“Rit Tich ma Nomiyi Kuom Ruoth”

“Rit tich ma nomiyi kuom Ruoth, ichope chuth.”​—KOLO. 4:17.

1, 2. Jokristo nigi ting’ mane kuom oganda dhano?

WAN gi ting’ maduong’ ahinya kuom jogo modak e alworawa. Paro ma ging’ado sani biro miyo giyud ngima kata kik giyud ngima, e kinde “sand maduong’no.” (Fwe. 7:14) Kotelne gi much Nyasaye, jandik-bug Ngeche nowacho kama: ‘Res jogo mitero kar tho; kendo ket chunyi kuom geng’o jogo maparo ni gibiro tho.’ Mago weche mapek ndi! Ka ok wakaw ting’ ma wan-go mar siemo ji kuom gik monego gitim, wanyalo bedo gi buch remo. Kuom adier, Ndikono dhi nyime kawacho kama: “Ka diwach ni, Neuru, ne ok wang’eyo wachni: Jalo mapimo chuny ji, ok opare koso? Kendo jal marito chunyi ok ong’eyo ma koso? Kendo ok nochul ni ng’ato ka ng’ato kaka tichne obet koso?” Kuom mano, nenore maler ni jotich Jehova ok nyal wacho ni ok ‘ging’eyo’ masira mochomo ji.​—Nge. 24:11, 12.

² Jehova kawo ngima kaka gima duong’. Ojiwo jotichne mondo otim kinda duto mondo gires ji mang’eny kaka nyalore. Jatich ka jatich mar Nyasaye nyaka land ote mareso ngima, mayudore e Wach Nyasaye. Migawo ma wan-go chalo gi mar jarit makok kochiwo siem seche moneno masira ka biro. Ok wadwar ni remb jogo mibiro kethi obedi e wiwa. (Ezek. 33:1-7) Omiyo, mano kaka en gima dwarore ni mondo wanan ahinya e kinda ma waketo e ‘yalo wach’!​—Som 2 Timotheo 4:1, 2, 5.

3. Gin weche mage mibiro non e sulani, koda e ariyo maluwo?

³ Sulani biro nyisi kaka inyalo loyo gigo manyalo moni tiyo tij reso ngima ji, koda kaka inyalo medo konyo ji mang’eny. Sula maluwo mae biro nyiso kaka inyalo medo lony e puonjo adiera mabeyo. Sula mar adek biro chiwo ripode moko ma jiwowa, ma jolendo mag Pinyruoth osetimo e piny mangima. Kata kamano, kapok wanono sulago, ber ka wanono gimomiyo kinde ma wadakiegi gin kinde makende ahinya.

Gimomiyo Ji Mathoth Onge Geno

4, 5. Dhano yudo chandruoge mage, to thoth ji timo nade?

⁴ Gik matimore e piny nyiso ni wadak e “giko mar ndalo,” kendo ni giko chiegni ahinya. Dhano neno gigo ma Yesu gi jopuonjrene nowacho ni nobed ranyis mar “ndalo mag giko.” “Masiche malit,” moriwo nyaka lwenje, nok mag chiemo, yiengni mag piny, koda mamoko, chando oganda dhano. Timbe kaka ketho chik, herruok ng’ato owuon, kendo luwo paro ma Nyasaye kwedo, ogundho. Magi gin “kinde mag chandruok” kata mana ne jogo matemo dak kaluwo puonj koda chike manie Muma.​—Math. 24:3, 6-8, 12; 2 Timo. 3:1-5.

⁵ Kata kamano, thoth oganda dhano ok ong’eyo ni gik matimore e piny sani nyiso ni wadak e kinde mage. To nikech mano, thothgi nigi parruok kuom ngimagi giwegi koda ngima joodgi. Tho mar joma gihero, kata masiche mayudogi giwegi miyo ji mang’eny  winjo malit. To nikech gionge ng’eyo makare kuom gimomiyo gigo timore koda kama kony nyalo yudoree, gibedo joma onge geno chuth.​—Efes. 2:12.

