Be Ing’eyo Wuoru me Polo?

ING’EYO wuoru e okang’ maromo nade? Penjoni nyalo buogi matin kapo ni ne idongo e ot ma hera ogundhoe. Inyalo dwoko ni, ‘Donge ang’eyo wuora maber!’ En adier ni ji mathoth ong’eyo gigo ma wuonegi ohero koda ma ok gihero, kaka wuonegi jotimo e chal mopogore opogore, kendo kaka girito joodgi.

Kata kamano, nyalo bedo ni nitie kinde moko ma ne ibwok bang’ neno wuoru kanyiso kido moro ma ok ning’eyo kuome. Kuom ranyisi, wuowi nyalo bedo ni ong’eyo wuon mare kaka ng’at mamuol kendo ma jaling’​—nyaka chop kama wach moro okethore. Mapiyo nono, oneno kaka wuon mare kawo okang’ motegno e rito joode kik hinyre.

To nade kuom Jachwechwa? Ndiko wachonwa kuome kama: “Kuom en wangima, kendo wawuotho, kendo wantie.” (Tich 17:28) Waduto ngimawa wuok kuom Nyasaye; omiyo en e Wuoro mar ji duto mangima. (Isaiah 64:8) Nyalo bedo ni in bende ineno Nyasaye kamano, to mano en gima ber kendo mowinjore. Kata kamano, nitie gik mamoko mathoth monego wapuonjore kendo wang’e kuome, to timo kamano biro konyowa kendo kelonwa mor.

Okang’ mihero godo wuoru me piny koda kaka imiye luor, otudore ahinya gi kaka ing’eye maber. Kamano bende, kaka imedo ng’eyo Nyasaye, e kaka winjruok e kindi kode, biro medo bedo maber. Nyasaye nyalo konyi nyagruok gi tembe koda chandruok manie ngima, ka ing’eye maber kendo ipuonjri timo dwache.

Nyasaye en ng’at machalo nade? Kido ma en-go onego omi inene e yo mane? Be ng’eyo Nyasaye miyo ibedo gi ting’ moko? Ibiro yudo dwoko mag penjogi e sula maluwo.

[Weche manie ite 3]

Okang’ mihero godo jomoko, otudore ahinya gi kaka ing’eyogi maber