GUY HOLLIS PIERCE, ma ne en achiel kuom joma nie Bura Matayo Joneno mag Jehova, notieko wuodhe mar pinyka Tich Ariyo tarik 18, Mach 2014 ka ojahigni 79. Kaka achiel kuom owete Kristo, ne ochiere ma omiye pokne mar dhi e polo.—Hib. 2:10-12; 1 Pet. 3:18.

Ne onyuol Guy Pierce e boma mar Auburn, California e piny Amerka tarik 6 Novemba e higa mar 1934, kendo ne obatise e higa mar 1955. Nokendo Penny jaode e higa mar 1977 ma ginyuolo nyithindo. Nikech noseng’eyo kaka irito joot, mano ne miyo owuoyo gi ji e yo mang’won. E higa mar 1982, en kaachiel gi jaode Penny ne gibedo jopainia kendo e higa mar 1986 nobedo jarit-alwora e piny Amerka kuom higni 11.

E higa mar 1997, Guy Pierce kod jaode Penny ne ogwel e Bethel ma Amerka. Owadwa Pierce ne tiyo e Migawo Mochung’ ne Tij Lendo, to e higa mar 1998 ne oyiere mondo obed jakony Komiti mar Jotich man e bwo Bura Matayo. E romo mar higa ka higa mar Watch Tower Bible and Tract Society of Pennsylvania ma ne otim Oktoba tarik 2, 1999, ne oyiere mondo obed achiel kuom joma nie Bura Matayo. E higni mokalo machiegnigi, osetiyo e komiti ma luwogi: Komiti mar Jotich, Komiti mar Ndiko, Komiti mar Gocho, kod Komiti mar Jocheno.

Joma wuok e ogendini mopogore opogore nohero Owadwa Pierce ahinya nikech nohero buonjo kendo miyo ji nyiero. Kata kamano, kido ma nomiyo ji omedo here moloyo noriwo hera ma noherogo ji, bolruokne, luwo chike kod puonj makare mag Muma, kod bedo gi yie motegno kuom Jehova. Guy Pierce ne jawacho ni wang’ chieng’ nyalo bare ma ok owuok, to singo mag Jehova ok nyal bare kata ang’o matimre, kendo ne en gi siso mar nyiso piny ngima adierano.

Owadwa Pierce ne tiyo ne Jehova ma ok ool kochako tich kogwen nyaka chuny otieno. Nowuotho e piny mangima kojiwo owete gi nyimine ma Jokristo wetene. E wi mano, ne ok otimre ni odich ahinya ma ok onyal wuoyo gi Jood Bethel wetene kaachiel gi jomamoko ma ne dwaro bedo machiegni kode mondo ong’adnegi paro moro kata okonygi e yo moro. Owete gi nyiminego pod nyalo paro kaka ne en ng’at mohero rwako welo, ma yot makogo osiep, kendo ma ne tiyo gi Ndiko kojiwogo ji.

Owadwa kendo osiepwani oweyo chien jaode, nyithindo auchiel, nyikwayo buora, kaachiel gi ndukluhunda mokalo ariyo. E wi mano, joma nopuonjo adiera kod joma ne nene kaka wuon-gi, to ng’eny maok nyal kwan! Twag yik Owadwa Pierce ne ogol e Bethel ma Brooklyn chieng’ Ngeso, Mach 22, 2014, kendo owadwa Mark Sanderson ma be en achiel kuom joma nie Bura Matayo e ma nogolo twagno. Achiel kuom weche ma nowuoye, en geno mar dhi e polo ma Owadwa Pierce ne nigo. Nosomo weche ma Yesu nowachogi: “E dala Wuora nitie udi mang’eny, . . . To ka adhi malosonu kar bet, anabi kendo, eka narwaku ka ma antie; mondo ka ma antie an, un bende ubedie. To ka ma an adhiyee, ung’eyo yo.”—Joh. 14:2-4.

En adier ni wabiro siko ka waparo Owadwa Pierce ndi. To gima morowa en ni ‘nong’eyo yo’ mochomo ka ma ne odhi ‘betie’ nyaka chieng’.