Yie En Ang’o?

KA NG’ATO openji ni yie en ang’o, inyalo dwoko nade? Jomoko wacho ni yie en rwako kendo yie ayiea gi puonj moro ma kata ng’ato ok openjore gimomiyo oyie kamano. Jandiko moro mong’ere ahinya e piny Amerka, H. L. Mencken, kinde moro nowacho ni yie en ‘paro maok kare ni gima ok nyalre, nyalo timore.’

Muma to chiwo paro mopogore gi mano, nimar owacho ni yie ok en gima ng’ato rwako arwaka maok oparo e yo makare. Wach Nyasaye wacho kama: ‘Yie en bedo gi adiera e chuny kuom gi mikiyo, kendo en bedo ma onge kiawa kuom gik ma ok ne.’—Jo Hibrania 11:1.

To nikech nitie paro mopogore opogore kuom wach yie, we wanon ane dwoko mag penjo maluwogi:

• Gima Muma wacho kuom yie, opogore nade gi kaka ji mang’eny paro?

• Ang’o momiyo dwarore ahinya mondo wanyag yie kaka mano ma Muma lero?

• Ere kaka inyalo gero yie motegno?

Yie En Kaka Title Deed Manyiso Adier Chuth

E kinde ma ne indiko bug Jo Hibrania ei Muma, wach ma ne oloki kowuok e dho-Grik ni ‘bedo gi adiera e chuny kuom gik mikiyo,’ ne en wach mitiyogo ahinya kindego. Pile ne itiyo kod wachno ka ji ndikore e weche mag ohala, kendo ne onyiso ni kuom adier ni ng’ato ne dhi bedo wuon gimoro e kinde mabiro. Kuom mano, buk moro malero tiend weche temo nyiso ni Jo Hibrania 11:1 inyalo loki kama: “Yie en kaka bedo gi title-deed kuom gik migeno.”

Kapo ni iseng’iewo gimoro molos e kambi moro, ma irito mondo kambino okelni gino, nyaka bed ni isenyiso yie machalo gi bedo gi title deed. Risit ma ne gimiyino, nomiyo ibedo gi yie kuom kambino. Wanyalo wacho ni risidno ne en kaka title deed, mamiyo ibedo gadier chuth maonge kiawa ni ibiro yudo gima ne ing’iewono. Kapo ni risidno ne olalni kata ne iwite, ne inyalo lalo gima nyiso ratiro ni in e wuon gima ne ing’iewono. Kamano bende, jogo ma nigi yie ni Nyasaye biro chopo gigo ma nosingo, nigi yie madier chuth mar yudo gik ma gigeno. To e yo machielo, jogo maonge gi yie, kata ma olalo yiegi, ok nigi ratiro mar yudo gigo ma Nyasaye osingo.—Jakobo 1:⁠5-8.

Wach machielo mitiyogo e Jo Hibrania 11:⁠1, moloki ni “bedo ma onge kiawa,” en wach manyiso bedo gi paro madier mopogore gi kaka ji neno gik moko gi oko. Kuom ranyisi, nenore ka gima wang’ chieng’ ema lworo pinywani—kowuok yo ugwe, kokalo e wi lwasi, kodhi podho yo yimbo. Kata kamano, josayans osefwenyo ni pinywani ema lworo wang’ chieng’. Bang’ ng’eyo kamano kendo yie ni en adier, ibedo gi yie ni pinywani ema lworo wang’chieng’—ma ok idewo ni wang’i to nyisi nade. Yie ma in-go kuom wachni, ok en yie ayiea maok iparo. Mopogore gi mano, en yie makonyi neno gik moko kaka gin gadier, to ok mana kaka ginenre gi oko.

Yie Motegno En Gima Dwarore Nikech Ang’o?

Mani e kit yie ma Muma jiwowa ni onego wabedgo—yie motegno motenore kuom gik ma gin adier chuth, kata kapo ni mano nyalo dwaro ni walok kaka wasebedo ka waparo. Yie machalo kamano en gima dwarore ahinya. Jaote Paulo nondiko kama: “Ng’at ma onge yie ok nyal bet malong’o ni Nyasaye; nikech ng’at ma sudo ir Nyasaye nyaka obed gi yie ni Nyasaye nitie, kendo ni en gi mich momiyo jogo ma dware.”—Jo Hibrania 11:6.

To kata kamano, nitie gik mang’eny manyalo monowa bedo gi yie motegno. To ka ikawo okang’ ang’wen miwuoyo kuomgi e ite maluwo, inyalo gero yie motegno.