6. Ang’o momiyo ‘Babulon Maduong’’ ok osekonyo jolupge?

⁶ ‘Babulon Maduong’,’ ma en dinde duto mag miriambo e piny, ok osekelo hoch ne oganda dhano. Mopogore gi mano, kokalo kuom “divai mar terruokne,” osewuondo kendo miyo ji mang’eny ok ong’eyo Nyasaye gadier. E wi mano, kotimre kaka dhako ma jaterruok, din mar miriambo oseywayo kendo chiko “ruodhi mag piny,” kotiyo gi puonj mag miriambo koda timbe juok, mondo omi oganda dhano osiki e bwo sirikande mag pinjegi ma ok gikwedi. Kuom mano, din mar miriambo oseyudo teko mar chiko ji, to bende oseweyo chuth adiera mar Nyasaye.​—Fwe. 17:1, 2, 5; 18:23.

7. En ang’o mabiro yudo thoth dhano, to moko kuomgi inyalo kony nade?

⁷ Yesu nopuonjo ni, thoth dhano wuotho e yo malach madhi e kethruok. (Math. 7:13, 14) Jomoko nie yo malachno nikech giseyiero gin giwegi ni ok gidwar luwo gima Muma puonjo, to jomoko mathoth luwo yorno nikech osewuondgi, kata nikech osewegi e mudho, mondo kik ging’e gima Jehova dwaro kuomgi gadier. Jomoko kuomgi nyalo loko ngimagi kapo ni onyisgi maler gima Ndiko wacho. Kata kamano, jogo ma dong’ ei Babulon Maduong’ kendo ma dhi nyime kwedo puonj gi chike manie Muma, ok noresgi mi gikal “e sand maduong’no.”​—Fwe. 7:14.

Dhi Nyime Lendo ‘Ma Ok Iwe’

8, 9. Jokristo mokwongo notimo nade e bwo akwede, to nikech ang’o?

⁸ Yesu nowacho ni, jopuonjrene ne dhi lando wach maber mar Pinyruoth kendo timo ji obed jopuonjre. (Math. 28:19, 20) Kuom mano, Jokristo madier osebedo ka kawo tij lendo kaka tich ma ginyisogo ni giluoro Nyasaye, kendo kaka tich madwarore ahinya e nyiso yie margi. Omiyo, jolup Yesu mokwongo nonano kata mana e bwo sand. Ne gigeno kuom Jehova mondo omigi teko, ka gikwaye mondo okonygi gidhi nyime “yalo Wachni gi chir chutho.” Kuom mano, Jehova nopong’ogi gi roho maler, kendo ne gihulo wach Nyasaye gi chir.​—Tich 4:18, 29, 31.

⁹ Kane akwede obedo mager, be kinda ma jolup Yesu ne nigo mar lando wach maber nodok chien? Ooyo. Ka jotend din Jo-Yahudi igi nowang’ nikech tij lendo ma joote ne timo, ne gimako jootego, mi gibwogogi,  kendo chwadogi. To ema podi joote ‘ne ok oweyo puonjo kendo yalo ni Yesu en Kristo.’ Ne ging’eyo ni nyaka ‘giwinj Nyasaye moloyo winjo dhano.’​—Tich 5:28, 29, 40-42.

10. Gin chandruoge mage ma Jokristo yudo e kindegi, to ang’o manyalo timore nikech timbegi mabeyo?

¹⁰ Ndalogi, thoth jotich Nyasaye ok osebedo e bwo akwede michwadogie kata bedo e twech nikech tijgi mar lendo. Kata kamano, Jokristo madier duto yudo chandruoge gi tembe mopogore opogore. Kuom ranyisi, chunyi mosetieg gi Muma nyalo miyo iluw tim moro ma ji mang’eny ok ohero, kata mondo itim gima miyo ibedo mopogore gi jomoko. Jotich weteni, joma isomogo, kata joma odak e alworau nyalo paro ni in ng’ama galagala, nikech paro ming’ado otenore kuom puonj koda chike manie Muma. Kata kamano, paro ma ok owinjore ma gin-go, ok onego omoni dhi nyime. Piny nie mudho kodok korka Wach Nyasaye, to Jokristo nyaka ‘rieny kaka sulue.’ (Fili. 2:15) Nyalo bedo ni jomoko ma chunygi ni kare biro neno kendo hero timbeni mabeyo, mi gimi Jehova duong’ nikech mano.​—Som Mathayo 5:16.

11.(a) Jomoko nyalo timo nade kilendonegi? (b) Jaote Paulo noyudo akwede mage, to notimo nade?

