhano duto ma winje. (Tich 13:47-49) Riwruok mar oganda Jehova ema tayo kaka onego oti tijni. Mani nyiso ni ka in gi migawo moro, inyalo loki sa asaya ma teri e migawo machielo.

⁸ Kinde duto, jotich Jehova momakore kode osebedo ka luwo kaka itayogi gi riwruok mar oganda Jehova. (Som Jo Hibrania 13:7, 17.) Samoro ok wanyal ng’eyo gimomiyo onyiswa ni watim migawo moro e yo mopogore gi kaka ne waparo. Kata kamano, wang’eyo kaka en gima ber riwo lwedo lokruoge ma Jehova timo.

9. En ranyisi mane maber ma jodongo ketonwa e kanyakla?

 ⁹ Gombo mar timo dwach Jehova nenorega e yo ma jodongo tayogo kanyakla. (2 Kor. 1:24; 1 Thes. 5:12, 13) Giikore tiyo matek kendo timo lokruok ma dwarore ni otim. Giikore bende timo lokruok mar tiyo gi yore manyien mag lando wach Pinyruodh Nyasaye. Kata obedo ni jomoko ne luor chako lendo ka gitiyo gi simo, lendo e dho wedhe, kata lendo e lela, bang’ temo yorego ne giyudo nyak miwuoro. Kuom ranyisi, jopainia moko ang’wen e piny Jerman notimo chenro mar lendo kuonde mitimoe ohala ma nosekawo kinde kapok olendie. Achiel kuomgi miluongo ni Michael, wacho niya: “Ne pok walendoga kuonde ohala kuom higni mang’eny, omiyo ne waluor. Nyaka bed ni Jehova noneno mano, nikech nokonyowa yudo nyak ma wiwa ok nyal wilgo e okinyi ma ne walendeno. To mano kaka ne wamor ni ne waluwo paro ma nochiw e Tijwa mar Pinyruoth kendo geno Jehova mondo okonywa!” Be iikori lendo kitiyo gi yore moko manyien mag lendo e alwarau?

10. Gin lokruoge mage ma osetim e riwruok mar oganda Jehova kuom higni matin mosekalo?

¹⁰ Nitie kinde ma itimo lokruoge motudore gi ofise magwa. Higni moko matin mosekalo, ofise Joneno moko oseriw mondo oti kanyachiel. Kata obedo ni timo kamano nyalo chuno owete gi nyimine matiyo e ofisego otim lokruoge moko, ber mar timo lokruogego nenorega mapiyo. (Ekl. 7:8) To mano kaka joma riwo lwedo lokruoge ma dhi nyime e kind jotich Jehova bedoga mamor!

11-13. Gin pek mage ma owete gi nyimine moko oseromogo nikech lokruok ma timore e riwruok mar oganda Jehova?

¹¹ Wanyalo puonjore gik mathoth kuom jogo ma ne tiyo e ofise ma noriw mondo oti kanyachiel. Moko kuomgi nosebedo ka tiyo kuom higni pieche e Bethel ma ne gintiere kapok otim lokruogego. Owadwa moro gi chiege ma nosebedo ka tiyo e Bethel moro matin man Central America, ne okwa mondo odhi e Bethel ma Mexico man gi ji ma kwan-gi oloyo Bethel ma ne gintie nyadi 30. Rogelio wacho niya: “Weyo joodwa kod osiepe ne ok en gima yot.” Owadwa machielo miluongo ni Juan, ma bende ne okwa mondo odhi Mexico, nowacho kama: “Chal mana ka gima inyuoli mar ariyo; nyaka ichak imany osiepe mamoko kendo. Nyaka iikri timo lokruok mondo ing’i gi kit ngima jogo kod kaka giparo.”

¹² Jo Bethel moko mawuok e pinje mag Ulaya ma ne okwa mondo odhi oti e Bethel man Jerman, bende noromo gi pek moko. Joma ne ong’iyo gi neno gode mochanore maber manie piny Switzerland, noyudo ka teknegi weyo alwora ma jaber kamano. Owete ma nowuok e Bethel ma Austria, nochako gombo ngima ma ne ging’iyogo e Bethel ma thurgi nikech kuno ne gin mana joma nok.

¹³ Owete gi nyimine madar mondo odhi e Bethel man e piny machielo nyaka tim lokruoge mang’eny. Nyaka gichak ng’iyo gi kuonde dak manyien, tiyo kanyachiel gi owete gi nyimine maok ging’eyo, kendo samoro timo tije Bethel mopogore gi ma ne gitimo chon. Nyaka gichak ng’iyo gi kanyakla manyien, lendo e alwora manyien, kendo samoro tiyo gi dhok ma wendo. Timo lokruoge ma kamago nyalo bedo matek. To ema Jo Bethel mang’eny oyie timo lokruogego! Ang’o momiyo giyie timo kamano?

