Piny Chiegni Bedo Paradis!

“Wuonwa manie polo, nyingi mondo obed maler, pinyruodhi mondo obi, gi midwaro mondo otimre e piny kaka e polo.”​—Mathayo 6:9, 10.

LAMO mong’ere ahinyani, ma ji mathoth luongo ni Lamo mar Ruoth, chiwo geno ne dhano. E yo mane?

Mana kaka Lamo mar Ruoth nyiso, Pinyruodh Nyasaye biro miyo dwaro mar Nyasaye otimre e piny chuth, mana kaka gadier sani otimore e polo. Kendo dwaro mar Nyasaye en ni mondo olok piny obed Paradis. (Fweny 21:1-5) Kata kamano, Pinyruodh Nyasaye en ang’o kuom adier, to ere kaka obiro loko piny mondo obed Paradis?

Sirkal Madier

Pinyruodh Nyasaye en sirkal madier. Mondo omi sirkal moro amora oti maber, dwarore ni obed gi joloch, chike, koda joma nie bwo loch sirkandno. Be Pinyruodh Nyasaye chal kamano? Ne ane dwoko ma Muma chiwo kuom penjo adek maluwogi:

Ng’a gini ma gin joloch mag Pinyruodh Nyasaye? (Isaiah 33:22) Jehova Nyasaye oseketo Yesu Kristo Wuode, mondo oloch e Pinyruodhno. (Mathayo 28:18) Koluwo kaka Jehova chike, Yesu oseyiero kwan matin mar ji mawuok “e ogendini duto, gi dhok duto, gi dhoudi duto gi pinje duto” mabiro locho kode ka gin “gi loch e piny.”​—Fweny 5:9, 10.

Gin chike mage ma Pinyruodh Nyasaye oseketo ma jogo manie bwoye onego oluw? Moko kuom chikego dwaro ni ji okaw okang’. Yesu ne olero chik maduong’ moloyo kuom chikego, kowacho kama: “‘Her Ruoth Nyasachi gi iyi duto, kendo gi chunyi duto, kendo gi riekoni duto.’ Ma e chik maduong’ kendo mokwongo. Mar ariyo machalo kode en ma: ‘Her wadu kaka iherori iwuon.’”​—Mathayo 22:37-39.

Chike moko to dwaro ni jogo manie bwo loch Pinyruodh Nyasaye, kik otim timbe moko. Kuom ranyisi, Muma wacho ratiro kama: “Koso ok ung’eyo ni jo ma ok kare ok nocham gikeni mag pinyruodh Nyasaye? Kik uwuondru; jochode, kata jolam nyiseche manono, kata jo ma terore, kata chwo ma terore gi chwo, kata jokuo, kata jogombo, kata jomer, kata joyenyo, kata jomecho, ok ginicham gikeni mar pinyruodh Nyasaye.”​—1 Jo Korintho 6:9, 10.

Jogo manie bwo loch Pinyruodh Nyasaye gin jomage? Yesu nowacho ni, jogo manie bwo loch Pinyruodh Nyasaye chalo gi rombe. Nowacho kama: “Dwonda giniwinji; to nobedie kueth achiel, gi jakwath achiel.” (Johana 10:16) Mondo ng’ato obed e bwo loch Pinyruodh Nyasaye, ok onego owach awacha ni oluwo Jakwath Maber ma en Yesu, to nyaka otim gino ma Yesu chiko. Yesu nowacho kama: “Ok ni ji duto ma luonga ni, ‘Ruoth, Ruoth,’ e ma nodonji e pinyruodh polo; to mana ng’atno ma timo  gi ma Wuora me polo dwaro.”​—Mathayo 7:21.

Omiyo, jogo manie bwo loch Pinyruodh Nyasaye tiyo gi nyinge, ma en Jehova, kendo gimiyo nying’no duong’, mana kaka Yesu ne timo. (Johana 17:26) Giluwo wach ma Yesu nochiko ni mondo gipuonj jomoko ‘wach maber mar pinyruoth.’ (Mathayo 24:14; 28:19, 20) Kendo ginyiso hera madier e kindgi ng’ato gi ng’ato.​—Johana 13:35.

‘Ketho Joma Ketho Piny’

Gik matimore e piny sani nyiso ni Pinyruodh Nyasaye chiegni kawo okang’ mar kelo lokruok madongo e piny. Ere kaka wang’eyo mano? Higini aluf ariyo mokalo, Yesu nolero wach ranyisi moro, mawuoyo kuom gik mopogore opogore ma ne dhi nyiso ni “pinyruodh Nyasaye chiegni.” (Luka 21:31) Mana kaka osenyis e sula motelo, gik mowach e ranyisino, sani nenore maler e piny mangima.