¹¹ Chir dwarore mondo omi wadhi nyime lando ote mar Pinyruoth. Jomoko, kata mana wede, nyalo jari kata temo nyoso chunyi e yo moro. (Math. 10:36) Ne ochwad jaote Paulo nyading’eny nikech ne omakre gi tije mar lendo. Ne ane gima nowacho kuom akwedego: “Yande waseneno masira, kendo otimnwa malit . . . ne watimo chir kuom Nyasachwa mondo wahulnu Wach Maber mar Nyasaye, ka wan e lweny mager.” (1 Thes. 2:2) Kuom adier, ne ok yot ne Paulo dhi nyime gi lando wach maber bang’ kane osemake, molonye, mochwade gi del, kendo obole e jela. (Tich 16:19-24) Ang’o ma nokonye medo nyiso chir? En nikech gombo maduong’ ma ne en-go mar tiyo tich ma Nyasaye nomiye mar lendo.​—1 Kor. 9:16.

12, 13. Gin chandruoge mage ma jomoko yudo, to gisetemo loyogi nade?

¹² Wan bende nyalo bedonwa matek nyiso kinda e gwenge ma ji ok hiny yudore pacho, kata kuonde ma ji mang’eny ok rwak ote mar Pinyruoth. Ang’o ma wanyalo timo kuonde kaka mago? Wanyalo yudo ni dwarore wamed nyiso chir moloyo mondo omi wamany yore mag lendo ne ji ka watiyo gi rieko mamoko. Bende nyalo dwarore walok sechewa mag lendo, kata temo ahinya lendo e gwenge ma wanyalo yudoe ji mang’eny moloyo.​—Pim gi Johana 4:7-15; Tich 16:13; 17:17.

¹³ Chandruoge moko ma jolendo mathoth yudo gin kaka ti, koda tuoche, ma gin gik ma monogi timo tij lendo kaka gidwaro. Ka mano e chal mari, kik chunyi nyosre. Jehova ong’eyo maber midekre ma in-go, kendo  omor gi gik minyalo timo. (Som 2 Jo Korintho 8:12.) Kuom chandruok moro amora minyalo bedogo, kaka akwede, romo gi joma ok rwak wach, kata midekre​—tim duto kar nyalo mari mondo iland wach maber ne jomoko.​—Nge. 3:27; pim gi Mariko 12:41-44.

“Rit Tich Ma Nomiyi”

14. En ranyisi mane ma jaote Paulo noketo ne Jokristo wetene, kendo nojiwo wach mane?

¹⁴ Jaote Paulo ne timo kinda ahinya e tije mar lendo, kendo ne ojiwo Jokristo wetene mondo otim kamano. (Tich 20:20, 21; 1 Kor. 11:1) Achiel kuom Jokristo mokwongo ma Paulo nojiwo e yo makende ne en jal miluongo ni Arkippo. E barupe ne Jo Kolosai, Paulo nondiko kama: “Wach ni Arkippo ni, ‘Rit tich ma nomiyi kuom Ruoth, ichope chuth.’” (Kol. 4:17) Ok wang’eyo ni Arkippo ne en ng’a, kata ni ngimane ne chalo nade, kata kamano wang’eyo ni ne oyie tiyo tij lendo. Ka in Jakristo mosechiwore ne Nyasaye, in bende iseyie tiyo tij lendo. Be idhi nyime rito tij lendo mondo omi ichope chuth?

15. Chiwruok ma Jakristo timo tiende ang’o, to gin penjo mage ma ng’ato onego openjre?

¹⁵ Kane pok obatiswa, ne wawuoyo gi Jehova e lamo matut, ka wachiwone ngimawa duto. Mano nonyiso ni ne wadwaro timo dwache. Omiyo, ber ka sani wapenjore ng’ato ka ng’ato niya, ‘Be kuom adier, timo dwaro mar Nyasaye e gima pod duong’ e ngimana?’ Wanyalo bedo gi ting’ mopogore opogore ma Jehova dwaro ni mondo wachop, machalo kaka mar rito joodwa. (1 Timo. 5:8) Kata kamano, watiyo nade gi teko koda kinde modong’? Ang’o ma waketo mokwongo e ngimawa?​—Som 2 Jo Korintho 5:14, 15.

16, 17. Gin thuolo mage ma rowere ma Jokristo kata jogo ma ok nigi ting’ mangeny nyalo keto e paro?