14, 15. (a) Ere kaka ji mang’eny osenyiso ni gimor tiyo gi Jehova kata bed ni gitiyone kanye? (b) Ere kaka owete gi nyiminego ketonwa ranyisi maber?

¹⁴ Grethel wacho kama: “Ne ayie timo  lokruogego duto mondo anyisgo Jehova ni hera ma aherego oloyo hera ma aherogo piny ma adakie, ot, kata mana migawo moro.” Dayska wacho niya: “Ka naparo ni migawono owuok kuom Jehova, narwako wachno gi ilo.” André gi Gabriela bende oyie gi wachno ka giwacho kama: “Lokruogno nomiyowa thuolo mar keto tenge dwarowa wawegi mondo wati ne Jehova. Ne wawacho kendwa niya, ‘Ka yamo oloko e riwruok mar oganda Jehova, ber kiluwori gi yamono kar ng’ang’ kode.’”

¹⁵ Ka iriwo ofise kanyachiel, jo Bethel moko imiyoga migepe mag bedo jopainia. Mano e gima notimore ne jood Bethel mang’eny kane iriwo ofise mag Denmark, Norway, kod Sweden e bwo ofis man Scandinavia. Moko kuom jo Bethelgo ne gin Florian gi Anja ma nowacho niya: “Waneno migawowa manyienni kaka thuolo makende. Tiyo ne Jehova en gima bernwa maok wadew ni watiyone kanye. Wanyalo wacho gadier ni oguedhwa ahinya!” Kata obedo ni samoro thothwa ok bi timo lokruoge ma kamago e ngimawa, donge ber ka waikore keto dwaro mag Pinyruoth obed mokwongo mana kaka owete gi nyiminego? (Isa. 6:8) Kinde duto, Jehova guedhoga joma mor gi migawo mar tiyone kata bed ni gitiyone kanye.

16. (a) Bug Jo Galatia 6:4 jiwowa nade? (b) En migawo mane maduong’ie mogik ma ng’ato nyalo bedogo?

¹⁶ Dhano morem oheroga pimore gi jomoko. Kata kamano, Wach Nyasaye nyisowa ni waket pachwa kuom gik ma wan wawegi wanyalo timo. (Som Jo Galatia 6:4.) Thothwa ok nigi migepe mag tayo tije moko e riwruogwa. E wi mano, waduto ok wanyal bedo jopainia, jomisonari, kata tiyo e Bethel. En adier ni mago gin migepe mabeyo ndi! Kata kamano, wiwa ok onego owil ni migawo maduong’ie mogik ma dhano nyalo bedogo, en migawo achiel ma waduto wan-go. En migawo mar  tiyo kaachiel gi Jehova e tijwa mar lando wach maber. Mae en migawo monego wamorgo sidang’!

17. En adiera mane ma nyaka wang’e sama pod wadak e piny ma Satan oteloeni, to ang’o momiyo mano ok onego onyos chunywa?

¹⁷ Sama pod wadak e piny ma Satan oteloeni, samoro ok wanyal yudo thuolo mar tiyo ne Jehova kaka dwaher. Seche moko ting’ mag rito joot, tuoche, kata weche mamoko nyalo geng’onwa e yo moro. Kata kamano, mano ok onego onyos chunywa kata matin. Kik icha nyalo ma in-go mar tiyo kaachiel gi Nyasaye kuom chiwo neno e wi nyinge kendo lando Pinyruodhe e thuolo moro amora miyudo. Gima duong’ en ni itimo duto minyalo mondo iti kaachiel gi Jehova, kendo ilemo mondo oguedh owete gi nyimine manyalo bedo ni timo mathoth moloyi. Kik wiyi wil ni Jehova ogeno kendo ohero ahinya ng’ato ang’ata mapako nyinge!

18. En ang’o monego waikre weyo luwo e kindegi, to nikech ang’o?

¹⁸ Kata obedo ni wan dhano morem kendo wan gi nyawo magwa, Jehova pod mor tiyo kodwa. To mano kaka wayil gi thuolo makende ma wan-go mar tiyo kaachiel kode e ndalo gikogi! Omiyo, onego wabed moikore weyo luwo gombo magwa e kindegi, ka wang’eyo ni e piny manyien, Jehova biro miyowa “ngima maradier,” ma en ngima mochwere ka wadak gi mor kod kuwe mogundho.—1 Tim. 6:18, 19.

19. En geno mane majaber ma Jehova osemiyowa e wi kinde mabiro?

¹⁹ Nikech sani piny manyien okayo machiegni, mano paronwa gima Musa nonyiso Jo-Israel kane gichiegni donjo e Piny Manosingi. Nowachonegi kama: “Jehova Nyasachi nomedi kuom tich duto mar lueti.” (Rapar 30:9) Bang’ Har–Magedon, jogo duto mosebedo kodich ka tiyo kaachiel gi Nyasaye biro donjo e piny ma nosingonegi. Kae to, wabiro keto pachwa e tich machielo, ma en tij loso piny duto obed paradiso ma jaber!