Ang’o maluwo bang’ mano? Yesu dwoko kama: “Masira maduong’ nobedie, ma pok nobedoe nyaka a chakruok piny nyaka chil kawuono, kendo ok nochak obedie ngang’.” (Mathayo 24:21) Masirano ok nobed ma dhano ema okelo. Kar mano, Nyasaye ema biro kawo okang’ mar ‘ketho joma ketho piny.’ (Fweny 11:18) Jomaricho, ma osebedo kaketho piny ma wadakieni nikech timbegi mag wuoro, ‘nogol oko e piny.’ To joma kare matiyo ne Nyasaye e yo modwaro, “nodong’” e piny.​—Ngeche 2:21, 22.

Jehova Nyasaye nigi ratiro chuth mar kawo okang’ makamano. Nikech ang’o? Kaw ane kuom ranyisi: In gi udi ma ji opango. Jomoko kuomgi timbegi beyo, gichudo e yo mowinjore kendo girito utego e yo maber. To jomamoko kuomgi chendo; ok gichud, kendo giketho ute ma gidakie. Kata obedo ni isemiyogi siem nyadinwoya, podi gidhi nyime gi timbegi maricho. En okang’ mane ma inyalo kawo? Kaka wuon ot, kuom adier ibiro riembo joma richogo.

Kamano bende, Jehova Nyasaye ma en Jachwech mar piny koda gik moko duto manie iye, nigi ratiro mar yiero jogo mobiro yienegi dong’ e pinyni. (Fweny 4:11) Jehova osenyiso ni dwaro ma en-go en, golo oko jomaricho ma ok dew dwache, kendo machando jomoko.​—Zaburi 37:9-11.

Piny Bedo Paradis

E kinde mokayo machiegni, Pinyruodh Nyasaye e lwet Yesu Kristo, biro locho e wi piny. Yesu noluongo chenro manyienni ni, “chuech manyien.” (Mathayo 19:28) Ngima biro chalo nade? Ne ane weche maluwogi ma Muma koro:

Zaburi 46:9. ‘Omiyo lwenje rumo nyaka giko piny.’

Isaiah 35:1. “Thim kod piny mowe nomor; mi gweng’ motuwo ma onge gi moro motwi noil, mi maua kaka ondanyo nobedie.”

Isaiah 65:21-23. “Jogo moyiedho nomor gi tich luetegi ndalo mang’eny. Ni mar ok giniti nono, kata nyuolo nyithindo matho gi tho muorruok.”

Johana 5:28, 29. “Ndalo biro ma ji duto manie liete nowinj dwonde [Yesu], kendo giniwuog oko.”

Fweny 21:4. “Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie.”

Gik Mamiyo Waketo Yie Kuom Singogo

Be in gi yie ni singo mag Muma biro chopo? Muma nokoro ni ji mang’eny ok ne dhi yie. Owacho kama: “E ndalo giko jong’a  wach nobi . . . ka giluwo gombogi giwegi, ka giwacho niya: ‘Ere singruok mar birone? Nikech nyaka ne nindo ter kwere, gik moko duto ochwere kaka ne gibet nyaka a chakruok mar chuech piny.’” (2 Petro 3:3, 4) Kata kamano jong’a wachgo ok nikare kata matin. Non ane gik moko ang’wen manyalo miyo iyie gi gik ma Muma wacho:

(1) E kinde mokalo, Nyasaye osekawo okang’ mar ketho jomaricho. Ataro mar kinde Noa en ranyisi mong’ere ahinya.​—2 Petro 3:5-7.

(2) Wach Nyasaye nokoro ratiro gik ma sani timore e piny mangima.

(3) Gik moko duto ok “ochwere kaka ne gibet nyaka a chakruok.” Mopogore gi kinde moro amora mosekalo, piny mwadakieni kethore e yore mang’eny, kendo kethruokgo oriwo ngima dhano koda timbegi, kaachiel gi kethruok mar pinywani.

(4) ‘Wach maber mar Pinyruodh Nyasaye’ ilando e piny mangima, kendo tijni bedo kaka ranyis ni ‘giko biro’ machiegni.​—Mathayo 24:14.

Joneno mag Jehova gweli mondo ipuonjri kodgi Wach Nyasaye ma en Muma, mondo omi ing’e weche momedore kuom geno mar ngima mochwere e bwo loch mar Pinyruodh Nyasaye. (Johana 17:3) Ee, ngima maber miwuoro orito dhano. Kinde maberie moloyo, okayo machiegni! Be inibedie e kinde maberno?

[Weche manie ite 7]

Jogo mawacho ni gik moko duto biro chwere mana kaka gisebedo kinde duto, ok nikare kata matin

[Picha manie ite 8]

Be inibedie e kinde maberno?