¹⁶ Be in Jakristo ma rawera mosetieko kata machiegni tieko skul? Nyalo bedo ni podi ok in gi ting’ mang’eny mag rito ot. Kuom mano, ang’o michano timo gi ngimani? Gin ang’o mibiro yiero timo mondo omi ichop singruok mari mar timo dwach Jehova? Thoth rowere oseloso chenro mondo omi gibed jo painia, kendo giseyudo chuny mokuwe koda mor gi ilo mogundho.​—Zab. 110:3; Ekle. 12:1.

¹⁷ Nyalo bedo ni isebedo rawera maduong’ moromo. Kendo ondiki tich makawo thuoloni ahinya, to ionge ting’ mang’eny mak mana rito ngimani iwuon. Onge kiawa ni imor tiyo tije mag kanyakla kaluwore gi thuolo ma in-go. Be inyalo miyo ilo gi mor ma in-go omedre moloyo? Be iseparoe medo timo mang’eny e tij lendo? (Zab. 34:8; Nge. 10:22) E gwenge moko, pod tij lendo dwarore ahinya mondo omi ochop ne ji duto gi wach mar adiera machiwo ngima. Be inyalo timo lokruok e ngimani, mondo idhi ilend kamoro ma jolendo mag Pinyruoth dwarore moloyo?​—Som 1 Timotheo 6:6-8.

18. Gin lokruok mage ma dichwo gi dhako moro notimo, to gin ber mage ma nobedoe?

¹⁸ Par ane ranyisi mar Kevin kod Elena, modak Amerka. * Mana kaka joma oa riwo arus ne jotimo e gweng’gi, gin bende ne gineno ni nyaka ging’iew ot. Giduto ne ondikgi tich, omiyo ne ginyalo dak e ngima maber. Kata kamano, chenro margi mar tich koda tijegi mag ot ne weyonegi mana thuolo matin mar lendo. Ne ginwang’o ni ne  gitiyo gi thuolo koda tekogi duto e rito gik ma gin-go. Kata kamano, kane gineno kaka dichwo gi dhako moro ma jopainia nodak mamor e ngima mayot, Kevin kod Elena noyiero mondo gilok pachgi kuom gik ma ne giketo mokwongo e ngimagi. Bang’ kwayo Jehova kony e lamo, ne giuso odgi mi gidhi dak e od apanga. Elena noyiero tiyo tij andika kuom seche manok, mondo obed painia. Bang’ neno mor ma chiege ne yudo e tij lendo, Kevin noweyo tije mar andika, mochako tij painia. Bang’ kinde, ne gidar mi gidhi e piny moro man Amerka ma Milambo mondo giti kama joland wach Pinyruoth ne dwarore ahinya. Kevin wacho kama: “Kinde duto ne wan gi mor e kindwa, to kane wachako timo mang’eny e tij Nyasaye, morwa nomedore e okang’ mamalo.”​—Som Mathayo 6:19-22.

19, 20. Ang’o momiyo lando wach maber e tich maduong’ie moloyo sani?

¹⁹ Tij lando wach maber e tich maduong’ie moloyo e piny sani. (Fwe. 14:6, 7) En tich mapuodho nying’ Nyasaye Yehova mondo obed maler. (Math. 6:9) Ote manie Muma medo konyo ji gana mang’eny marwako wach higa ka higa, kendo mano nyalo miyo owar ngimagi. Jaote Paulo nopenjo ni, “To . . . digiwinj nadi ka onge jayal wach?” (Rumi 10:14, 15) Kuom adier, digiwinj nade? Ang’o mamoni timo duto minyalo mondo omi ichop tiji mar lendo?

²⁰ Yo machielo minyalo konyogo ji mondo ong’e ni kinde ma wadakiegi gin kinde makende, kendo mondo ging’e gigo ma paro ma ging’ado biro kelonegi, en medo lony e yo mipuonjogo. Kaka inyalo timo mae ibiro wuoyoe e sula maluwe.

[Weche moler piny]

Inyalo Dwoko Nade?

• En ting’ mane ma Jokristo nigo kuom oganda dhano?

• Wanyalo nyagore nade gi gik manyalo monowa tiyo tijwa mar lendo?

• Wanyalo chopo nade tij lendo mosemiwa?

[Penjo mag Puonjruok]

[Picha manie ite mar 9]

Chir dwarore mondo omi walend e bwo akwede

[Picha manie ite mar 10]

Ang’o minyalo timo kapo ni ilendo e gwenge ma ji ok yudore e pacho?